ជនជាតិដើមភាគតិចកួយជាង ១០០នាក់ រស់នៅខេត្តព្រះវិហារបានរួមគ្នាធ្វើពិធីសែនព្រេន ដើម្បីដាក់បណ្ដាសាចំពោះក្រុមហ៊ុន និងអាជ្ញាធរណា ដែលរំលោភដីធ្លីរបស់ពួកគាត់។ អ្នកភូមិអះអាងថា ក្រោយពីក្រុមហ៊ុនស្ករអំពៅចិន ហេងហ្វូ (Hengfu Group Sugar Industry) ផ្អាកវិនិយោគនៅតំបន់នោះ អាជ្ញាធរមូលដ្ឋានបែរជាហួងហែងដីធ្លី ដែលកំពុងមានជម្លោះនោះមកកាន់កាប់ខ្លួនឯង ពុំព្រមប្រគល់ឱ្យពលរដ្ឋអាស្រ័យផលវិញទេ។
ជនជាតិដើមភាគតិចចំនួន ២ភូមិ គឺភូមិប្រមេរ និងស្រែព្រៀង ឃុំប្រមេរ ស្រុកត្បែងមានជ័យបានរៀបចំពិធីសែនព្រេននៅចំណុចព្រៃកប់សព ក្នុងខ្ទមអ្នកតាចាស់ស្រុក កាលពីថ្ងៃទី៣ ខែកុម្ភៈ។ អ្នកភូមិសែនក្បាលជ្រូកមួយមាន់ស្ងោរ ស្រា និងផ្លែឈើជាដើម ដើម្បីបួងសួងរកដំណោះស្រាយវិបត្តិដីធ្លី ដែលអូសបន្លាយពេលជិត ១០ឆ្នាំមកហើយ។ ក្នុងពិធីនេះ អ្នកភូមិបានប្រកុំភ្លេងខ្មែរ និងជាន់អារក្សដាក់បណ្ដាសា ឱ្យអ្នកតាចាស់ស្រុកបរាមុខ និងកាច់បំបាក់ក ចំពោះក្រុមហ៊ុន និងអាជ្ញាធរណា មានមហិច្ឆតាទុច្ចរិតរំលោភដីធ្លីរបស់ពួកគាត់។
ជនជាតិដើមភាគតិចកួយរស់នៅភូមិប្រមេរ លោកស្រី កុយ ម៉ឺន ប្រាប់អាស៊ីសេរីថាអ្នកភូមិមានជំនឿថា បារមីអ្នកតាពូកែស័ក្ដិសិទ្ធិជួយទាមទារដីធ្លី ដែលក្រុមហ៊ុនចិនរំលោភយក ឱ្យត្រឡប់មកវិញ។ លោកស្រីថា បើទោះបីជាក្រុមហ៊ុនចិនផ្អាកសង្វាក់ផលិតកម្មក្តី ក៏ប៉ុន្តែអាជ្ញាធរឃុំ និងស្រុក បែរជាកាងដីនៅតំបន់នោះ ពុំព្រមប្រគល់ឱ្យអ្នកស្រុកវិញទេ៖ «បួងសួងឱ្យអ្នកតាជួយ បើនរណារំលោភយកដីយើងឱ្យអ្នកតាកាច់ មិនថាមេភូមិ មេឃុំ មេស្រុក និងចៅហ្វាយខេត្តក៏ដោយ។ ភ្ជួរស្រែមិនបានក្ដៅក្រហាយ គេគំរាមអ្នកណាធ្វើដីចិនមិនបាន។ ខ្ញុំថា យើងធ្វើលើដីយើងទេ មិនមែនដីចិនទេ »។
គ្រួសារលោកស្រី កុយ ម៉ឺន មានដីជាង ១០ហិកតារ ត្រូវបានក្រុមហ៊ុនចិនរំលោភយកទាំងអស់ស្រុងជិត ១០ឆ្នាំមកហើយ ហើយមកទល់ពេលនេះអាជ្ញាធរមិនទាន់ប្រគល់ដីឱ្យគ្រួសារលោកស្រីវិញទេ។ រីឯអ្នកភូមិជាច្រើនគ្រួសារទៀត ក៏មានបញ្ហាដូចលោកស្រីដែរ។
ជនជាតិដើមភាគតិចម្នាក់ទៀត រស់នៅភូមិប្រមេរ លោកស្រី ស៊ីង សាំ អះអាងថា ក្រោយពីក្រុមហ៊ុនចិនផ្អាកវិនិយោគនៅតំបន់នោះ ក្រុមហ៊ុនយក្សមួយនេះ បានប្រគល់ដីដែលមានជម្លោះទាំងអស់ ឱ្យអាជ្ញាធរខេត្តព្រះវិហារដោះស្រាយ ក៏ប៉ុន្តែអាជ្ញាធរនៅតែអូសបន្លាយពេល មិនព្រមដោះស្រាយទាល់តែសោះ។ លោកស្រីបញ្ជាក់ថា ដីស្រែជាង ៦០ហិកតារ ឬស្មើ ១០ភាគរយ ដែលក្រុមហ៊ុនចិនរំលោភបំពានពីអ្នកភូមិកន្លងទៅ អាជ្ញាធរស្រុកបែរជាហ៊ុមព័ទ្ធគ្រប់គ្រងជាសម្បត្តិឯកជនទៅវិញ៖ «ពេលចិនទៅអស់ហើយ ដី ១០ភាគរយហ្នឹង គឺដីមានឈ្មោះរបស់បងប្អូនអស់ហើយ ដីសហគមន៍ណា។ អាជ្ញាធរស្រុក គេភ្ជូរដាំចន្ទីរបស់ពលរដ្ឋ ពេលពលរដ្ឋតវ៉ាទៅ គេថា ដី ១០ភាគរយរបស់ស្រុកគេប្រគល់ឱ្យប៉ូលិស និងប៉េអឹម »។
អាស៊ីសេរីបានទាក់ទងអភិបាលស្រុកត្បែងមានជ័យ លោក នុត សោភ័ណ្ឌ ដើម្បីបកស្រាយជុំវិញការលើកឡើងរបស់ពលរដ្ឋ ប៉ុន្តែលោកបដិសេធមិនផ្តល់បទសម្ភាសន៍តាមទូរស័ព្ទទេ ដោយលោករុញឱ្យអ្នកយកព័ត៌មានរបស់អាស៊ីសេរីមកជួបលោកផ្ទាល់៖ « ចាំមកចួបខ្ញុំផ្ទាល់នៅកន្លែងមក បានខ្ញុំបកស្រាយបាន » ។
ប៉ុន្តែមេឃុំប្រមេរ លោក ធាន ហេង បកស្រាយថា ដីជាង ៦០ហិកតារដែលអាជ្ញាធរបោះបង្គោលរក្សាទុក គឺជាដីបម្រុងទុកសម្រាប់ចែកជូនពលរដ្ឋក្រីក្រ ពុំមែនជារបស់អាជ្ញាធរណាមួយនោះទេ។លោកបដិសេធថា ពុំមានអាជ្ញាធរណាទៅរំលោភដីនៅតំបន់នោះទេ ហើយជម្លោះដីធ្លីនេះ គឺហួសពីសមត្ថភាពអាជ្ញាធរឃុំដោះស្រាយ៖ «ពាក់ព័ន្ធដី ១០ភាគរយ យើងរក្សាទុកសម្រាប់ពលរដ្ឋអត់ដី យើងគ្រាន់តែការពារកុំឱ្យបងប្អូនយក »។
សង្គមស៊ីវិលតាមដានករណីនេះសង្កេតឃើញថា ជម្លោះដីធ្លីនេះមានករណីប្លែកជាងគេ។ នាយកប្រតិបត្តិអង្គការពន្លកខ្មែរលោក ប៉ឹក សោភ័ណថា បច្ចុប្បន្នជម្លោះដីធ្លីនៅតំបន់នោះពុំមែនកើតមានរវាងក្រុមហ៊ុនចិន ជាមួយពលរដ្ឋនោះទេ បែរជាកើតមានរវាងអាជ្ញាធរស្រុក និងពលរដ្ឋទៅវិញ។ លោកអំពាវនាវឱ្យរដ្ឋាភិបាលគួរតែពន្លឿនដោះស្រាយជម្លោះដីធ្លីនេះដោយយុត្តិធម៌ និងមានតម្លាភាព។
ក្រុមហ៊ុនសម្បទានសេដ្ឋកិច្ច ហេង ហ្វូ (Hengfu Group Sugar Industry) ទទួលសិទ្ធិវិនិយោគពីរដ្ឋាភិបាលលើផ្ទៃដីទំហំជាង ៤ម៉ឺនហិកតារ (៤២.០០០) តាំងពីឆ្នាំ២០១១ វិនិយោគដាំអំពៅ និងកៅស៊ូឋិតនៅស្រុកឆែប ស្រុកត្បែងមានជ័យ និងស្រុកជ័យសែន ខេត្តព្រះវិហារ។ ក្រុមហ៊ុនផ្អាកដំណើរជាង ១ឆ្នាំហើយក្រុមហ៊ុនបានជួលដីមួយផ្នែកធំ ឱ្យពលរដ្ឋចំណាកស្រុកដាំស្រូវ ហើយមានដីផ្នែកខ្លះទៀត អាជ្ញាធរមូលដ្ឋានបានដណ្ដើមគ្នាកាន់កាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។