ពលរដ្ឋរស់នៅក្បែរបឹងតាមោកប្រមាណ២០នាក់នៅថ្ងៃទី២៤ ធ្នូ នាំគ្នាដេកយាមការពារតូបលក់អីវ៉ាន់ពីព្រោះខ្លាចអាជ្ញាធរខណ្ឌព្រែកព្នៅ ចុះរុះរើតូបរបស់ពួកគាត់ម្ដងទៀត។ ពួកគាត់អះអាងថា ការធ្វើទុក្ខបុកម្នេញពីសំណាក់អាជ្ញាធរគឺជាការរំខានដល់ការប្រកបមុខរបរចិញ្ចឹមជីវិតរបស់ពួកគាត់ហើយអ្នកខ្លះមិនហ៊ានចេញទៅរកប្រាក់ចំណូលឆ្ងាយពីលំនៅឋានឡើយ។
ប្រជាពលរដ្ឋរស់នៅក្បែរបឹងតាមោក ស្ថិតក្នុងសង្កាត់សំរោងត្បូង ខណ្ឌព្រែកព្នៅ រាជធានីភ្នំពេញលើកឡើងថា ពួកគាត់កំពុងមានជីវភាពខ្វះខាត និងជំពាក់បំណុលគ្រឹះស្ថានមីក្រូហិរញ្ញវត្ថុវ័ណ្ឌកដោយសារតែអាជ្ញាធរខណ្ឌព្រែកព្នៅ នៅតែធ្វើទុក្ខបុកម្នេញលើពួកគាត់។
ពលរដ្ឋរស់នៅក្បែរបឹងតាមោក លោកស្រី គង់ តឿ ប្រាប់វិទ្យុអាស៊ីសេរីនៅថ្ងៃទី២៤ ខែធ្នូ ថាស្ថានភាពជីវភាពលោកស្រីកាន់តែក្រលំបាក បន្ទាប់ពីអាជ្ញាធរចុះមករុះរើតូប និងបំផ្លាញអីវ៉ាន់លោកស្រីអស់ដែលគិតជាថវិកាជាង ៣លានរៀល ធ្វើឱ្យលោកស្រីគ្មានប្រាក់សងបំណុលគ្រឹះស្ថានមីក្រូហិរញ្ញវត្ថុ។ លោកស្រីបន្តថា ទង្វើរបស់អាជ្ញាធរខណ្ឌព្រែកព្នៅ គឺមានចេតនាបង្ខំឱ្យលោកស្រីចាកចេញពីលំនៅឋានដើម្បីយកដីឱ្យទៅអ្នកមានលុយមានអំណាចសាងសង់បុរីលក់។
លោកស្រី គង់ តឿ៖ «សព្វថ្ងៃខ្ញុំតូចចិត្ត ខ្ញុំតូចចិត្តត្រង់ថា ជនជាតិឯងខ្មែរសុទ្ធហេតុអ្វីអត់មានអីសព្វគ្រប់ដូចជនជាតិចិន ជនជាតិវៀតណាមគេមានគ្រប់ហើយគេមានមេគេការពារ បើឯងអត់សោះមានតែប្ដឹងកូនចៅឯងយកទៅតុលាការសុទ្ធតែច្បាប់ព្រហ្មទណ្ឌ ចង់ឱ្យកូនចៅឯងជាប់គុក»។
កាលពីថ្ងៃទី១៩ ខែធ្នូ អាជ្ញាធរខណ្ឌព្រែកព្នៅជិត ២០នាក់បានចុះរុះរើផ្ទះនិងតូបអីវ៉ាន់ព្រមទាំងប្រើអំពើហិង្សាលើពលរដ្ឋបណ្ដាលឱ្យពួកគាត់មួយចំនួនរងរបួសស្រាលដោយគ្រាន់តែពួកគាត់លក់ដូរអីវ៉ាន់បន្តិចបន្តួចនៅតាមដងថ្នល់ដើម្បីរកប្រាក់ផ្គត់ផ្គង់ជីវភាពគ្រួសារ។
ពលរដ្ឋដែលរងផលប៉ះពាល់ពីការលុបបឹងតាមោក ម្នាក់ទៀតគឺ លោកស្រី ស៊ា ដាវី ថ្លែងថា តូចចិត្តដែលលោកស្រីជាពលរដ្ឋខ្មែរមួយរូប ប៉ុន្តែគ្មានសិទ្ធិរស់នៅលើដីលំនៅឋានរបស់ខ្លួនផ្ទុយពីជនជាតិចិន និងជនជាតិវៀតណាមមួយចំនួនដែលទទួលបានការយកចិត្តទុកដាក់ពីរដ្ឋាភិបាលកម្ពុជា។លោកស្រីបន្តថា បច្ចុប្បន្នលោកស្រីមិនហ៊ានចេញទៅរកប្រាក់ចំណូលឆ្ងាយពីលំនៅឋាននោះទេពីព្រោះខ្លាចអាជ្ញាធរចុះរុះរើផ្ទះលោកស្រី។
លោកស្រី ស៊ា ដាវី៖ «ព្រោះអីដីកម្មសិទ្ធិរបស់ពួកបងរស់នៅម្នាក់ៗឆ្នាំ២០ ៣០ឆ្នាំហើយយើងមានប្លង់ភូមិឃុំ ខ្លះមានខ្លះក៏ភូមិឃុំអត់ធ្វើឱ្យអ៊ីចឹងសួរថា គ្រាន់តែធ្វើរោងបន្លែ លើដីខ្លួនឯងមិនមែនលើដីរបស់ម៉ែឪអាជ្ញាធរទេ ហេតុអ្វីក៏អាជ្ញាធរក៏ក្ដៅក្រហាយជាមួយជីវិតរស់នៅរបស់ប្រជាពលរដ្ឋម្ល៉េះមិនបានផ្ដល់ដើមទុនឱ្យមិនបានបង្រៀនប្រជាពលរដ្ឋពីការរកស៊ីចិញ្ចឹមជីវិតហើយបែរជាមកធ្វើទុក្ខបុកម្នេញមកក្ដៅក្រហាយជាមួយឆ្នាំងបាយប្រជាពលរដ្ឋខ្លួនឯង»។
វិទ្យុអាស៊ីសេរីមិនអាចទាក់ទងអភិបាលខណ្ឌព្រែកព្នៅ លោក ធឹម សំអាន និងអភិបាលរាជធានីភ្នំពេញលោក ឃួង ស្រេង ដើម្បីសុំការបកស្រាយជុំវិញបញ្ហានេះបានទេនៅថ្ងៃទី២៤ ខែធ្នូ។
ទោះជាយ៉ាងណា កាលពីថ្ងៃទី២០ ខែធ្នូ រដ្ឋបាលខណ្ឌព្រែកព្នៅបានចេញលិខិតឱ្យលោកស្រី គង់ តឿ និងលោក ឡុង គឹមយន រុះរើតូបរបស់ពួកគាត់ក្នុងរយៈពេលបីថ្ងៃបន្ទាប់ពីថ្ងៃជូនដំណឹងដោយអាជ្ញាធរសំអាងថា តូបលក់អីវ៉ាន់របស់ពួកគាត់សាងសង់លើចំណីផ្លូវ និងព្រមានចាត់វិធានការផ្លូវច្បាប់ដោយមិនទទួលខុសត្រូវរាល់ទ្រព្យសម្បត្តិដែលខូចខាត។ប៉ុន្តែពលរដ្ឋអះអាងថា តូបលក់ដូររបស់ពួកគាត់សាងសង់ឆ្ងាយពីចំណីថ្នល់ប្រមាណ ៣ម៉ែត្រ និងចាត់ទុកវិធានការរបស់អាជ្ញាធរគឺការបំបិទសេដ្ឋកិច្ចពួកគាត់។
ជុំវិញបញ្ហានេះអ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា មានប្រសាសន៍ថា ពលរដ្ឋមានសិទ្ធិសេរីភាពប្រកបមុខរបរចិញ្ចឹមជីវិតដូច្នេះអាជ្ញាធរគួរតែរកដំណោះស្រាយជូនពួកគាត់។ លោកបារម្ភថា ការបាត់បង់ដីធ្លីនិងមុខរបររបស់ពលរដ្ឋអាចធ្វើមានអំពើហិង្សារវាងពលរដ្ឋ និងអាជ្ញាធរកាន់តែធ្ងន់ធ្ងរ។
លោក ស៊ឹង សែនករុណា៖ «ដើម្បីបញ្ចប់ភាពចម្រូងចម្រាសគួរតែភាគីពាក់ព័ន្ធជាពិសេសស្ថាប័នដែលមានសមត្ថកិច្ចហ្នឹងគួរតែសិក្សាស្រាវជ្រាវថាទំហំដីត្រឹម ៤ហិកតារហ្នឹង អាចមានលទ្ធភាពកាត់ឆ្វៀល ឬក៏រកដំណោះស្រាយណាមួយដែលពួកគាត់ព្រមព្រៀងទទួលយកបានអាហ្នឹងគឺជារឿងប្រសើរជាជាង ទៅប្រើប្រាស់នូវវិធានការបណ្ដេញចេញការធ្វើទុក្ខបុកម្នេញផ្សេងៗទៅលើពួកគាត់»។
ការប្រើអំពើហិង្សាលើពលរដ្ឋមានជម្លោះដីធ្លីនៅបឹងតាមោកនេះ មិនមែនជាលើកទី១ នោះទេ។ជាក់ស្ដែងកាលពីថ្ងៃទី៩ ខែឧសភា កន្លងទៅអាជ្ញាធរប្រមាណ ៤០នាក់បានយករណាយន្តកាត់រុះរើស្ពានឫស្សី ប្រវែង៨០ម៉ែត្រ របស់ប្រជាពលរដ្ឋដែលសាងសង់សម្រាប់ធ្វើដំណើរ និងបានប្រើហិង្សារុញច្រានធ្វើឱ្យស្ត្រី ១០នាក់រងរបួស។ ពលរដ្ឋរស់នៅក្បែរបឹងតាមោកស្នើឱ្យរដ្ឋាភិបាលកាត់ឆ្វៀលដីចំនួន ៤ហិកតារ ជូនដល់ពួកគាត់ និងបញ្ឈប់ការធ្វើទុក្ខបុកម្នេញលើពលរដ្ឋស្លូតត្រង់តទៅទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។