ពលរដ្ឋមានវិវាទដីធ្លី និងរងការដុតបំផ្លាញផ្ទះសម្បែង ពីសំណាក់ក្រុមហ៊ុនវៀតណាម និងអាជ្ញាធរខេត្តក្រចេះ លើកឡើងថា អាជ្ញាធរស្រុកសំបូរ ខេត្តក្រចេះ កំពុងឆ្លើយដោះសាគេចវេះ និងមិនទទួលខុសត្រូវនូវទង្វើរបស់ខ្លួនដែលបានធ្វើដាក់ប្រជាពលរដ្ឋកន្លងមក។ ការលើកឡើងនេះ បន្ទាប់ពីរដ្ឋបាលស្រុកសំបូរ បានចេញលិខិតបដិសេធជាថ្មីថា ក្រុមហ៊ុនវៀតណាម និងអាជ្ញាធរ មិនបានដុតផ្ទះសម្បែងប្រជាពលរដ្ឋ ដូចការចោទប្រកាន់របស់ពលរដ្ឋរងគ្រោះដីធ្លីនោះទេ។
ពលរដ្ឋរងគ្រោះដីធ្លី និងរងការដុតបំផ្លាញផ្ទះសម្បែង ក្នុងឃុំកោះខ្ញែរ ស្រុកសំបូរ ខេត្តក្រចេះ ឆ្លើយតបនឹងលិខិតបំភ្លឺរបស់អាជ្ញាធរស្រុកសំបូរថា អាជ្ញាធរកំពុងគេចវេះមិនទទួលខុស និងកាងការពារក្រុមហ៊ុនវៀតណាម ដែលបានដាក់គ្រឿងចក្រឈូសឆាយបំផ្លាញផលដំណាំ ដុតផ្ទះសម្បែង និងគំរាមកំហែងចាប់ខ្លួនតំណាងពលរដ្ឋ។ ពលរដ្ឋបន្ថែមថា រហូតមកដល់ពេលនេះ អាជ្ញាធរនៅតែមិនព្រមដោះស្រាយឲ្យប្រជាពលរដ្ឋជាង៣០០គ្រួសារដដែល ហើយថែមទាំងព្យាយាមទម្លាក់កំហុសថាប្រជាពលរដ្ឋទាំងនោះជាអ្នកដណ្ដើមយកដីធ្លីពីក្រុមហ៊ុនវៀតណាម។
តំណាងប្រជាពលរដ្ឋ១រូបក្នុងចំណោម៥រូប នៅឃុំកោះខ្ញែរ លោក ហុន សុខហេង ប្រាប់វិទ្យុអាស៊ីសេរីនៅថ្ងៃទី០៦ ខែកក្កដាថា អាជ្ញាធរស្រុកសំបូរនៅតែគេចវេះមិនទទួលខុសត្រូវ និងចោទពលរដ្ឋ ថាបានចូលទៅរំលោភយកដីរបស់ក្រុមហ៊ុន កាម៉ាដេនូ វេនឈ័រ (ខេមបូឌា) លីមីធីត(Kamdhenu Ventures Cambodia Limited KVCL) និងក្រុមហ៊ុន កសិកម្ម យុវជន ស្វាយរៀង។ លោកបន្ថែមថា ក្រុមហ៊ុនវៀតណាម បានឈូសឆាយផលដំណាំ និងកាយកប់វត្ថុតាងផ្សេងៗ ដែលអាចបញ្ជាក់ថា ពលរដ្ឋរស់នៅតំបន់នោះមុនក្រុមហ៊ុនមួយនេះទទួលបានសិទ្ធិវិនិយោគ ហើយអាជ្ញាធរមិនបានចុះត្រួតពិនិត្យជាក់ស្ដែង និងស្វែងរកដំណោះស្រាយនោះទេ។ លើសពីនោះ លោកថា អាជ្ញាធរបានគំរាមកំហែងទៅលើប្រជាពលរដ្ឋដែលហ៊ានចេញមុខតវ៉ាថែមទៀត។
លោក ហុន សុខហេង៖ «សូមឲ្យអាជ្ញាធរគ្រប់ជាន់ថ្នាក់ អង្គការគ្រប់ស្ថាប័នទាំងអស់ ជួយដល់ប្រជាពលរដ្ឋផងប្រជាពលរដ្ឋ៥ភូមិនឹង រងទុក្ខដីធ្លីជាមួយក្រុមហ៊ុន ដែលប៉ះពាល់ដំណាំដំឡូង ស្រូវ ជាពិសេសភ្ជូរលើស្រូវគ្នាហើយយកសណ្ដែកខ្មោចមកបាចពីលើទៀត ដើម្បីបំបាត់ភស្តុតាងគ្នាទៀត ហើយមួយយប់ៗបង្ហោះដ្រូនលើដីនឹងខ្លាចប្រជាពលរដ្ឋយកស្រូវទៅព្រោះពេលយប់ ក្រុមហ៊ុនវិនិយោគមិនមកវិនិយោគទេគឺមកឈ្លោះជាមួយប្រជាពលរដ្ឋ»។
ពលរដ្ឋព្រមាន វេចបង្វេច ចានឆ្នាំង មុងភួយ ខ្នើយកន្ទេល លើកគ្នាមកបោះជុំរុំតវ៉ានៅរាជធានីភ្នំពេញម្ដងទៀត ដើម្បីស្នើឲ្យរដ្ឋាភិបាល ជួយអន្តរាគមន៍ និងស្វែងរកដំណោះស្រាយ ប្រសិនបើអាជ្ញាធរខេត្តមួយនេះមិនព្រមដោះស្រាយឲ្យពួកគេ។
ជុំវិញរឿងនេះ វិទ្យុអាស៊ីសេរី មិនអាចទាក់ទងអភិបាលរងស្រុកសំបូរ លោក ចេង គឺមជប់ និងអភិបាលខេត្តក្រចេះ លោក វ៉ា ថន បានទេនៅថ្ងៃទី០៦ ខែកក្កដា។
កាលពីថ្ងៃទី០៣ ខែកក្កដា រដ្ឋបាលស្រុកសំបូរ បានចេញលិខិតបដិសេធមួយ ដោយអះអាងថា ក្រុមហ៊ុនវៀតណាម និងអាជ្ញាធរ មិនបានដុតផ្ទះសម្បែងប្រជាពលរដ្ឋនោះទេ ហើយផ្ទះប្រជាពលរដ្ឋដែលមានទទឹង៤ម៉ែត្រនិងបណ្ដោយ៦ម៉ែត្រ ដំបូលប្រក់ពីស្បូវជញ្ជាំងស្លឹងឆាបឆេះនោះ បណ្ដាមកពីឪពុកម្ដាយមិននៅផ្ទះ កូនៗរបស់ពួកគេដាំបាយមិនប្រយ័ត្នទើបឆាបឆេះតែម្ដង។
បើទោះជាយ៉ាងណាក្ដី នេះមិនមែនជាលើកទីមួយទេ ដែលអាជ្ញាធរខេត្តក្រចេះ ចេញលិខិតបដិសេធរាល់ការរាយការណ៍ និងការស្នើសុំរបស់ប្រជាពលរដ្ឋ ជាក់ស្ដែងកាលពីថ្ងៃទី១៤ ខែមិថុនា អាជ្ញាធរបដិសេធថាមិនមានប្រជាពលរដ្ឋរងគ្រោះដីធ្លីជាមួយក្រុមហ៊ុន កាម៉ាដេនូ វេនឈ័រ និងក្រុមហ៊ុន កសិកម្ម យុវជន ស្វាយរៀង ច្រើនគ្រួសារនោះទេ និងចោទពលរដ្ឋទាំងនោះរំលោភយកដីក្រុមហ៊ុនថែមទៀត។
ផ្ទុយពីការអះអាងរបស់អាជ្ញាធរ នៅព្រឹកថ្ងៃទី១៩ ខែមិថុនាកន្លងទៅ ពលរដ្ឋមានវិវាទដីធ្លីជិត៥០នាក់តំណាងឲ្យពលរដ្ឋជាង៣០០គ្រួសារ បាននាំគ្នាឡើងមកភ្នំពេញ ដាក់លិខិតសុំកិច្ចអន្តរាគមន៍ និងស្វែងរកដំណោះស្រាយ ពីស្ថាប័នពាក់ព័ន្ធ ដើម្បីឲ្យក្រុមហ៊ុនវៀតណាម បញ្ឈប់ការឈូសឆាយ ដំណាំកសិកម្ម និងឈប់ឲ្យអាជ្ញាធរខេត្តក្រចេះ គំរាមកំហែងទៅលើប្រជាពលរដ្ឋ ហើយអាជ្ញាធរខេត្តក៏បានតាមលួងលោម និងបានសន្យាដោះស្រាយបញ្ហាដីធ្លីឲ្យប្រជាពលរដ្ឋនៅពេលពួកគាត់ត្រឡប់ទៅផ្ទះវិញ។
ទាក់ទិននឹងបញ្ហានេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិនៃសមាគមការពារសិទ្ធិមនុស្សអាដហុក លោក យិន ម៉េងលី មានប្រសាសន៍ថា អាជ្ញាធរគួរចុះពិនិត្យជាក់ស្ដែង ដើម្បីស្វែងរកការពិត និងស្វែងរកដំណោះស្រាយឲ្យប្រជាពលរដ្ឋ ដើម្បីកុំឲ្យរឿងជម្លោះដីធ្លីកាន់តែរីករាល់ធំឡើង។
លោក យិន ម៉េងលី៖ «ខ្ញុំនៅតែទទូចឲ្យក្រសួងចុះទៅដល់ទីកន្លែងស្វែងរកការពិតមួយ ប្រសិនបើមានភាពខុសគ្នាអ៊ីចឹងថាវាមានមែនឬអត់ ហើយសូមឲ្យមានវិធានការផងប្រសិនបើរកឃើញមានបញ្ហាមែនត្រូវតែមានវិធានការ»។
ប្រជាពលរដ្ឋនៅឃុំកោះខ្ញែរ អះអាងទៀតថា នៅចុងខែមិថុនា ក្រុមហ៊ុនវៀតណាម និងអាជ្ញាធរខេត្តក្រចេះ បានដាក់គ្រឿងចក្រឈូសឆាយបំផ្លាញផលដំណាំកសិកម្ម ដុតផ្ទះសម្បែងពលរដ្ឋអស់៧ខ្នង និងព្យាយាមតាមចាប់ខ្លួនតំណាងពលរដ្ឋ ដែលប្រមូលគ្នាឡើងទៅតវ៉ានៅរាជធានីភ្នំពេញថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។