ស្នង​ការ​នគរបាល​ខត្ត​កំពង់​ឆ្នាំង​សាក​សួរ​តំណាង​សហគមន៍​ឡ​ពាង​២​នាក់​ប្ដី​ប្រពន្ធ រឿង​ផ្សាយ​ជម្លោះ​ដីធ្លី​តាម​ហ្វេសប៊ុក

0:00 / 0:00

អាជ្ញាធរ​​ស្រុក​ជល​គិរី បាន​បញ្ជូន​​ខ្លួន​​តំណាង​សហគមន៍​ឡ​ពាង​២នាក់​ប្ដី​ប្រពន្ធ គឺ​លោក​ ស្ងួន ញឿន និង​លោកស្រី អ៊ុំ​ សុភី ទៅ​ស្នង​ការ​នគរបាល​ខេត្ត​កំពង់ឆ្នាំង នៅ​ថ្ងៃ​ទី​៣០​ ខែមករា ក្រោយ​សមត្ថកិច្ច​នៃ​ការិយាល័យ​ព្រហ្មទណ្ឌ​កម្រិត​ធ្ងន់​សាកសួរ​ពួកគាត់​ អស់​១​ថ្ងៃ ពាក់ព័ន្ធ​នឹង​ការ​ផ្សាយ​ជម្លោះ​ដីធ្លី​មួយ​កន្លែង​នៅ​ភូមិ​តា​ម៉ុល​លើ ឃុំ​កោះ​ថ្កូវ​ តាម​បណ្ដាញ​សង្គម​ហ្វេសប៊ុក (Facebook)។ អង្គការ​សង្គម​ស៊ីវិល​ ចាត់​ទុក​ការ​ឃាត់​ខ្លួន​ពលរដ្ឋ​នេះ ថារំលោភ​សិទ្ធិមនុស្ស​ធ្ងន់ធ្ងរ និង​ស្នើ​ឲ្យ​ដោះលែង​ពួកគាត់​ឲ្យ​មាន​សេរីភាព​វិញ។

ប្អូន​ថ្លៃ​របស់​លោក ស្ងួន ញឿន គឺលោកស្រី ណាក កេន ប្រាប់​វិទ្យុ​អាស៊ី​សេរី​នៅ​ថ្ងៃ​ទី​៣០ ខែមករា ថា​ការ​ឃាត់​ខ្លួន​តំណាង​សហគមន៍​ឡ​ពាង​ទាំង​២​នេះ កើត​ឡើង​ក្រោយ​ពេល​​ពួកគាត់ ផ្សព្វផ្សាយ​ជម្លោះ​ដីធ្លី​តាម​បណ្ដាញ​សង្គម​ហ្វេសប៊ុក កាល​ពី​ថ្ងៃ​ទី​២៩ ខែមករា ករណី​អាជ្ញាធរ​ឃុំ​កោះ​ថ្កូវ ​រំលោភ​យក​ដី​ពលរដ្ឋ​២​គ្រួសារ​យក​ទៅ​ចែក​ឲ្យ​ពលរដ្ឋ​ដទៃ​ទៀត នៅ​ក្នុង​ភូមិ​តា​ម៉ុល​លើ ដោយ​គ្មាន​ផ្ដល់​សំណង​។

លោក​ស្រី​បន្ត​ទៀត​ថា អធិការ​នគរបាល​ស្រុក​ជលគិរី​ប្រាប់​ឲ្យ​លោក​ស្រី ទៅ​ដោះ​ស្រាយ​រឿង​នេះ​ នៅ​ស្នងការ​នគរបាល​ខេត្ត​កំពង់​ឆ្នាំង។ ស្ត្រី​វ័យ​ ៣៧ ​ឆ្នាំ​រូប​នេះ ដែល​ត្រូវ​​ជា​​ភរិយា​លោក​ រាជ សីមា ដែល​កំពុង​ជាប់​ឃុំ​ ស្នើ​សុំ​អាជ្ញាធរ​ដោះលែង​លោក​ ស្ងួន ញឿន និង​លោកស្រី អ៊ុំ​ សុភី ឲ្យ​មាន​សេរីភាព​ឡើង​វិញ​ ដើម្បី​វិល​ត្រឡប់​ទៅ​រក​ប្រាក់​ចិញ្ចឹមនិងមើល​ថែ​​កូន​៤​នាក់​របស់​គាត់​វិញ៖ «ខ្ញុំ​គិត​ថា ​វា​អត់​មាន​ភាព​យុត្តិធម៌​សម្រាប់​បង​ថ្លៃ​ខ្ញុំ​ទេ ព្រោះ​គាត់​គ្រាន់​តែ​ទៅ​ជួយ​ប្រជាពលរដ្ឋ​ដូច​គ្នា​ដែល​មាន​ទំនាស់​ដីធ្លី​ដូច​គ្នា។ គាត់​តែង​តែ​ជួយ​គ្នា។ ដល់​ពេល​គេ​ចាប់​ចោទ​ពួកគាត់​ថ គាត់​ទៅ​ឃុបឃិត​គ្នា ដើម្បី​បំផ្លាញ​ទ្រព្យ​របស់​គេ​។​ ខ្ញុំ​រក​ពាក្យ​និយាយ​អត់​ចេញ​ទេ ដល់​រឿង​ផ្ទួន​គ្នា​ច្រើន​ពេក​អ៊ីចឹង។ ដូច​ថា​អាណិត​ខ្លួន​អី​ផង និយាយ​អត់​ចង់​ចេញ​ទេ ហើយ​ខ្ញុំ​មាន​ប្ដី​នៅ​ជាប់​គុក​ទៀត នៅ​ទាំង​អស់​គ្នា​ ទាំង​បង​ទាំង​ប្អូន។ ពាក្យ​ចុង​ក្រោយ​របស់​ខ្ញុំ​ មាន​តែ​ស្នើ​សុំ​ឲ្យ​តុលាការ​ដោះលែង​បង​ថ្លៃ​ និង​បងស្រី ឲ្យ​ត្រឡប់​មក​ជួប​ជុំ​កូនចៅ​គាត់​។ ខ្ញុំ​អត់​មាន​អី​ទីពឹង​ទេ ព្រោះ​ក្មួយ​ក៏​នៅ​បន្ទុក​លើ​ខ្ញុំ។ កូនចៅ​នៅ​លើ​ខ្ញុំ​ទាំង​អស់។ ខ្ញុំ​មិន​ដឹង​ជា​ជ្រែក​ទៅ​ខាង​ណា​ទេ។ សូម​ជួយ​ឲ្យ​ដោះលែង​គាត់​ឆាប់​មក​វិញ​ផង​»។

កាល​ពី​ថ្ងៃ​ទី​២៩ ខែមករា សមត្ថកិច្ច​ឃុំ​កោះ​ថ្កូវ បាន​ឃាត់​ខ្លួន​លោក​ ស្ងួន​ ញឿន និង​លោកស្រី អ៊ុំ​ សុភី ហើយ​បញ្ជូន​ទៅ​អធិការដ្ឋាន​នគរបាល​ស្រុក​ជល​គិរី ដោយ​ចោទ​ប្រកាន់​ពួកគាត់​ថា ផ្សាយ​ជម្លោះ​ដីធ្លី​តាម​ហ្វេសប៊ុក ​(Facebook) បំផ្លើស​ការ​ពិត​ និង​មិន​បាន​សុំ​ការ​ពី​អាជ្ញាធរ​មូលដ្ឋាន​ជា​មុន។

មុន​ពេល​ឃាត់​ខ្លួន​នោះ តំណាង​សហគមន៍​ឡ​ពាង លោក ស្ងួន ញឿន ​បាន​ប្រាប់​វិទ្យុ​អាស៊ី​សេរី​ថា ​ពលរដ្ឋ​២​គ្រួសារ​ បាន​ស្នើ​សុំ​លោក​ឲ្យ​ទៅ​ជួយ​ផ្សាយ​រឿង​ដីធ្លី​ពួកគាត់​បង្ហោះ​តាម​ហ្វេសប៊ុក (Facebook) ក្រោយ​អាជ្ញាធរ​ឃុំ​កោះ​ថ្កូវ​បាន​ឃុបឃិត​គ្នា​ដក​យក​ដី​ធ្លី​ពួកគាត់ ដែល​អាស្រ័យ​ផល​ជិត​១០​ឆ្នាំ យក​ទៅ​បែង​ចែក​ឲ្យ​ពលរដ្ឋ​ជាង​១១​គ្រួសារ​ទៀត ដោយ​គ្មាន​ផ្ដល់​សំណង។

លោក​ចាត់​ទុក​ទង្វើ​អាជ្ញាធរ​នេះ​ថា ជា​ការ​គំរាមកំហែង​បំបាក់​ស្មារតី​សារព័ត៌មាន​ប្រជាពលរដ្ឋ​ ដែល​គ្រាន់​តែ​ផ្សាយ​រឿង​ដីធ្លី​តាម​បណ្ដាញ​ហ្វេសប៊ុក ដើម្បី​ឲ្យ​ប្រមុខ​រដ្ឋាភិបាល​ដឹង​ឮ​ ហើយ​ចាត់​វិធានការ​ដោះស្រាយ​ជូន​ពលរដ្ឋ​៖ «គាត់​អញ្ជើញ​ខ្ញុំ​ទៅ​ដើម្បី​ផ្សាយ​ព័ត៌មាន​ហ្នឹង ប៉ុន្តែ​ត្រូវ​បាន​មេភូមិ មេឃុំ​ថា​ខ្ញុំ​ធ្វើ​ព័ត៌មាន​មិន​ពិត​ កុហក​អ៊ីចឹង។ នេះ​ហើយ​ជា​ការ​បិទ​សិទ្ធិ​សេរីភាព​សារព័ត៌មាន​ ហើយ​ជា​ព័ត៌មាន​ពលរដ្ឋ ដែល​គាត់​មិន​ឲ្យ​ខ្ញុំ​ថត​អី​ទាំង​អស់។ក៏​មាន​ការ​ឈ្លោះ​ប្រកែក​គ្នា​ ទាំង​ប៉ូលិស​ទាំង​អី​ហ្នឹង​ ក៏​ហាម​ខ្ញុំ​ជា​ដាច់​ខាត។ ហើយ​ខ្ញុំ​ក៏​អត់​ថត​ដែរ។ ខ្ញុំ​សូម​ស្នើ​ទៅ​អាជ្ញាធរ​កុំ​បិទ​សិទ្ធិ​សេរីភាព​អ្នក​ផ្សាយ​ព័ត៌មាន​ ព្រោះ​អ្នក​ផ្សាយ​ព័ត៌មាន​ ប្រជាពលរដ្ឋ​សុំ​ឲ្យ​គាត់​ផ្សាយ​ គាត់​ផ្សាយ​ហើយ»។

វិទ្យុ​អាស៊ី​សេរី​មិន​អាច​សុំ​ការ​ឆ្លើយ​បំភ្លឺ​រឿង​នេះ ពី​ ស្នងការ​នគរបាល​ខេត្ត​កំពង់​ឆ្នាំង​លោក ខូវ លី បាន​ទេ នៅ​ថ្ងៃ​ទី​៣០ មករា ដោយ​ហៅ​ទូរស័ព្ទ​ចូល​តែ​ពុំ​មាន​អ្នក​ទទួល។

ទាក់​ទង​នឹង​រឿង​នេះ អ្នក​សម្រប​សម្រួល​គម្រោង​ធុរកិច្ច និង​សិទ្ធិ​មនុស្ស​នៃ​មជ្ឈមណ្ឌល​សិទ្ធិ​មនុស្ស​កម្ពុជា លោក វណ្ណ សូផាត មាន​ប្រសាសន៍​ថា ករណី​ឃាត់​ខ្លួន​ពលរដ្ឋ​ដែល​គ្រាន់​តែ​ផ្សាយ​វិវាទ​ដីធ្លី​តាម​បណ្ដាញ​សង្គម​ហ្វេសប៊ុក គឺ​ជា​ការ​រំលោភ​សិទ្ធិ​ជា​មូលដ្ឋាន​របស់​ប្រជាពលរដ្ឋ និង​សិទ្ធិ​មនុស្ស​ធ្ងន់ធ្ងរ។

លោក​បន្ត​ថា មុន​ឈាន​ដល់​ការ​ឃាត់​ខ្លួន​ពលរដ្ឋ​ អាជ្ញាធរ​ត្រូវ​ចុះ​ទៅ​ស៊ើប​អង្កេត​វិវាទ​ដីធ្លី​នៅ​ទីតាំង​មាន​ទំនាស់​នោះ​ឲ្យ​ច្បាស់​លាស់​ជាមុន​សិន ថា​ពិត​ដូច​អ្វី​ដែល​ពលរដ្ឋ​បាន​ផ្សាយ​តាម​បណ្ដាញ​សង្គម​ហ្វេសប៊ុក​ដែរ​ឬ​ទេ។

លោក​ស្នើ​ឲ្យ​អាជ្ញាធរ​ដោះលែង​ពលរដ្ឋ​ទាំង​២​នាក់​ឲ្យ​មាន​សេរីភាព​វិញ ដោយ​គ្មាន​លក្ខខណ្ឌ ដើម្បី​ឲ្យ​ពួកគាត់​វិល​ទៅ​ជួប​ជុំ​កូន​ដែល​កំពុង​ទន្ទឹង​រង់ចាំ​ជួប​ឪពុក​ម្ដាយ​នៅ​ផ្ទះ​៖ «អាជ្ញាធរ​ហ្នឹង​ត្រូវ​ដោះលែង​ពួកគាត់​សិន។ ការ​ចាប់​ខ្លួន​ គឺ​មិន​មែន​ជា​ដំណោះស្រាយ​ល្អ​ទេ។ ដូច​ខ្ញុំ​បាន​លើក​ឡើង​អ៊ីចឹង​ ជា​ការ​បំបាក់​ស្មារតី​ពួកគាត់​ ហើយ​ធ្វើ​ឲ្យ​អ្នក​ដែល​មាន​ការ​រំលោភ​កាន់​តែ​បាន​ចិត្ត​ ហើយ​មិន​រៀង​ចាល ហើយ​បន្ត​វប្បធម៌​និទ្ទណ្ឌភាព​ហ្នឹង​បន្ត​ទៀត។ ចំណែក​អ្នក​ដែល​ផ្សាយ​ព័ត៌មាន​ អ្នក​ផ្សាយ​ព័ត៌មាន​ពិត​ប្រាកដ​ហ្នឹង​ ត្រូវ​ជាប់​ទោស​ទៅ​វិញ។ វា​ជា​រឿង​មួយ​ដែល​អយុត្តិធម៌​ក្នុង​សង្គម​យើង​បច្ចុប្បន្ន​ណាស់»។

លោក​ ស្ងួន​ ញឿន និង​លោកស្រី អ៊ុំ សុភី ត្រូវ​បាន​គេ​ស្គាល់​ថា ជា​សកម្មជន​ដីធ្លី​ពីរ​នាក់​ប្ដី​ប្រពន្ធ​ដែលលេច​ធ្លោ ​ចេញ​មុខ​ទាមទារ​រក​ដំណោះស្រាយ​រឿង​ដីធ្លី​ ពី​ប្រធាន​ក្រុមហ៊ុន​ ខេឌីស៊ី (KDC) អ្នក​ស្រី ជា ខេង ត្រូវ​ជា​ភរិយា​លោក ស៊ុយ សែម រដ្ឋមន្ត្រី​ក្រសួង​រ៉ែ និង​ថាមពល។

តំណាង​សហគមន៍​ឡ​ពាង​២នាក់ ស្នើ​សុំ​អាជ្ញាធរ​ដោះលែង​ពួក​គាត់​ឲ្យ​មាន​សេរីភាព​វិញ ដើម្បី​វិល​ទៅ​មើល​ថែ​កូន​៤​នាក់​ក្នុង​បន្ទុក​គ្រួសារ ព្រោះ​ពួកគាត់​មិន​បាន​ថត​វីដេអូ​បង្ហោះ​រឿង​ដីធ្លី​នៅ​ក្នុង​ហ្វេសប៊ុក​នៅ​ឡើយ​ទេ នៅ​ពេល​សមត្ថកិច្ច​ចុះ​ទៅ​សួរនាំ​និង​ហាម​ឃាត់​នោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។