អាជ្ញាធរស្រុកស្វាយជ្រំ ផាកពិន័យតំណាងពលរដ្ឋ២នាក់ ដោយបង្គាប់ឲ្យបង់ប្រាក់ម្នាក់២លានរៀល (២.០០០.០០០) ករណីប្រមូលផ្ដុំពលរដ្ឋលើកបដាតវ៉ារកដំណោះស្រាយដីធ្លី នៅទីតាំងមានជម្លោះ។ សង្គមស៊ីវិលស្នើសុំអាជ្ញាធរទម្លាក់ចោលការផាកពិន័យនេះ ដោយប្រើវិធានការព្រមានជំនួស ព្រោះពួកគាត់ក៏ជាអ្នករងផលប៉ះពាល់ពីគម្រោងសាងសង់អាងទឹករបស់រដ្ឋាភិបាលដែរ។
សាលាស្រុកស្វាយជ្រំ បង្គាប់ឲ្យសហគមន៍ចេកមាសលោកស្រី ឥន សូត្រ និងលោកស្រី យស់ សោភ័ណ្ឌ បង់ប្រាក់ម្នាក់ ២ លានរៀល នៅសាលាខេត្តស្វាយរៀង ដោយទុកពេលដល់ដំណាច់ខែសីហា ករណីល្មើសបម្រាមសាលាខេត្ត ដែលហាមមិនឲ្យពលរដ្ឋជុំគ្នាច្រើន ក្នុងអំឡុងពេលមានការរីករាលដាលជំងឺកូវដី-១៩។ អាជ្ញាធរព្រមានថា ប្រសិនបើអ្នកទាំងពីរ មិនបានបង់ប្រាក់តាមការសម្រេចនេះទេ នោះនឹងត្រូវបញ្ជូនសំណុំរឿងទៅតុលាការ។
តំណាងពលរដ្ឋមានជម្លោះដីធ្លីម្នាក់គឺអ្នកស្រី ឥន សូត្រ ដែលត្រូវសមត្ថកិច្ចហៅឲ្យទៅសាលាឃុំឈើទាលថ្លែងថា ការមិនបានដោះស្រាយបញ្ហាដីធ្លីជូនពលរដ្ឋក្រីក្រហើយថែមទាំងដាក់ពិន័យឲ្យបង់ប្រាក់ទៀតពីសំណាក់អាជ្ញាធរនេះ គឺជារឿងអយុត្តិធម៌ និងមិនអាចទទួលយកបាននោះទេ។
លោកស្រីបញ្ជាក់ថា លោកស្រីនិងតំណាងពលរដ្ឋម្នាក់ទៀត នឹងមិនបង់ប្រាក់តាមការពិន័យទេ ព្រោះគាត់គ្មានប្រាក់បង់ឲ្យសាលាខេត្តនោះទេ បើជីវភាពសព្វថ្ងៃ រកមួយថ្ងៃ សម្រាប់ចម្អែតក្រពះមួយថ្ងៃនោះ។
តំណាងពលរដ្ឋរូបនេះ ស្នើសុំអាជ្ញាធរទម្លាក់ចោលការផាកពិន័យ ព្រោះការជួបជុំគ្នាលើកបដានៅវាលស្រែដែលបង្ហោះក្នុងបណ្ដាញសង្គមហ្វេសប៊ុក(FacebooK)កាលពីពេលថ្មីៗនេះ គឺមានបំណងចង់បានសំណងដីធ្លី៣ដុល្លារក្នុងម៉ែត្រការ៉េ មិនមែន ៩០០រៀល ដូចដែលអាជ្ញាធរផ្ដល់ឲ្យនោះទេ៖ «ខ្ញុំយល់ឃើញថា អយុត្តិធម៌សម្រាប់ពួកខ្ញុំអ្នកក្រ។ មិនត្រឹមត្រូវទេ មកចាប់ពួកខ្ញុំឲ្យបង់ ព្រោះខ្ញុំធ្វើអ្វីខុសទេ ដោយសារពួកគាត់ធ្វើមុន បានខ្ញុំធ្វើ។ ហើយខ្ញុំមិនសុខចិត្ត ខ្ញុំនិយាយរឿងការពិត។ ខ្ញុំគ្មានរឿងអ្វីត្រូវខុសច្បាប់ទេ។ ហើយបើគាត់មកឲ្យសងអ៊ីចឹង វាត្រឹមត្រូវទេ។ ដូចជាគាបសង្កត់អ្នកទន់ខ្សោយ អ្នកក្រីក្រ ទៅជាអាជ្ញាធរ មានអំណាចបុណ្យស័ក្ដិធំ មិនខុសអ្វីផង ឲ្យខុសតែរាស្ត្រ ដូចជាវាមិនត្រឹមត្រូវ»។
វិទ្យុអាស៊ីសេរីមិនអាចសុំការឆ្លើយតបរឿងនេះ ពីអភិបាលរងស្រុកស្វាយជ្រំលោក ប៉ុល សារិទ្ធ ដែលផាកពិន័យពលរដ្ឋ២នាក់ និងអភិបាលស្រុកលោក ហែម សារិទ្ធ នៅថ្ងៃទី៤ ខែសីហានេះ បាននៅឡើយទេ ដោយលោកទាំងពីរប្រាប់ថា រវល់ជាប់ប្រជុំ។
ទោះបីជាយ៉ាងលោក ហែម សារិទ្ធ បានប្រាប់សារព័ត៌មានវីអូឌីថា បញ្ហាដីធ្លីនេះ ខាងក្រសួងពាក់ព័ន្ធបានដោះស្រាយជូនពលរដ្ឋជាបន្តបន្ទាប់ហើយ ដោយប្រជាពលរដ្ឋប្រមាណ ៩០ ភាគរយ ព្រមទទួលយកសំណង នៅសេសសល់ពលរដ្ឋមួយចំនួនតូចនៅប្រកាន់ជំហរមិនព្រមទទួលយក។
ទាក់ទងរឿងនេះ មន្ត្រីសម្របសម្រួលអង្គការលីកាដូប្រចាំខេត្តស្វាយរៀង (Licadho) លោក នុត បូពិណ្ណារ័ត្ន មានប្រសាសន៍ថា ការផាកពិន័យប្រាក់ចំពោះតំណាងពលរដ្ឋនេះ ទំនងជាចង់គំរាមបំបាក់ស្មារតីពួកគាត់ កុំឲ្យប្រមូលផ្ដុំគ្នាតវ៉ាបន្តទៀត។
លោកយល់ថា ក្នុងអំឡុងពេលមានវិបត្តិកូវីដ-១៩នេះ អាជ្ញាធរគួរតែលើកលែងការផាកពិន័យនេះ ដោយបង្គាប់ឲ្យពលរដ្ឋធ្វើកិច្ចសន្យាឈប់ធ្វើទង្វើបែបនេះ ទើបជាការប្រសើរ ព្រោះពួកគាត់ក៏ជាអ្នករងផលប៉ះពាល់ពីគម្រោងសាងសង់អាងទឹករបស់រដ្ឋាភិបាលដែរ៖ «ដំណាក់កាលនេះ យើងទៅពិន័យគាត់ពីរនាក់ជាតំណាងសហគមន៍ វាហាក់ជាអយុត្តិធម៌លើគាត់។ គាត់ក៏ជាអ្នករងគ្រោះលើដីហ្នឹងដែរ។ អ៊ីចឹង ! គាត់មានសិទ្ធិក្នុងការទាមទារ។ ឬក៏យើងគិតថា តំណាងសហគមន៍ជាអ្នកញុះញង់។ គេចោទថា គាត់ញុះញង់។ បើថា ផាកពិន័យគួរតែយោគយល់ដល់ចំណុចត្រង់នេះមួយ គាត់រងគ្រោះលើដីធ្លីរាប់សិបឆ្នាំមកហើយ។ អ៊ីចឹង ! ដំណាក់កាលនេះ យើងអាចថា យើងព្រមានគាត់លើកទី១ អីសិនទៅ ព្រោះយើងផាកពិន័យ ទាល់តែផាកទាំងអស់គ្នា ប៉ុន្មានសិបនាក់ហ្នឹង។ ហ្នឹង ! បានវាស្មើភាពគ្នា។ បើផាកតែ២នាក់។ អ៊ីចឹង ! វារងអយុត្តិធម៌ចំពោះការផាកហ្នឹងខ្លាំងក្លាណាស់»។
កាលពីថ្ងៃទី២ ខែសីហា ពលរដ្ឋមួយក្រុមមានគ្នា៣០នាក់ នៅក្នុងភូមិចេកមាស ឃុំឈើទាល និងមួយក្រុមទៀតមានគ្នា៤០នាក់នៅភូមិធ្នង់ ឃុំស្វាយធំ បានប្រមូលផ្ដុំគ្នាលើកបដា នៅលើដីស្រែពួកគាត់ ដើម្បីទាមទារឱ្យអាជ្ញាធរផ្ដល់សំណងសមរម្យក្នុងជម្លោះដីធ្លីពួកគាត់ ក្រោយពីដឹងថា អាជ្ញាធរមូលដ្ឋានផ្ដល់សំណងត្រឹមតែ ៩០០រៀល ក្នុងមួយម៉ែត្រការ៉េ។
ពលរដ្ឋមានជម្លោះដីធ្លីជាង ១០០ គ្រួសារ ដែលរស់នៅអាស្រ័យផលធ្វើស្រែលើដីសរុបជិត ១០០ ហិកតារ តាំងពីឆ្នាំ១៩៧៩ នៅស្រុកស្វាយជ្រំ ស្នើសុំអាជ្ញាធរខេត្តស្វាយរៀង និងក្រសួងធនធានទឹកប្ដូរគោលនយោបាយផ្ដល់សំណងឲ្យពលរដ្ឋពី៩០០រៀលក្នុងម៉ែត្រការ៉េ ទៅ ១ម៉ឺន ២ពាន់រៀល ឬ៣ដុល្លារក្នុងម៉ែត្រវិញ។
ប្រជាសហគមន៍ចេកមាស ប្រកាន់ជំហរថា ប្រសិនបើក្រសួងនិងអាជ្ញាធរពាក់ព័ន្ធមិនព្រមផ្ដល់សំណងតាមការទាមទារទេ ពួកគាត់នឹងមិនបញ្ឈប់ការតវ៉ាឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។