ពលរដ្ឋមានទំនាស់ដីធ្លី ៦៩គ្រួសារនៅស្រុកគាស់ក្រឡ ខេត្តបាត់ដំបង ទទូចឲ្យតំណាងរាស្ត្រខេត្ត ជួយអន្តរាគមន៍ពន្លឿនការដោះស្រាយវិវាទដីធ្លី។ ចំណែកមន្ត្រីអង្គការសង្គមស៊ីវិលថា អ្នកតំណាងរាស្រ្តគួរតែពន្លឿនការដោះស្រាយបញ្ហារបស់ពលរដ្ឋ ឲ្យបានឆាប់រហ័ស។
ពលរដ្ឋមានទំនាស់ដីធ្លី ៦៩គ្រួសារនៅស្រុកគាស់ក្រឡ ខេត្តបាត់ដំបង អស់សង្ឃឹមចំពោះតំណាងរាស្ត្រខេត្ត ដែលអសកម្ម មិនអើពើចំពោះសំណើជួយអន្តរាគមន៍វាស់វែង និងចេញប្លង់កម្មសិទ្ធិដីធ្លីពួកគាត់ដែលមានទំហំ ជាង២០០ហិកតា(២៥៤)។ ពលរដ្ឋអះអាងថា តាំងពីដាក់ពាក្យស្នើសុំជួយអន្តរាគមន៍ពីតំណាងរាស្រ្តខេត្តបាត់ដំបង កាលពីថ្ងៃទី០៦ មិថុនា មក មិនដែលមានតំណាងរាស្រ្តរូបណាទៅសួរនាំ ឬចាត់ឲ្យក្រុមការងារទៅសិក្សាពីសំណើពលរដ្ឋនោះទេ។ ពាក្យស្នើសុំជួយអន្តរាគមន៍នោះ ពលរដ្ឋ៦៩គ្រួសារបានស្នើសុំឲ្យតំណាងរាស្រ្តខេត្ត ជួយឲ្យមានការវាស់វែង និងចេញប្លង់កម្មសិទ្ធិដីធ្លី ទំហំ២៥៤ហិកតា នៅភូមិសំរោង ឃុំឆ្នាស់មាន់ ស្រុកគាស់ក្រឡ ខេត្តបាត់ដំបង ជូនពួកគាត់ដែលអាស្រ័យផលជាង១០ឆ្នាំមកហើយ។ ពាក្យស្នើសុំនោះឲ្យដឹងថា នៅអំឡុងឆ្នាំ២០២០ ក្រុមការងារសុរិយោដីខេត្ត/ស្រុក បានចុះមកវាស់វែង និងចេញប្លង់កម្មសិទ្ធិជូនពលរដ្ឋនៅតំបន់នោះ ក៏ប៉ុន្តែមិនបានវាស់វែងដីពលរដ្ឋ៦៩គ្រួសារ ដែលមានទំហំ២៥៤ហិកតានោះទេ ក្រោមហេតុផលថា មិនមានឈ្មោះត្រឹមត្រូវដើម្បីវាស់វែង។ បើទោះបីជាពលរដ្ឋទាំង ៦៩គ្រួសារតវ៉ាសុំឲ្យវាស់វែងក៏ដោយ ក៏ក្រុមការងារសុរិយោដីខេត្ត/ស្រុក មិនវាស់វែងដីឲ្យនោះដែរ។ តំណាងរាស្រ្តនីតិកាលទី៦ ខេត្តបាត់ដំបង មកពីគណបក្សប្រជាជនកម្ពុជារួមមានលោក ស ខេង លោក ងិន ឃន អ្នកស្រី លី គឹមលៀង លោក ឈាង វុន លោក ឡោក ហ៊ួរ លោក ភួ ពុយ លោក សៀង ស៊ុតថង និងលោក ច័ន្ទ សុផល។
តំណាងពលរដ្ឋម្នាក់គឺលោក ស្វាយ សុភាព ប្រាប់វិទ្យុអាស៊ីសេរីនៅថ្ងៃទី១៨ កក្កដាថា លោកខកចិត្តចំពោះតំណាងរាស្ត្រ ដែលមិនស្វែងរកដំណោះស្រាយចំពោះពលរដ្ឋទាំង៦៩គ្រួសារនេះ។ លោកស្នើដល់រដ្ឋាភិបាល ជួយវាស់វែង និងចេញប្លង់កម្មសិទ្ធិដីធ្លីជូនពួកគាត់ទាំង៦៩គ្រួសារ។
លោក ស្វាយ សុភាព៖ «ទេ ខ្ញុំខកចិត្តព្រោះថាខ្ញុំ ក្នុងនាមខ្ញុំជាប្រជាពលរដ្ឋដែរ ខ្ញុំមានទុក្ខកង្វល់អ៊ីចឹង ខ្ញុំសុំស្នើដល់ថ្នាក់ដឹកនាំជាម្លប់ ជាសន្តិភាពក្នុងគណបក្សប្រជាជនដឹកនាំប្រទេស ហើយដល់ខ្ញុំស្នើទៅគាត់អីចឹង គាត់ស្ងាត់ អត់មានគិតគូរដល់ប្រជាពលរដ្ឋអ៊ីចឹង ខ្ញុំអន់ចិត្តដែរក្មួយអន់ចិត្ត»។
ផ្ទុយទៅវិញ ពលរដ្ឋនៅមិនទាន់ឃើញពន្លឺ នៃការដោះស្រាយបញ្ហាដីធ្លីនេះពីតំណាងរាស្រ្ត ឬអាជ្ញាធរនោះទេ បែរជា តុលាការបានចោទប្រកាន់ថា តំណាងពលរដ្ឋបានកៀរគរពលរដ្ឋឲ្យទៅរស់នៅលើដីរបស់រដ្ឋ និងមានអាជ្ញាធរតាមឃ្លាំមើលតំណាងពលរដ្ឋមិនដាច់ពីភ្នែក។
លោក ស្វាយ សុភាព បញ្ជាក់ថា លោកមិនមែនជាអ្នកដើរកៀរគរពលរដ្ឋអ្វីនោះទេ គឺគ្រាន់តែជាចាស់ជាទុំនៅក្នុងភូមិ ដែលពលរដ្ឋពឹងពាក់ឲ្យជជែកជាមួយអាជ្ញាធរតែប៉ុណ្ណោះ។ លោកបន្ថែមថា លោកបារម្ភដល់សុវត្ថិភាព ព្រោះឈ្មោះជាតំណាងពលរដ្ឋនេះ ធ្វើឲ្យអាជ្ញាធរតាមឃ្លាំមើលលោក ជារៀងរាល់ថ្ងៃ មិនដាច់ពីភ្នែក។
លោក ស្វាយ សុភាព៖ «បាទ ខ្ញុំព្រួយបារម្ភដែរក្មួយ ខ្ញុំព្រួយបារម្ភច្រើនណាស់អារឿងសុវត្ថិភាព ខ្ញុំកំពុងតែគេឲ្យតាមដានខ្ញុំ អាជ្ញាធរភូមិ អាជ្ញាធរឃុំហ្នឹងគឺតាមដានខ្ញុំហើយជាពិសេសសមត្ថកិច្ច ប៉ូលិសហ្នឹងហ្មង តាមដានខ្ញុំជាប់ជានិច្ចខ្ញុំចេញទៅណា ខ្ញុំទៅធ្វើអីណាអីណា គេឲ្យតាមដានអ៊ីចឹង»។
ឆ្លើយតបចំពោះការលើកឡើងនេះ អធិការដ្ឋាននគរបាលស្រុកគាស់ក្រឡ លោក ប៉ាង ហៀង មានប្រសាសន៍ថា លោកមិនបានដឹងអំពីសមត្ថកិច្ចតាមឃ្លាំមើលតំណាងពលរដ្ឋ ៦៩គ្រួសារ អ្វីនោះទេ ហើយក៏ចុចបិទទូរស័ព្ទ។
លោក ប៉ាង ហៀង៖ «អត់ដឹងផង គាត់ថា តែគាត់ដែរអត់ដឹង អរគុណហើយខ្ញុំជាប់រវល់បន្តិចសិនបានហើយ»។
វិទ្យុអាស៊ីសេរី មិនអាចទាក់ទងអ្នកនាំពាក្យរដ្ឋសភា លោក ឡេង ប៉េងឡុង អភិបាលខេត្តបាត់ដំបងលោក សុខ លូ និងតំណាងរាស្រ្តខេត្តបាត់ដំបងលោក ស ខេង និងលោក ឈាង វុន ដើម្បីសុំការឆ្លើយតបពីសំណើរបស់ពលរដ្ឋបានទេ នៅថ្ងៃទី១៨ កក្កដា។
ទោះជាយ៉ាងណា អ្នកសម្របសម្រួលផ្នែកឃ្លាំមើលការរំលោភសិទ្ធិមនុស្សនៃអង្គការលីកាដូ(LICADHO) ខេត្តបាត់ដំបង លោក អ៊ិន គង់ជិត មានប្រសាសន៍ថា អាជ្ញាធរ គួរតែពន្លឿននីតិវិធីវាស់វែង និងចេញប្លង់កម្មសិទ្ធិដីធ្លីជូនពួកគាត់ ព្រោះពួកគាត់ បានរស់នៅ និងអាស្រ័យផលលើដីនោះ ជាង១០ឆ្នាំទៅហើយ។ លោកអំពាវនាវ ដល់សមត្ថកិច្ច បញ្ឈប់ការតាមឃ្លាំមើល ដែលធ្វើឲ្យពួកគាត់ភ័យខ្លាច និងស្នើដល់តុលាការទម្លាក់ការចោទប្រកាន់លើតំណាងពលរដ្ឋ៦៩គ្រួសារនោះ។
លោក អ៊ិន គង់ជិត៖ «យើងមើលឃើញថា ដីហ្នឹងជាកម្មសិទ្ធិរបស់ខេត្តអីចឹង អាជ្ញាធរខេត្តធ្វើប្រទានកម្មទៅ ព្រោះអី លើកមុនរាជរដ្ឋាភិបាលលោក ចេះកាត់ផ្ទៃដីព្រៃដែលប្រជាពលរដ្ឋធ្លាប់អាស្រ័យផល បង្កបង្កើនផលហ្នឹងផ្ដល់ឲ្យប្រជាពលរដ្ឋ កាលពីឆ្នាំ២០១២ ២០១៣ ។ ចុះនេះជាកម្មសិទ្ធិរបស់រដ្ឋហើយអីចឹង គ្រាន់តែធ្វើប្រទានកម្មឲ្យប្រជាពលរដ្ឋទៅជាការចប់សព្វគ្រប់ហើយ ហើយពួកគាត់បានផ្ទៃដីបង្កបង្កើនផលដើម្បីជីវភាពរបស់ពួកគាត់ទៅថ្ងៃអនាគត»។
ពលរដ្ឋ និងសង្គមស៊ីវិលនៅតែទទូចឲ្យអាជ្ញាធរ ពន្លឿនការវាស់វែង និងចេញប្លង់កម្មសិទ្ធិដីធ្លីជូនពលរដ្ឋ ៦៩ គ្រួសារ ដើម្បីឲ្យពួកគាត់បន្តអាស្រ័យផលកសិកម្ម លើផ្ទៃដី ដែលពួកគាត់ប្រើប្រាស់ជាង១០ឆ្នាំមកហើយនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។