Opens in new windowមន្ត្រីក្រសួងរៀបចំដែនដី នគរូបនីយកម្ម និងសំណង់ អះអាងថា ស្ថាប័នជំនាញរបស់រដ្ឋមួយនេះ បានដោះស្រាយដីដែលមានវិវាទប្រមាណ ៧ពាន់ករណីនៅទូទាំងប្រទេស ហើយនៅសល់ប្រមាណ ៧០០ករណីទៀតប៉ុណ្ណោះដែលត្រូវដោះស្រាយបន្ត។
ជុំវិញបញ្ហានេះ អង្គការមិនមែនរដ្ឋាភិបាល អំពាវនាវឲ្យស្ថាប័នជំនាញរបស់រដ្ឋាភិបាលនេះ គួរបង្កើនការចុះបញ្ជីដីធ្លី និងជំរុញការដោះស្រាយបញ្ហាដែលនៅសេសសល់ឲ្យបានឆាប់ ដើម្បីបញ្ចប់ជំងឺរ៉ាំរ៉ៃនៃវិវាទដីធ្លីនៅកម្ពុជា។
មន្ត្រីរៀបចំដែនដី នគរូបនីយកម្ម និងសំណង់ មានជំនឿថា វិវាទដីធ្លីដែលនៅសេសសល់ប្រមាណ ៧០០ករណីទៀតនេះ អាចនឹងដោះស្រាយបញ្ចប់ក្នុងពេលឆាប់ៗខាងមុខនេះ ដោយផ្អែកលើគោលនយោបាយរបស់ជាតិ។
ការបញ្ជាក់ជំហរដូចនេះរបស់ទេសរដ្ឋមន្ត្រី លោក អ៊ឹម ឈុនលឹម ធ្វើឡើងក្នុងពេលដែលលោកចូលឆ្លើយបំភ្លឺតាមការកោះអញ្ជើញរបស់គណៈកម្មការទី១ នៃរដ្ឋសភា។ ការចូលឆ្លើយបំភ្លឺផ្ទាល់មាត់ ដែលប្រើពេលប្រមាណ ៣ម៉ោងកាលពីព្រឹកថ្ងៃទី១០ កញ្ញា នៅវិមានរដ្ឋសភា លោក អ៊ឹម ឈុនលឹម ទេសរដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ថ្លែងថា តាមរយៈយុទ្ធនាការបទបញ្ជាលេខ០១ គោលនយោបាយចាស់សកម្មភាពថ្មី បានផ្ដល់ដីជូនប្រជាពលរដ្ឋបានប្រមាណ ៤សែនគ្រួសារ ស្មើផ្ទៃដីសរុបប្រមាណ ១លាន ២សែនហិកតារ។ លើសពីនេះទៀត តាមផែនការ ត្រូវអនុវត្តឲ្យបានរហូតដល់ ២លានហិកតារ អាចផ្ដល់ដីជូនប្រជាពលរដ្ឋប្រមាណ ៦សែនគ្រួសារនៅទូទាំងប្រទេស។
បើទោះជាបែបណា ការជជែកដេញដោលបិទទ្វារនៅវិមានរដ្ឋសភា កាលពីព្រឹកថ្ងៃទី១០ កញ្ញា ត្រូវបាន លោក អេង ឆៃអ៊ាង ដែលជាប្រធានគណៈកម្មការទី១ នៃរដ្ឋសភាកូតាមកពីគណបក្សសង្គ្រោះជាតិ ថ្លែងថា លោកបានទទួលព័ត៌មានយ៉ាងពិស្ដារជុំវិញការបកស្រាយអំពីបញ្ហាវិវាទដីធ្លី ដែលកំពុងប្រឈមនៅតាមគោលដៅមួយចំនួន។ ជាងនេះទៀត លោក អេង ឆៃអ៊ាង ឲ្យដឹងថា លោកនឹងយកលទ្ធផលនៃការសន្យារបស់ក្រសួងសាមី ទៅផ្សព្វផ្សាយដល់ដើមបណ្ដឹងជាប្រជាពលរដ្ឋវិញ។ លោកបន្តថា «គណៈកម្មការនឹងយកព័ត៌មានទាំងអស់ដែលក្រសួងបានធ្វើ និងគោលបំណងគោលហ្នឹង ប្រជាពលរដ្ឋដែលជាម្ចាស់បណ្ដឹងវិញ ហើយជាចុងក្រោយគណៈកម្មការទី១ ក៏បានសំណូមពរ ដើម្បីឲ្យឯកឧត្ដមទេសរដ្ឋមន្ត្រី ជួយធ្វើអន្តរាគមន៍ធ្វើយ៉ាងណា ជួយដោះលែងអ្នកជាប់គុកដោយដីធ្លី»។
មន្ត្រីរបស់ក្រសួងដែនដី នគរូបនីយកម្ម និងសំណង់ បានឲ្យដឹងថា គិតចាប់ពីឆ្នាំ២០០៣ វិវាទដីធ្លីប្រមាណ ៧ពាន់ករណី បានកើតឡើងនៅទូទាំងប្រទេស ក្នុងនោះបញ្ហាដែលត្រូវដោះស្រាយបន្តដែលនៅសេសសល់ គឺប្រមាណ ៧០០សំណុំរឿងទៀតប៉ុណ្ណោះ។
ពាក់ព័ន្ធបញ្ហានេះ មន្ត្រីនាំពាក្យក្រសួងដែនដី នគរូបនីយកម្ម និងសំណង់ លោក សេង ឡូត បដិសេធថា ដីធ្លីដែលមានវិវាទនេះ លោករកមិនឃើញថាជាកំហុសរបស់មន្ត្រីរដ្ឋាភិបាល ភ្នាក់ងាររដ្ឋ ឧកញ៉ា ឬមន្ត្រីយោធា ជាអ្នកផ្ដើមឲ្យមានជម្លោះនោះទេ។ ផ្ទុយទៅវិញ លោកចាត់ទុកថា វិវាទដែលតែងកើតឡើងនោះ គឺជាទំនាស់ផ្ដើមចេញពីព្រំដីរវាងបុគ្គល និងបុគ្គល ច្រើនជាងទំនាស់ជាសមូហភាព។ លោកបន្តថា «ក្រុមការងារក្រសួងសុរិយោដី ដែលយើងមានមន្ត្រីជំនាញសុរិយោដីហ្នឹង គាត់ជួយសម្របសម្រួលជួយវាស់វែងក៏ដោះស្រាយបានដែរ ហើយបើសំដៅទៅលើមុខសញ្ញាវិវាទ ឧកញ៉ា អ្នកមានអំណាចអី ខ្ញុំគិតថា បើមើលទៅលើជ្រុងហ្នឹង ដូចជាតិចតួចមែនទែនបាទ»។
បើទោះជាបែបនេះក៏ដោយចុះ លោក អំ សំអាត មន្ត្រីជាន់ខ្ពស់អង្គការលីកាដូ យល់ឃើញថា វិវាទដីធ្លីដែលកើតឡើងក្នុងពេលកន្លងទៅ គឺពុំមែនជាវិវាទរួម ហើយផ្ដើមដោយប្រជាពលរដ្ឋឡើយ ក៏ប៉ុន្តែជាទំនាស់ក្រោមហេតុផលនៃគោលនយោបាយសម្បទានដីសេដ្ឋកិច្ច។ ជាងនេះទៀត លោកចាត់ទុកថា ដើម្បីផ្ដល់ជំនឿឡើងវិញពីប្រជាពលរដ្ឋ លុះត្រាតែរដ្ឋាភិបាលបង្កើនការដោះស្រាយដោយតម្លាភាព និងយុត្តិធម៌ ទើបអាចប៉ះប៉ូវភាពខុសឆ្គងទៅលើគោលនយោបាយដីធ្លី ដែលកំពុងមានបញ្ហាទៅបាន។ លោកបន្តថា «អ៊ីចឹងដើម្បីបង្កើនទំនុកទុកចិត្តនេះ គួរណាស់តែក្រសួងដែនដី នគរូបនីយកម្ម និងស្ថាប័នពាក់ព័ន្ធបង្កើនយន្តការនៃការដោះស្រាយ ដើម្បីឲ្យប្រជាពលរដ្ឋមានជំនឿទុកចិត្ត»។
អង្គការមិនមែនរដ្ឋាភិបាលយល់ឃើញថា ការបកស្រាយនេះ គឺវាផ្ទុយពីភាពជាក់ស្ដែង ដែលកំពុងកើតឡើង។ ទំនាស់ដីធ្លីភាគច្រើននៅកម្ពុជា គឺក្រោមគោលនយោបាយសម្បទានដីសេដ្ឋកិច្ច។ អង្គការលីកាដូ បានចេញផ្សាយរបាយការណ៍ស្ដីពីជម្លោះដីធ្លី កាលពីថ្ងៃទី១៩ កុម្ភៈ ថា គ្រាន់តែក្នុងឆ្នាំ២០១៤ រកឃើញថា ប្រជាពលរដ្ឋជាង ១ពាន់គ្រួសារដែលរងផលប៉ះពាល់ដោយសារដីធ្លីក្នុងចំណោម ១៣ខេត្ត-ក្រុង ហើយចំនួននេះច្រើនជាង ៣ដងនៃចំនួនគ្រួសារដែលរងផលប៉ះពាល់កាលពីឆ្នាំ២០១៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។