តំបន់ព្រៃជំនឿមួយកន្លែង ដែលជនជាតិដើមភាគតិចកួយចំនួន ២ភូមិ នៅខេត្តព្រះវិហារ តែងតែឃ្វាលគោក្របី និងប្រមូលអនុផលព្រៃឈើចិញ្ចឹមជីវិត កំពុងប្រឈមការឈូសឆាយទ្រង់ទ្រាយធំ ឱ្យក្លាយជាវាលល្វឹងល្វើយ ពីសំណាក់ឧកញ៉ាមួយរូប។
ប្រជាសហគមន៍ខកចិត្តនឹងអាជ្ញាធរមូលដ្ឋានខេត្តព្រះវិហារ បើកដៃឱ្យឧកញ៉ាមួយរូប ប្រើគ្រឿងចក្រជិត ១០គ្រឿង សម្រុកឈូសឆាយព្រៃជំនឿ និងតំបន់ចម្ការវិលជុំ ដែលជាឆ្នាំងបាយរបស់ពួកគាត់។
ជនជាតិដើមភាគតិចកួយជាង ២០០គ្រួសារ រស់នៅក្នុងភូមិដងផ្លិត និងភូមិណារុង ឃុំឆែបពីរ ស្រុកឆែប ទាមទារឱ្យអភិបាលខេត្តព្រះវិហារ លោក គីម រិទ្ធី ជួយអន្តរាគមន៍បញ្ឈប់សកម្មភាពឈូសឆាយព្រៃជំនឿ និងតំបន់ដែលអ្នកភូមិរកអនុផលព្រៃឈើបែបប្រពៃណី កំពុងប្រឈមការឈូសឆាយអស់ជាង ២០០ហិកតារ នៅរយៈពេលជាង ២សប្ដាហ៍កន្លងទៅនេះ ។
ពួកគាត់អះអាងថា សកម្មភាពឈូសឆាយនេះ មានទាហានប្រដាប់អាវុធជាច្រើននាក់យាមកាម ហាមមិនឱ្យពលរដ្ឋចេញចូលតំបន់នោះ។
សំណាងសហគមន៍ លោក សោម ណៃ ប្រាប់វិទ្យុអាស៊ីសេរី នៅថ្ងៃទី ១៥ មករាថា ជនជាតិដើមភាគតិចចំនួន ២ភូមិ កំពុងជួបការលំបាកមួយកម្រិតទៀត ប្រសិនបើព្រៃជំនឿ ដីចម្ការវិលជុំ និងកន្លែងរកអនុផលព្រៃឈើបន្សល់ចុងក្រោយ ដែលពួកគាត់អាស្រ័យផលក្នុងតំបន់នោះ បាត់បង់អស់។
លោកថា ទីតាំងដែលកំពុងឈូសឆាយនោះ ឋិតនៅចំណុចអន្លង់ស្វាយអៀ ចំណុចប្រលានតាដេវ និងចំណុចត្រពាំង នៅកៀកនឹងភូមិកំណើតរបស់ពួកគាត់។
លោក សោម ណៃ៖«អស់ហើយ!ចាប់ពីពេលនេះពលរដ្ឋមានតែទុក្ខព្រួយហើយ គ្មានមន្ត្រីណាជួយបានទេ សុទ្ធតែលេទាំងអស់។ ពលរដ្ឋចាក់គំនិតស្ទើរបែកដើមទ្រូងអស់ហើយ។ តែបើងាប់ឱ្យអស់ហ្មងទៅ មិនចាំបាច់មានទុក្ខព្រួយទៀត»។
កាលពីថ្ងៃទី៤ មករា ប្រជាសហគមន៍ប្រមាណ ២០នាក់ បានលើកគ្នាឃាត់គ្រឿងចក្រជិត ១០គ្រឿង ដែលកំពុងឈូសឆាយផ្ដួលដើមឈើតូចធំក្នុងតំបន់នោះ ហើយក្នុងពេលចុះឃាត់បុរសម្នាក់ ដែលគេស្គាល់ថា ជាមេការ ឈ្មោះ ឆេន សែន និងបក្ខពួក បានប្រើដំបងវាយអ្នកភូមិម្នាក់បណ្ដាលឱ្យបែកក្បាលហូរឈាម។
ក្រោយពីកើតហេតុ ពួកគាត់បានប្ដឹងឱ្យអាជ្ញាធរជួយអន្តរាគមន៍ ក៏ប៉ុន្តែគ្មានបានផលឡើយ ហើយពួកគាត់បានដាក់ពាក្យប្ដឹងទៅតុលាការខេត្តព្រះវិហារបន្តទៀត។
ជនជាតិដើមភាគតិចម្នាក់ទៀតរស់នៅភូមិដងផ្លិត លោក អឹម ឆេន ប្រាប់វិទ្យុអាស៊ីសេរីថា សកម្មភាពឈូសឆាយនេះ អាជ្ញាធរមិនបានជូនដំណឹងប្រាប់ពួកគាត់នោះទេ ធ្វើឱ្យពលរដ្ឋមានមន្ទិល និងសោកស្ដាយព្រៃឈើ។
លោកថា បច្ចុប្បន្នសហគមន៍មិនអាចចូលទៅអាស្រ័យផល ព្រៃឈើ និងធ្វើចម្ការវិលជុំ ក្នុងតំបន់នោះបានទេ ព្រោះមានទាហានប្រដាប់អាវុធរារាំង និងគំរាមកំហែង។
លោក អឹម ឆេន៖«ដល់ខ្ញុំទៅសួរនាំ គេមិនបានទេ ទៅថ្ងៃមិញ ទាហានគ្រប់ដៃ ១០នាក់សួរនាំខ្ញុំមករកអី?ខ្ញុំថា មករកឱ្យអស់លោកជួយដោះស្រាយពលរដ្ឋ ២ភូមិ ទុក្ខវេទនាណាស់សព្វថ្ងៃនេះ។ ដេកមិនលក់បក់មិនល្ហើយទេ ពិបាកសព្វយ៉ាងអស់»។
វិទ្យុអាស៊ីសេរីមិនទាន់អាចទាក់ទងសុំការបកស្រាយបន្ថែមជុំវិញរឿងនេះ ពីអភិបាលខេត្តព្រះវិហារលោក គីម រិទ្ធី បាននៅឡើយទេ នៅថ្ងៃទី១៥ មករា ដោយសារទូរស័ព្ទហៅចូលតែគ្មានអ្នកលើក។
ក៏ប៉ុន្តែ មេឃុំឆែបពីរ លោក ជឿន ជិន មានប្រសាសន៍ថា ក្រុមហ៊ុនឯកជនមួយ បានចូលមកវិនិយោគវិស័យកសិកម្មក្នុងតំបន់នោះ ដោយឈូសឆាយដីឱ្យក្លាយវាលទំហំ ១ពាន់ហិកតារ (១.០០០)។ លោកថា ដីដែលឈូសឆាយ គឺក្រុមហ៊ុនបានប្រមូលទិញពីពលរដ្ឋនៅមូលដ្ឋាន។
លោកបញ្ជាក់ថា លោកមិនស្គាល់ឈ្មោះក្រុមហ៊ុនឈូសឆាយនោះទេ តែគ្រាន់តែដឹងថា ម្ចាស់ក្រុមហ៊ុនជារបស់ឧកញ៉ា អ៊ុក គឹមសាន។
លោក ជឿន ជិន៖«ខ្ញុំដឹងត្រឹមថាគេឈូសឆាយ ១ពាន់ហិកតារ ឈ្មោះឧកញ៉ា អ៊ុក គឹមសាន គាត់មករកស៊ីវិនិយោគ»។
វិទ្យុអាស៊ីសេរីនៅមិនទាន់អាចទាក់ទងសុំការបំភ្លឺ ជុំវិញការចោទប្រកាន់នេះ ពីឧកញ៉ា អ៊ុក គឹមសាន បាននៅឡើយទេ នៅថ្ងៃដដែលនេះ។
ជុំវិញរឿងនេះ មន្ត្រីពង្រឹងសិទ្ធិអំណាចសហគមន៍មូលដ្ឋាននៃសមាគមអាដហុក លោក ប៉ែន ប៊ុណ្ណារ៍ ចាត់ទុកសកម្មភាពឈូសឆាយនេះ ជារឿងអយុត្តិធម៌សម្រាប់ជនជាតិដើមភាគតិចកួយ ដែលទាមទារឱ្យរដ្ឋាភិបាល បង្ហាញឆន្ទៈរឹងមាំដោះស្រាយបញ្ហានេះឱ្យបានត្រឹមត្រូវ និងការពារសិទ្ធិជនជាតិដើមភាគតិចដែលកំពុងរងការរំលោភបំពាន។
លោក ប៉ែន ប៊ុណ្ណារ៍៖«ការបំផ្លាញព្រៃឈើរបស់ជនជាតិដើមភាគតិច វាជាអំពើអយុត្តិធម៌ណាស់ ដែលរដ្ឋាភិបាលត្រូវគិតមែនទែន គិតនេះមិនឱ្យគិតតែទៅបំពេញចិត្តឧកញ៉ាឈូសឈើទេ គឺគិតជនជាតិដើមភាគតិចចែកគ្នារស់ផង ឱ្យពួកគាត់មានសិទ្ធិអាស្រ័យផលដោយគ្មានការរំលោភសិទ្ធិផង»។
តំបន់ព្រៃជំនឿ ព្រៃអារក្ស និងតំបន់អាស្រ័យផល ដែលកំពុងឈូសឆាយនោះ មានផ្ទៃដីជាង ១ ពាន់ហិកតារ ដែលជនជាតិដើមភាគតិចកួយ ចំនួន ២ភូមិ អាស្រ័យផល ធ្វើកសិកម្មដាំដុះ និងរកអនុផលព្រៃឈើច្រើនជំនាន់មកហើយ។
ព្រៃនៅតំបន់នោះ ក៏ជាជម្រកសត្វព្រៃ ព្រៃកប់សព វាលស្មៅសម្រាប់ឃ្វាលគោក្របី និង អូរធម្មជាតិ។
ប្រជាសហគមន៍បន្ថែមថា ពួកគាត់ មិនត្រឹមតែបាត់បង់ព្រៃឈើ និងសត្វព្រៃប៉ុណ្ណោះទេ បច្ចុប្បន្នសូម្បីតែដីធ្លីដែលពួកគាត់ធ្លាប់ស្រមៃថា នឹងដាំដើមឈើស្ដារឡើងវិញ ក៏ប្រឈមការបាត់បង់អស់ដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។