សកម្មជនដីធ្លីខេត្តកោះកុងលើកឡើងថា ការកោះហៅពួកគាត់ភ្លាមៗក្រោយពីពួកគាត់ ទើបតែចេញពីពន្ធនាគារ គឺជាការបំបាក់ស្មារតី និងធ្វើឲ្យប៉ះពាល់ខ្លាំងដល់ជីវភាពរបស់ពួកគាត់ ។ មន្ត្រីអង្គការសង្គមស៊ីវិលថា តុលាការគួរតែទម្លាក់ការចោទប្រកាន់លើសកម្មជនដីធ្លីទាំងពីរនាក់នេះ ព្រោះពួកគាត់ ពុំបានប្រព្រឹត្តខុសច្បាប់អ្វីទេ។
សកម្មជនដីធ្លីខេត្តកោះកុង ទាមទារឲ្យតុលាការជាន់ខ្ពស់លុបចោលការចោទប្រកាន់លើពួកគាត់ ដើម្បីឲ្យពួកគាត់ មានសេរីភាព រកស៊ីចិញ្ចឹមជីវិតឡើងវិញ។
សកម្មជនដីធ្លី ខេត្តកោះកុងលោកស្រី ផាវ ញ៉ើង ប្រាប់វិទ្យុអាស៊ីសេរីនៅថ្ងៃទី២១ តុលាថា លោកស្រីនឹងចូលខ្លួនតាមការកោះហៅរបស់សាលាឧទ្ធរណ៍ព្រះសីហនុ បើទោះបីជាកំពុងជួបបញ្ហាសេដ្ឋកិច្ច និងជំងឺប្រចាំកាយស្ថិតក្នុងសភាពធ្ងន់ធ្ងរក៏ដោយ។ លោកស្រីស្នើដល់លោកនាយករដ្ឋមន្ត្រី ហ៊ុន ម៉ាណែត អន្តរាគមន៍ជំរុញដល់សាលាឧទ្ធរណ៍ព្រះសីហនុស្វែងរកយុត្តិធម៌ ចំពោះតំណាងសហគមន៍។
លោកស្រី ផាវ ញ៉ើង៖ «សកម្មភាពការពារដីរដ្ឋ គឺជាសកម្មភាពពិតរបស់ប្រជាពលរដ្ឋ ហើយខ្ញុំក៏ចូលរួមដែរ។ នេះគឺជាសិទ្ធិរបស់ពលរដ្ឋ ហើយចុះច្បាប់រដ្ឋធម្មនុញ្ញចែងថា ប្រជាពលរដ្ឋខ្មែរមានសិទ្ធិការពារទ្រព្យសម្បត្តិជាតិ ហេតុអ្វីបានជាពួកលោកគ្រាន់តែទៅដាក់ពាក្យបណ្ដឹង ហើយទៅស្នើសុំឲ្យមានការដកហូតឲ្យដីរដ្ឋហ្នឹងមកគ្រប់គ្រង ហើយសម្បត្តិរដ្ឋហ្នឹងឲ្យពលរដ្ឋក្រីក្រ ហេតុអ្វីខ្ញុំជាអ្នកញុះញង់ទៅវិញ?អ្វីដែលខ្ញុំសោកស្ដាយ គឺតុលាការខេត្តកោះកុងក៏ដោយ តុលាការណាក៏ដោយ តុលាការគឺជាកំពូលអ្នកច្បាប់ ហើយអ្នកដែលអាចការពារឲ្យពលរដ្ឋអ៊ីចឹង ហេតុអ្វីបើសិនជាអ្នកច្បាប់ក្នុងខេត្តកោះកុងហ្នឹងមួយចំនួនហ្នឹងអត់ខ្វល់ពីច្បាប់អ៊ីចឹង បែរទៅជាគាត់ចោទប្រកាន់ខ្ញុំហើយ គាត់ចេញដីកាឃុំខ្លួនខ្ញុំទៀត»។
ព្រះរាជអាជ្ញា នៃមហាអយ្យការអមសាលាឧទ្ធរណ៍ប្រចាំតំបន់ តាំងនៅខេត្តព្រះសីហនុ លោក សុខ ហេង កាលពីថ្ងៃទី១៩ តុលា បានចេញដីកាកោះហៅសកម្មជនដីធ្លីលោកស្រី ផាវ ញ៉ើង និងលោកស្រី សេង លីន ដើម្បីពិភាក្សាដេញដោលពីបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម និងបទបរិហារកេរ្តិ៍ជាសាធារណៈ ដែលបានប្រព្រឹត្តនៅមុខក្រសួងដែនដី នគរូបនីយកម្ម និងសំណង់ ក្នុងរាជធានីភ្នំពេញកាលពីចុងឆ្នាំ២០១៩ តាមការប្ដឹងជំទាស់របស់តំណាងសហគមន៍ ចំពោះសាលក្រមរបស់សាលាដំបូងខេត្តកោះកុង កាលពីខែសីហា ។
ជាមួយគ្នានេះ សកម្មជនដីធ្លី ខេត្តកោះកុង ៩នាក់ផ្សេងទៀត រួមមានលោកស្រី ដេត ហួរ លោកស្រីកើត នៅ និងលោក សុខ ជ័យ ជាដើម ត្រូវបានព្រះរាជអាជ្ញា នៃមហាអយ្យការអមសាលាឧទ្ធរណ៍ព្រះសីហនុ លោក ខៀវ ផល្លា កាលពីថ្ងៃទី១៨ តុលា បានចេញដីកាកោះហៅពួកគាត់ទាំង៩នាក់ឲ្យចូលសវនាការ នៅថ្ងៃទី២៦ តុលា ដើម្បីដេញដោលពីបទបរិហារកេរ្តិ៍ និងញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គម ដែលប្រព្រឹត្តនៅខេត្តកោះកុង។
វិទ្យុអាស៊ីសេរី នៅពុំទាន់អាចទាក់ទងអ្នកនាំពាក្យសាលាឧទ្ធរណ៍ព្រះសីហនុ លោក លឹម ស៊ីណាត ដើម្បីសុំការឆ្លើយតបជុំវិញបញ្ហានេះបាននៅឡើយទេ នៅថ្ងៃទី២១ តុលានេះ។
ជុំវិញរឿងនេះ អ្នកសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា (CCHR) លោក វណ្ណ សូផាត មានប្រសាសន៍ថា សកម្មភាពទាមទារឲ្យមានដំណោះស្រាយវិវាទដីធ្លីកន្លងទៅជាការអនុវត្តសិទ្ធិសេរីភាពជាមូលដ្ឋាន ស្របតាមច្បាប់ និងសិទ្ធិក្នុងចូលរួមការពារសម្បត្តិសាធារណៈរបស់រដ្ឋ។
លោក វណ្ណ សូផាត៖ «អ៊ីចឹងសង្ឃឹមថា តុលាការនឹងពិចារណានឹងទម្លាក់ចោលការចោទប្រកាន់ តែផ្ទុយទៅវិញអ្នក ដែលប្រព្រឹត្តបទល្មើសក្នុងការរុករានទន្ទ្រានព្រៃ ឬមួយក៏រំលោភយកដីសាធារណៈរបស់រដ្ឋទៅលក់ ដើម្បីប្រយោជន៍ឯកជន អាហ្នឹងបានមានទោស តែពួកគាត់នេះ ជាអ្នកដែលការពារដីសាធារណៈរបស់រដ្ឋ»។
ពលរដ្ឋនៅខេត្តកោះកុងរាប់ពាន់គ្រួសារ បានបាត់បង់ដីធ្លី ដោយសារការផ្ដល់ដីសម្បទានសេដ្ឋកិច្ចរបស់រដ្ឋាភិបាល ទៅឱ្យឧកញ៉ា និងអ្នកមានអំណាច ក្នុងនោះ មានលោក លី យ៉ុងផាត់ និងលោក ហេង ហ៊ុយ មន្ត្រីជាន់ខ្ពស់ក្រសួងមហាផ្ទៃ។ ពួកគាត់បានព្យាយាមតវ៉ា និងដើរដាក់ញត្តិរាប់មិនអស់ ទាំងនៅថ្នាក់ខេត្ត និងតាមក្រសួងស្ថាប័ននៅថ្នាក់ជាតិ ដើម្បីស្វែងរកដំណោះស្រាយដីធ្លីអូសបន្លាយអស់រាប់ឆ្នាំមកហើយ ប៉ុន្តែមិនដែលទទួលបានដំណោះស្រាយឡើយ ក៏ប៉ុន្តែតុលាការបានចោទប្រកាន់ពួកគាត់ពីបទព្រហ្មទណ្ឌ និងបានឃុំខ្លួនពួកគាត់ក្នុងពន្ធនាគារថែមទៀត។ បើទោះបីជា តំណាងសហគមន៍ត្រូវបានតុលាការឲ្យនៅក្រៅឃុំបណ្ដោះអាសន្នក្ដី ក៏ពួកគាត់នៅពុំទាន់រួចផុតពីការចោទប្រកាន់នោះទេ។
ទោះជាយ៉ាងណាសកម្មជនដីធ្លី និងមន្ត្រីអង្គការសង្គមស៊ីវិល នៅតែទទូចដល់រដ្ឋាភិបាល ជំរុញដល់តុលាការស្វែងរកយុត្តិធម៌សម្រាប់តំណាងសហគមន៍ ដែលការពារសម្បត្តិសាធារណៈរបស់រដ្ឋ និងចាត់វិធានការច្បាប់ចំពោះជនខិលខូច ដែលគប់គិតគ្នាលក់ទ្រព្យសម្បត្តិជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។