ប្រជាពលរដ្ឋក្នុងសហគមន៍បឹងឈូកអេ (A) កំពុងរស់នៅទាំងលំបាកវេទនា បន្ទាប់ពីអាជ្ញាធរខណ្ឌឬស្សីកែវជាច្រើននាក់ចុះរុះរើផ្ទះរបស់ពួកគេចំនួន ២០គ្រួសាររស់នៅលើដីបឹងក្នុងភូមិបឹងឈូក សង្កាត់គីឡូម៉ែត្រលេខ៦ ដើម្បីយកដីធ្វើផ្លូវឱ្យក្រុមហ៊ុនឯកជនធ្វើអាជីវកម្ម ដោយមិនផ្តល់សំណងសមរម្យ។ មន្រ្តីសង្គមស៊ីវិលយល់ថា ការបណ្តោញពលរដ្ឋទាំងបង្ខំ គឺរំលោភសិទ្ធិមនុស្សនិងច្បាប់យ៉ាងធ្ងន់ធ្ងរ ដូច្នេះអាជ្ញាធរគួរតែផ្តល់សំណងសមរម្យជូនប្រជាពលរដ្ឋទាំងនោះ។
ប្រជាពលរដ្ឋក្នុងសហគមន៍បឹងឈូកអេ (A) កំពុងក្រាញននៀលរស់នៅលើទីតាំងដីដដែល ទោះបីជាអាជ្ញាធរ បានឈូសឆាយកម្ទេចផ្ទះសម្បែងរបស់ពួកគាត់ក៏ដោយ។ ពួកគាត់ ទាមទារឲ្យអាជ្ញាធរក្រុងភ្នំពេញ ទទួលខុសត្រូវ និងផ្តល់សំណងសមរម្យជូនពួកគាត់។
ប្រជាពលរដ្ឋសហគមន៍បឹងឈូកអេលោក កែវ តុង រៀបរាប់ប្រាប់ថាលោកមានដីទំហំ ៤ គុណនឹង ១០ ម៉ែត្រ ស្មើនឹង ៤០ ម៉ែត្រការ៉េ ផ្ទះឈើដំបូលប្រក់ស័ង្កសី និងផ្ទះថ្មពលរដ្ឋផ្សេងទៀតត្រូវអាជ្ញាធរខណ្ឌឬស្សីកែវបានឈូសឆាយនិងរុះរើរាបដល់ដី។ លោកបន្តថា ពេលនេះគ្រួសារលោកជួបទុក្ខលំបាកជាខ្លាំងដូចជាគ្មានស្បៀងអាហារហូបចុក បំណុលធនាគារ ជាពិសេសគ្មានកន្លែងស្នាក់នៅ។ លោកឱ្យដឹងទៀតថា បច្ចុប្បន្នឪពុក ប្រពន្ធនិងកូនតូចៗរបស់លោកត្រូវដេកលើរ៉ម៉ក់ និងតង់កៅស៊ូក្រោមកំដៅថ្ងៃ ហាលភ្លៀងលើដីនោះយ៉ាងលំបាកវេទនា ប៉ុន្តែពួកលោកកំពុងបារម្ភអាជ្ញាធរបណ្តេញពួកគាត់ចេញពីទីនោះទាំងបង្ខំតទៅទៀត៖ «លុយដែលគេឱ្យថ្លៃរុះរើហ្នឹងខ្ញុំអត់យកទេ គឺខ្ញុំមុនរុះសុំថតរូបមុនផ្ទះខ្ញុំហើយ ខ្ញុំអត់ប្រឆាំងជាមួយរដ្ឋាភិបាលទេតែខ្ញុំសុំឱ្យមានដំណោះស្រាយ បាទព្រោះវគ្គនេះមិនអាចរកផ្ទះជួលមានក៏គេមិនរកឱ្យយើងដែរ»។
តំណាងសហគមន៍បឹងឈូកអេលោក អូន សំអ៊ន់ ប្រាប់ថា ដីជុំវិញសហគមន៍បឹងឈូកអេ សំបូរដោយដីអ្នកមានអំណាច ចំណែកតម្លៃដីលើទីផ្សារវិញនៅតំបន់នេះជាង១ពាន់ដុល្លារអាមេរិកក្នុងមួយម៉ែត្រការ៉េ។ លោកបន្តថា អាជ្ញាធរតែងតែប្រើរូបភាពគំរាមកំហែងដល់ពលរដ្ឋនៅក្នុងសហគមន៍ដើម្បីបង្ខំឱ្យពួកគាត់ទទួលយកសំណងបន្តិចបន្តួចចន្លោះ ២រយដុល្លារ ទៅ ៥រយដុល្លារ ក្នុងមួយខ្នងផ្ទះ ប៉ុន្តែពួកគាត់ប្តេជ្ញាចិត្តមិនចាកចេញ និងទទួលយកសំណងនោះទេ ប្រសិនបើគ្មានដំណោះស្រាយសមរម្យ ព្រោះពួកគាត់មានជីវភាពក្រីក្រ គ្មានលទ្ធភាពរកទិញដីនិងសាងសងផ្ទះនៅកន្លែងផ្សេងនោះទេ៖ «ខ្ញុំបាននិយាយជាមួយអាជ្ញាធររួចហើយថា ខ្ញុំបើចេញទៅស្លាប់ខ្ញុំអត់ចេញទៅទេ បើនៅស្លាប់ខ្ញុំសុខចិត្តស្លាប់នៅកន្លែងនេះហើយ សុខចិត្តតស៊ូដើម្បីកូនចៅលំនៅឋានរបស់ខ្លួនខ្ញុំសហគមន៍ចង់ឱ្យមានដំណោះស្រាយដោះដូរដីលំនៅឋានដូចគោលនយោបាយរបស់សាលារាជធានី សាលាខណ្ឌឬស្សីកែវដោះដូរមុនៗហ្នឹង»។
ប្រជាពលរដ្ឋរងគ្រោះ លើកឡើងដូចៗគ្នាថា អាជ្ញាធរទំនងរុះរើផ្ទះសម្បែងរបស់ពួកគាត់ដើម្បីធ្វើផ្លូវចូលទៅគម្រោងបុរីក្រុមហ៊ុនឯកជនកំពុងចាក់ដីនិងបុកគ្រឹះនៅក្បែរនោះ ដែលប្រជាពលរដ្ឋដាក់ការសង្ស័យថា ជាដីរបស់អភិបាលរាជធានីភ្នំពេញលោក ឃួង ស្រេង។ ពលរដ្ឋចោទថា អាជ្ញាធរចង់យកដីលំនៅឋានពួកគាត់រស់នៅធ្វើផ្លូវដើម្បីបំរើផលប្រយោជន៍អ្នកមានអំណាចនិងក្រុមហ៊ុនឯកជនដោយមើលរំលងទុក្ខលំបាកពលរដ្ឋ។
វិទ្យុអាស៊ីសេរីមិនអាចទាក់ទងអភិបាលរាជធានីភ្នំពេញលោក ឃួង ស្រេង ដើម្បីសុំការបកស្រាយជុំវិញរឿងនេះបានទេនៅថ្ងៃទី៨ ខែសីហា។ ចំណែកចៅសង្កាត់គីឡូម៉ែត្រលេខ៦ លោក ស្តើង មានិត ប្រាប់ថា លោកមិនបកស្រាយរឿងនេះទេ ដោយលោករុញឱ្យសួរស្មៀនសង្កាត់វិញ។
មន្រ្តីសម្របសម្រួលគម្រោងធុរកិច្ច និងសិទ្ធិមនុស្សរបស់មជ្ឈមណ្ឌលសិទ្ធិមនុស្សកម្ពុជាលោក វណ្ណ សុផាត ថ្លែងថា តាមច្បាប់ប្រសិនបើពលរដ្ឋរស់នៅលើដីឯកជនរបស់រដ្ឋមុនច្បាប់ភូមិបាលចូលជាធរមាននៅថ្ងៃទី៣០ ខែសីហា ២០០១ ពួកគាត់មានសិទ្ធិកាន់កាប់ដីនោះស្របច្បាប់។ លោកសង្កេតឃើញថា ការឈូសឆាយកម្ទេចផ្ទះពលរដ្ឋបែបនេះ គឺអំពើរំលោភសិទ្ធិមនុស្សធ្ងន់ធ្ងរ ពិសេសរំលោភសិទ្ធិមានលំនៅឋាននិងមានដីធ្លីពួកគាត់ដែលធានាដោយរដ្ឋធម្មនុញ្ញ ដូច្នេះរដ្ឋត្រូវផ្តល់សំណង ឬប្តូរទីតាំងថ្មីឱ្យពួកគាត់រស់នៅសមរម្យឡើងវិញ។ លោកយល់ថា ស្ថានភាពរីករាលដាលជំងឺកូវីដ-១៩ អាជ្ញាធរមិនត្រូវបណ្តេញពលរដ្ឋពីលំនៅឋានទេ ពីព្រោះពលរដ្ឋកំពុងត្រូវការដីនិងលំនៅឋាន ដើម្បីការពារជំងឺកូវីដ១៩៖ «រដ្ឋាភិបាលត្រូវតែគិតគូរនិងធ្វើអន្តរាគមន៍ជាបន្ទាន់ចំពោះប្រជាពលរដ្ឋដែលរងផលប៉ះពាល់ ហើយប្រសិនថា គាត់ចេញទៅសួរថា តើឱ្យពួកគាត់នៅកន្លែងណា គាត់អត់មានដីអត់ផ្ទះសម្បែងហ្នឹង ហើយធ្លាប់សន្យាគាត់ហើយហ្នឹងរហូតដល់បច្ចុន្បន្នបានឱ្យលុយ ១០ម៉ឺនឱ្យ ២រយដុល្លារយកទៅធ្វើអីឥឡូវហ្នឹង ចឹងបានការអនុវត្តច្បាប់នៅស្រុកយើងរឿងដីធ្លីនេះកក្រើកឡើងវិញហើយ ជាពិសេសអំឡុងពេលកូវីដ-១៩ហ្នឹង»។
ពលរដ្ឋអះអាងថា ពួកគាត់បានរស់នៅលើដីនេះជាង ២៥ ឆ្នាំមកហើយ តាំងពីតំបន់នោះនៅលក្ខណៈជាបឹងនៅឡើយ ហើយកកើតជាភូមិឋាន និងផ្លូវដែលមានមនុស្សរស់នៅច្រើន។ ពួកគាត់ឱ្យដឹងថា កាលពីខែសីហា ឆ្នាំ២០២០ អាជ្ញាធរខណ្ឌឬស្សីកែវបានជួបពិភាក្សារកដំណោះស្រាយជាមួយពួកគាត់ដែរ ដោយអាជ្ញាធរសន្យាថា នឹងរកដីទីតាំងថ្មីជូនពួកគាត់។ ប៉ុន្តែនៅថ្ងៃទី២ ខែសីហា អាជ្ញាធរបានកោះហៅប្រជាពលរដ្ឋទៅជួបដើម្បីរកដំណោះស្រាយ ស្រាប់តែសមត្ថកិច្ចនិងសន្តិសុខប្រមាណ ៥០ នាក់បែរជាដាក់គ្រឿងចក្រចុះឈូសឆាយកម្ទេច ផ្ទះពលរដ្ឋនៅសហគមន៍បឹងឈូកអេ ចំនួន ១៥ ខ្នងផ្ទះ ក្នុងចំណោម ២០ ខ្នងផ្ទះ។ ក្រុមពលរដ្ឋ លើកឡើងថា ពួកគាត់មិនប្រឆាំងនឹងការអភិវឌ្ឍរបស់អាជ្ញាធរទេ ប៉ុន្តែពួកគាត់ទាមទារឱ្យអាជ្ញាធរផ្តល់ដីទីតាំងថ្មីដល់ពួកគាត់ទាំងអស់ ដើម្បីឱ្យពួកគេមានទីជម្រកថ្មីស្នាក់អាស្រ័យ និងប្រកបមុខរបរចិញ្ចឹមជីវិត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។