ពលរដ្ឋមានទំនាស់ដីធ្លីនៅខេត្តបន្ទាយមានជ័យជាង ១០០នាក់ លើកគ្នាកាន់បដា តវ៉ានៅមុខសាលាខេត្តនេះជាថ្មីទៀត នៅព្រឹកថ្ងៃទី៣១ ខែសីហា ដើម្បីឱ្យអាជ្ញាធរអន្តរាគមន៍រកដំណោះស្រាយជូនពួកគាត់។ អ្នកភូមិអះអាងថា ទំនាស់ដីធ្លីរបស់ពួកគាត់បានអូសបន្លាយពេលជិត ១០ឆ្នាំហើយ ដោយបានប៉ះពាល់ដល់ជីវភាពរបស់ពួកគាត់ធ្វើឱ្យគ្មានដីដាំដុះរកប្រាក់ចំណូលចិញ្ចឹមជីវិត។
ពលរដ្ឋ ១៧០ គ្រួសាររស់នៅក្នុងភូមិចំនួន ៣ ក្នុងឃុំថ្មពួក ស្រុកថ្មពួក បន្តទាមទារដីចម្ការរបស់ខ្លួនទំហំសរុបជាង ១០០ហិកតារ ដែលពួកគាត់បានចោទប្រកាន់ថា ម្ចាស់ក្រុមហ៊ុនលី សំអាន គឺលោក លី សំអាន ឃុបឃិតជាមួយអាជ្ញាធរលួចធ្វើប្លង់រឹង ឬប្លង់កម្មសិទ្ធិរំលោភយកដីចម្ការពួកគាត់អស់ទាំងស្រុង កាលពីឆ្នាំ២០១៦។
តំណាងអ្នកតវ៉ាម្នាក់ គឺលោកស្រី ភឿន ឌួង ថ្លែងថា គោលបំណងនៃការតវ៉ានេះ គឺស្នើឱ្យអាជ្ញាធរកាត់ឆ្វៀលដីមានជម្លោះនោះជូនពលរដ្ឋបង្កបង្កើនផលវិញ ព្រោះក្រុមហ៊ុន មិនអនុញ្ញាតឱ្យអ្នកភូមិចូលទៅអាស្រ័យផល លើដីរបស់ខ្លួនទៀតទេ នៅរយៈពេល ៦ខែចុងក្រោយនេះ។ លោកស្រីចោទលោក លី សំអាន ជាម្ចាស់ក្រុមហ៊ុន លី សំអាន បានលួចធ្វើប្លង់រឹងរំលោភយកដីចម្ការពួកគាត់ទាំងស្រុង ហើយពួកលោកស្រីបានស្រែកតវ៉ាទាមទារជាច្រើនឆ្នាំមកហើយ តែគ្មានលទ្ធផលនោះទេ។ លោកស្រីបន្ថែមថា ដីមានជម្លោះនោះ ឋិតនៅខាងលិចភ្នំព្រះ ទំហំជាង ១រយហិកតារ ឬស្មើនឹង ៥៣ក្បាលដី គឺជាអាយុជីវិតរបស់ពួកគាត់ ដូច្នេះប្រសិនបើរដ្ឋាភិបាលមិនដោះស្រាយទេ អ្នកភូមិនឹងលំបាកវេទនា៖ «ក្រុមហ៊ុនគេថា ដីហ្នឹងមានប្លង់ ប៉ុន្តែដីហ្នឹង គឺពលរដ្ឋខំធ្វើពីដើមមក ពេលអ្នកភូមិទៅធ្វើគេជំទាស់ គេមិនឱ្យធ្វើទេ។ កាលពីពួកខ្ញុំទៅហែកទៅកាយ គេថាអត់មានប្លង់ទេ ហេតុអ្វីបានប្លង់ត្រូវចេញ មិនប្រក្រតី តែគេបានឆ្លើយថា គេមិនអាចនិយាយថយ ក្រោយទេ គេនិយាយទៅមុខ»។
វិទ្យុអាស៊ីសេរីមិនអាចទាក់ទងសុំការបំភ្លឺរឿងនេះ ពីអភិបាលខេត្តបន្ទាយមានជ័យលោក អ៊ុំ រាត្រី និងអ្នកនាំពាក្យសាលាខេត្តនេះលោក លី សារី បាននៅឡើយទេ នៅថ្ងៃទី៣១ ខែសីហា។ ចំណែកលោក លី សំអាន ជាម្ចាស់ក្រុមហ៊ុន លី សំអាន ដែលរងការចោទប្រកាន់នេះ ក៏មិនអាចទាក់ទងបានដែរ នៅថ្ងៃដដែលនេះ។
ប៉ុន្តែអ្នកភូមិថា ក្នុងពេលតវ៉ាពេញមួយព្រឹកនេះ អាជ្ញាធរខេត្តបានអនុញ្ញាតឱ្យតំណាងពលរដ្ឋ ៥នាក់ ចូលបំភ្លឺជាង ១ម៉ោងនៅក្នុងសាលាខេត្តបន្ទាយមានជ័យ ដោយមន្ត្រីសាលាខេត្ត បានប្រាប់ពួកគាត់ថា អាជ្ញាធរនឹងមិនដោះស្រាយរឿងបានទេ ព្រោះដីដែលពលរដ្ឋទាមទារ មានប្លង់កម្មសិទ្ធិ ឬប្លង់រឹង ស្របច្បាប់រួចរាល់ហើយ។
ពលរដ្ឋម្នាក់ទៀតលោកស្រី សុខ រ៉ាឌី ហួសចិត្តនៅគ្រាដែលអាជ្ញាធរខេត្តបន្ទាយមានជ័យ នៅតែឆ្លើយដោះសារពុំដោះស្រាយ ក្តីកង្វល់រួមរបស់ពលរដ្ឋ។ លោកស្រីថា អាជ្ញាធរខេត្តហាក់លម្អៀងខាងភាគីក្រុមហ៊ុន ព្រោះការធ្វើប្លង់រឹង ឬបណ្ណកម្មសិទ្ធិដីធ្លី បានរំលោភយកដីពួកគាត់ជាង ១០០ហិកតារ គឺជារឿងអយុត្តិធម៌ និងធ្វើបាបពលរដ្ឋក្រីក្រ៖ «បើថា ទៅកន្លែងច្បាប់តែគេមិនដោះស្រាយឱ្យមានតែនៅតាមដីរៀងខ្លួន ដីអ្នកណាក៏អ្នកហ្នឹងធ្វើ ហើយរឿងដែលអ្នកស្រុក ទៅក៏អ្នកស្រុកមិនបានទាមទារមិនបានយកដីក្រុមហ៊ុន។ អ្នកស្រុកថា ដីអ្នកស្រុកត្រឹមណាធ្វើត្រឹមហ្នឹង សុំតែប៉ុណ្ណឹងមិនបានសុំអីច្រើនទេ»។
ជុំវិញរឿងនេះ មន្ត្រីសម្របសម្រួលនៃសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យលោក ស៊ុំ ច័ន្ទគា យល់ថា ពលរដ្ឋតវ៉ាភាគច្រើនជាកសិករក្រីក្រ ខ្វះខាតដីបង្កបង្កើនផល អាជ្ញាធរគួរតែដោះស្រាយបញ្ហានេះដោយយុត្តិធម៌ ដើម្បីផ្តល់លទ្ធភាពឱ្យពលរដ្ឋបង្កបង្កើនផលរកចំណូលចិញ្ចឹមជីវិត។ លោកថា រដ្ឋាភិបាល គួរតែស៊ើបអង្កេតពីភាពមិនប្រក្រតីនៃការចេញបណ្ណកម្មសិទ្ធិ ឬប្លង់រឹង ប៉ះចំដីស្រែចម្ការរបស់ពលរដ្ឋចំនួន ៣ភូមិ បង្កើតឱ្យមានវិបត្តិដីធ្លីរ៉ាំរៃ៖ «ពួកគាត់កាន់កាប់ អាស្រ័យផលហើយ អាជ្ញាធរគួរតែពិនិត្យពិចារណា ដើម្បីឱ្យពួកគាត់ហ្នឹងបានទទួលនៅ ចំណែកលើដីរបស់ខ្លួនណាមួយដែល ដើម្បីឱ្យពួកគាត់បានស្ងប់អារម្មណ៍ វាប្រសើរជាងទុកឱ្យពួកគាត់ អត់មានដីធ្លី តែបែរជាក្រុមហ៊ុនអ្នកជំនួញ មានដីច្រើនរាប់រយហិកតារទៅវិញ»។
ក្រុមអ្នកតវ៉ាបាននាំគ្នាត្រឡប់ទៅផ្ទះវិញក្រោយពេលតំណាងរបស់ពួកគាត់ជួបពិភាក្សាជាមួយអាជ្ញាធរខេត្ត ហើយពួកគាត់ព្រមានថា នឹងនាំគ្នាមកតវ៉ាជាថ្មីទៀតនៅពេលឆាប់ៗខាងមុខ។
អ្នកភូមិថា បុរសឈ្មោះ លី សំអាន ដែលជាម្ចាស់ក្រុមហ៊ុនលីសំអាន បានយកពលរដ្ឋ ១៤គ្រួសារជាខែល ឈរឈ្មោះជំនួស ដើម្បីរំលោភយកដីចម្ការរបស់ពលរដ្ឋធ្វើជាកម្មសិទ្ធិផ្ទាល់ខ្លួន។ ពួកគាត់ចោទទៀតថា ការរំលោភយកដីចម្ការអ្នកស្រុក ដ៏ធំសម្បើមនេះ មានការឃុបឃិតជាប្រព័ទ្ធរវាងមន្ត្រីជំនាញសុរិយោដី អាជ្ញាធរមួយចំនួន និងលោក លី សំអាន ដែលគេស្គាល់ថា មានទំនាក់ទំនងជិតស្និទ្ធជាមួយ មន្ត្រីជាន់ខ្ពស់ក្នុងជួររដ្ឋាភិបាល និងបក្សកាន់អំណាច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។