ពលរដ្ឋប្រមាណ៣០០នាក់ តវ៉ានៅមុខសាលាឃុំនីពេជ ស្រុកកំពង់ស្វាយ ខេត្តកំពង់ធំ ស្នើឱ្យមេឃុំដោះស្រាយបញ្ហាម្ចាស់ដីមួយកន្លែងមិនអនុញ្ញាតឱ្យពលរដ្ឋធ្វើផ្លូវធ្វើដំណើរ។ មន្ត្រីអង្គការសង្គមស៊ីវិលលើកឡើងថា អាជ្ញាធរមូលដ្ឋានគួរដោះស្រាយបញ្ហាប្រជាពលរដ្ឋ និងកសាងផ្លូវជូនប្រជាពលរដ្ឋឱ្យបានឆាប់។
ក្រុមប្រជាពលរដ្ឋបាននាំគ្នាតវ៉ានៅខាងមុខសាលាឃុំនីពេជ ដោយបានដាំបាយ ក្រាលកៅស៊ូដេករង់ចាំមេឃុំដោះស្រាយបញ្ហាម្ចាស់ដីមួយកន្លែង គំរាមកំហែងមិនឱ្យប្រជាពលរដ្ឋធ្វើផ្លូវពីចំណុចវត្តនីពេជ ទៅកាន់ភូមិរបស់ពួកគាត់។ ក្រុមប្រជាពលរដ្ឋលើកឡើងថា ការចេញតវ៉ារបស់ពួកគាត់ គឺឱ្យតុលាការដោះលែងលោក ឡូត ឡាញ់ ដែលកំពុងជាប់ពន្ធនាគារដោយសារឈូសឆាយផ្លូវឱ្យប្រជាពលរដ្ឋបានធ្វើដំណើរ។ ពលរដ្ឋក៏ស្នើឱ្យតុលាការទម្លាក់បទចោទប្រកាន់ទៅលើប្រជាពលរដ្ឋ៤នាក់ ដែលបានចូលរួមឈូសឆាយផ្លូវ និងឱ្យមេឃុំសម្របសម្រួលជាមួយម្ចាស់ដី ដើម្បីឱ្យប្រជាពលរដ្ឋមានផ្លូវធ្វើដំណើរដូចដើមឡើងវិញ។
ប្រពន្ធលោក ឡូត ឡាញ់ ដែលកំពុងជាប់ពន្ធនាគារនៅខេត្តកំពង់ធំ ដោយសារតែឈូសឆាយផ្លូវសម្រាប់ប្រជាពលរដ្ឋធ្វើដំណើរ គឺលោកស្រី ឆែម សុឃឿន ប្រាប់វិទ្យុអាស៊ីសេរី នៅថ្ងៃទី២១ ខែធ្នូថា ចៅក្រមស៊ើបសួរសាលាដំបូងខេត្តកំពង់ធំ លោក ផូង វណ្ណ បានចោទប្រកាន់ប្ដីពីបទប្រើហិង្សា ទៅលើអ្នកកាន់កាប់អចលនវត្ថុដោយសុចរិត និងបានឃុំខ្លួនប្ដីនៅពន្ធនាគារខេត្តកំពង់ធំ កាលពីថ្ងៃទី៤ ខែធ្នូ។ លោកស្រីអះអាងថា ការឃុំប្ដីរបស់លោកស្រី គឺជារឿងអយុត្តិធម៌ ព្រោះប្ដីរបស់លោកស្រីមិនដែលប្រើអំពើហិង្សាទៅលើលោកស្រី សាន់ ចំប៉ា ដែលជាម្ចាស់ដីនៅសងខាងផ្លូវនោះទេ។
លោកស្រី ឆែម សុឃឿន៖ «ឈូសផ្លូវដើម្បីប្រជាពលរដ្ឋនៅក្នុងឃុំយើងទាំងអស់គ្នាហ្នឹងហើយបង ប៉ុន្តែត្រូវរងការចោទប្រកាន់អំពីគេ ហើយកូនខ្ញុំត្រូវទទួលសំពាធពីមិត្តភ័ក្ដិពេលដែលទៅរៀន គេនិយាយថា ឱ្យខ្ញុំសុទ្ធតែថា លោកពុកជាប់គុកអ៊ីចឹង អ៊ីចឹងខ្ញុំមានវិប្បដិសារីនៅក្នុងចិត្ត ដោយសារតែប្ដីខ្ញុំ រឿងធ្វើផ្លូវ»។
វិទ្យុអាស៊ីសេរី មិនអាចសុំការបកស្រាយពីលោកមេឃុំនីពេជ គឺលោក ឆឹង ញ៉េប បានឡើយ នៅថ្ងៃទី២១ ខែធ្នូ ដោយលោកលើកឡើងថា មិនផ្ដល់បទសម្ភាសន៍តាមរយៈទូរស័ព្ទ។
ម្ចាស់ដីដែលនៅសងខាងផ្លូវគឺលោកស្រី សាន់ ចំប៉ា ប្រាប់វិទ្យុអាស៊ីសេរីថា លោកស្រីមិនបានបិទផ្លូវទាំងស្រុងមិនឱ្យប្រជាពលរដ្ឋធ្វើដំណើរចេញចូលនោះឡើយ ហើយការប្ដឹងផ្ដល់ទៅលើប្រជាពលរដ្ឋ គឺដោយសារពួកគេឈូសឆាយធ្វើផ្លូវប៉ះពាល់របស់លោកស្រី ដោយមិនបានជូនដំណឹង។
លោក ឆឹង ញ៉េប៖ «ខ្ញុំអាចឱ្យផ្លូវចំណែកដីខ្ញុំផ្ទាល់ខ្លួន១០ម៉ែត្រ បើមិនគ្រប់ខ្ញុំឱ្យប្រាំដណ្ដប់ម៉ែត្រ ឬម្ភៃម៉ែត្រ ឱ្យតែឃុំត្រូវការរដ្ឋត្រូវការ ឱ្យមានកំណត់ហេតុត្រឹមត្រូវ ខ្ទង់ខែប្រាំមុនខ្ញុំព្រួស ខ្ញុំរៀបចំព្រួស(ស្រូវ)ឈ្មោះ ឡូត ឡាញ់ នេះបានទៅលួចឈូសឆាយដីខ្ញុំ។ ខ្ញុំមិនមែនប្ដឹងផ្លូវទេណា រុញដីខ្ញុំប្រហែលប្រាំដណ្ដប់ម៉ែត្រ ដីស្រែ ប្រហែល ១គីឡូ អត់មានប្រាប់ខ្ញុំមួយម៉ាត់ទេអូន»។
ឆ្លើយតបនឹងការលើកឡើងនេះ លោកស្រី ឆែម សុឃឿន មកអះអាងថា ការឈូសឆាយដីទំហំប្រមាណ៣ ម៉ែត្រ ប្រវែងជាង ១ពាន់ម៉ែត្រ ដើម្បីធ្វើផ្លូវឱ្យប្រជាពលរដ្ឋធ្វើដំណើរឱ្យបានស្រួលឡើងវិញកាលពីខែឧសភា កន្លងទៅ គឺប្ដីរបស់លោកស្រីបានប្រាប់មេភូមិដូនឈូកជាមុន។
ហើយខ្ញុំឆ្ងល់បើគាត់ឱ្យគេអ៊ីចឹងដដែល ចុះប្រជាពលរដ្ឋធ្វើគាត់ទៅប្ដឹងចាប់ប្រជាពលរដ្ឋធ្វើអី ខ្ញុំសួរអ៊ីចេះ? បានប្រជាពលរដ្ឋធ្វើហើយ មិនជួយសម្រាលដល់ថវិការបស់គាត់ ហើយហេតុអីបានជាគាត់ទៅចាប់អ្នកធ្វើផ្លូវ? ខ្ញុំឆ្ងល់តែប៉ុណ្ណេះទេ។
ជុំវិញរឿងនេះ អ្នកនាំពាក្យសមាគមការពារសិទ្ធិមនុស្សអាដហុក (ADHOC) លោក ស៊ឹង សែនករុណា មានប្រសាសន៍ថា អាជ្ញាធរមូលដ្ឋានគួរពន្លឿនការដោះស្រាយជូនប្រជាពលរដ្ឋដែលមានបញ្ហាមិនអាចធ្វើផ្លូវធ្វើដំណើរឱ្យបានឆាប់ៗ ជាជាងបន្តគេចវេះមិនព្រមដោះស្រាយឱ្យប្រជាពលរដ្ឋ។
លោក ស៊ឹង សែនករុណា៖ «បើយើងពិនិត្យអំពីរដ្ឋធម្មនុញ្ញអំពីប្រទេសយើង កាលណាមានការទាមទារ តវ៉ាពីប្រជាពលរដ្ឋទៅអង្គការរដ្ឋណាមួយ អង្គការរដ្ឋហ្នឹងត្រូវពិនិត្យនូវសំណើ និងការទាមទារតវ៉ាហ្នឹងដោយល្អិតល្អន់ ហើយយកចិត្តទុកដាក់ ដើម្បីរកដំណោះស្រាយតបត្រឡប់ទៅវិញ មិនមែនអូសបន្លាយពេល ពន្យារពេលធ្វើឱ្យខាតប្រយោជន៍ ខាតពេលវេលាប្រជាពលរដ្ឋទេ អ៊ីចឹងត្រូវរកដំណោះស្រាយដោយយុត្តិធម៌ទៅដល់ពួកគាត់»។
គិតមកដល់ម៉ោងផ្សាយនេះ ក្រុមប្រជាពលរដ្ឋដែលចេញតវ៉ានៅបរិវេណសាលាឃុំនីពេជ បាននាំគ្នារំសាយ និងធ្វើដំណើរទៅផ្ទះរៀងៗខ្លួនវិញហើយ បន្ទាប់ពីមេឃុំនីពេជ លោក ឆឹង ញ៉េប ចេញមកបកស្រាយថា ប្រជាពលរដ្ឋត្រូវតែសុំការអនុញ្ញាតពីលោកស្រី សាន់ ចំប៉ា មុននឹងឈូសឆាយធ្វើផ្លូវទំហំ ៦ម៉ែត្រឡើងវិញ។ ទោះជាយ៉ាងណា តំណាងក្រុមប្រជាពលរដ្ឋដែលចេញតវ៉ាប្រាប់វិទ្យុអាស៊ីសេរីថា ក្រុមប្រជាពលរដ្ឋនឹងធ្វើដំណើរទៅតវ៉ានៅក្រុងស្ទឹងសែន ខេត្តកំពង់ធំជាថ្មីម្ដងទៀតនៅថ្ងៃទី២២ ខែធ្នូ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។