សមត្ថកិច្ចខណ្ឌដូនពេញ បានដោះលែងស្ត្រី ៣នាក់ ដែលជាតំណាងក្រុមសហគមមានជម្លោះដីធ្លីចំនួន ៣សហគមន៍ ឲ្យមានសេរីភាពវិញហើយ នៅម៉ោងប្រមាណ ១២ថ្ងៃត្រង់ ថ្ងៃទី៥ វិច្ឆិកា ក្រោយពេលចាប់ដាក់ឡាន និងសាកសួរជាង ៣ម៉ោង នៅសាលាខណ្ឌ។ បន្ទាប់ពីត្រូវបានដោះលែង ក្រុមពលរដ្ឋមានជម្លោះដីធ្លី បាននាំគ្នាបន្ដដំណើរទៅដាក់ញត្តិនៅការិយាល័យអង្គការសហប្រជាជាតិ ប្រចាំក្រុងភ្នំពេញជាបន្ដ។
ក្រុមពលរដ្ឋមានជម្លោះដីធ្លីចំនួន ៤សហគមន៍អះអាងថា បានបរាជ័យដាក់ញត្តិនៅមុខភូមិគ្រឹះ លោក ហ៊ុន សែន ក្បែរវិមានឯករាជ្យ ក្រុងភ្នំពេញ ដោយសារតែក្រុមសមត្ថកិច្ចចម្រុះ ដណ្ដើមយកញ្ញត្តិពីពលរដ្ឋ មិនឲ្យដាក់នៅមុខភូមិគ្រឹះ ក្បែរវិមានឯករាជ្យទេ ដោយរុញច្រាន និងប្រទាញប្រទង់ពលរដ្ឋ ឲ្យទៅដាក់នៅខុទ្ទកាល័យ នៅក្រោមដើមពោធិ៍ មុខវត្តបុទុមវត្តីវិញ។
ក្រោយប្រទាញប្រទង់គ្នាមួយសន្ទុះ នៅម៉ោងប្រមាញ ៩ព្រឹក សមត្ថកិច្ចចម្រុះ បានចាប់ខ្លួនពលរដ្ឋ៣នាក់ ដាក់ឡាន យកទៅសួរនាំនៅសាលាខណ្ឌដូនពេញ ជាង៣ម៉ោង និងបានដោះលែងវិញ នៅម៉ោងប្រមាណ ១២ថ្ងៃត្រង់ ក្រោយពេលមន្ត្រីខុទ្ទកាល័យ លោក ហ៊ុន សែន ម្នាក់ ឈ្មោះ គង់ ចំរើន ទៅទទួលយកញត្តិពលរដ្ឋ ពីសាលាខណ្ឌដូនពេញ។
ស្ត្រីដែលសមត្ថកិច្ចចាប់ដាក់ឡាន និងឃាត់ខ្លួនជាង ៣ម៉ោង នៅសាលាខណ្ឌដូនពេញនោះរួម មាន អ្នកស្រី សៀ ណារ៉េត សហគមន៍ជម្លោះដីធ្លីអតីតបឹងកក់ អ្នកស្រី ច្រាយ នីម សហគមន៍ SOS នៅភូមិថ្មគោល ក្បែរព្រះលានយន្ដហោះពោធិ៍ចិនតុង និងអ្នកស្រី ព្រាប រដ្ឋា សហគមន៍ជម្លោះដីធ្លីស្រុកបុទុមសាគរ ខេត្តកោះកុង។
តំណាងសហគមន៍មានជម្លោះដីធ្លីសហគមន៍ SOS អ្នកស្រី ច្រាយ នីម ប្រាប់ថា សមត្ថកិច្ចចម្រុះ បានឃាត់ខ្លួន ស្ត្រីទាំង ៣នាក់ និងបានបំភិតបំភ័យ សំឡុត គំរាម សួរនាំពីមូលហេតុនៃការដាក់ញត្តិមុខភូមិគ្រឹះ លោក ហ៊ុន សែន និងសួររកលិខិតសុំច្បាប់ពីសាលាក្រុងភ្នំពេញ។ ពលរដ្ឋមានជម្លោះដីធ្លី អះអាងថា ពួកគាត់ ជាក្រុមជនរងគ្រោះដីធ្លី ហើយការដាក់ញ្ញត្តិដើម្បីទទូចសុំរកដំណោះស្រាយ មិនមែនធ្វើបាតុកម្មទេ។ ដូច្នេះ មិនត្រូវការសុំច្បាប់ពីសាលាក្រុងឡើយ។
អ្នកស្រី ច្រាយ នីម ហៅការឃាត់ខ្លួនក្រុមស្ត្រីមានជម្លោះដីធ្លីទាំង ៣នាក់ ជារឿងអយុត្តិធម៌សម្រាប់ពលរដ្ឋរងគ្រោះដីធ្លី ព្រោះសមត្ថកិច្ចនៃរបបក្រុងភ្នំពេញ មិនព្រមជួយដោះស្រាយវិវាទរ៉ាំរ៉ៃទេ ប៉ុន្ដែបែរជាបន្ដធ្វើទុក្ខបុកម្នេញ ក្រុមស្ត្រីរងគ្រោះដីធ្លីទៅវិញ៖ «ព្រឹកមិញនឹងគេប្រើហិង្សាមកលើសំខាន់គេរកទះ គេរកវាយ ចាស! ពួកខ្ញុំមិនមែនអ្នកទោសទេ ចោរលួចចោរប្លន់អីណា ពួកខ្ញុំជាប្រជាពលរដ្ឋធម្មតា។ តើហេតុអីមកធ្វើបែបនេះមកលើពួកខ្ញុំ»។
ក្រុមពលរដ្ឋមានជម្លោះដីធ្លីចំនួន ៤សហគមន៍ គឺអតីតបឹងកក់ បុរីកីឡា សហគមន៍ SOS ឬ ថ្មគោល និងសហគមន៍បុទុមសាគរ នៃខេត្តកោះកុង បាននាំគ្នាទាមទារដាក់ញត្តិមុខភូមិគ្រឹះ មេដឹកនាំរបបក្រុងភ្នំពេញ លោក ហ៊ុន សែន នៅក្បែរវិមានឯករាជ្យ នៅព្រឹកថ្ងៃទី៥ វិច្ឆិកា។ ចំណែកនៅពេលរសៀល ក្រុមពលរដ្ឋមានជម្លោះដីធ្លី សហគមន៍បុទុមសាគរ ខេត្តកោះកុង ដែលមានជម្លោះដីធ្លីរ៉ាំរ៉ៃ ជាង ១០ឆ្នាំ ជាមួយក្រុមហ៊ុនចិន ឈ្មោះ យូញៀន ឌីវិឡុបមែន (Union Development Group) ឬ យូឌីជី បាននាំគ្នាបន្ដទៅដាក់ញ្ញត្តិនៅការិយាល័យអង្គការសហប្រជាជាតិប្រចាំទីក្រុងភ្នំពេញ ដើម្បីស្នើសុំឲ្យអ្នករាយការណ៍ពិសេសទទួលបន្ទុកផ្នែកសិទ្ធិមនុស្ស អ្នកស្រី រ៉ូណា ស្មីត (Rhona Smith)ជួយជំរុញទៅរបបក្រុងភ្នំពេញ ឲ្យពន្លឿនយន្ដការដោះស្រាយបញ្ចប់ទំនាស់ដីធ្លីជូនពួកគាត់។
នៅម៉ោងប្រមាណ ២រសៀល ក្រុមពលរដ្ឋមានជម្លោះដីធ្លីនៃសហគមន៍បុទុមសាគរ ខេត្តកោះកុង ត្រូវបានមន្ត្រីការិយាល័យអង្គការសហប្រជាជាតិ អនុញ្ញតឲ្យតំណាង ៥នាក់ ចូលដាក់ញត្តិ និងជួបសន្ទនាក្នុងការិយាល័យអង្គការសហប្រជាជាតិ ខណៈដែលក្រុមជម្លោះដីធ្លីដទៃទៀត នៅក្រៅការិយាល័យ រង់ចាំឃ្លាំមើលការដាក់ញត្តិ។
តំណាងម្នាក់ក្នុងចំណោម ៥នាក់ ដែលចូលជួបមន្ត្រីអង្គការសហប្រជាជាតិ អ្នកស្រី ទិត្យ ទេន ឲ្យដឹងថា មន្ត្រីការិយាល័យអង្គការសហប្រជាជាតិ បានទទួលយកញត្តិរបស់សហគមន៍បុទុមសាគរ ដែលស្នើសុំឲ្យជួយធ្វើអន្ដរាគមន៍ទៅរបបក្រុងភ្នំពេញ ករណីតុលាការឃុំខ្លួនតំណាងពលរដ្ឋ ឈ្មោះ ហេង សុខ ជិតមួយឆ្នាំ និងស្នើឲ្យជំរុញទៅរបបក្រុងភ្នំពេញ ត្រូវពន្លឿនរកដំណោះស្រាយបិទបញ្ចប់វិវាទជាមួយក្រុមហ៊ុនចិន យូញៀន ឲ្យបានឆាប់រហ័ស៖ «គាត់ថាគាត់នឹងយករឿងដែលពួកខ្ញុំស្នើសុំទាំងអស់នេះ។ និយាយទៅគាត់យកញត្តិទាំងអស់ដែលពួកខ្ញុំដាក់ជូនទៅអ្នកស្រី រ៉ូ ណាស្មីត (Rhona Smith) ដើម្បី រកកិច្ចចចាររកដំណោះស្រាយបញ្ហាជាមួយអាជ្ញាធររាជរដ្ឋាភិបាល ដើម្បីជួយរកដំណោះស្រាយសម្រាប់ពួកខ្ញុំ»។
លោក ហេង សុខ តំណាងពលរដ្ឋមានជម្លោះដីធ្លីម្នាក់ ត្រូវបានអាជ្ញាធរខេត្តកោះកុង ចាប់ខ្លួនកាលពីចុងខែកុម្ភៈ តាមបណ្ដឹងក្រុមហ៊ុន លោកឧកញ៉ា លី យ៉ុងផាត់ ខណៈតំណាងសហគមន៍រូបនេះ កំពុងបោះបង្គោលព្រំដីរបស់លោក ដែលកំពុងមានទំនាស់ជាមួយក្រុមហ៊ុន លី យ៉ុងផាត់។ សំណុំរឿងនេះ តុលាការខេត្តកោះកុង បានកាត់ទោសឱ្យជាប់ពន្ធនាគារចំនួន ១ឆ្នាំ ៦ខែ និងរងពិន័យជាប្រាក់ចំនួន ២លានរៀល ពីបទប្រព្រឹត្តអំពើហិង្សាលើអ្នកកាន់កាប់អចលនទ្រព្យដោយសុចរិត។ ចំណែកករណីជម្លោះដីធ្លីពលរដ្ឋ ជាមួយក្រុមហ៊ុនចិន ឈ្មោះ យូញៀន វិញ បានកើតឡើងតាំងពីឆ្នាំ២០០៨ បន្ទាប់ពីរបបលោក ហ៊ុន សែន ផ្ដល់ដីសម្បទានដីទំហំជាង ៣ម៉ឺន ៦ពាន់ហិកតារ ឲ្យក្រុមហ៊ុនចិនមួយនេះ ហើយបានប៉ះពាល់ ឬត្រួតលើដីពលរដ្ឋជាច្រើនរយគ្រួសារ ប៉ុន្តែពុំមានដំណោះស្រាយសមរម្យជូនពួកគាត់ទេ។ ពលរដ្ឋអះអាងថា បច្ចុប្បន្ន ក្រុមហ៊ុនចិន យូញៀន នៅតែបន្តឈូសឆាយដំណាំ និងផ្ទះសម្បែងពលរដ្ឋជាបន្តបន្ទាប់។
នាយិកាប្រតិបត្តិអង្កការ សីលកា (Silaka) អ្នកស្រី ធីតា ឃឹះ សម្ដែងការសោកស្ដាយជុំវិញការចាប់ និងឃាត់ខ្លួន ក្រុមស្ត្រីមានជម្លោះដីធ្លី ដែលគ្រាន់តែទទូចសុំដំណោះស្រាយនៅមុខភូមិគ្រឹះមេដឹកនាំរបបក្រុងភ្នំពេញ។ មន្ត្រីសង្គមស៊ីវីលរូបនេះ យល់ថា ការណ៍ដែលពលរដ្ឋក្រីក្រ គ្មានខ្នងបង្អែកជាអ្នកធំដូចគេ ទៅរកកិច្ចអន្ដរាគមន៍ពីលោក ហ៊ុន សែន ដោយសារពួកគេគ្មានជម្រើសផ្សេង និងសង្ឃឹមលើលោក ហ៊ុន សែន ទាំងស្រុង ដូច្នេះ អាជ្ញាធរមិនគួររារាំង ឬធ្វើបាបក្រុមស្ត្រីទាំងនោះទេ។ អ្នកស្រី ធីតា ឃឹះ ស្នើសុំលោក ហ៊ុន សែន ឲ្យពន្យល់ពីទៅមន្ត្រីឲ្យច្បាស់ ពីគោលការណ៍ទទួលញត្តិពលរដ្ឋ និងបទដ្ឋានផ្សេងៗ ដើម្បីជៀសវាងការអនុវត្តខុសពីសេចក្តីប្រកាសបង្កើតក្រុមការងារចម្រុះសម្រាប់ទទួល និងដោះស្រាយបណ្តឹងនៅមុខភូមិគ្រឹះ លោក ហ៊ុន សែន និងភរិយា៖ «ខ្ញុំមើលទៅប្រជាពលរដ្ឋដែលពួកគាត់មកនេះ មិនមែនពួកគាត់មកធ្វើលេងនោះទេ។ អានេះ គឺជារឿងទ័លច្រករបស់ពួកគាត់ ដែលបាត់បង់ដីបង្កបង្កើនផល ការរស់នៅប្រចាំថ្ងៃ។ អ៊ីចឹងទៅមិនមែនរឿងចេះតែធ្វើទេ។ រឿងបែបនេះ គួរតែខាងរាជរដ្ឋាភិបាលគួរតែប្រញ៉ាប់ដោះស្រាយជូនពួកគាត់»។
ទោះយ៉ាងណាក្ដី នៅម៉ោងប្រមាណ ៤រសៀល ក្រុមពលរដ្ឋមានជម្លោះដីធ្លីទាំង ៤សហគមន៍ បានបំបែកគ្នាត្រលប់ទៅផ្ទះវិញរៀងៗ ខ្លួន។ ចំណែកពលរដ្ឋមានជម្លោះដីធ្លីជាមួយក្រុមហ៊ុនចិន យូញៀន នៅខេត្តកោះកុង ប្រាប់ថា ពួកគាត់នឹងត្រឡប់ទៅខេត្តកោះកុងវិញ នៅថ្ងៃទី៦ វិច្ឆិកា ហើយពួកគាត់នឹងត្រឡប់មករកកិច្ចអន្ដរាគមន៍នៅរាជធានីភ្នំពេញបន្តទៀត ប្រសិនបើមន្ត្រីខុទ្ទកាល័យ មិនដោះស្រាយតាមញត្តិស្នើសុំទេនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។