សាលាដំបូងរាជធានីភ្នំពេញ កោះហៅសកម្មជនដីធ្លីម្នាក់នៅភូមិឡពាង ខេត្តកំពង់ឆ្នាំង និងមេធាវីការពារក្ដីឱ្យចូលរួមសវនាការនៅដើមខែកុម្ភៈ ក្នុងសំណុំរឿងព្រហ្មទណ្ឌ តាមបណ្ដឹងរបស់ក្រុមហ៊ុន ខេ.ឌី.ស៊ី (KDC) កាលជាងពី ១០ឆ្នាំមុន។ តំណាងសហគមន៍ឡពាងថា ចំណាត់ការរបស់តុលាការដែលគាស់កកាយយករឿងកន្លងផុតទៅជាច្រើនឆ្នាំ មកបើកសវនាការនៅពេលនេះ គឺធ្វើឡើងតាមអ្នកមានអំណាច ដើម្បីដាក់គំនាបពួកគាត់ ដែលជាពលរដ្ឋក្រីក្រ ឱ្យឈប់ចេញតវ៉ារឿងដីធ្លីតទៅទៀត។
តំណាងសហគមន៍ឡពាង លោកស្រី អ៊ុំ សុភី ថ្លែងថា នេះជារឿងអយុត្តិធម៌ ដែលស្ថាប័នតុលាការមិនចុះស្វែងរកការពិត ហើយបែរជាយករឿងចាស់ដែលកន្លងផុតទៅ ១២ឆ្នាំទៅហើយនោះ មកចោទប្រកាន់ និងជំនុំជម្រះលោកស្រីនៅពេលនេះ។ លោកស្រីបន្តថា គ្មានអ្នកណាទៅញុះញង់អ្នកភូមិឡើយ គឺពលរដ្ឋរួមគ្នាតវ៉ាទាមទារសំណងទាំងអស់គ្នា ក្រោយពីពួកគាត់បាត់បងដីស្រែ និងផ្ទះសម្បែង ដោយសារការរំលោភយកពីសំណាក់ក្រុមហ៊ុន ខេ.ឌី.ស៊ី។
អតីតគ្រូបង្រៀនរូបនេះ បញ្ជាក់ថា លោកស្រីនឹងចូលរួមសវនាការតាមកោះហៅរបស់តុលាការក្រុងភ្នំពេញ៖ «រឿងនេះជាអយុត្តិធម៌ណាស់សម្រាប់ពួកខ្ញុំ ហើយសូម្បីតែការងាររបស់ខ្ញុំក៏ត្រូវបាត់បង់រឿងដីធ្លីហ្នឹងដែរ។ ហេតុអ្វីក៏លោកតុលាការអត់មើលឃើញ ពីទុក្ខលំបាករបស់ពួកខ្ញុំអ៊ីចឹង ? វាអយុត្តិធម៌ពេកសម្រាប់ពួកខ្ញុំ។ តាំងពីខ្ញុំមានការធ្វើរហូតដល់ខ្ញុំមិនមានការងារធ្វើ។ តើលោកតុលាការមានដែលយល់ពីអារម្មណ៍របស់ពួកខ្ញុំទេ ? ពួកខ្ញុំការពារតែដីរបស់ពួកខ្ញុំទេ។ ខ្ញុំអត់មានទៅទាមទាររំលោភយកដីរបស់ក្រុមហ៊ុនទេ។ ក្រុមហ៊ុនអាក្រក់ ក្រុមហ៊ុនធ្វើបាបពួកខ្ញុំ បែរតុលាការមិនចាត់ការទៅវិញ។ ឈូសឆាយផ្ទះរបស់ពួកខ្ញុំអស់ ១៤ខ្នងផ្ទះ តាំង៩មករា ២០០៨ មកដល់បច្ចុប្បន្ននេះ ក្រុមហ៊ុននេះ សូម្បីតែ១០០រៀលលុយខ្មែរ ក៏អត់ឱ្យដែរ ថ្លៃឈូសឆាយផ្ទះសម្បែងរបស់ពួកខ្ញុំ»។
អ្នកភូមិឡពាងម្នាក់ ដែលបាត់បង់ដីធ្លីដោយសារតែក្រុមហ៊ុន ខេ.ឌី.ស៊ី រំលោភយក គឺលោកស្រី កែវ វណ្ណៈ យល់ថា ការសើរើសំណុំរឿងនេះឡើងវិញ ប្រហែលជាមកពីលោកស្រី អ៊ុំ សុភី ចេញមុខការពារដីបឹងធម្មជាតិ ក្រោយពីឃើញមានមនុស្សមួយក្រុមចុះវាស់វែងដីបឹង បម្រុងយកទៅធ្វើអាជីវកម្ម។ លោកស្រី ស្នើដល់តុលាការទម្លាក់ចោលបទចោទប្រកាន់លើតំណាងពលរដ្ឋរូបនេះ៖ «គ្រាន់តែចាប់វាស់ប៉ុណ្ណឹងហើយ នាំគ្នាតវ៉ាស្រាប់តែឥឡូវមកចេញយករឿង២០០៨ហ្នឹង មកកាត់ក្ដីគាត់វិញ វាអត់សម វាអត់ត្រូវរឿង។ អ៊ីចឹង បានថាអ្នកណាមួយចង់លួចធ្វើបាបអ្នកគ្រូ សុភី ហ្នឹងហើយ ព្រោះគាត់ការពារបឹងទាំងអស់ហ្នឹង។ ប្រជាពលរដ្ឋពឹងគាត់ហ្នឹងហើយ គាត់ជាអ្នកចេះដឹងមួយ។ អ៊ីចឹង ! គេចង់បំបាក់គាត់កុំឱ្យប្រជាពលរដ្ឋពឹងគាត់បាន។ គេចង់បំបាក់គាត់តែម្ដង។ សូមតុលាការរកយុត្តិធម៌ឱ្យពួកខ្ញុំឱ្យត្រឹមត្រូវ»។
ប្រតិកម្មរបស់តំណាង និងពលរដ្ឋសហគមន៍ឡពាងនេះ ធ្វើឡើងបន្ទាប់ពីព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ លោក ឆាយ ហុង បានសម្រេចកោះហៅ លោក សំ សុគង់ ដែលជាមេធាវីការពារសិទ្ធិឱ្យតំណាងពលរដ្ឋឡពាង គឺលោកស្រី អ៊ុំ សុភី ឱ្យចូលសវនាការជំនុំជម្រះក្ដី ពាក់ព័ន្ធនឹងសំណុំរឿង «ញុះញង់» កាលឆ្នាំ២០០៨ នៅរសៀលថ្ងៃទី៤ ខែកុម្ភៈ សប្តាហ៍ក្រោយនេះ។
មេធាវី សំ សុគង់ ប្រាប់អាស៊ីសេរីថា កាលពីជាង ១០ឆ្នាំមុន លោកធ្លាប់បានធ្វើជាមេធាវីឱ្យអង្គការអ្នកច្បាប់កម្ពុជា ហើយបានការពារផ្នែកច្បាប់ដល់តំណាងសហគមន៍ដីធ្លី លោកស្រី អ៊ុំ សុភី ក្នុងវិវាទដីធ្លីមួយ រវាងអ្នកភូមិឡពាង ជាមួយនឹងប្រធានក្រុមហ៊ុន ខេ.ឌី.ស៊ី គឺអ្នកស្រី ជា ខេង ដែលត្រូវជាភរិយាលោក ស៊ុយ សែម រដ្ឋមន្ត្រីក្រសួងរ៉ែ និងថាមពល។ លោកថា សំណុំរឿងនេះសាលាដំបូងខេត្តកំពង់ឆ្នាំងបានបើកការជំនុំជម្រះបានតែម្ដងទេ រួចក៏ផ្ទេរសិទ្ធិនៃការកាត់ក្ដីបន្តទៅឱ្យសាលាដំបូងរាជធានីភ្នំពេញវិញ។
ទោះជាយ៉ាងណា លោកបញ្ជាក់ថា បច្ចុប្បន្នលោកលែងកាន់ក្តីនេះទៀតហើយ ដោយសារអង្គការអ្នកច្បាប់កម្ពុជានោះបានបិទទៅហើយ ក៏ប៉ុន្តែលោកថា លោកនឹងពិភាក្សាជាមួយលោកស្រី អ៊ុំ សភី ប្រសិនបើតំណាងពលរដ្ឋរូបនេះចង់ឱ្យលោកជួយការពារក្តីនេះបន្តទៅទៀត៖ « ប្រសិនបើគាត់ជួបខ្ញុំហើយចង់ឱ្យខ្ញុំបន្តទៀត នោះខ្ញុំនឹងពិចារណាការពារក្ដីឱ្យគាត់។ តែបើគាត់ថាគាត់ចង់ដូរមេធាវី ឬចង់រកមេធាវីណាផ្សេងនោះអាស្រ័យលើឆន្ទៈរបស់គាត់» ។
ជម្លោះដីធ្លីរវាងក្រុមហ៊ុន ខេ.ឌី.ស៊ី របស់អ្នកស្រី ជា ខេង ជាមួយពលរដ្ឋនៅឃុំតាជេស ស្រុកកំពង់ត្រឡាច បានអូសបន្លាយអស់រយៈពេលជាង១៣ឆ្នាំមកហើយ។ ភាគីក្រុមហ៊ុន បានប្រើគ្រប់វិធីសាស្ត្រក្នុងការដោះស្រាយបញ្ហា គឺប្រើទាំងទិដ្ឋភាពច្បាប់ ការសម្របសម្រួលក្រៅប្រព័ន្ធតុលាការ និងពេលខ្លះមានប្រើអំពើហិង្សាផងក៏មាន។ កាលពីឆ្នាំ២០១៣ រដ្ឋាភិបាលលោក ហ៊ុន សែន បានផ្ដល់ដីសម្បទាននៅតំបន់មានជម្លោះនេះ ទៅឱ្យក្រុមហ៊ុនចិនថែមទៀត ខណៈពលរដ្ឋឃុំតាជេស នៅមិនទាន់ទទួលបានដំណោះស្រាយនៅឡើយ។
អ្នកភូមិឡពាងឱ្យដឹងថា ពួកគាត់នឹងនាំគ្នាឡើងមករាជធានីភ្នំពេញ ដើម្បីតាមដានសវនាការកាត់ក្តីតំណាងរបស់ពួកគាត់ នៅថ្ងៃទី៤ ខែកុម្ភៈខាងមុខនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។