ពលរដ្ឋ​ ៣​ភូមិ​​នៅ​ខេត្តព្រះវិហារ​អះអាង​ថា ក្រុមហ៊ុន​រ៉ែ​មាស នៅតែ​រំលោភ​ដីស្រែ​ចម្ការ​ពួកគាត់

0:00 / 0:00

ក្រុមហ៊ុន ឌែលខម ខេមបូឌា (Delcom Cambodia) និង​ក្រុមហ៊ុន គីម ជាធួន គ្រុប (Kim Gia Thuan Group Co., Ltd) នៅតែ​បន្ត​ហ៊ុមព័ទ្ធ​យក​ដីស្រែ​ចម្ការ​របស់​អ្នកភូមិ​ជាច្រើន​គ្រួសារ​ផ្សេង​ទៀត ដើម្បី​ពង្រីក​អាជីវកម្ម​រ៉ែ​មាស​នៅ​តំបន់​ភ្នំលុង ក្នុង​ខេត្តព្រះវិហារ។ ពលរដ្ឋ​ ២៥០គ្រួសារ​រស់នៅ​ស្រុក​រវៀង អស់សង្ឃឹម​ពី​ភាព​ប្រ​ងើយ​កន្តើយ​របស់​អាជ្ញាធរ​រដ្ឋាភិបាល ដែល​មិន​ដោះស្រាយ​ក្តីកង្វល់​របស់​ពួកគាត់​ជាច្រើន​ឆ្នាំ​មក​ហើយ។

ពលរដ្ឋ​រស់នៅ​ភូមិ​ចំនួន​៣ គឺ ភូមិ​ស្វាយ​ដំណាក់ ភូមិ​រំដេង និង​ភូមិ​អូរទ្រលោក ឃុំ​រមទម ស្រុក​រវៀង ចោទ​ក្រុមហ៊ុន​ទាំង​នេះ​ថា នៅតែ​បន្ត​រំលោភបំពាន​ដីស្រែ​ចម្ការ របស់​ពួកគាត់​ជា​បន្តបន្ទាប់ ដើម្បី​ពង្រីក​ផ្ទៃដី​ធ្វើ​អាជីវកម្ម​រ៉ែ​មាស។ មក​ទល់​ពេល​នេះ ពលរដ្ឋ​រងគ្រោះ​កើនឡើង ២៥០​​គ្រួសារ​ហើយ។

តំណាង​ពលរដ្ឋ លោក ពុយ ឆេង ឱ្យ​ដឹង​នៅ​ថ្ងៃទី១៥ មីនាថា ក្រុមហ៊ុន​ទាំងនេះ​នៅតែ​ឈូស​ឆាយ និង​បោះ​បង្គោលព្រំ​ពង្រីក​ផ្ទៃដី​អាជីវកម្ម​រ៉ែ​មាស ប៉ះចំ​ដីស្រែ​ចម្ការ​របស់​អ្នកភូមិ ១០៤គ្រួសារ ថ្មី​ផ្សេងទៀត។ លោក​បញ្ជាក់​ថា កាលពី​សប្តាហ៍​មុន​ក្រុមហ៊ុន​បាន​បោះបង្គោល​ព្រំ​ដី បំពាន​ដីស្រែ​ចម្ការ​របស់​អ្នកភូមិ​ស្វាយ​ដំណាក់ ប្រវែង​ទទឹង ៥​រយ​ម៉ែត្រ និង​បណ្តោយ​ជាង ១​ពាន់​ម៉ែត្រ៖ «គេ​អត់​ដោះស្រាយ​ឱ្យ គេ​បំពាន​យក​ដដែល គេ​គ្រាន់តែ​ផ្អាក​មួយ​សារ​ទៅ គេ​បំពាន​យក​ដដែល​។ គាត់​អត់​ហ៊ាន មាន​សិទ្ធិ​ហ៊ាន​តវ៉ា​អី​ផង គាត់​ខ្លាច​គេ​ចាប់​យក​ដាក់គុក»។

លោក ពុយ ឆេង បន្ថែម​ថា សំណុំ​ចាស់ ដែល​ពលរដ្ឋ​ប្តឹង​ក្រុមហ៊ុន អាជ្ញាធរ​មិន​ត្រឹមតែ​មិន​យកចិត្តទុកដាក់​ដោះស្រាយ​ទេ ហើយ​ក្រុមហ៊ុន​នៅតែ រំលោភ​ដី​ពួកគាត់​ជា​បន្តបន្ទាប់។ រីឯ​ដី​ពលរដ្ឋ​ខ្លះទៀត​មាន​ប្លឹង​រឹង ឬ​ប្លង់​កម្មសិទ្ធិ ក៏​ក្រុមហ៊ុន​រំលោភបំពាន​ដែរ។ លោក​ថា កាលពី​សប្តាហ៍​មុន អាជ្ញាធរ​ស្រុក​បាន​កោះហៅ​ពលរដ្ឋ ១៤០នាក់ ទៅ​គំរាមកំហែង មិន​ឱ្យ​តវ៉ា ដោយ​លើក​ហេតុផល​ថា ដី​ដែល​ក្រុមហ៊ុន​ឈូស​ឆាយ​នោះ ជា​ដី​របស់​រដ្ឋ​វិនិយោគ​ឱ្យ​ក្រុមហ៊ុន​ស្របច្បាប់។

អាស៊ីសេរី​បាន​ព្យាយាម​ទាក់ទង​តំណាង​ក្រុមហ៊ុន ឌែលខម ខេមបូឌា (Delcom Cambodia) តាមរយៈ​លេខ​ទូរស័ព្ទ​ក្នុង​គេហទំព័រ​សាជីវកម្ម ប៉ុន្តែ​អ្នក​លើក​ទូរស័ព្ទ​ប្រាប់​ថា ច្រឡំ​លេខ។ ចំណែក​តំណាង​ក្រុមហ៊ុន គីម ជាធួន គ្រុប (Kim Gia Thuan Group Co., Ltd) ក៏​អាស៊ីសេរី​មិន​ទាន់​អាច​ទាក់ទង​បាន​ដែរ។

លោក ពុយ ឆេង បន្ថែម​ថា រយៈពេល ៦​ខែ​ចុង​ក្រោយនេះ ក្រុមហ៊ុន​ទាំងនេះ​បាន​ហ៊ុមព័ទ្ធ​ដី​រាប់ពាន់​ហិកតារ នៅ​តំបន់​ភ្នំ​លុង ដើម្បី​ពង្រីក​ផ្ទៃដី​ធ្វើ​អាជីវកម្ម​រ៉ែ​មាស​ជា​ថ្មី​ទៀត ប៉ះពាល់​ដីស្រែ​ចម្ការ​របស់​អ្នកស្រុក​រស់នៅ​ទីនោះ​។ លើស​ពី​នេះ ក្រុមហ៊ុន​បាន​ពង្រាយ​កម្លាំងយោធា​ប្រដាប់​អាវុធ និង​សមត្ថកិច្ច​រាប់​សិប​នាក់ យាមល្បាត​មិន​ឱ្យ​ពលរដ្ឋ​ចូល​អាស្រ័យ​ផល​លើ​ដី​ដែល​មាន​ជម្លោះ​នោះ​ទេ៖ «អាជ្ញាធរ​គេ​អត់​ដោះស្រាយ​ឱ្យ​គេ​ថា ក្រុមហ៊ុន​ហ្នឹងឯង​មានច្បាប់​ប្រជាជន​អត់​ច្បាប់។ ដូច្នេះ​គេ​អត់​ដោះស្រាយ​ឱ្យ​ទេ នៅពេល​គេ​ចុះ​មក​ម្តងៗ គេ​គំរាម​ប្រជាជន​សុទ្ធតែ ដាក់គុក​ច្រវាក់ ប្រជាជន​ខ្លាច​។ ក្រុមហ៊ុន​គេ​ថា គេ​បាន​ច្បាប់​ពី​រដ្ឋាភិបាល ពួក​យើង​អត់​មាន​សិទ្ធិ​ធ្វើ​លើ​ដី​ហ្នឹង»។

ពលរដ្ឋ​មាន​ជម្លោះដីធ្លី​ម្នាក់ទៀត​រស់នៅ​ភូមិ​រំដេង លោកស្រី យឹម ផាត ឱ្យ​ដឹង​ថា នៅ​ភូមិ​របស់​លោកស្រី​មាន​ពលរដ្ឋ ១០​គ្រួសារ បាន​ប្តឹង​ក្រុមហ៊ុន ទៅ​តំណាង​អយ្យការ​ខេត្តព្រះវិហារ​កាលពី អំឡុង ខែកញ្ញា ឆ្នាំ ២០២០ ដើម្បី​ទាមទារ​ដីស្រែ​ចម្ការ​មកវិញ តែ​មក​ទល់​ពេល​នេះ​មិនទាន់​ទទួល​លទ្ធផល​នៅ​ឡើយ​ទេ​។ លោកស្រី​ថា ដីស្រែ​ចម្ការ​ដែល​អ្នកភូមិ​ប្តឹង​នោះ ជា​ដី​កេរ​ឪពុកម្ដាយ ហើយ​ដី​ខ្លះទៀត មាន​ប្លង់​រឹង​៖ «បើ​ឡាន​ប៉ូលិស​ទាហាន​ទៅ ៣​ឡាន គេ​ទៅ​រុះរើ​រោង ហើយ​គេ​ទៅ​វាស់វែង​ដី​បាញ់​ថ្នាំ វា​ហួស​បង្គោលព្រំ​ទៀត​។ ដី​ខ្ញុំ ៥​ហិកតារ​ដីស្រែ ហើយ​ដីចម្ការ​ហ្នឹង ៨​ហិកតារ ហើយ​ដីស្រែ​ចម្ការ ៥​ហិកតារ ប្លង់​រឹង»។

ឆ្លើយតប​រឿង​នេះ តំណាង​អយ្យការ អម​សាលាដំបូង​ខេត្តព្រះវិហារ លោក ទី សុវណ្ណថាល់ បកស្រាយ​ថា គ្រប់​សំណុំរឿង​ទាំងអស់ មិន​ត្រូវ​បាន​ទុក​យូរ​ទេ ឱ្យ​តែ​ដល់ដៃ​ព្រះរាជអាជ្ញា និង​តុលាការ ចាំបាច់​ត្រូវតែ​ដំណើរការ​នីតិវិធី​។ លោក​បញ្ជាក់​ថា សំណុំរឿង​ដែល​ពលរដ្ឋ​ប្តឹង​នេះ លោក​មិន​ច្បាស់​ថា តំណាង​អយ្យការ​ណាមួយ​ទេ កាន់​រឿង​នេះ​ទេ ក៏ប៉ុន្តែ​ប្រសិនបើ​ពលរដ្ឋ​មិន​សុខចិត្ត អាច​មក​ចួប​លោក​ផ្ទាល់ ដើម្បី​ពិភាក្សា​រក​ដំណោះស្រាយ​៖ «អ្នក​ប្តឹង​ហ្នឹង​ឱ្យមកៗ បើ​ចង់ដឹង​ថា រឿង​ហ្នឹង​ដល់​ណា​ហើយ ហេតុ​អី​ក៏​ក្រ​កោះហៅ អាហ្នឹង​ខ្ញុំ​អន្តរាគមន៍​បាន ព្រោះ​ដល់ដៃ​អ្នកណា អ្នក​ហ្នឹង​មិន​កោះហៅ​ទេ​។ អាហ្នឹង​មានការ​ពិន័យ ព្រមាន​ពី ពិសេស​ថ្នាក់ដឹកនាំ ក្រសួងយុត្តិធម៌ ដែល​បង្កើត​គណៈកម្មការ​ពិនិត្យ​រឿង​កកស្ទះ»។

ចំណែក​ពលរដ្ឋ​មាន​មាន​ជម្លោះដីធ្លី​ម្នាក់ទៀត​គឺ លោក ជ័យ ស៊ីម ត្អូញ​ថា ដីស្រែ​ចម្ការ​របស់​លោក ៨​ហិកតារ ត្រូវ​បាន​ក្រុមហ៊ុន​រំលោភ​យក​ទាំងស្រុង​នៅ​រយៈពេល ៤ឆ្នាំ​ចុង​ក្រោយ​នេះ​។ លោក​ថា គ្រួសារ​លោក​មាន​បងប្អូន ៧​នាក់ បាន​បង្ខំចិត្ត​ចំណាកស្រុក​ទៅ​ធ្វើ​ការ​នៅ​ប្រទេស​ថៃ ខ្លះ​ដើរ​ស៊ី​ឈ្នួល​ធ្វើ​សំណង់ ដោយសារ​បាត់បង់​ដីស្រែ​ចម្ការ​ចិញ្ចឹមជីវិត​៖ «ក្រុមហ៊ុន​នៅតែ​បន្ត​អាជីវកម្ម​ធម្មតា តែ​ឥលូវ​ឃើញ​យក​អាអ៊ិច មក​វ៉ៃ​ដី​ហ្នឹង បងប្អូន​ខ្ញុំគេ​យក​ទទេ ខ្លះ​អត់​មាន​ដី​នៅ​នោះ​ទៅ​។ ខ្លះទៅ​ថៃ ខ្លះទៅ​ចិន អត់​មាន​ដី​ធ្វើ​កសិកម្ម»។

អភិបាលខេត្ត​ព្រះវិហារ លោក ប្រាក់ សុវណ្ណ បដិសេធ​មិន​ផ្តល់​បទ​សម្ភាស​ឱ្យ​អាស៊ីសេរី​ទេ ដោយ​លោក​រុញឱ្យ​សួរ​នាយក​រដ្ឋបាល​សាលាខេត្ត​វិញ។

ចំណែក​នាយក​រដ្ឋបាល​សាលាខេត្ត​ព្រះវិហារ លោក យ៉ុង គឹមហឿង និង​អ្នកនាំពាក្យ​ក្រសួង​រ៉ែ និង​ថាមពល លោក យស មុនីរ៉ាត់ ក៏​មិនទាន់​អាច​ទាក់ទង​បាន​ដែរ ព្រោះ​ពួក​លោក​មិន​លើក​ទូរស័ព្ទ។

កាល​ពី​ចុង​ខែ​កុម្ភៈ កន្លងទៅ អភិបាល​ស្រុក​រវៀង លោក ហោ ប៊ុនហ៊ួ បាន​ហៅ​ពលរដ្ឋ​ដែល​មាន​ជម្លោះដីធ្លី​នេះ ១៤០​គ្រួសារ​ទៅ​ពិភាក្សា ហើយ​​លោក​​សន្យា​​ថា នឹង​​ដឹក​នាំ​​ក្រុម​ការងារ​ចុះ​ពិនិត្យ​ជម្លោះដីធ្លី​នេះ​ដោយ​ផ្ទាល់​នៅពេល​ឆាប់ៗ ​នេះ ដើម្បី​ស្វែងរក​ការពិត។

ទាក់ទង​រឿង​នេះ​អ្នកនាំពាក្យ​សមាគម​អាដហុក (Adhoc) លោក ស៊ឹង សែនករុណា មាន​ប្រសាសន៍ថា ក្រុម​ពលរដ្ឋ​បាន​ដាក់​ពាក្យ​ប្តឹង​ករណីនេះ ទៅ​អាជ្ញាធរ​មូលដ្ឋាន​រហូត​ដល់ ថ្នាក់​ជាតិ តែ​មិន​ទាន់​ឃើញ​អាជ្ញាធរ​ពាក់ព័ន្ធ ចុះ​ដោះស្រាយ​នៅឡើយ​ទេ​។ លោក​ថា ប្រសិនបើ​អាជ្ញាធរ​រដ្ឋាភិបាល មិន​អើពើ​ដោះស្រាយ​សំណុំ​រឿង​នេះ​ទេ ពលរដ្ឋ​នឹង​អស់ជំនឿ​ចិត្ត​៖ «អ៊ីចឹង​បើសិនជា​គាត់ បាន​ដាក់​បណ្តឹង​តាំង​ពី​ថ្នាក់ក្រោម រហូត​ដល់​ថ្នាក់​លើ​ហើយ នៅតែ​អត់​ទាន់​រក​យុត្តិធម៌ និង​ចុះ​ស្រាវជ្រាវ​ពី​រឿង​នេះ ដើម្បី​មានការ​ចាត់វិធានការ​តាមផ្លូវ​ច្បាប់ អ៊ីចឹង​ធ្វើ​ឱ្យ​ពលរដ្ឋ​ហ្នឹង លោក​អស់សង្ឃឹម​ក្នុង​ការ​រក​អន្តរាគមន៍ ដំណោះស្រាយ​ពី​អាជ្ញាធរ​ពាក់ព័ន្ធ ដែល​មាន​សមត្ថកិច្ច​ទាំងអស់​ហ្នឹង»។

កន្លង​ទៅ​រដ្ឋមន្ត្រីក្រសួង​រ៉ែ និង​ថាមពល លោក ស៊ុយ សែម អះអាង​ថា នឹង​ចាត់វិធានការ​លើ​ក្រុមហ៊ុន​រុករក​រ៉ែ​ទាំងឡាយ​ណា ​ដែល​មិន​បាន​អនុវត្ត​តាម​ច្បាប់​។ លោក​ព្រមាន​ថា ក្រសួង​នឹង​មិន​អត់ឱន​ជាដាច់ខាត បើ​មាន​ក្រុមហ៊ុន​ណា អនុវត្ត​មិន​បាន​ត្រឹមត្រូវ​តាម​លក្ខខណ្ឌ​ដែល​កំណត់​ក្នុង​ច្បាប់ ក្នុង​សេចក្ដី​ប្រកាស ឬ​រំលោភ​អនុក្រឹត្យ​ស្ដីពី​ការរុករក​រ៉ែ ដែល​នាំ​ឱ្យ​មាន​ការ​ប៉ះពាល់​បរិស្ថាន​ធ្ងន់ធ្ងរ​។ លោក ស៊ុយ សែម ថ្លែង​បែបនេះ ក្រោយ​ពី​កើតមាន​ករណី​ពុល​ទឹក​ព្រែក​ទេរ នៅ​ខេត្ត​ក្រចេះ និង​ខេត្ត​មណ្ឌលគិរី បណ្ដាល​ឱ្យ​អ្នកភូមិ ចំនួន ១៨​នាក់​ស្លាប់ និង​ធ្លាក់ខ្លួន​ឈឺ​រាប់​រយ​នាក់ កាលពី​ខែ​ឧសភា ២០១៨។

ទោះជា​យ៉ាងណា​ពលរដ្ឋ និង​មន្ត្រី​សង្គម​ស៊ីវិល រិះគន់​​ថា ការ​ប្រកាស​នេះ ធ្វើ​ឱ្យ​តែ​ល្អមើល​ប៉ុណ្ណោះ ប៉ុន្តែ​គ្មាន​វិធានការ​ឱ្យ​មាន​ប្រសិទ្ធភាព​នោះ​ទេ​មក​ទល់​ពេល​នេះ ហើយ​ក្រុមហ៊ុន​រ៉ែ​មាស​ទាំងនេះ នៅតែ​រំលោភបំពាន​យក​ដីធ្លី​របស់​ពលរដ្ឋ​ដដែល ខណៈ​សកម្មជន​បរិស្ថាន រកឃើញ​ថា អាជីវកម្ម​រ៉ែ​មាស​នៅ​ទីនោះ​សុទ្ធ​សឹង​ធ្វើ​ឡើង​ដោយ​ខុសច្បាប់​គ្មាន​ការសិក្សា​ផល​ប៉ះពាល់​បរិស្ថាន​និង​សង្គម​ត្រឹមត្រូវ​នោះ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។