ពលរដ្ឋរាប់រយនាក់រស់នៅខេត្តសៀមរាប បន្តរារាំងអាជ្ញាធរជាតិអប្សរាមិនឱ្យរុះរើផ្ទះសម្បែង រោងបាយ និងជញ្ជាំងផ្ទះ របស់ពលរដ្ឋ រយៈពេល ២ថ្ងៃជាប់គ្នា។
មន្ត្រីសង្គមស៊ីវិលចាត់ទុកទង្វើ របស់អាជ្ញាធរជាតិអប្សរា ជាការរំលោភសិទ្ធិលំនៅឋានរបស់ពលរដ្ឋ។
ពលរដ្ឋទាំងនោះ រស់នៅតំបន់ឧទ្យានអង្គរជាយូរមកហើយ ក្នុងស្រុកប្រាសាទបាគង ស្រុកពួក និង ក្រុងសៀមរាប កំពុងកើតទុក្ខមិនសុខចិត្ត ករណីអាជ្ញាធរជាតិអប្សរា បន្តប្រើកម្លាំងជាច្រើននាក់ រុះរើផ្ទះសម្បែង រោងបាយ និង ជញ្ជាំងផ្ទះរបស់ពលរដ្ឋចំនួន ៣ ខ្នង នៅថ្ងៃទី២៤ និង ២៥ តុលានេះ។
ពលរដ្ឋរស់នៅភូមិដូននំ ឃុំមានជ័យ ស្រុកប្រាសាទបាគង លោក សុខ ពៅ ប្រាប់វិទ្យុអាស៊ីសេរីនៅថ្ងៃទី២៥ តុលាថា អាជ្ញាធរចោទគ្រួសារលោកថា មកតាំងទីលំនៅខុសច្បាប់ ហើយអាជ្ញាធរអប្បរាបានមករុះរើ ផ្ទះរបស់លោកជាច្រើនដងមកហើយ ក៏ប៉ុន្តែអ្នកភូមិរាប់រយនាក់ បានលើកគ្នារារាំង ហាមឃាត់មិនឱ្យរុះរើ។
លោកបន្ថែមថា ផ្ទះរបស់លោក មានទំហំទទឹង ៤ ម៉ែត្រ បណ្តោយ ៦ ម៉ែត្រ ប្រក់ស័ង្កសី ជញ្ជាំងបាំងស័ង្កសីបានតែមួយចំហៀង ហើយមួយចំហៀងទៀត អាជ្ញាធរអប្សរាហាមឃាត់មិនឱ្យបាំង ពេលមានភ្លៀងធ្លាក់ម្តងៗ ទឹកសាចចូលពេញផ្ទះ។
លោក សុខ ពៅ៖ «គេថាឱ្យយើងសុំច្បាប់ ដល់ពេលយើងដាក់ពាក្យសុំច្បាប់គេអត់ឱ្យ។ ខ្ញុំសុំច្បាប់បងឯងគេអត់ឱ្យ ខ្ញុំថា បងឯងឱ្យខ្ញុំរស់នៅតាមថ្នល់ ឬយ៉ាងម៉េច?គេរុះរើទាំងអស់ អត់មានសំណងឱ្យយើងផង»។
បុរសដដែលបន្ថែមថា គ្រួសាររបស់លោក មករស់នៅតំបន់នេះ ២៣ ឆ្នាំមកហើយ ប៉ុន្តែអាជ្ញាធរជាតិអប្សរាប៉ុនប៉ងរុះរើផ្ទះជាច្រើនដង ដោយពុំមានសំណងអ្វីទាំងអស់។
លោកថា បញ្ហានេះមិនត្រឹមតែគ្មានដំណោះស្រាយទេ លោកនឹងប្រពន្ធ បែរជាជាប់បណ្តឹងនៅតុលាការ ២សំណុំរឿង ដែលអាជ្ញាធរជាតិអប្សរាជាដើមបណ្តឹង បានប្តឹងក្នុងបំណងគំរាមមិនឱ្យលោកបង្ហោះហ្វេសប៊ុក (Facebook) បង្ហាញពីសកម្មភាពអាជ្ញាធររុះរើផ្ទះរបស់លោក។
ចាប់តាំងពីថ្ងៃទី២៤ និង ២៥ ខែតុលានេះ អាជ្ញាធរជាតិអប្សរា បានទៅរុះរើលំនៅឋាន រោងបាយ និងជញ្ជាំងផ្ទះ របស់ពលរដ្ឋចំនួន ៣ គ្រួសារ រស់នៅស្រុកពួក ក្រុងសៀមរាប និង ស្រុកប្រាសាទបាគង។
ក្នុងចំណោមផ្ទះ ៣ ខ្នង ក៏មានផ្ទះរបស់មន្ត្រីយោធាម្នាក់ដែរ ឋិតក្នុងភូមិប្រៃយ៍ចាស់ សង្កាត់ទឹកវិល ក្រុងសៀមរាប ត្រូវអាជ្ញាធរអប្សរារុះរើដំបូល និងជញ្ជាំងផ្ទះអស់។
ចំណែកឯពលរដ្ឋរស់នៅស្រុកពួករាប់រយនាក់ បានលើកគ្នាតវ៉ា ខឹងសម្បារនឹងអាជ្ញាធរជាតិអប្សរា មករុះរើផ្ទះបាយ របស់ពលរដ្ឋមួយគ្រួសារ កាលពីព្រឹកថ្ងៃទី២៥ តុលា។
ក្រុមពលរដ្ឋទាំងនោះ បានថតវីដេអូ បង្ហោះតាមបណ្ដាញសង្គមហ្វេសប៊ុក ស្តីបន្ទោសអាជ្ញាធរថា ធ្វើបាបពលរដ្ឋក្រីក្រ៖ «បើមិនស្រែកយើងបានផ្ទះណានៅ ? បានផ្ទះណាជ្រក»?
ជុំវិញរឿងនេះ រដ្ឋលេខាធិការ និងជាប្រធានក្រុមអ្នកនាំពាក្យក្រសួងវប្បធម៌ លោក ស៊ុំ ម៉ាប់ បដិសេធមិនអធិប្បាយរឿងនេះទេ ព្រោះលោកថា ជាភារកិច្ចរបស់អាជ្ញាធរជាតិអប្សរា។
វិទ្យុអាស៊ីសេរី ក៏មិនទាន់អាចសុំការបំភ្លឺរឿងនេះ ពីអ្នកនាំពាក្យអាជ្ញាធរជាតិអប្សរា លោក ឡុង កុសល បាននៅឡើយទេ នៅថ្ងៃទី២៥ តុលា ដោយទូរស័ព្ទហៅចូលច្រើនដង តែគ្មានអ្នកលើក។
កាលពីចុងខែមីនា កន្លងទៅ អង្គការលើកលែងទោសអន្តរជាតិ(Amnesty International ) បានចេញសេចក្តីថ្លែងការណ៍មួយបង្ហាញថា មនុស្សជាច្រើនដែលរស់នៅជុំវិញតំបន់អង្គរ ត្រូវបានបង្ខិតបង្ខំឱ្យផ្លាស់ទីលំនៅទៅរស់នៅតំបន់រុនតាឯក ដែលខ្វះខាតហេដ្ឋារចនាសម្ព័ន្ធ និងទឹកស្អាត។
បន្ថែមពីនេះទៀត គ្រួសារដែលផ្លាស់ប្ដូរទីលំនៅមិនបានផ្តល់ការពិគ្រោះយោបល់ពិតប្រាកដឡើយ ជាពិសេស ការទទួលបានការការពារផ្លូវច្បាប់។
ជុំវិញរឿងនេះ អ្នកសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិកម្ពុជា លោក វណ្ណ សុផាត ពន្យល់ថា ការបង្ខំឱ្យពលរដ្ឋរុះរើផ្ទះសម្បែង គឺជាសកម្មភាពបណ្តេញពលរដ្ឋដោយបំពានច្បាប់ ផ្ទុយពីស្មារតីច្បាប់ និងបទដ្ឋានសិទ្ធិមនុស្សអន្តរជាតិ ដែលរដ្ឋាភិបាលកម្ពុជាផ្តល់សច្ចាប័ន។
លោក វណ្ណ សុផាត៖ «ការអភិវឌ្ឍមួយប្រកបដោយនិរន្តរភាព ប្រកបដោយសុខដុមរមនា អនុលោមតាមច្បាប់ជាតិ និងអន្តរជាតិ លុះត្រាដែលដូរលំនៅឋានប្រកបដោយពិភាក្សា មានការពិភាក្សាពីគ្រប់ភាគី និងមានសំណងសមរម្យ ដែលអាចទទួលបាន។ បើផ្ទុយពីហ្នឹង បំពានច្បាប់ សិទ្ធិមនុស្ស រដ្ឋធម្មនុញ្ញ និងរំលោភសិទ្ធិមនុស្សធ្ងន់ធ្ងរ ដែលរដ្ឋាភិបាលថ្មី គួរតែចាប់អារម្មណ៍»។
សេចក្ដីសម្រេចរបស់រដ្ឋាភិបាលលេខ៧០ ស្ដីពីការកំណត់បទដ្ឋានការប្រើប្រាស់ដីធ្លីនៅតំបន់១ និងតំបន់២ នៃរមណីយដ្ឋានសៀមរាប-អង្គរ ប្រការ២ ចែងថា ពលរដ្ឋដែលមានលំនៅឋានរស់នៅយូរលង់មកហើយ ឬមុនឆ្នាំ២០០៤ មិនមានការដេញឱ្យចាកចេញពីលំនៅឋានឡើយ។
ក៏ប៉ុន្តែពលរដ្ឋមួយចំនួន ដែលរស់នៅតំបន់អង្គរ យូរយារមកហើយ តាំងពីមុនឆ្នាំ ២០០៤ បានត្អូញត្អែរថា អាជ្ញាធរអប្សរាតែងតែចុះមកដល់ផ្ទះរបស់ពួកគាត់ជាញឹកញាប់ហើយ ប្រាប់ថា តើព្រមរុះរើ ឬមិនព្រម?
កន្លងទៅ អតីតលោកនាយករដ្ឋមន្ត្រី ហ៊ុន សែន បានគំរាមពលរដ្ឋរស់នៅតំបន់អង្គរថា ប្រសិនបើពលរដ្ឋមិនព្រមទទួលយកសំណងដីឡូត៍នៅតំបន់រុនតាឯក អាជ្ញាធរនឹងបណ្ដេញពួកគាត់ចេញដោយមិនផ្តល់សំណងអ្វីទាំងអស់។
លោក ហ៊ុន សែន ថា ផែនការផ្លាស់ទីលំនៅចេញពីតំបន់រមណីយដ្ឋានអង្គរ ដើម្បីរក្សាសោភ័ណភាពបរិស្ថានអង្គរ ស្របតាមលក្ខខណ្ឌនៃអង្គការយូណេស្កូ (UNESCO) ហើយប្រសិនបើ កម្ពុជាមិនអនុវត្តដូច្នេះទេ អង្គការនេះនឹងដកតំបន់អង្គរចេញពីបញ្ជីបេតិកភណ្ឌពិភពលោក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។