ពលរដ្ឋ និងមន្ត្រីសង្គមស៊ីវិលស្នើទៅអាជ្ញាធរខេត្តព្រះសីហនុ ឱ្យពន្លឿនការផ្តល់ដីសម្បទានសង្គមកិច្ចដល់ពលរដ្ឋរស់នៅសង្កាត់លេខ៤ ក្រុងព្រះសីហនុ ដែលត្រូវអាជ្ញាធរខេត្តរុះរើផ្ទះរបស់ពួក ដើម្បីពង្រីកអូរ និងប្រឡាយ។ សំណើបែបនេះ ធ្វើឡើងក្នុងខណៈដែលអាជ្ញាធរខេត្តអះអាងថា កំពុងសិក្សា មុននឹងសម្រេចផ្តល់ដីដល់ពលរដ្ឋរងផលប៉ះពាល់ណា ដែលជាអ្នកខ្វះខាតពិតប្រាកដ។
ក្រុមពលរដ្ឋលើកឡើងថា ពួកគេកំពុងជួបការលំបាកដោយសារបាត់បង់ជម្រក ដោយអាជ្ញាធរខេត្តព្រះសីហនុរុះរើផ្ទះរបស់ពួកគេ ដោយចោទ ថា រស់នៅលើដីចំណីអូរ និងចំណីផ្លូវសាធារណៈរបស់រដ្ឋ។
ពលរដ្ឋម្នាក់ លោកស្រី អ៊ុច ម៉ុន ឱ្យដឹងថា ពេលនេះលោកស្រីមិនទទួលបានព័ត៌មានជាក់លាក់នៃការផ្តល់ដីសម្បទានសង្គមកិច្ចនៅឡើយទេ។ លោកស្រីរំពឹងថា អាជ្ញាធរខេត្តនឹងពន្លឿនការងាររបស់ខ្លួនដើម្បីទទួលបានដីសម្បទានសង្គមកិច្ច៖ «យើងអត់ប្រឆាំងទេគេអភិវឌ្ឍន៍អីគេស្តារអូរអីធ្វើទៅ ប៉ុន្តែធ្វើអីធ្វើទៅប្រជាពលរដ្ឋគាត់រស់នៅហ្នឹង គ្នាសុទ្ធតែអ្នកអត់ជួយដោះស្រាយផ្ដល់សំណងប្រជាពលរដ្ឋ»។
អ្នកសម្របសម្រួលសមាគមអាដហុក (Adhoc) ប្រចាំខេត្តព្រះសីហនុ អ្នកស្រី ជៀប សុធារី សង្ឃឹមថា អាជ្ញាធរខេត្ត នឹងពិនិត្យផ្ដល់ដីដល់ពលរដ្ឋឈរលើមូលដ្ឋានតម្លាភាព និងយុត្តិធម៌។ មន្ត្រីសង្គមស៊ីវិលរូបនេះ ចង់ឃើញអាជ្ញាធរផ្ដល់ថវិកាបន្ថែមលើការផ្ដល់ដីសម្បទានសង្គមកិច្ច ដោយអ្នកស្រីសង្កេតឃើញថា ពលរដ្ឋខ្លះបានបាត់បង់ផ្ទះរបស់ខ្លួនទាំងស្រុងតែម្ដង ហើយពួកគេក៏គ្មានលទ្ធភាពសាងសង់លំនៅឋានថ្មីនោះដែរ៖ «ហើយបើសិនរដ្ឋបាលខេត្តចែកតែដីឱ្យគាត់ មិនបានជាលុយពីណាមកសងធនាគារទេ ត្រូវរកលុយធ្វើផ្ទះជាថ្មីហើយ រកលុយសងធនាគារទៀត»។
អាជ្ញាធរខេត្តព្រះសីហនុបានចាប់ផ្តើមរុះរើផ្ទះពលរដ្ឋកាលពីថ្ងៃទី២៣ ខែមករា ដោយចោទប្រកាន់ថា ការរស់នៅរបស់ពលរដ្ឋ ២៩គ្រួសារនេះ ធ្វើឱ្យប៉ះពាល់ដល់ប្រព័ន្ធរំដោះទឹក និងគម្រោងស្ថាបនាផ្លូវក្នុងក្រុងព្រះសីហនុ ដែលជាហេតុធ្វើខេត្តនេះរងជំនន់ទឹកភ្លៀង។
អ្នកនាំពាក្យសាលាខេត្តព្រះសីហនុ លោក ឃាង ភារម្យ ឱ្យអាស៊ីសេរីដឹងថា ពលរដ្ឋក្នុងតំបន់នេះ ដែលអាចទទួលបានដីសម្បទានសង្គមកិច្ច គឺជាពលរដ្ឋក្រីក្រពិតប្រាកដ។ ប៉ុន្តែ លោកមិនទាន់អាចបញ្ជាក់បានថា មានពលរដ្ឋប៉ុន្មានគ្រួសារនៃពលរដ្ឋទាំង ២៩គ្រួសាររងប៉ះពាល់ដែលនឹងត្រូវទទួលបានដីសម្បទាននៅឡើយនោះទេ ព្រោះអាជ្ញាធរកំពុងសិក្សាករណីនេះ៖ «យើងទៅកំណត់អត្តសញ្ញាណពលរដ្ឋថា ក្រីក្រពិតប្រាកដ ឬក៏អ្នកមានផ្ទះកន្លែងផ្សេងមកសាងសង់ផ្ទះបន្ថែមអាហ្នឹងមិនត្រូវបានពិចារណាយកដោះស្រាយទេ»។
មន្ត្រីសង្គមស៊ីវិល និងពលរដ្ឋលើកឡើងដូចគ្នាថា ពលរដ្ឋដែលរងផលប៉ះពាល់ពួកគេបានចូលមករស់នៅទីនេះជាង ១០ឆ្នាំមកហើយ ម្យ៉ាងវិញទៀតរាល់ការទិញដីធ្លីនៅក្នុងតំបន់នេះ គឺមានការទទួលស្គាល់ពីអាជ្ញាធរមូលដ្ឋាន។ ពលរដ្ឋថា ពួកគេមិនប្រឆាំងការអភិវឌ្ឍទេ ប៉ុន្តែពួកគេស្នើសុំមានការរស់នៅសមរម្យពេលអាជ្ញាធរធ្វើការអភិវឌ្ឍ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។