ពលរដ្ឋមានទំនាស់ដីធ្លី ២ភូមិដាក់លិខិតស្នើសុំកាន់កាប់ដីរបស់ខ្លួនវិញ បន្ទាប់ពីរដ្ឋបាលស្រុកបូទុមសាគរ ខេត្តកោះកុងឲ្យប្រជាពលរដ្ឋរុះរើខ្ទមចេញពីដីសម្បទានសង្គមកិច្ច នៅតំបន់នោះ។ មន្ត្រីសង្គមស៊ីវិលអះអាងថា អាជ្ញាធរហាក់ឆកល្វេងមិនបានប្រាប់ពលរដ្ឋឲ្យបានដឹងជាមុន អំពីដីសម្បទានសង្គមកិច្ចនេះ មុនពេលប្រជាពលរដ្ឋបង្កបង្កើនផលដំណាំលើដីតំបន់នោះ។
ពលរដ្ឋរស់នៅភូមិអណ្ដូងទឹក និងភូមិជីមាល ឃុំអណ្ដូងទឹក ស្រុកបូទុមសាគរ ប្រមាណជិត២០០គ្រួសារ ផ្ដិតស្នាមមេដៃដាក់លិខិតស្នើសុំទៅអភិបាលស្រុកបទុមសាគរ ឲ្យកាត់ដីដែលបានអាស្រ័យផល និងរស់នៅជាយូរឆ្នាំមកហើយនោះ ប្រគល់ឲ្យប្រជាពលរដ្ឋវិញ។ ពលរដ្ឋទាំងនោះបាន ដាក់លិខិតស្នើសុំកាត់ដីនេះ កាលពីថ្ងៃទី១០ កុម្ភៈ មុនមួយថ្ងៃនៃថ្ងៃកំណត់បញ្ចប់ឲ្យរុះរើនេះ។
ពលរដ្ឋមានទំនាស់ដីធ្លី ភូមិជីមាល លោក ឆេង វ៉ាន់ស៊ុយ រៀបរាប់ថា ពលរដ្ឋបានមករស់នៅក្នុងភូមិនេះ និងបង្កបង្កើនផលនៅលើដីនោះ តាំងពីឆ្នាំ១៩៩៣ មុនពេលអាជ្ញាធរប្រកាសថា ដីនោះ ជាដីសម្បទានសង្គមកិច្ចទៅទៀត។ លោកបន្តថា ទោះបីប្រជាពលរដ្ឋរស់នៅទីនោះ ពុំទាន់មានប្លង់កម្មសិទ្ធិដីធ្លី ប៉ុន្តែពួកគេបានរៀបចំសាងសង់ផ្ទះ ប្រកបរបរដាំដំណាំ ជិត ៣០ឆ្នាំ មកហើយ ពុំមែនជាខ្ទមដូចការលើកឡើងរបស់រដ្ឋបាលខេត្តឡើយ។ លោកថា អាជ្ញាធរបានបំពាន និងរំលោភយកដីរបស់ពួកគេធ្វើជាដីសម្បទានសង្គមកិច្ច ដោយមិនបានជូនដំណឹងទុកជាមុនឡើយ។ លោកអះអាងថា ប្រជាពលរដ្ឋមិនសុខចិត្តចំពោះការប្រកាសឲ្យប្រជាពលរដ្ឋរុះរើចេញឡើយ ហើយពួកគេសុខចិត្តស្លាប់នៅលើនៅទៅតាំងជម្លោះនោះ ប្រសិនបើអាជ្ញាធរដាក់កម្លាំងឲ្យមកឈូសឆាយ ឬកម្ទេចផ្ទះរបស់ពួកគេ៖ « នៅហ្នឹងតាំងពីខាងអនុរក្សមិនទាន់កើត សង្គមកិច្ចក៏មិនទាន់កើត មិនដឹងសង្គមកិច្ចនៅខាងណាអីខាងណាផង។ រួចដល់ពេលប្រជាពលរដ្ឋធ្វើស្រែចម្ការបានដាំដំណាំបានអីចឹងទៅ មានទុរេនមានអីចឹងទៅ មានទុរេនមានអីចឹងទៅ គាត់ថា ដីសង្គមកិច្ច។ រួចសង្គមកិច្ចគាត់ដាក់ក្នុងក្រដាសទើប ឆ្នាំ២០១១ ហ្នឹង។ គេថា សុខចិត្តងាប់ចោលកន្លែងដីហ្នឹង ព្រោះខ្លះគេទិញដី ទិញអីហ្នឹងអស់ច្រើន ឈូសឆាយអស់ច្រើន ដាំដំណាំអស់ច្រើនណាស់ » ។
ពលរដ្ឋទាំងនោះលើកឡើងដូចៗ គ្នាថា ពួកគេស្រ័យផល ដាំដំណាំស្វាយ ដំឡូង ទុរេន និងដំណាំមួយចំនួនទៀត ដើម្បីចិញ្ចឹមជីវិត និងលក់យកប្រាក់បង់ធនាគារ។ ប្រសិនបើអាជ្ញាធរបណ្ដេញពួកគេចេញ ពួកគេពុំមានផ្ទះ ដី និងប្រាក់សម្រាប់បង់ធនាគារឡើយ។
ពលរដ្ឋមានទំនាស់ដីធ្លីមួយរូបទៀត លោកស្រី រាជ ណាវី មានប្រសាសន៍ថា លោកស្រីមិនព្រមរុះរើចេញពីដីនៅទីតាំងនេះឡើយ ហើយលោកស្រីនិងអ្នកភូមិទាំងនោះ នឹងសាមគ្គីគ្នារារាំងអាជ្ញាធរមិនឲ្យឈូសឆាយផ្ទះ ឬដំណាំទាំងនោះឡើយ៖ « យើងសាមគ្គីគ្នាថា អត់ឲ្យទៅឈូសទេ បើកាលណាគេទៅឈូសដីធ្លីយើងហ្នឹង យើងអត់ឲ្យទៅឈូសទេ ព្រោះយើងសាមគ្គីគ្នាថា ត្រូវតែឃាត់ បើសិនជាគេទៅមានយកអាត្រាក់យកអីទៅរុះយកកងកម្លាំងអីទៅរុះអី យើងនឹងទៅ អត់ឲ្យរុះអ៊ីចឹង » ។
រដ្ឋបាលស្រុកបូទុមសាគរ ខេត្តកោះកុងបានចេញលិខិតជូនដំណឹងកាលពីថ្ងៃទី៤ កុម្ភៈ ឲ្យប្រជាពលរដ្ឋរុះរើខ្ទមដែលសាងសង់អនាធិបតេយ្យនៅលើដីនោះ។ ក្នុងលិខិតរបស់រដ្ឋបាលស្រុកបុទុមសាគរឲ្យដឹងថា ដីសម្បទានសង្គមកិច្ច ក្នុងតំបន់នោះ គឺទុកសម្រាប់ជូនអតីតកងកម្លាំងប្រដាប់អាវុធ និងគ្រួសារចូលនិវត្តន៍ បាត់បង់សមត្ថភាពការងារ ពិការ និងគ្រួសារយុទ្ធជនពលី រស់នៅតំបន់នេះ។ អាជ្ញាធរបានដាក់កំណត់ថ្ងៃឲ្យប្រជាពលរដ្ឋរុះរើចេញ ចាប់ពីថ្ងៃទី៥ រហូតដល់ថ្ងៃទី១១ កុម្ភៈ។
អាស៊ីសេរីបានព្យាយាមទាក់ទងទៅអភិបាលខេត្តកោះកុង អ្នកស្រី មិថុនា ភូថង ដើម្បីសួរនាំបន្ថែមពីករណីនេះ នៅថ្ងៃទី១២ កុម្ភៈ ដោយទូរស័ព្ទចូល ប៉ុន្តែពុំមានអ្នកទទួល។ ទោះជាយ៉ាងណា អភិបាលស្រុកបូទុមសាគរ លោក ហាក់ ឡេង បញ្ជាក់ថា ពលរដ្ឋដែលរស់នៅលើដីទីតាំងនោះ ពុំមែនជាអ្នកស្រុកនៅក្នុងខេត្តនេះទាំងអស់នោះទេ គឺពួកគេមួយចំនួនមកពីខេត្តផ្សេង ហើយចាប់ដីនៅទីតាំងនេះតែប៉ុណ្ណោះ។ លោកបន្តថា លោកកំពុងពិចារណាលើសំណើរបស់ប្រជាពលរដ្ឋ និងបានណែនាំទៅកាន់អាជ្ញាធរឃុំ ដើម្បីឲ្យពួកគេចុះទៅពិនិត្យមើលជាក់ស្ដែង និងស្រង់ឈ្មោះពលរដ្ឋដែលបានរស់នៅលើដីទីតាំងនោះពិតប្រាកដ៖ « មិនមែនយើងជូនម្ដងយើងធ្វើភ្លាមទេ អ៊ីចឹងមិនមែនយើងម្ដងយើងធ្វើអនុវត្តវិធានការរដ្ឋបាលភ្លាមទេ។ យើងធ្វើម្ដង យើងត្រូវទទួលយក អាសំណើដឹងតែមានសំណើហើយ អ៊ីចឹងហ្នឹង ២ដង យើងនឹងអនុវត្តតាមវិធានការច្បាប់ហើយ។ យើងចង់ធ្វើអ្វីឲ្យវាបានច្បាស់លាស់ ជាជាងអាមិនច្បាស់លាស់ វាធ្វើឲ្យប៉ះពាល់ដល់ប្រជាពលរដ្ឋរបស់យើង។ លោកជំទាវអភិបាលលោកថា លោកនឹងខំប្រឹងដោះស្រាយឲ្យអស់ពីលទ្ធភាព ដើម្បីយើងស្រង់មើលប្រជាពលរដ្ឋពិតប្រាកដយ៉ាងម៉េចៗ ហើយ ដើម្បីយើងបានសួរ ដែលគេហៅថា របាយការណ៍ពិតប្រាកដមួយសម្រាប់យើងសម្រេចចិត្តចុងក្រោយឲ្យច្បាស់ » ។
ទាក់ទងនឹងវិធានការរបស់អាជ្ញាធរនេះ សង្គមស៊ីវិលស្នើឲ្យអាជ្ញាធរពិចារណាសំណើរបស់ពលរដ្ឋឲ្យបានត្រឹមត្រូវ។
អ្នកសម្របសម្រួលផ្នែកសិទ្ធិមនុស្សនៃសមាគមអាដហុក ប្រចាំខេត្តកោះកុង លោក ថោង ច័ន្ទដារ៉ា មានប្រសាសន៍ថា ប្រសិនបើអាជ្ញាធរធ្វើការឈូសឆាយ ឬរឹបអូសយកដី ដែលប្រជាពលរដ្ឋបានអាស្រ័យផលជាយូរមកហើយនោះ គឺជាការរំលោភបំពានធ្ងន់ធ្ងរលើសិទ្ធរបស់ប្រជាពលរដ្ឋ។ លោកបន្តថា អាជ្ញាធរគួរបង្ហាញលិខិត ឬអនុក្រឹត្យដែលថា ដីតំបន់នោះជាដីសម្បទានសង្គមកិច្ចឲ្យប្រជាពលរដ្ឋបានដឹងមុនពេលប្រជាពលរដ្ឋបានសាងសង់ ឬរស់នៅតំបន់នោះតាំងពីដំបូង៖ « សំខាន់ឲ្យអាជ្ញាធរគាត់ធ្វើការតម្លាភាព បើសិនជាប្រជាពលរដ្ឋគាត់តាំងទីលំនៅកន្លែងណាមួយដែលថា ជាដីបម្រុងរបស់រដ្ឋ អ៊ីចឹងយើងគួរតែហៅពួកគាត់មក ដើម្បីប្រជុំប្រាប់ឲ្យពួកគាត់បានដឹង ត្រៀមខ្លួនអីសិនទៅ។ បើសិនយើងដូចថា អាដំណើរការអនុក្រឹត្យហ្នឹងចេញយូរយារណាស់មកហើយ ហើយដល់ពេលទើបនឹកឃើញចង់ដូចថា បណ្ដេញពួកគាត់ចេញៗ ភ្លាមអ៊ីចឹង ដូចជាការខ្វះចន្លោះ ជាការធ្វើការមួយដែលពួកគាត់ដូចថា វាមិនបានយកចិត្តទុកដាក់ទៅលើអាបញ្ហាការរស់នៅរបស់ប្រជាពលរដ្ឋហ្នឹង » ។
ពលរដ្ឋទាំងនោះប្ដេជ្ញាថា ពួកគេមិនព្រមចុះចេញពីដី ក្នុងភូមិទាំង ២នេះឡើយ ទោះបីជាពួកគេត្រូវបាត់បង់ជីវិតនៅលើដីនោះក៏ដោយ ហើយពួកគេនឹងការពារមិនឲ្យអាជ្ញាធរឈូសឆាយឡើយ។ ពួកគេ គ្រោងនឹងដាក់លិខិតជូនទៅស្ថាប័នពាក់ព័ន្ធបន្តទៀត ដើម្បីឲ្យស្ថាប័នទាំងនោះជួយដោះស្រាយជូនពួកគេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។