ប្រជាសហគមន៍រងគ្រោះដីធ្លីចំនួន ១១ខេត្ត នៅព្រឹក ថ្ងៃទី២៣ ខែកុម្ភៈ បានជួបជុំគ្នាជាក្រុមៗ តាមទីតាំងសហគមន៍រៀងៗខ្លួន ដែលមួយក្រុមៗមានគ្នាចន្លោះពី ១០នាក់ ទៅ ២០នាក់ ដើម្បីចូលរួមយុទ្ធនាការជម្រុញឲ្យអាជ្ញាធររដ្ឋាភិបាលទម្លាក់ចោលបទចោទលើសកម្មជនដីធ្លីទាំងអស់ និងដោះលែងសកម្មជនដីធ្លីចំនួន ៦នាក់ ដែលត្រូវបានអាជ្ញាធរចាប់ខ្លួន។ យុទ្ធនាការនេះប្រជាពលរដ្ឋនាំគ្នាលើកបដាតូចធំដែលមានរូបសកម្មជនដីធ្លីកំពុងជាប់ឃុំទាំង៦រូប និងមានសរសេរអក្សរថា ''ទម្លាក់ចោលបទចោទ និងដោះលែងពលរដ្ឋរងគ្រោះដីធ្លី''។
តំណាងសហគមន៍រងគ្រោះដីធ្លីក្នុងខេត្តកំពង់ស្ពឺ លោក សឹង សុខុម មានប្រសាសន៍ថា យុទ្ធនាការនេះមានគោលបំណងសំខាន់ ៣ គឺទី១ ទាមទារឲ្យដោះលែង និងទម្លាក់ចោលបទចោទទៅលើពលរដ្ឋរងគ្រោះដីធ្លីទាំង៦រូប។ ទី២ ស្វែងរកកិច្ចអន្តរាគមន៍ពីអជ្ញាធរមូលដ្ឋាននិងអភិបាលខេត្តឲ្យជួយទទួលខុសត្រូវចំពោះរាល់ការរំលោភបំពានដីធ្លីរបស់ពួកគាត់ និងបញ្ឈប់ការប្រើប្រាស់កងកម្លាំងរួមមានកម្លាំងអាវុធហត្ថទៅគំរាមកំហែង បំភិតបំភ័យ ឬចាប់ខ្លួនប្រជាពលរដ្ឋសាមញ្ញដែលរងគ្រោះដីធ្លី។ ទី៣ យុទ្ធនាការនេះមានគោលបំណងពង្រឹងសាមគ្គីភាពរបស់សហគមន៍ដើម្បីតស៊ូមតិដោយសន្តិវិធីឲ្យមានដំណោះស្រាយដីធ្លី និងការលើកកម្ពស់ជីវភាពរស់នៅរបស់ពួកគាត់ជាមួយនិងការអភិវឌ្ឍន៍ប្រកបដោយចីរភាព៖ «ខ្ញុំនៅតែអំពាវនាវឲ្យតុលាការបញ្ឈប់ចោទប្រកាន់ ចាប់ខ្លួនសកម្មជនដីធ្លីដាក់ពន្ធនាគារបន្តទៅទៀត កុំឲ្យថាគាត់រងគ្រោះបាត់បង់ដីធ្លីហើយត្រូវជាប់ពន្ធនាគារទៀត ហើយគ្រួសាររបស់គាត់រងទុក្ខវេទនាដោយសារមិនមានអ្នកណារកស៊ីចិញ្ចឹមជីវិតក្រុមគ្រួសារគាត់។ ដីធ្លីក៏អស់មិនមានសម្រាប់បង្កបង្កើនផលទៀត។ សូមផ្តាំផ្ញើទៅរដ្ឋាភិបាលថា ដំណោះស្រាយមានតែការដោះស្រាយជាប្រព័ន្ធ ចរចារជាមួយប្រជាពលរដ្ឋ ឬសហគមន៍រងគ្រោះដីធ្លីទើបជាដំណោះស្រាយល្អ»។
សកម្មជនដីធ្លីទាំង ៦រូប ដែលកំពុងជាប់ឃុំនោះ រួមមាន តំណាងសហគមន៍ក្នុងខេត្តត្បូងឃ្មុំ ៤រូប គឺលោក សែម សាង លោក សែម ចំណាន លោក ហឿន ស៊ីនាថ លោក ផុន សុផល និងតំណាងសហគមន៍នៅខេត្តព្រះសីហនុ ២រូប គឺលោកស្រី អេង វ៉ាន់ និងលោក កៅ ហ៊ួរ។ អ្នកទាំង៦រូប ត្រូវបានអាជ្ញាធរបានចាប់ខ្លួនពួកគាត់ជាបន្តបន្ទាប់កាលពីឆ្នាំ២០១៩ ឆ្នាំ២០២០ និងនៅដើមឆ្នាំ២០២១ ពាក់ព័ន្ធនឹងសកម្មភាពការពារ និងទាមទារសិទ្ធិដីធ្លីរបស់ពួកគាត់ពីក្រុមហ៊ុន និងបុគ្គមានលុយមានអំណាច។ ក្រៅពីនេះ មន្ត្រីអង្គការសង្គមស៊ីវិលអះអាងថា សកម្មជនដីធ្លីជិត ២រយ (១៧២) នាក់ផ្សេងទៀត កំពុងជាប់បណ្តឹង និងជាប់ចោទពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» «ញុះញង់ឱ្យមានភាពវឹកវរដល់សន្តិសុខសង្គម» និងបទចោទផ្សេងទៀត ដោយគ្រាន់តែពួកគាត់ប្រើប្រាស់សិទ្ធិស្របច្បាប់របស់ខ្លួន។
ទាក់ទងករណីនេះ អាស៊ីសេរីមិនអាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន អ្នកនាំពាក្យក្រសួងយុត្តិធម៌ លោក ជិន ម៉ាលីន និងលោក គឹម សន្តិភាព ព្រមទាំងអ្នកនាំពាក្យក្រសួងរៀបចំដែនដីលោក សេង ឡូត បានទេដោយទូរស័ព្ទចូលពុំមានអ្នកទទួល។
ប្រធានសមាគមសម្ព័ន្ធសហគមន៍កសិករកម្ពុជាលោក ថេង សាវឿន មានប្រសាសន៍ថា ការធ្វើយុទ្ធនាការរបស់ប្រជាសហគមន៍នេះ គឺជាការអនុវត្តសិទ្ធិសេរីភាពជាមូលដ្ឋានរបស់ពួកគាត់ដោយសន្តិវិធី និងមិនបង្កឲ្យប៉ះពាល់ដល់សណ្តាប់សង្គមឡើយ ។ លោកសង្ឃឹមថា អាជ្ញាធររដ្ឋាភិបាលនឹងមិនរារាំង ហើយខិតខំដោះស្រាយតាមការអំពាវនាវរបស់ប្រជាពលរដ្ឋ៖ «យើងស្នើសុំឲ្យអាជ្ញាធរគ្រប់ជាន់ថ្នាក់ ពិសេសក្រសួងស្ថាប័នតុលាការ ធ្វើយ៉ាងណារកយុត្តិធម៌ជូនដល់ប្រជាពលរដ្ឋជាអ្នករងគ្រោះពិតប្រាកដ ឲ្យមានចំណាត់ការចុះដោះស្រាយដីធ្លី ហើយបិទបញ្ចប់ទំនាស់ដីធ្លីនេះដោយឈរលើផ្លូវច្បាប់ និងឈរលើធាតុពិតជាស្តែងនៃការកាន់កាប់អាស្រ័យផល និងដោយមានការចូលរួមដោយបើកចំហរពីគ្រប់ភាគីពាក់ព័ន្ធ ដើម្បីបញ្ជៀសនូវការរំលោភសិទ្ធិផ្សេងៗ។
ប្រជាសហគមន៍រងគ្រោះដីធ្លី ឲ្យដឹងថា យុទ្ធនាការនេះនឹងធ្វើជាឡើងជាជំហ៊ានៗផ្សេងៗគ្នា ដូចជា ជួបជុំគ្នាជាក្រុមតូចៗហើយថតបង្ហោះនៅលើបណ្តាមសង្គមហ្វេសប៊ុក ( Facebook) ការធ្វើសន្និសិទសារព័ត៌មាន។ បន្ទាប់មកពួកគាត់គ្រោងជួបជុំគ្នា ផ្តិតមេដៃដាក់ញត្តិជូនអាជ្ញាធរថ្នាក់ខេត្ត និងក្រសួងស្ថានប័នពាក់ព័ន្ធរបស់រដ្ឋាភិបាល ដោយ ប្តេជ្ញាថា នឹងធ្វើយុទ្ធនាការនេះ រហូតដល់មានដំណោះស្រាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។