ពលរដ្ឋនៅឃុំតាតោក ស្រុកសំឡូត ខេត្តបាត់ដំបងមួយចំនួនគ្មានទីជម្រក ក្រោយពីអាជ្ញាធរ បានឈូសឆាយផ្ទះសម្បែងរបស់ពួកគេ។ មន្ត្រីអង្គការសង្គមស៊ីវិលថា អាជ្ញាធរគួរតែដោះស្រាយបញ្ហានេះ ដោយសន្តិវិធី និងប្រកបដោយមនុស្សធម៌ ប្រសើរជាងការបណ្ដេញចេញដោយបង្ខំ និងការរារាំងពលរដ្ឋមិនឲ្យប្រមូលទ្រព្យសម្បត្តិឯកជនពួកគេ។
ពលរដ្ឋ២២៩គ្រួសារនៅស្រុកសំឡូតខេត្តបាត់ដំបង កំពុងរស់នៅគ្មានទីជម្រកសម្រាប់បាំងថ្ងៃបាំងភ្លៀងនោះទេ ក្រោយពីអាជ្ញាធរឈូសឆាយផ្ទះសម្បែងពួកគេអស់គ្មានសល់កាលពីថ្ងៃទី២៨ មិថុនា។
ពលរដ្ឋមួយចំនួន បង្ខំចិត្តក្រាលកន្ទេលដេកតាមចិញ្ចឹមផ្លូវ ដុតភ្លើងដេញមូស ហាលទឹកសន្សើមខាងមុខផ្លូវចូលក្រុមហ៊ុនរ័ត្នសម្បត្តិ បានក្រោមស្លាកការអភិវឌ្ឍជឿនលឿនរបស់នាយករដ្ឋមន្ត្រីលោក ហ៊ុន សែន។
ពលរដ្ឋមួយចំនួន អះអាងថា រហូតដល់កណ្ដាលថ្ងៃត្រង់ទី២៩ មិថុនា ពួកគេមិនទាន់បានបាយចូលពោះមួយគ្រាប់នោះទេ ស្របពេលលុយកាក់គ្មានសូម្បីមួយរៀលសម្រាប់ទិញរបស់ហូប។ អ្នកខ្លះទៀត ដោយអត់ទ្រាំនឹងការស្រេកឃ្លាន ក៏ដាច់ចិត្តលើកដៃសំពះអ្នកជិះម៉ូតូតាមផ្លូវ ដើម្បីបានប្រាក់ខ្លះធ្វើសោហ៊ុយ និងទិញបាយទឹកឲ្យកូនចៅតូចៗហូប ខណៈក្មេងតូចៗទាំងនោះ នៅហាលវាលហាលក្ដៅជាមួយម្ដាយឪពុកលើគោយន្តដឹកទំនិញ។ ពួកគាត់បន្ថែមថា ពួកគាត់ បានបាត់បង់របស់របរប្រើប្រាស់ និងសត្វចិញ្ចឹមមួយចំនួន ព្រោះអាជ្ញាធរមិនអនុញ្ញាតឲ្យពលរដ្ឋចូលទៅប្រមូលនោះទេ ដោយបិទបញ្ចប់ការចូលទៅប្រមូលអីវ៉ាន់ត្រឹមម៉ោង៦ល្ងាចថ្ងៃទី២៨ មិថុនា។ អាជ្ញាធរបានពង្រាយគ្នាជាច្រើននាក់នៅផ្លូវចូល ក្រុមហ៊ុន រ័ត្ន សម្បត្តិ ដើម្បីហាមឃាត់ពលរដ្ឋ ចូលទៅទីតាំងលំនៅឋានរបស់ពួកគេ។
ពលរដ្ឋរស់នៅឃុំតាតោកលោក យឹម ផល ប្រាប់វិទ្យុអាស៊ីសេរីថា គាត់ក្រាលកន្ទេលសម្រាកជាមួយប្រពន្ធ និងកូន តាមចិញ្ចើមផ្លូវ គ្មានដំបូលនោះទេ កាលពីយប់ថ្ងៃទី២៨ មិថុនា។ លោកបន្តថា ពេលនេះគាត់ កំពុងតែដាច់ទឹកដាច់បាយ ព្រោះអស់អង្ករគ្មានអ្វីដាំស្លហូបនោះទេ ដោយសារអាជ្ញាធរ មិនអនុញ្ញាតឲ្យចូលទៅប្រមូលរបស់របរដែលនៅសល់។ លោកបន្តទៀតថា គាត់មិនមានកន្លែងសម្រាប់ស្នាក់នៅនោះទេ ហើយ កំពុងតែសុំដីអ្នកភូមិស្នាក់នៅបណ្ដោះអាសន្ន។
លោក យឹម ផល៖ «នេះខ្ញុំសុំដីគេនៅក្នុងព្រៃចេកគេបង ប្រហែលជាម្ភៃគ្រួសារ ព្រៃចេក ព្រៃក្នុងស្បូវហើយស្វាយ ចំការចន្ទីគេបងសុំគេ។ អាខ្លះដាច់បាយដាច់ទឹកមុខខ្ម ប៉ែហ្នឹងហាបងអ្ហើយ អត់មានអ្វីហូបទេ ម្ភៃគ្រួសារ ហ្នឹងសុទ្ធតែអ្នកអត់ដីនៅពិតប្រាកដហើយបង»។
ស្រដៀងគ្នានេះ ពលរដ្ឋម្នាក់ទៀតលោកស្រី ខាត់ ចាប ថ្លែងថា ទ្រព្យសម្បត្តិ របស់គាត់នៅសេសសល់ មិនអាចប្រមូលចេញពីផ្ទះបាន ដោយសារអាជ្ញាធរមិនអនុញ្ញាតឲ្យចូលទៅយកវិញនោះទេ។ លោកស្រីបន្ថែមថា មកដល់ពេលនេះគាត់មិនមានផ្ទះសម្រាប់ជ្រកនោះទេ។
លោកស្រី ខាត់ ចាច៖ «ពូឯងមើលមកឈូសឆាយឈូសអីអស់ ខ្ទេចខ្ទីអស់ហើយខ្ញុំថតអីអត់ឲ្យខ្ញុំថតទេចាប់យកទូរស័ព្ទ។ ហើយគាត់ព័ត៌មានខ្លួនឯងសុទ្ធតែថា ពួកខ្ញុំហ្នឹងដេញកាប់ដេញអីគាត់ ព័ត៌មានខ្លួនឯងថាខ្លួនឯងលោកពូឯងមើល។ ហើយឈូសឆាយហើយយក យកស័ង្កសីយកអីៗៗហ្នឹង អត់ឲ្យខ្ញុំយកទាំងអស់។ គាត់ឈូសឆាយចោលរបស់ខ្ញុំទាំងអស់ ឆ្នាំងចានក៏មិនឲ្យយកកន្ទេលមុងក៏មិនឲ្យយក មាន់ទាក៏មិនឲ្យចាប់ឲ្យអីទាំងអស់ គាត់ថា ហ៊ានចាប់ ដាក់ខ្នោះ»។
វិទ្យុអាស៊ីសេរីនៅពុំទាន់អាចទាក់ទងអភិបាលស្រុកសំឡូត លោក សើ សាម៉េត អធិការនគរបាលស្រុកសំឡូត លោក ម៉ែន រីម ស្នងការខេត្តបាត់ដំបង លោក សាត គឹមសាន និងអភិបាលខេត្តបាត់ដំបង លោក សុខ លូ ដើម្បីសុំការអត្ថាធិប្បាយអំពីរឿងនេះបាននៅឡើយទេ នៅថ្ងៃទី២៩ មិថុនា។
ដោយឡែកមេឃុំតាតោក ស្រុកសំឡូត លោក អ៊ុន ខែម ថ្លែងថា គាត់មិនបានគិតដល់កន្លែងស្នាក់នៅបណ្ដោះអាសន្ន សម្រាប់ពលរដ្ឋ២២៩គ្រួសារនោះទេ ព្រោះផ្ទះរបស់លោកគឺនៅឆ្ងាយពីទីនោះ ហើយលោកមិនធ្លាប់ទៅទីតាំងតំបន់នោះ និងពុំធ្លាប់មានទំនាក់ទំនងជាមួយពលរដ្ឋ២២៩គ្រួសារដែរ។
លោក អ៊ុន ខែម៖ «អាហ្នឹងគាត់ទៅនៅ គេឲ្យទៅតាមផ្ទះតាមដី តាមធ្លីរបស់គាត់រៀងៗខ្លួនហ្នឹងទៅតាមមើល ខ្ញុំអត់ វាផុតពីការ ខ្ញុំដោះស្រាយហើយអារឿងហ្នឹង ខ្ញុំអត់សូវដឹងដែរហ្នឹងហា វានៅខាងលើវិញទេ ខាងតុលាការ ខាងអីគេ បានគេយល់ជ្រៅជាងពីបញ្ហាហ្នឹង។ ហើយប្រជាជនក៏មិនមែនអ្នកនៅខាងខ្ញុំដែរ ប្រជាជននៅខាងខ្ញុំ ក៏វាតិចតួច គាត់ទៅរស់នៅតាមផ្ទះតាមសម្បែងគាត់ទៅ បី បួន ដប់គ្រួសារអ៊ីចឹងទៅ»។
ទោះជាយ៉ាងណា អ្នកសម្របសម្រួលផ្នែកឃ្លាំមើលការរំលោភសិទ្ធិមនុស្ស នៃអង្គការលីកាដូ (Licadho) ខេត្តបាត់ដំបង លោក អ៊ិន គង់ជិត មានប្រសាសន៍ ថា ប្រតិបត្តិការវាយកម្ទេចផ្ទះពលរដ្ឋ និងការបណ្ដេញចេញដោយបង្ខំ ហើយមិនទុកពេលសមរម្យឲ្យពលរដ្ឋ សម្រាប់ប្រមូលសម្ភារៈរបស់ពួកគេនោះ ជាការរំលោភសិទ្ធិធ្ងន់ធ្ងរ និងគ្មានភាពមនុស្សធម៌។
លោក អ៊ិន គង់ជិត៖ «ក្នុងនាមអង្គការសង្គមស៊ីវិល យើងខ្ញុំសូមអំពាវនាវឲ្យអាជ្ញាធរ គិតគូរទៅលើមនុស្សធម៌ អំពើមនុស្សធម៌ ដែលជួយបង្កលក្ខណៈអនុគ្រោះឲ្យគាត់បានរស់នៅជាបណ្ដោះអាសន្ន។ យើងគិតថា កន្លងមកឃើញអាជ្ញាធរ មានសកម្មភាពល្អដូចជាចែកជំនួយចែកអំណោយដល់ជនក្រីក្រនៅតាមភូមិ អ្នកពិការ ស្ត្រីទុរគត ជនពិការ មនុស្សចាស់ជរា អ្នកជំងឺអ្វីហ្នឹង គឺឃើញមានទឹកចិត្តល្អក្នុងការឧបត្ថម្ភឲ្យដល់ប្រជាពលរដ្ឋក្នុងភូមិ។ ចុះចំណែកពួកគាត់ ដែលគាត់អស់ផ្ទះសម្បែងហើយ អស់ទីជង្រុកអស់ទីជម្រកហើយ អស់ទីស្នាក់នៅហើយ គ្រាន់តែបង្កលក្ខណៈ ឬក៏សម្រួលឬក៏រកទីកន្លែងសមរម្យណាមួយសម្រាប់ឲ្យពួកគាត់រស់នៅបណ្ដោះអាសន្ន»។
អាជ្ញាធរស្រុកសំឡូត ខេត្តបាត់ដំបង នៅថ្ងៃទី២៨ មិថុនាកន្លងទៅ បានប្រើគ្រឿងចក្រឈូសឆាយផ្ទះប្រជាពលរដ្ឋ អស់ជាច្រើនគ្រួសារ ក្រោមហេតុផលថា ពលរដ្ឋទាំងនោះ សង់ផ្ទះរំលោភលើដីរបស់ក្រសួងកសិកម្ម ហើយបានហាមឃាត់ មិនឲ្យពលរដ្ឋចូលទៅប្រមូលយកទ្រព្យសម្បតិ្ត និងសត្វចិញ្ចឹមពួកគេចេញនោះទេ។ មន្ត្រីសង្គមស៊ីវិលថា ទង្វើរបស់អាជ្ញាធរនេះ ជារឿងអមនុស្សធម៌ និងរំលោភលើសិទ្ធិមនុស្សធ្ងន់ធ្ងរ។ សង្គមស៊ីវិល អំពាវនាវឲ្យ អាជ្ញាធរ ស្វែងរកទីតាំងឲ្យពលរដ្ឋស្នាក់នៅបណ្ដោះអាសន្ន និងទុករយៈពេលឲ្យពលរដ្ឋឲ្យបានសមរម្យដើម្បីឲ្យពួកគេ ប្រមូលយកទ្រព្យសម្បត្តិ និងសត្វចិញ្ចឹមរបស់ពួកគេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។