ពលរដ្ឋនៅតំបន់អង្គរត្អូញត្អែរថា ពួកគាត់កំពុងរស់នៅដោយគ្មានផាសុខភាពដោយសារតែអាជ្ញាធរអប្សរា ហាមឃាត់មិនឱ្យពួកគាត់ជួសជុលផ្ទះ ឬសាងសង់បន្ទប់ទឹកតាមការស្នើសុំនោះទេ។ ទោះជាយ៉ាងណា អ្នកនាំពាក្យអាជ្ញាធរជាតិអប្សរាថា គ្រប់ផ្នែកនៃតំបន់អង្គរអាចនឹងត្រូវប៉ះពាល់ ប្រសិនបើអនុញ្ញាតឱ្យពលរដ្ឋចំណូលថ្មីបន្តសាងសង់ដោយគ្មានការត្រួតពិនិត្យជាមុន។
ពលរដ្ឋជាង៦រយនាក់ នៅឃុំខ្នាត ស្រុកពួក ខេត្តសៀមរាប នៅថ្ងៃទី១៥មករា ដង្ហែញត្តិទៅសាលាខេត្តសៀមរាប ដើម្បីស្នើសុំឱ្យអភិបាលខេត្ត និងរដ្ឋាភិបាលអន្តរាគមន៍ទៅអាជ្ញាធរជាតិអប្សរា ឱ្យផ្ដល់ភាពងាយស្រួលឱ្យពួកគាត់អាចសាងសង់លំនៅឋានបាន។
ពលរដ្ឋនៅឃុំខ្នាត លោក សំ អុល លើកឡើងថា ប្រជាពលរដ្ឋបានរស់នៅក្នុងតំបន់អង្គរនេះតាំងពីដូនតាមក ប៉ុន្តែលោកថាក្នុងរយៈពេលពីរឆ្នាំចុងក្រោយនេះ អាជ្ញាធរជាតិអប្សរា ហាមឃាត់មិនឱ្យពួកគាត់ជួសជុលផ្ទះ តសំយាបផ្ទះ និងសាងសង់បង្គន់អនាម័យជាដើម។
លោក សំ អុល លើកឡើងថានេះ គឺជារឿងអយុត្តិធម៌ដែលពួកគាត់រស់នៅឆ្ងាយពីតំបន់ប្រាសាទប្រមាណ១០គីឡូម៉ែត្រត្រូវបានអាជ្ញាធរចោទប្រកាន់ថាជាអ្នកធ្វើឱ្យប៉ះពាល់ដល់គ្រឹះប្រាសាទ ប៉ុន្តែលោកថាអាជ្ញាធរមិនដែលមើលសណ្ឋាគារ ផ្ទះសំណាក់ និងអគារផ្សេងៗដែលសាងសង់កៀកនឹងប្រាសាទនោះទេ។
លោក សំ អុល៖ «បងប្អូនប្រជាពលរដ្ឋទាំងអស់គ្នាហ្នឹងគឺគាត់រស់នៅតាំងពីដូនតាមក រងការគំរាមកំហែងពីអាជ្ញាធរអប្សរាច្រើនពេក ព្រោះពីមុនយើងអាចសាងសង់លំនៅឋានអីបានតិចតួច ឥឡូវសូម្បីតែស័ង្កសីបីសន្លឹកក៏គាត់ឱ្យដាក់ច្បាប់ ហើយពេលខ្លះគាត់អត់ចេញច្បាប់ឱ្យប្រជាពលរដ្ឋ»។
ពលរដ្ឋនៅឃុំខ្នាតម្នាក់ទៀត គឺលោកស្រី សុខ អាំ លើកឡើងថានៅពេលដែលពលរដ្ឋដាក់លិខិតស្នើសុំទៅកាន់អាជ្ញាធរអប្សរា និងអាជ្ញាធរមូលដ្ឋានដើម្បីសាងសង់លំនៅឋានត្រូវប្រើរយៈពេលរាប់ឆ្នាំដែលនាំឱ្យប៉ះពាល់ដល់ការរស់នៅរបស់ប្រជាពលរដ្ឋ។ លោកស្រី សុខ អាំ រំពឹងថាអភិបាលខេត្តសៀមរាបដែលបានទទួលញត្តិ និងស្ដាប់ការលំបាករបស់ប្រជាពលរដ្ឋ នឹងអាចផ្ដល់ដំណោះស្រាយដល់ពួកគាត់ឆាប់ៗ។
លោកស្រី សុខ អាំ៖ «អត់ទាន់មានទំនុកចិត្ត ប៉ុន្តែអ្វីក៏ដោយទាល់តែចាំមើល ដោយសារវាស្ថិតនៅក្រោមផ្លូវច្បាប់អ៊ីចឹងត្រូវការរយៈពេល នៅតែសង្ឃឹមថាខាងអាជ្ញាធរពាក់ព័ន្ធហ្នឹងគាត់អាចមានដំណោះស្រាយជូនប្រជាពលរដ្ឋ»។
ជុំវិញករណីនេះ អ្នកនាំពាក្យអាជ្ញាធរជាតិអប្សរា លោកឡុងកុសល លើកឡើងថានៅក្នុងតំបន់អង្គរមានប្រជាពលរដ្ឋដែលរស់នៅពីដូនតា និងមានពលរដ្ឋចំណូលថ្មីក្រោយឆ្នាំ២០០៤។ លោកឡុងកុសល ថា ពលរដ្ឋនៅក្នុងតំបន់នេះត្រូវស្នើសុំមកកាន់អាជ្ញាធរមុនពេលសាងសង់ ដើម្បីកុំឱ្យប៉ះពាល់គ្រប់ផ្នែកនៃតំបន់អង្គរ រួមមានគ្រឹះនៃប្រាសាទ បារាយ និងទួលបុរាណជាដើម។
លោក ឡុងកុសល៖ «អីចឹងហើយបានជានៅក្នុងការដាក់ការចុះបញ្ជីតំបន់អង្គរជាតំបន់បេតិកភណ្ឌពិភពលោកមិនសំដៅតែទៅលើតែការចុះប្រាង្គប្រាសាទនោះទេ ក៏ប៉ុន្តែរចនាសម្ព័ន្ធបុរាណ ឬក៏អ្វីដែលជាសំណល់ដែលបន្សល់ទុកពីការរស់នៅរបស់បុព្វបុរសខ្មែរយើងដែលបានក៏សាងទុកត្រូវបានចុះបញ្ជីទាំងអស់គ្នាអ៊ីចឹងទាំងផ្លូវទឹក ទាំងទួលបុរាណ ទាំងទីកន្លែងរចនាសម្ព័ន្ធបុរាណក៏បញ្ចូលទៅក្នុងសម្បត្តិពិភពលោកនឹងគ្នា»។
ទោះជាយ៉ាងណា អ្នកគ្រប់គ្រងការិយាល័យអង្គការលីកាដូប្រចាំខេត្តបន្ទាយមានជ័យ លោក អ៊ិន គង់ជិត ដែលបានចុះអង្កេតករណីនេះលើកឡើងថាអាជ្ញាធរមូលដ្ឋានគួរតែផ្ដល់សិទ្ធិដល់ប្រជាពលរដ្ឋនៅតំបន់នោះឱ្យមានសិទ្ធិគ្រប់គ្រាន់ក្នុងការសាងសង់ផ្ទះបែបលក្ខណៈគ្រួសារ ហើយអាជ្ញាធរគួរតែពន្លឿននៅពលរដ្ឋដែលស្នើសុំ។
លោក អ៊ិន គង់ជិត៖ «អ្វីដែលជាក្ដីកង្វល់ដែលគាត់រស់នៅក្នុងភាពភ័យខ្លាច រស់នៅក្នុងភាពមិនមែនជាម្ចាស់កម្មសិទ្ធិអ៊ីចឹង គាត់ហាក់ដូចជាមានក្ដីកង្វល់ រស់នៅដោយអត់មានសុវត្ថិភាពអ៊ីចឹង អាជ្ញាធរអប្សរាចេះតែមករករឿងគាត់ជាប្រចាំ ហ្នឹងហើយគឺជាក្ដីកង្វល់ ជាក្ដីឈឺចាប់របស់គាត់មិនអាចទ្រាំបានគាត់ត្រូវតែប្រមូលគ្នាសម្ដែងមតិ»។
ទាក់ទងនឹងបញ្ហានេះ អង្គការយូណេស្កូ (UNESCO)កាលពីថ្ងៃទី១៥ ខែវិច្ឆិកា អំពាវនាវឱ្យរដ្ឋាភិបាលកម្ពុជាធានាគោរពសិទ្ធិពលរដ្ឋរស់នៅតំបន់អង្គរ ដោយត្រូវអនុវត្តតាមសំណើរបស់អង្គការលើកលែងទោសអន្តរជាតិ ដែលបានលាតត្រដាងអំពីការរំលោភសិទ្ធិមនុស្សរបស់អាជ្ញាធររដ្ឋាភិបាលដូចជាករណីបណ្ដេញចេញពលរដ្ឋពីតំបន់អង្គរប្រមាណ១ម៉ឺននាក់ទៅកាន់តំបន់រុនតាឯក។ UNESCO សង្កត់ធ្ងន់ថា ខ្លួនមិនស្នើសុំ គាំទ្រ ឬចូលរួមនៅក្នុងកម្មវិធីនេះឡើយ។ UNESCO អះអាងបានរំឭកម្ដងហើយម្ដងទៀតជាសាធារណៈ ចាប់តាំងពីអាជ្ញាធរកម្ពុជាបានប្រកាសកម្មវិធីផ្លាស់ប្ដូរទីលំនៅពលរដ្ឋ កាលពីឆ្នាំ២០២២ មកពីសារៈសំខាន់នៃការគោរពសិទ្ធិមនុស្សពេញលេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។