រដ្ឋាភិបាលកម្ពុជា បានយល់ព្រមឲ្យអាជ្ញាធរដែលពាក់ព័ន្ធនឹងកិច្ចការពារសម្បត្តិបេតិកភណ្ឌពិភពលោក ចុះរុះរើសំណង់ថ្មីៗជាច្រើននៅក្នុងតំបន់អង្គរទាំងអស់នោះចេញវិញ។ ប្រសិនបើមិនរើសំណង់ទាំងនោះទេ គឺហានិភ័យអង្គររបស់កម្ពុជា អាចនឹងត្រូវគេដាក់ជាជំហានដំបូងទៅក្នុងបញ្ជីបេតិកភណ្ឌប្រឈមនឹងគ្រោះថ្នាក់ ហើយបើការប៉ះពាល់នៅតែបន្ត គឺអាចនឹងត្រូវគេលុបចេញពីបញ្ជីនៃបេតិកភណ្ឌពិភពលោក។
អាជ្ញាធរខេត្តសៀមរាប បានសហការជាមួយអាជ្ញាធរអប្សរាទទួលបន្ទុកការពារ និងថែរក្សាប្រាសាទបុរាណ មានគម្រោងនឹងចុះបង្ក្រាប ព្រមទាំងរុះរើចោលសំណង់ខុសច្បាប់ថ្មីៗនៅក្នុងតំបន់ការពារបេតិកភណ្ឌអង្គរ នៃភូមិសាស្ត្រក្រុងសៀមរាប និងស្រុកចំនួនបួនទៀតឲ្យអស់ជាស្ថាពរនៅពេលឆាប់ៗខាងមុខ។
អាជ្ញាធរខេត្តសៀមរាប និងអាជ្ញាធរអប្សរា បានបង្កើតគណៈកម្មការរួមគ្នារួចហើយ ដើម្បីចាប់ធ្វើយុទ្ធនាការចុះរុះរើសំណង់ថ្មីៗទាំងឡាយដែលសាងសង់នៅក្នុងតំបន់ការពារបេតិកភណ្ឌឲ្យអស់ចាប់ពីចុងខែកក្កដា តទៅ។
អគ្គនាយកអាជ្ញាធរអប្សរា គឺលោក ស៊ុំ ម៉ាប់។ លោកថ្លែងនៅក្នុងសន្និសីទកាសែតនៅព្រឹកថ្ងៃពុធ ទី១២ ខែកក្កដា ថា ចាប់តាំងពីថ្ងៃយុទ្ធនាការឃោសនា និងការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ ថ្ងៃទី២០ ខែឧសភា រហូតដល់ថ្ងៃទី២ ខែមិថុនា គឺមានសំណង់ថ្មីៗនៅក្នុងតំបន់ឧទ្យានអង្គរនៃក្រុងសៀមរាប ស្រុកពួក ស្រុកបន្ទាយស្រី ស្រុកប្រាសាទបាគង និងស្រុកអង្គរធំ បានកើតឡើងចំនួនជាង ៥២០កន្លែង។ អាជ្ញាធរបានចាត់ទុកសំណង់ថ្មីៗទាំងនោះ គឺជាសំណង់ខុសច្បាប់ ដោយមិនមានអាជ្ញាធរពាក់ព័ន្ធមួយណាបានផ្ដល់ការអនុញ្ញាតឲ្យសាងសង់ដូច្នេះឡើយ។
លោក ស៊ុំ ម៉ាប់ បញ្ជាក់ជំហរយ៉ាងម៉ឺងម៉ាត់ថា រាជរដ្ឋាភិបាលកម្ពុជា បានយល់ព្រមឲ្យអាជ្ញាធរដែលពាក់ព័ន្ធនឹងកិច្ចការពារសម្បត្តិបេតិកភណ្ឌពិភពលោក ចុះរុះរើសំណង់ទាំងអស់នោះចេញ។ ប្រសិនបើមិនរើសំណង់ទាំងនោះទេ គឺហានិភ័យអង្គររបស់កម្ពុជា អាចនឹងត្រូវគេដាក់ជាជំហានដំបូងទៅក្នុងបញ្ជីបេតិកភណ្ឌប្រឈមនឹងគ្រោះថ្នាក់ ហើយបើការប៉ះពាល់នៅតែបន្ត គឺអាចនឹងត្រូវគេលុបចេញពីបញ្ជីនៃបេតិកភណ្ឌពិភពលោក៖ « អស់លោកប្រហែលជាជ្រាបហើយថា គុណវិបត្តិនេះ តើ វាធំធេង ប៉ុណ្ណា ? ទាំងការទូត ទាំងមុខ មាត់ជាតិ និងទាំង វិស័យសេដ្ឋកិច្ច ?»។
មន្ត្រីអាជ្ញាធរអប្សរា ឲ្យដឹងថា កាលពីថ្ងៃទី២១ ខែមិថុនា មជ្ឈមណ្ឌលបេតិកភណ្ឌពិភពលោក បានចោទសួរមករដ្ឋាភិបាលខ្មែរឲ្យពន្យល់ជុំវិញការសាងសង់សំណង់ថ្មីៗនៅក្នុងតំបន់អង្គរ ដែលជាសម្បត្តិបេតិកភណ្ឌពិភពលោកនេះ។
កាលពីថ្ងៃទី៩ ខែមិថុនា អាជ្ញាធរអប្សរាបានចេញប្រកាស យកទៅចែកជូនពលរដ្ឋជាម្ចាស់សំណង់ថ្មីៗ ដោយឲ្យរុះរើចេញពីតំបន់ហាមឃាត់វិញក្នុងរយៈពេល ៧ថ្ងៃជាកំហិត ហើយកាលពីថ្ងៃទី២០ ខែមិថុនា អាជ្ញាធរអប្សរាបានសាកល្បងបញ្ជូនកម្លាំងអន្តរាគមន៍របស់ខ្លួនចុះទៅអនុវត្តការរុះរើសំណង់ថ្មីៗទាំងនោះ ក៏ប៉ុន្តែត្រូវពលរដ្ឋលើកគ្នាប្រឆាំង ដោយធ្វើការបិទកំណាត់ផ្លូវចូលទៅកាន់តំបន់អង្គរវត្តជាច្រើនម៉ោង។
អភិបាលរងខេត្តសៀមរាប លោក លី សំរិទ្ធិ ថ្លែងថា ចាប់ពីពេលនេះតទៅ អាជ្ញាធរខេត្តសៀមរាប នឹងចូលរួមការចុះអនុវត្តរុះរើសំណង់ថ្មីៗនៅក្នុងតំបន់ការពារបេតិកភណ្ឌទាំងនោះ ដោយមិនអនុញ្ញាតឲ្យពលរដ្ឋលើកគ្នាតវ៉ាជារូបភាពកាន់ដបសាំងគំរាម និងបិទផ្លូវបានទៀតទេ៖ « យើង ទុកពេលនេះឲ្ យអ្នក ទាំងអស់គ្នា ចូលរួម បើមិនចូលរួមការពារសម្បត្តិបេតិកភណ្ឌទេ គឺប្រហែលជាមានការប៉ះទង្គិចគ្នា រវាងពលរដ្ឋ និងកម្លាំងអាជ្ញាធរជៀសមិនផុតទេ »។
អ្នកស៊ើបអង្កេតសមាគមការពារសិទ្ធិមនុស្សអាដហុក (ADHOC) ខេត្តសៀមរាប ដែលតាមឃ្លាំមើលការអនុវត្តរុះរើសំណង់ថ្មីនោះ លោក សួស ណារិន សម្ដែងការព្រួយបារម្ភចំពោះការប៉ះទង្គិចគ្នារវាងពលរដ្ឋ និងអាជ្ញាធរ នៅពេលចុះអនុវត្តការរុះរើសំណង់ថ្មីៗនៅពេលខាងមុខនេះ។ លោកយល់ថា ថ្វីត្បិតតែពលរដ្ឋសាងសង់សំណង់ថ្មីៗខុសច្បាប់ជាច្រើនក្នុងតំបន់ការពារបេតិកភណ្ឌក៏ពិតមែន ក៏ប៉ុន្តែពលរដ្ឋទាំងនោះបានចំណាយប្រាក់ជាច្រើនដែរ។ ដូច្នេះគួរតែអាជ្ញាធរអនុវត្តការរុះរើតាមវិធីណាមួយយ៉ាងសមស្រប ដោយឲ្យពលរដ្ឋទាំងនោះបានទទួលផលប្រយោជន៍ស្របតាមគោលការណ៍ដែលរដ្ឋាភិបាលកំពុងតែកាត់បន្ថយភាពក្រីក្រផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។