ជនជាតិដើមភាគតិចព្នងជាង ១២០នាក់ មកពីស្រុកចំនួន ៥ ក្នុងខេត្តមណ្ឌលគិរី បានជួបជុំគ្នាធ្វើ សន្និសីទកាសែត និងពិធីសែនព្រេន លើភ្នំរ៉ាដាង ដើម្បីបង្ហាញពីទុក្ខកង្វល់ ការរំលោភដីធ្លី ពីសំណាក់អ្នកមានអំណាច ឃុបឃិតជាមួយអាជ្ញាធរមូលដ្ឋាន។ អ្នកភូមិប្ដេជ្ញាថា នឹងសាមគ្គីគ្នាតវ៉ាទាមទារភ្នំរ៉ាដាងឱ្យបានមកវិញ។ ចំណែកអាជ្ញាធរថា ការទិញលក់ដីភ្នំនេះ មានការព្រមព្រៀងរវាងតំណាងអ្នកភូមិ និងអ្នកទិញ។
ជនជាតិដើមភាគតិចប្រមាណ ១២០នាក់ ស្លៀកពាក់បែបប្រពៃណីជនជាតិដើម បានមកជួបជុំគ្នានៅលើខ្នងភ្នំរ៉ាដាង ក្នុងសង្កាត់រមនា ក្រុងសែនមនោរម្យ នៅព្រឹកថ្ងៃទី១៥ ខែកញ្ញា។ ពួកគេធ្វើពិធីសែនព្រេន បន់ស្រន់អារក្សអ្នកតា និងធ្វើសន្និសីទកាសែត អំពាវនាវឱ្យអាជ្ញាធរខេត្តមណ្ឌលគិរីដោះស្រាយជម្លោះដីធ្លីជូនពួកគាត់ដោយយុត្តិធម៌។
តំណាងជនជាតិដើមភាគតិចព្នងរស់នៅភូមិពូលូង លោកស្រី រឿន ផ្លុំ ឱ្យដឹងថា អ្នកភូមិប្រកាសច្រានចោល ចំពោះទង្វើរបស់លោក រឿម ស្រេម និង លោក ស្រឺត ស្រ៊ី ដែលអះអាងថា ជាតំណាងរបស់ពួកគេ ហើយធ្វើឯកសារមិនប្រក្រតី លក់ដីភ្នំនេះខុសច្បាប់។ លោកស្រីថា អ្នកភូមិស៊ូស្លាប់ ការពារភ្នំនេះ ដើម្បីថែរក្សា ទីកន្លែងសក្ការបូជា របស់ជនជាតិដើមភាគតិច។ លោកស្រីសោកស្តាយ ដើមឈើដុះព័ទ្ធជុំវិញភ្នំរ៉ាដាង ជាច្រើនហិកតារ អមដោយព្រៃត្រណម និងព្រៃកប់សព ត្រូវគេឈូសឆាយ អស់ស្ទើរទាំងស្រុង ក្នុងរយៈពេលប៉ុន្មានខែចុងក្រោយនេះ៖ «គោលបំណងយើងចង់បានទាមទារជនខិលខូចលួចលក់ ភ្នំរបស់ យើងទុកសម្រាប់កូនចៅទៅថ្ងៃអនាគត »។
ក្នុងពិធីសែនព្រេន និងសន្និសីទកាសែតនោះ អ្នកភូមិបានប្រកាសតាមឧបករណ៍បំពងសំឡេង ទាមទារ ដីភ្នំរ៉ាដាងមកវិញ ដោយស្នើឱ្យអាជ្ញាធរអនុវត្តច្បាប់ចំពោះ ពលរដ្ឋខិលខូច ឃុបឃិតជាមួយអាជ្ញាធរលក់ដីភ្នំទាំងបំពានច្បាប់៖ «លោក រឿម ស្រេម និងលោក ស្រឺត ស្រ៊ី មិនមែនជាតំណាងសហគមន៍ពុំមានសិទ្ធិកាន់កាប់លក្ខណៈឯកជន និងផ្ទេរសិទ្ធិលក់ដីនេះ ទៅឱ្យអ្នកទិញបានឡើយ ដោយអាជ្ញាធរភូមិឃុំ និងក្រុង ក៏មិនអាចបញ្ជាក់ពីភាពស្របច្បាប់នៅការកាន់កាប់ និងផ្ទេរសិទ្ធិលើដីសហគមន៍ និងដីសាធារណៈរបស់រដ្ឋបានឡើយ »។
អ្នកនាំពាក្យសាលាខេត្តមណ្ឌលគិរី លោក សុក សេរ៉ា បដិសេធមិនអធិប្បាយរឿងនេះទេ ព្រោះលោកបានផ្ទេរភារកិច្ចមកក្រសួងមហាផ្ទៃហើយ។ ចំណែកអភិបាលក្រុងសែនមនោរម្យ លោក ឡុង វិបុល ក៏មិនអាចសុំការឆ្លើយតបបានដែរ ដោយទូរស័ព្ទចូលពុំមានអ្នកទទួល។ ក៏ប៉ុន្តែលោកធ្លាប់ប្រាប់អាស៊ីសេរី កាលពីពេលថ្មីៗ នេះថា កន្លងទៅមានតំណាងជនជាតិដើមភាគតិចជាច្រើនគ្រួសារ បានផ្ដិតមេដៃយល់ព្រមផ្ទេរកម្មសិទ្ធិជូនអ្នកទិញ ដែលមានអាជ្ញាធរភូមិ/ឃុំចុះទៅពិនិត្យទីតាំងដីជាក់ស្ដែង ហើយបានស្នើសុំធ្វើប្លង់កម្មសិទ្ធិ ដែលមានការបង់ពន្ធប្រថាប់ត្រាតាមនីតិវិធីរដ្ឋបាល៖ «ពួកគាត់ទាមទារ ៣ ទៅ ៤គ្រួសារមកទាមទារលើសមូហភាពទាំងមូលដែលមានជាង ១០០គ្រួសារហ្នឹង យើងនឹងអញ្ជើញពួកគាត់មក ដើម្បីនឹងសួរនាំបន្ថែម ហើយចំពោះការទាមទាររបស់គាត់ ពួកគាត់ត្រូវទាមទារពីតំណាងរបស់ពួកគាត់ ព្រោះតំណាងពួកគាត់បានផ្ដិតមេដៃប្រគល់សិទ្ធិ ដើម្បីឈរឈ្មោះលក់ដីហើយ »។
ចៅសង្កាត់រមនា លោក ភ្យី ងុក ថ្លែងថា អាជ្ញាធរមិនបានរារាំងការធ្វើសន្និសីទកាសែត និងសែនព្រេនរបស់ពលរដ្ឋនោះទេ។ លោកថា ជម្លោះដីធ្លីនេះ ភាគីពាក់ព័ន្ធកំពុងសម្របសម្រួលដោះស្រាយ។ រីឯអ្នកទិញដីភ្នំនេះ បានចំណាយលុយជាច្រើន តែលោកមិនបញ្ជាក់លម្អិតថា មានចំនួនប៉ុន្មាននោះទេ៖ «បុគ្គលមួយចំនួនតួចទេ ដែលឆ្កឹះឆ្កៀល ដើម្បីវឹកវរ និងអាជ្ញាធរវឹកវរអ្នកទិញ អ្នកលក់ហ្នឹង ព្រោះអ្នកទិញក៏គ្នាអស់លុយដែរ។ នេះខ្ញុំនិយាយត្រង់មិនលាក់បាំងទេ ហើយអ្នកលក់ដីសមូហភាព ១៤០គ្រួសារគាត់ឯកភាពគ្នាថា ព្រមលក់កន្លែងហ្នឹង ជាតំបន់របស់គាត់ទេ »។
ភ្នំរ៉ាដាង មានទំហំប្រមាណ ២០ហិកតារ គឺជា បណ្ដុំប្រពៃណីវប្បធម៌ ដែលក្រុមពលរដ្ឋគោរពបូជាតាំងពីបុរាណមក។ ភ្នំនេះជាប្រភពទឹកអូរដ៏សំខាន់ និងជាអណ្ដូងទឹកសមូហភាព ដែលសហគមន៍ប្រើប្រាស់ប្រចាំថ្ងៃ ហូរឆ្ពោះទៅស្រុកកោះញែកមិនចេះរីងស្ងួត ដែលមានពលរដ្ឋរាប់ពាន់គ្រួសារអាស្រ័យផល។
ប្រធានបណ្ដាញសហគមន៍ជនជាតិដើមភាគតិចព្នង ខេត្តមណ្ឌលគិរី លោកស្រី ភ្លឹក ភីរម្យ ឱ្យដឹងថា អ្នកភូមិកំពុងកើតទុកមិនសុខចិត្ត ចំពោះការរំលោភយកដីភ្នំរ៉ាដាង។ លោកស្រីបញ្ជាក់ថា លើភ្នំនេះ មានខ្ទមអ្នកតាពីរកន្លែង ផ្នូរកប់សព ថ្ម ទឹកអូរធម្មជាតិ ដើមឈើ គឺជាភស្តុតាងបញ្ជាក់ថា តំបន់នេះទីសក្ការបូជា របស់ជនជាតិដើមភាគតិចព្នងមិនអាចទិញលក់ដូរបាននោះទេ៖ «ពលរដ្ឋជាង ១០០នាក់ហ្នឹង គេសុំឱ្យអាជ្ញាធរទប់ស្កាត់ឈូសឆាយយកដីភ្នំរ៉ាដាងធ្វើជាកម្មសិទ្ធិរបស់ខ្លួន។ គេចង់ឱ្យគាត់ជួយការពារភ្នំនេះ ដើម្បីឱ្យពួកគាត់បន្តគោរព បូជាធ្វើជាទីសក្ការរបស់ពួកគាត់ »។
កាលពីដើមខែសីហាកន្លងទៅ (ឆ្នាំ២០២០) ជនជាតិដើមភាគតិចប្រមាណ ១២០នាក់បានផ្ដិតមេដៃដាក់ញត្តិទៅសាលាខេត្តមណ្ឌលគិរី និងអាជ្ញាធរជាតិ ដើម្បីឱ្យស្ថាប័នទាំងនេះដោះស្រាយជម្លោះដីធ្លីនៅតំបន់ភ្នំរ៉ាដាង និងត្រូវអភិរក្សតំបន់នោះ ជាទីសក្ការវប្បធម៌ដែលបន្សល់តាំងពីបុរាណមក។ ក៏ប៉ុន្តែអ្នកភូមិថា អាជ្ញាធរពាក់ព័ន្ធមិនបានដោះស្រាយក្ដីកង្វល់នេះជូនពួកគាត់ឡើយ៕