ក្រុមពលរដ្ឋមានជម្លោះដីធ្លីចំនួន ១២នាក់ នៅខេត្តកោះកុង ដែលជាប់បណ្ដឹងពីបទញុះញង់បង្កឲ្យមានភាពវឹកវរធ្ងន់ធ្ងរដល់សង្គម នាំគ្នាចូលទៅបង្ហាញខ្លួន នៅអធិការដ្ឋាននគរបាលស្រុកស្រែអំបិល បន្ទាប់ពីសាលាដំបូងខេត្តនេះ ដាក់ពួកគាត់ឲ្យស្ថិតក្រោមការត្រួតពិនិត្យតាមផ្លូវតុលាការ កាលពីកន្លះខែមុន។ ពួកគេទាមទារឲ្យតុលាការទម្លាក់ចោលបទចោទនេះ និងបញ្ឈប់ការប្រើប្រាស់យន្តការតុលាការធ្វើទុក្ខបុកម្នេញ លើពលរដ្ឋមានជម្លោះដីធ្លីតទៅទៀត។
ក្រុមពលរដ្ឋមានជម្លោះដីធ្លី ២ក្រុម គឺក្រុម ១៩៧គ្រួសារនៃឃុំជីខលើ និងក្រុម ១៧៥គ្រួសារ នៃឃុំជីខក្រោម ទទូចឲ្យតុលាការបញ្ឈប់ការចោទប្រកាន់មិនសមហេតុផលមកលើពួកគាត់ ព្រោះវាជាការគំរាមកំហែង និងធ្វើបាបពលរដ្ឋក្រីក្រ ដែលមានជម្លោះដីធ្លីជាមួយក្រុមហ៊ុនមានអំណាច។
តំណាងសហគមន៍ក្រុម ១៧៩គ្រួសារ នៃភូមិតានី ឃុំជីខលើ លោកស្រី ដេត ហ៊ួរ ឲ្យដឹងថា ក្រុមលោកស្រី មានគ្នា ១០នាក់ ចូលបង្ហាញខ្លួន និងផ្ដិតមេដៃ នៅលើឈ្មោះរបស់ខ្លួនរៀងៗ ខ្លួន រួចរាល់ហើយ នៅព្រឹកថ្ងៃទី៧ ធ្នូ នៅអធិការដ្ឋាននគរបាលស្រុកស្រែអំបិល។ លោកស្រីប្រាប់ថា ប៉ូលិសបានហាម ក្រុមលោកស្រីមិនឲ្យថតរូប ក្នុងពេលបង្ហាញខ្លួននោះទេ តែពលរដ្ឋនាំគ្នាជម្នះ ព្រោះសំអាងថា ការថតដើម្បីទុកជាភស្តុតាងឲ្យតុលាការមើល។
លោកស្រីបន្តថា ពលរដ្ឋក្នុងសហគមន៍ប្រហែល ៦០នាក់ នាំគ្នាទៅឃ្លាំមើលការបង្ហាញខ្លួនរបស់តំណាងមួយខែម្ដង។ ទោះបីជាយ៉ាងណា លោកស្រីមិនពេញចិត្ត ចំពោះការសម្រេចចោទប្រកាន់នេះទាល់តែសោះ ដោយសារនេះជារឿងអយុត្តិធម៌។ លោកស្រី ទាមទារ ឲ្យតុលាការខេត្តកោះកុង ទម្លាក់ចោលការចោទប្រកាន់ទាំងស្រុង លើតំណាងសហគមន៍ទាំងអស់ ព្រោះពួកគាត់ គឺជាអ្នកបាត់បង់ដី មិនមែនជាអ្នកដើរបង្កភាពវឹកវរដល់សង្គមទេ។
តំណាងសហគមន៍រូបនេះ ចោទអាជ្ញាធរ ប្រើប្រាស់ប្រព័ន្ធតុលាការ ដាក់សម្ពាធលើអ្នកភូមិ ដើម្បីគំរាមមិនឲ្យចេញតវ៉ារឿងដីធ្លី។ យ៉ាងណាក្ដី ក្រុមសហគមន៍ នឹងបន្តការតវ៉ា ទាមទារដីធ្លីបន្តទៀត នៅក្រោយពេលបញ្ចប់ព្រឹត្តិការណ៍ឆ្លងជំងឺកូវីដ១៩ (Covid-19) ដោយមិនតក់ស្លុតចំពោះការដាក់ សម្ពាធតាមផ្នែកតុលាការទេ៖ «យើងទៅភ្នំពេញ អត់មានបំណងបង្កភាពវឹកវរទេ ព្រោះដោយសារពួកយើងបាត់បងដីធ្លី។ ចុះបើពួកយើងបាត់ដីធ្លី តើឲ្យយើងទៅធ្វើយ៉ាងមិចវិញ ឲ្យទៅទាមទារនៅឯណាវិញ។ បើប្រជាពលរដ្ឋយើង ធ្លាក់ខ្លួនក្រយើងចង់ទៅរកសម្ដេច រកយុត្តិធម៌ពីថ្នាក់ក្រោមដល់ថ្នាក់ជាតិដើម្បីឲ្យដោះស្រាយឲ្យកូនចៅ ព្រោះរដ្ឋាភិបាលអ្នកដឹកនាំ។ ប្រជាពលរដ្ឋយើងខ្វះខាត បាត់បងដីត្រូវតែទៅរកពួកគាត់។ ពួកគាត់ដាក់បទចោទពួកខ្ញុំអ៊ីចឹង អយុត្តិធម៌ណាស់ ហើយក៏អត់សប្បាយចិត្តដែរ»។
ចំណែកតំណាងពលរដ្ឋសហគមន៍ក្រុម ១៧៥គ្រួសារ នៅភូមិព្រែកជីក ឃុំជីខក្រោម ចំនួន ២នាក់ គឺលោកស្រី ផាវ ញ៉ើង និង លោកស្រី សេង លីន ក៏អះអាងថា បានបង្ហាញខ្លួន រួចរាល់ហើយដែរ នៅថ្ងៃជាមួយគ្នានេះ។
លោកស្រី ផាវ ញ៉ើង ប្រាប់ថា ខាងប៉ូលិសស្រុក បង្ហាញឆន្ទៈហាក់មិនឲ្យលោកស្រីបង្ហាញខ្លួនទេ ដោយសំអាងថា មិនទាន់ដល់ថ្ងៃកំណត់។ តែទោះយ៉ាងណាក៏ដោយ ក៏លោកស្រីបញ្ជាក់ថា ខាងតុលាការបានកំណត់ឲ្យលោកស្រីបង្ហាញខ្លួនមួយខែម្ដង នៅអធិការដ្ឋានស្រុក ទើបក្រុមលោកស្រីនាំគ្នាទៅបង្ហាញខ្លួន។
តំណាងសហគមន៍ជម្លោះដីធ្លីរូបនេះ ក៏ចង់ឲ្យតុលាការទម្លាក់ចោលបទចោទ ញុះញង់ ប្រឆាំងលោកស្រីដែរ ដោយអះអាងថា ជាការដាក់សម្ពាធតាមផ្លូវតុលាការ ប្រឆាំងនឹងលោកស្រី។ លោកស្រីនឹងបន្តនាំគ្នាចេញតវ៉ាដដែល ដរាបណាអាជ្ញាធរមិនព្រមផ្ដល់ដំណោះស្រាយដីធ្លីឲ្យពលរដ្ឋ៖ «លោក អ៊ុន សុវណ្ណធានី គាត់បានប្រកាសថា ជនពីរនាក់ត្រូវបានឃាត់ខ្លួន សុំឲ្យចៅក្រមឃុំខ្លួនបណ្ដោះអាសន្ន កុំឲ្យដើររញ៉េរញ៉ៃអីដល់សង្គម។ អ៊ីចឹង ! ពាក្យខ្ញុំឈឺចាប់ខ្លាំងណាស់។ ខ្ញុំរញ៉េរញ៉ៃរឿងអី រដ្ឋាភិបាលអត់បានដោះស្រាយដីធ្លី ផ្ទះខ្ញុំ ហើយយកទៅឲ្យ ហេង ហ៊ុយ។ ពេលខ្ញុំចេញទៅតវ៉ា ចោទប្រកាន់ថាខ្ញុំបង្កភាពវឹកវរដល់សង្គមជាតិ។ សួរថាព្រះរាជអាជ្ញាលោកបានពិនិត្យលើរឿងហ្នឹងអត់ បានគាត់អត់ឲ្យឆ្លើយរឿងអីសោះ ឲ្យឆ្លើយតែរឿងព្រហ្មទណ្ឌ។ រឿងទាំងអស់ហ្នឹង វាពាក់ព័ន្ធរឿងដីធ្លីរបស់ពួកខ្ញុំ។ ហេតុអ្វីអត់ឲ្យយើងនិយាយរឿងដីធ្លី ឲ្យឆ្លើយតែរឿងព្រហ្មទណ្ឌ»។
កាលពីពាក់កណ្ដាលខែវិច្ឆិកា ចៅក្រមស៊ើបសួរ នៃសាលាដំបូងខេត្តកោះកុង លោក ឡោ ក្រឹម បានសម្រេចឲ្យ តំណាងក្រុមសហគមន៍មានជម្លោះដីធ្លី ២ក្រុម មានគ្នា ១២នាក់ ស្ថិតក្រោមការត្រួតពិនិត្យតាមផ្លូវតុលាការ ក្រោមបទចោទបរិហារកេរ្តិ៍ និងញុះញង់ឱ្យប្រព្រឹត្តអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ដោយសារពាក់ព័ន្ធនឹងអំពើតវ៉ាទាមទារដំណោះស្រាយដីធ្លី នៅមុខក្រសួងដែនដី នគរោបនីយកម្ម និងសំណង់ និងតវ៉ានៅសាលាខេត្តកោះកុង កាលពីខែវិច្ឆិកា ឆ្នាំ២០១៩។
តំណាងសហគមន៍ដីធ្លីទាំងពីរក្រុម គឺក្រុម ១៩៧ និងក្រុម ១៧៥គ្រួសារ បានចេញតវ៉ាច្រើនឆ្នាំមកហើយ ដោយសារ ពួកគាត់មានជម្លោះដីធ្លី ជាមួយក្រុមហ៊ុន ហេង ហ៊ុយ អេហ្គ្រីខាលឆ័រ គ្រុប (Heng Huy Agriculture Group) របស់ឈ្មួញម្នាក់ មានងារជាឧកញ៉ា ឈ្មោះ ហេង ហ៊ុយ ដែលទទួលបានដីសម្បទានសេដ្ឋកិច្ច ពីរដ្ឋាភិបាល កាលពីឆ្នាំ២០០៧ ទំហំជាង ៤ពាន់ហិកតារ នៅចំណុចស្រុកស្រែអំបិលវិនិយោគដាំអំពៅ។
នៅឆ្នាំ២០១០ ពលរដ្ឋចោទក្រុមហ៊ុនថា បានយកគ្រឿងចក្រទៅឈូសឆាយដីលំនៅឋានប្រជាពលរដ្ឋ និងគំរាមចាប់ខ្លួនប្រជាពលរដ្ឋណា ដែលហ៊ានតវ៉ា ចំពោះការឈូសឆាយវាទយកដីរបស់ក្រុមហ៊ុន។ ពលរដ្ឋបានបង្កើនការតវ៉ាចាប់តាំងពីពេលនោះមក និងសំអាងថា ពួកគេ បានចូលកាន់កាប់ និងអាស្រ័យផលលើដីធ្លីចាប់តាំងពីឆ្នាំ១៩៩៣ មកម្ល៉េះ ដោយមានប័ណ្ណកាន់កាប់ដីធ្លី ទទួលស្គាល់ពីអាជ្ញាធរមូលដ្ឋាន។
ជាង ១០ឆ្នាំមកនេះ ពលរដ្ឋ តែងនាំគ្នា ចេញតវ៉ា នៅតាមចិញ្ចើមផ្លូវ មុខសាលាខេត្តកោះកុង និងមុខក្រសួងដែនដីនៅរាជធានីភ្នំពេញ ដើម្បីស្នើសុំអន្តរាគមន៍រកដំណោះស្រាយ។
ជុំវិញករណីចូលបង្ហាញខ្លួន និងទាមទារឲ្យទម្លាក់បទចោទលើតំណាងសហគមន៍ជម្លោះដីធ្លីទាំង ១២នាក់នេះ អាស៊ីសេរីមិនអាចសុំការបញ្ជាក់ពីអធិការដ្ឋានស្រុកស្រែអំបិល លោក ហួត នន់ និងអ្នកនាំពាក្យសាលាដំបូងខេត្តកោះកុង លោក ឈិន ឡុង បានទេ នៅថ្ងៃទី៧ ធ្នូ។
អ្នកសម្របសម្រួលអង្គការលីកាដូ ប្រចាំខេត្តកោះកុង លោក ហ៊ួរ អ៊ីន ដែលឃ្លាំមើលដំណើរការរឿងក្ដីនេះ សោកស្ដាយចំពោះការប្រើប្រាស់ប្រព័ន្ធតុលាការ លើក្រុមអ្នកមានជម្លោះដីធ្លី។ តំណាងសង្គមស៊ីវិលរូបនេះ យល់ថា តុលាការគួរទម្លាក់ចោលបទចោទ ហើយងាកមករកដំណោះស្រាយឲ្យពលរដ្ឋវិញ ទើបអាចបញ្ចប់វិវាទដីធ្លីរ៉ាំរ៉ៃនេះបាន៖ «កាលណាប្រើប្រព័ន្ធតុលាការមកដាក់បន្ទុកលើពួកគាត់អ៊ីចឹង វាជាការគំរាមកំហែងមកលើប្រជាពលរដ្ឋ ដោយសារភាគច្រើនគាត់ជាអ្នកក្រីក្រ ហើយក្រុមហ៊ុនជាអ្នកមានលុយមានអំណាច។ អ៊ីចឹង ! ដើម្បីភាពយុត្តិធម៌ ក៏ដូចជាភាពត្រឹមត្រូវលើជម្លោះដីធ្លី តុលាការជាពិសេសចៅក្រមស៊ើបសួរ លើកលែងការចោទប្រកាន់លើពួកគាត់ទៅ ហើយទុកឲ្យអាជ្ញាធរខេត្ត ក្រសួងដែនដីធ្វើការដោះស្រាយវិញ»។
ជម្លោះដីធ្លីរបស់អ្នកឃុំជីខលើ និងឃុំជីខក្រោមនេះ បានបណ្ដាលឱ្យពលរដ្ឋរាប់រយគ្រួសារ ធ្លាក់ខ្លួនក្រីក្រ បាត់បង់មុខរបរ ធ្វើស្រែចម្ការលើដីខ្លួន។ អ្នកខ្លះអះអាងថា បានជំពាក់បំណុលធនាគារ រហូតដល់គ្មានលទ្ធភាពសង ហើយចំណាកស្រុកទៅធ្វើការនៅទីក្រុង និងប្រទេសថៃ ខណៈក្មេងៗ ក្នុងសហគមន៍ភាគច្រើនបោះបង់ការសិក្សា ដើម្បីចេញតវ៉ាទាមទារដីធ្លី ជាមួយឪពុកម្ដាយជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។