តំណាងជនជាតិដើមភាគតិច ៥០នាក់ រស់នៅឃុំប៊ូស្រា និងឃុំដាក់ដាំ ខេត្តមណ្ឌលគិរី បានផ្ដិតមេដៃស្នើសុំអាជ្ញាធរស្រុក ដកហូតដីមានទំហំ ៣ពាន់ហិកតារពីក្រុមហ៊ុនសម្បទានសេដ្ឋកិច្ច មេហ្គា ហ្វើស (Mega First Corporation Berhad)។ អ្នកភូមិថា ក្រុមហ៊ុននេះបានឈូសឆាយប៉ះពាល់តំបន់កប់សព ព្រៃសក្ការបូជា និងប៉ះពាល់ប្រភពទឹកអូរដែលសហគមន៍រាប់ពាន់គ្រួសារអាស្រ័យផល។
តំណាងជនជាតិដើមភាគតិច មកពីឃុំចំនួន ២ ក្នុងស្រុកពេជ្រាដា និងស្រុកអូររាំង បានយកញត្តិមានស្នាមមេដៃ អ្នកភូមិជាង ៥០នាក់ ដែលមានខ្លឹមសារទាមទារដីទំហំ ៣ពាន់ហិកតារ ពីក្រុមហ៊ុនសម្បទានសេដ្ឋកិច្ច មេហ្គា ហ្វើស។ ខ្លឹមសារពាក្យបណ្ដឹងនោះបានថ្កោលទោសក្រុមហ៊ុននេះថា ធ្វើឲ្យប៉ះពាល់ព្រៃជំនឿ តំបន់ភូមិចាស់ ប្រភពទឹកអូរធម្មជាតិ បាត់បង់ព្រៃស្រោងជាទីជម្រកសត្វព្រៃ និងអនុផលព្រៃឈើជាដើម។
តំណាងជនជាតិដើមភាគតិចព្នង (ពូនង) នៅឃុំដាក់ដាំ លោក ស្រប គ្រុន ឲ្យដឹងនៅថ្ងៃទី៤ មិថុនាថា ញត្តិនោះសហគមន៍បានដាក់ជូនរដ្ឋបាលស្រុកអូររាំងរួចហើយ កាលពីថ្ងៃទី១៣ ខែមិនាកន្លងទៅ តែមកទល់ពេលនេះនៅពុំទាន់ឃើញអាជ្ញាធរមូលដ្ឋានចុះដោះស្រាយនៅឡើយទេ។ លោកថា អ្នកភូមិរាប់រយគ្រួសារ គ្រោងចុះបោះបង្គោលដោយខ្លួនឯង បំណងទាមទារដីដែលក្រុមហ៊ុនរំលោភយកមកជាសម្បត្តិសហគមន៍វិញ និងត្រៀមដាំដើមឈើ ប្រសិនបើអាជ្ញាធរមូលដ្ឋានមិនដោះស្រាយនោះទេ៖ « ទាមទារដី ៣ពាន់ហិកតារហ្នឹង ដើម្បីយើងយកភូមិចាស់វិញ កន្លែងហ្នឹងមានព្រៃកប់ខ្មោច ហើយព្រៃខ្មោចគេឈូសអស់ហើយ នៅសល់ ២កន្លែង ប្រសិនគេមិនដោះស្រាយទេ យើងត្រូវតែកំណត់ព្រំ ព្រៃខ្មោចមានទំហំប៉ុន្មាន ? ហើយយើងទៅបោះបង្គោលម្ដង » ។
សេចក្ដីរាយការណ៍ពីសហគមន៍ជនជាតិដើមភាគតិចបង្ហើបថា អ្នកភូមិរាប់រយគ្រួសារ បានផ្ដើមតវ៉ាតាំងពីឆ្នាំ២០១៥ ក្រោយពីក្រុមហ៊ុនអនុវត្តខុសពីគោលការណ៍វិនិយោគ ដោយឈូសឆាយដីបំពានតំបន់ព្រៃសក្ការ ដីព្រៃជម្រកសត្វកម្រ និងធនធានធម្មជាតិ បូកផ្សំទឹកអូរផ្លាយ និងអូរពុល ដែលជាប្រភពទឹកយ៉ាងសំខាន់ដែលអ្នកភូមិរស់នៅចំនួន ៣ស្រុក អភិរក្ស និងអាស្រ័យផល។ ទន្ទឹមនឹងនេះ សហគមន៍ថា ក្រុមហ៊ុន និងអាជ្ញាធរពាក់ព័ន្ធមិនបានពិគ្រោះយោបល់ស្ដីពីផលប៉ះពាល់ជាមួយពលរដ្ឋ និងមិនបានផ្សព្វផ្សាយពីគម្រោងវិនិយោគជាក់លាក់នោះទេ។
អភិបាលស្រុកអូររាំងលោក នង ទុនណ្ណារី មានប្រសាសន៍ថា រដ្ឋបាលស្រុកបានទទួលញត្តិនេះរួចហើយ និងបានបញ្ជូនក្រុមការងារចុះពិនិត្យ ដោយរកឃើញថា ទីតាំងដីដែលពលរដ្ឋស្នើសុំនោះ ត្រូវបានចុះបញ្ជីជាដីរបស់រដ្ឋ ពុំមែនជាដីរបស់ក្រុមហ៊ុនទេ។ លោកបញ្ជាក់យ៉ាងខ្លីថា ភារកិច្ចដោះស្រាយរឿងនេះ ហួសពីសមត្ថភាពអាជ្ញាធរស្រុក ហើយលោកបានរាយការណ៍ទៅថ្នាក់លើរួចហើយដែរ៖ « យើងមិនព្រងើយកន្តើយទេ តែអ្វីដែលគាត់ស្នើសុំ គឺហួសសមត្ថភាពថ្នាក់ស្រុក។ យើងបានចុះមើលស្ថានភាពជាក់ស្ដែង យើងបានជួបភាគីទាំងពីរ ពិនិត្យអំពីអ្នកដែលស្នើសុំ និងទីតាំងស្នើសុំ តែអ្វីដែលពិនិត្យមើលទៅអ្នកទាំងអស់ហ្នឹង គាត់មានផ្ទះសម្បែង និងមានដីអស់ហើយ » ។
អាស៊ីសេរីបានទាក់ទងអ្នកនាំពាក្យសាលាខេត្តមណ្ឌលគិរី លោក សុក សេរ៉ា ដើម្បីសុំការអធិប្បាយបន្ថែមករណីនេះ តែទូរស័ព្ទហៅចូល គ្មានអ្នកលើកនៅថ្ងៃទី៤ មិថុនា។
ក្រុមហ៊ុនសម្បទានសេដ្ឋកិច្ច មេហ្គា ហ្វើស របស់ប្រទេសម៉ាឡេស៊ី ទទួលសិទ្ធិវិនិយោគពីរដ្ឋាភិបាលជាង ៩ពាន់ហិកតារ នៅស្រុកអូររាំង តាំងពីឆ្នាំ២០១២។ ក្រោយពីរដ្ឋាភិបាលផ្ដល់សិទ្ធិឲ្យក្រុមហ៊ុនវិនិយោគ ក្រុមហ៊ុនបានឈូសឆាយព្រៃមានសក្ដានុពលបង្កើតសហគមន៍ទេសចរណ៍ និងព្រៃដែលមានរុក្ខជាតិកម្រ មានតម្លៃលើទីផ្សារជួយទ្រទ្រង់សេដ្ឋកិច្ចសហគមន៍។
តំណាងសហគមន៍ជនជាតិដើមភាគតិចព្នង លោក ក្រើង តុលា សង្កេតឃើញថា ក្រុមហ៊ុនមេហ្គាហ្វើសធ្លាប់អះអាងថា ខ្លួនបានកាត់ឆ្វៀលផលប៉ះពាល់ផ្ទៃដី ៣ពាន់ហិកតារ ក៏ប៉ុន្តែធាតុពិតក្រុមហ៊ុននេះមិនបានកាត់ឆ្វៀលផលប៉ះពាល់ចេញទេ។ លោកថា ក្រុមហ៊ុនប្រព្រឹត្តកំហុសជាច្រើន បំពានគោលការណ៍វិនិយោគ ល្មមដល់ពេលអាជ្ញាធរប្រើកណ្ដាប់ដៃ រុញឲ្យក្រុមហ៊ុននេះទទួលខុសត្រូវចំពោះមុខច្បាប់ហើយ។ លោកបញ្ជាក់ថា ជំហរដើមរបស់សហគមន៍ចង់រក្សាដី ៣ពាន់ហិកតារ ដើម្បីផ្ដល់លទ្ធភាពឲ្យពួកគេ អភិរក្សតំបន់សក្ការបែបប្រពៃណីជនជាតិដើមភាគតិច និងដាំដើមឈើឡើងវិញ៖ « ក្រុមហ៊ុនប៉ះពាល់ច្រើនក្នុងតំបន់ហ្នឹង ទី១ ប៉ះពាល់ព្រៃជំនឿគាត់ ទី២ ភូមិចាស់គាត់ ទី៣ អនុផលព្រៃឈើ ទី៤ ទី៥ និងទី ៦ ក្បាលអូរផ្លាយ និងអូរប៉ុល ឋិតក្នុងក្រុមហ៊ុនហ្នឹង ទី៧ ប៉ះពាល់ព្រៃតំណម។ អ៊ីចឹង ៧ចំណុចហ្នឹង យើងប្រាប់ហេតុផលទៅអាជ្ញាធរខេត្ត » ។
អាស៊ីសេរីនៅមិនទាន់អាចទាក់ទងតំណាងក្រុមហ៊ុន មេហ្គា ហ្វើស ដើម្បីសុំការបំភ្លឺជុំវិញពាក្យបណ្តឹងរបស់សហគមន៍បានថាយ៉ាងណានៅឡើយទេ នៅថ្ងៃដដែលនេះ។
មន្ត្រីសម្របសម្រួលសមាគម អាដហុក ខេត្តមណ្ឌលគិរី លោក អ៊ាង ម៉េងលី ដែលចុះអង្កេតករណីនេះ យល់ថា ពាក្យបណ្ដឹងរបស់សហគមន៍ អាជ្ញាធរពាក់ព័ន្ធគួរចុះស្រាវជ្រាវ និងសិក្សាឲ្យស៊ីជម្រៅ ខណៈអ្នកភូមិមានភស្តុតាងគ្រប់គ្រាន់ដែលបញ្ជាក់ថា ក្រុមហ៊ុននេះបានប្រព្រឹត្តកំហុសជាច្រើនបំពានគោលការណ៍វិនិយោគ។ លោកកត់សម្គាល់ថា នេះពុំមែនជាលើកទី១ទេ ដែលអ្នកភូមិប្ដឹងទាមទារដីធ្លីពីក្រុមហ៊ុន ក៏ប៉ុន្តែអាជ្ញាធរមូលដ្ឋានហាក់មិនបានដោះស្រាយក្ដីកង្វល់របស់ពួកគេនៅឡើយទេ មកទល់ពេលនេះ៖ « ពលរដ្ឋគាត់មានសិទ្ធិប្ដឹងទាមទារដីទ្រព្យរដ្ឋមកវិញ ដើម្បីទុកជាទ្រព្យរួម ហើយករណីនេះយើងឃើញថា កន្លងមក ពលរដ្ឋបានប្ដឹងទាមទារជាហូរហែ ទាក់ទិនការរំលោភបំពានឈូសឆាយប៉ះពាល់ដីពលរដ្ឋ តែពុំទាន់មានការដោះស្រាយនៅឡើយទេបាទ » ។
ទោះជាយ៉ាងណា តំណាងសហគមន៍ជនជាតិដើមភាគតិច លោក ក្រើង តុលា អំពាវនាវឲ្យអាជ្ញាធរជាតិ និងអាជ្ញាធរខេត្ត ដោះស្រាយពាក្យបណ្ដឹងរបស់សហគមន៍ដោយយុត្តិធម៌ ដើម្បីសង្គ្រោះទឹកអូរធម្មជាតិ និងស្ដារព្រៃឈើឡើងវិញ។ ពួកគេចាត់ទុកថា តំបន់ដែលអាជ្ញាធរអនុញ្ញាតផ្ដល់ដីសម្បទាន គឺជាព្រៃស្រោង លាតសន្ធឹងជាប់ដែនជម្រកសត្វព្រៃភ្នំណាំលៀរ រហូតដល់ប្រទេសវៀតណាម ពុំគួរជាកម្មវត្ថុសម្រាប់ផ្ដល់ដីសម្បទានសេដ្ឋកិច្ចឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។