ធនាគារ ANZ ដែលមានមូលដ្ឋាននៅទីក្រុង មែលប៊ន (Melbourne) ប្រទេសអូស្ត្រាលី បានយល់ព្រមចេញសំណងដល់ពលរដ្ឋចំនួន ១២០០ គ្រួសារ រងគ្រោះក្នុងរឿងវិនិយោគស្ករអំពៅដ៏ចម្រូងចម្រាស របស់សមាជិកព្រឹទ្ធសភា គណបក្សប្រជាជនកម្ពុជា លោក លី យ៉ុងផាត់។ ការផ្តល់សំណងនេះ គឺដោយសារតែធនាគារនេះ កាលពីឆ្នាំ២០១១ តាមរយៈធនាគារ ANZ Royal ដែលជាក្រុមហ៊ុនបណ្ដាក់ទុករួមគ្នារបស់ខ្លួន បានផ្តល់កម្ចីជាទឹកប្រាក់ចំនួន ៤០លានដុល្លារអាមេរិក ឲ្យក្រុមហ៊ុន Phnom Penh Sugar របស់លោក លី យ៉ុងផាត់ ដើម្បីវិនិយោគលើដំណាំស្ករអំពៅ និងធ្វើរោងចក្រផលិតស្ករស។ គម្រោងវិនិយោគរបស់លោក លី យ៉ុងផាត់ នេះ បានបណ្ដាលឲ្យពលរដ្ឋខ្មែរជាច្រើនរយគ្រួសាររងការបណ្តេញចេញដោយបង្ខំ ប្រើប្រាស់ពលកម្មកុមារ និងអនុវត្តការងារគ្មានសុវត្ថិភាព។
សារព័ត៌មានអូស្ត្រាលី ABC រាយការណ៍កាលពីថ្ងៃទី២៧ កុម្ភៈ ថា ធនាគារ ANZ របស់អូស្ត្រាលី បានបដិសេធមិនប្រាប់ពីចំនួនជាក់លាក់នៃតម្លៃសំណង ដែលខ្លួនយល់ព្រមផ្ដល់ឲ្យដល់ពលរដ្ឋរងគ្រោះចំនួន ១២០០ គ្រួសារទាំងនេះ។ យ៉ាងណាក៏ដោយ ធនាគារ ANZ ថ្លែងក្នុងសេចក្ដីថ្លែងការណ៍ថា ធនាគារនឹងបង់ប្រាក់ចំណេញដុលរបស់ខ្លួនបានមកពីការផ្តល់កម្ចីដល់លោក លី យ៉ុងផាត់ នេះ ឲ្យទៅដល់ក្រុមគ្រួសារពលរដ្ឋរងគ្រោះ។
នាយកប្រតិបត្តិអង្គការសមធម៌កម្ពុជា លោក អៀង វុទ្ធី ដែលអង្គការរបស់លោក កាលពីដើមឡើយបានរៀបចំបណ្ដឹងឲ្យពលរដ្ឋរងគ្រោះចំនួន ៦៨១ គ្រួសារ ត្រូវបានសារព័ត៌មានដដែលស្រង់ប្រសាសន៍ថា ការផ្ដល់សំណងនេះជារឿងសំខាន់ ហើយអាចជួយដល់សហគមន៍ដែលរងការខ្វះខាតខ្លាំង។ លោកបន្តថា ការយល់ព្រមផ្ដល់សំណងនេះ គឺជាការទទួលស្គាល់អំពីការលំបាកដែលពលរដ្ឋទាំងនោះបានរងគ្រោះដោយសារតែការវិនិយោគនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។