ព្រះសង្ឃ និងពលរដ្ឋនៅសហគមន៍អូរដំរី ខេត្តព្រះសីហនុ ដែលជាកន្លែងមានបញ្ហាដីធ្លី កំពុងជួបបញ្ហាក្នុងការរស់នៅ។ ចំណែកឯព្រះសង្ឃជួបបញ្ហាខ្វះខាតចង្ហាន់ ព្រោះឈ្មួញដីធ្លីមានអំណាចម្នាក់បានបិទទ្វាររបងចេញចូលលើដីមានជម្លោះដែលមិនអាចឲ្យពលរដ្ឋ និងពុទ្ធបរិស័ទចូលធ្វើបុណ្យនៅក្នុងវត្តដែលស្ថិតក្នុងដីមានជម្លោះនោះ។ អភិបាលខេត្តព្រះសីហនុអះអាងថា លោកនឹងដោះស្រាយបញ្ហានេះ។
ពលរដ្ឋ និងព្រះសង្ឃនៅសហគមន៍អូរដំរីទទូចឲ្យអាជ្ញាធរខេត្តព្រះសីហនុបើកច្រកចេញពីសហគមន៍នេះ ព្រោះឈ្មួញមានអំណាចឈ្មោះអ្នកស្រី ហ៊ឹម សុវណ្ណារី មានងារជាជំទាវ និងបក្សពួកបានបិទច្រកចេញចូលសហគមន៍ជាង ១០ថ្ងៃមកហើយ។ ឈ្មួញរូបនេះបានយកលួសមកព័ទ្ធជុំវិញផ្លូវចូល ចំណែកខ្លោងទ្វារផ្លូវខាងមុខត្រូវបានគេយកសោរចាក់បិទទ្វាររបង រីឯផ្លូវចូលខាងក្រោយគេបានយកគ្រឿងចក្រកាយផ្ដាច់ផ្លូវមិនឲ្យឡានម៉ូតូបើកបរបាន។
ប្រជាសហគមន៍អូរដំរីម្នាក់លោក ហឹម ចាន់ ដែលមានផ្ទះជិតវត្តអូរដំរីនិយាយថា ផ្លូវនេះជាផ្លូវ សាធារណៈ ដូច្នេះទោះតំបន់នេះមានវិវាទដីធ្លីយ៉ាងណាក៏ដោយក៏មិនត្រូវបិទផ្លូវនេះដែរ។ ពលរដ្ឋរូបនេះស្នើទៅអាជ្ញាធរខេត្តជួយអន្តរាគមន៍ឲ្យមានការបើកផ្លូវនេះឡើងវិញ។ «»
ពលរដ្ឋម្នាក់ទៀតលោកស្រី ឈាវ ចាន់ធី ឲ្យដឹងថា គ្រួសារលោកស្រីបានមករស់នៅទីនេះតាំងពីអំឡុងឆ្នាំ១៩៩២។ លោកស្រីបន្តថា ចាប់តាំងពីក្រុមអ្នកស្រី ហ៊ឹម សុវណ្ណារី មកបិទផ្លូវនៅសហគមន៍គេមិនអនុញ្ញាតឲ្យចូលដីផ្ទះរបស់ខ្លួននោះទេ។ «»
សហគមន៍អូរដំរីស្ថិតនៅក្នុងភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ មានប្រជាពលរដ្ឋរស់នៅចំនួន ១៤៩គ្រួសារក្នុងផ្ទៃដីចំនួន១៣៥ហិកតារ។ សហគមន៍មានទីអារាមមួយជាទីសក្ការៈបូជា និងសម្រាប់ពលរដ្ឋទៅធ្វើបុណ្យទាន។ ពលរដ្ឋចូលមករស់នៅទីនេះតាំងពីឆ្នាំ១៩៩២ អាជ្ញាធរមូលដ្ឋានភូមិឃុំនៅទីនេះក៏បានចេញប័ណ្ណសម្គាល់សិទ្ធិប្រើប្រាស់ជូនដល់ពលរដ្ឋដែរ ប៉ុន្តែពលរដ្ឋក្រីក្រនៅសហគមន៍គ្មានលទ្ធភាពធ្វើប័ណ្ណកម្មសិទ្ធិ ឬប្លង់រឹងនោះទេ។
ពលរដ្ឋ និងសង្គមស៊ីវិលឲ្យដឹងថា កាលពីឆ្នាំ២០០៧ ក្រុមអ្នកស្រី ហ៊ឹម សុវណ្ណារី យកកងកម្លាំងប្រដាប់អាវុធ និងយកគ្រឿងចក្រចូលឈូសឆាយដំណាំ និងផ្ទះរបស់ពលរដ្ឋម្ដងរួចហើយ ដោយពួកគេសំអាងថា គេមានប័ណ្ណកម្មសិទ្ធិ។ ក្រុមនេះថែមទាំងរំលោភយកដីវត្តថែមទៀតផង។
ជម្លោះដីធ្លីនេះក៏បានអូសបន្លាយដល់សព្វថ្ងៃនេះ។ កាលពីពេលថ្មីៗនេះ ក្រុមអ្នកស្រី ហ៊ឹម សុវណ្ណារី បានយកបន្លាលួសបិទផ្លូវចេញចូលសហគមន៍អូរដំរី។ ក្រៅពីហាមមិនឲ្យពលរដ្ឋចេញចូលដីផ្ទះរបស់ខ្លួន ក្រុមឈ្មួញមិនអនុញ្ញាតឲ្យពុទ្ធបរិស័ទយកចង្ហាន់មកប្រគេនព្រះសង្ឃដែរ។
ព្រះចៅអធិការវត្តអូរដំរី ព្រះតេជព្រះគុណ ម៉ាន ភក្ត្រី មានថេរដីកាថា ក្រុមឈ្មួញក្រៅពីបិទរបងមិនឲ្យមានការចេញ ពួកគេក៏មានការឃ្លាំមើលអ្នកចេញចូលវត្តដែរ។ ព្រះតេជព្រះគុណបន្តថា សកម្មភាពបែបនេះ កំពុងធ្វើឲ្យព្រះសង្ឃដែលគង់នៅវត្ត មានការព្រួយបារម្ភនិងភ័យខ្លាច។ «»
តុលាការខេត្តព្រះសីហនុក៏ធ្លាប់ចុះមកស្រាវជ្រាវដល់សហគមន៍អូរដំរីម្ដងដែរ ប៉ុន្តែតុលាការមិនទាន់បង្ហាញពីដំណោះស្រាយនៅឡើយទេ។ ក្រុមពលរដ្ឋស្នើទៅអាជ្ញាធរ ឲ្យមានវិធានការជាបន្ទាន់ជៀសវាងកើតឡើងនូវករណីហិង្សាណាមួយរវាងពលរដ្ឋ និងក្រុមឈ្មួញដីអ្នកស្រី ហ៊ឹម សុវណ្ណារី ខណៈសំណុំរឿងស្ថិតក្នុងដៃតុលាការ។
អាស៊ីសេរីមិនទាន់អាចមានមធ្យោបាយសុំការបំភ្លឺពីអ្នកស្រី ហ៊ឹម សុវណ្ណារី ឲ្យបកស្រាយពីការ ចោទប្រកាន់នេះបាននៅឡើយទេថ្ងៃទី៧ មិថុនា។
ចំណែកអភិបាលខេត្តព្រះសីហនុ លោក យន់ មីន ឲ្យអាស៊ីសេរីដឹងថ្ងៃទី៧ មិថុនា ថា លោកបានដឹងបានពីករណីជម្លោះដីធ្លីនៅសហគមន៍អូរដំរីនេះហើយ។ លោកអភិបាលខេត្តឲ្យដឹងទៀតថា លោកបានបញ្ជាកងកម្លាំងចុះទៅរុះរើរបងនោះចេញ អាជ្ញាធរខេត្តត្រៀមដោះស្រាយជម្លោះនេះ ហើយនៅពេលនេះគឺរង់ចាំការសម្រេចពីទីស្ដីការគណៈរដ្ឋមន្ត្រី និងការសម្រេចរបស់តុលាការ។ «»
អ្នកសម្របសម្រួលនៃសមាគមសម្ព័ន្ធសហគមន៍កសិករកម្ពុជាក្នុងខេត្តព្រះសីហនុ លោក ញិល ភាព ដែលតាមដានដំណើររឿងនេះស្វាគមន៍ចំណាត់ការរបស់អភិបាលខេត្តព្រះសីហនុនៅពេលនេះ។ ប៉ុន្តែសង្គមស៊ីវិលរូបនេះយល់ថា ការបិទផ្លូវសាធារណៈរបស់អ្នកស្រី ហ៊ឹម សុវណ្ណារី គឺជាការប្រព្រឹត្តល្មើសច្បាប់ ដូច្នេះលោកស្នើទៅលោកអភិបាលខេត្តត្រូវមានវិធានការផ្លូវច្បាប់ចំពោះឈ្មួញដីធ្លីនេះ។ «»
វិបត្តិដីធ្លីខេត្តព្រះសីហនុកំពុងផ្ទុះឡើងសព្វថ្ងៃនេះ ខណៈខេត្តពាណិជ្ជកម្ម និងទេសចរណ៍មួយ នេះកំពុងទទួលបានការវិនិយោគពីជនជាតិចិន។ ករណីជម្លោះដីធ្លីនៅសហគមន៍អូរខ្សាច់ នៅក្បែរសហគមន៍អូរដំរីនេះដែរ ត្រូវមេបញ្ជាការកងរាជអាវុធហត្ថខេត្តព្រះសីហនុ លោក ហេង ប៊ុនទី បានបញ្ជាកម្លាំងចុះចាប់ខ្លួនពលរដ្ឋដាក់ពន្ធនាគារចំនួនបួននាក់ ដោយពេលនេះពួកគេ ទាំងនោះមិនទាន់ដោះលែងវិញនៅឡើយទេ ហើយក្រុមពលរដ្ឋកំពុងរកបណ្ដឹងពីតុលាការ។
ពលរដ្ឋ និងសង្គមស៊ីវិលស្នើទៅអាជ្ញាធរខេត្ត និងមេដឹកនាំរបបក្រុងភ្នំពេញ លោក ហ៊ុន សែន ដោះស្រាយវិបត្តិដីធ្លីនៅខេត្តព្រះសីហនុ ដោយផ្តល់យុត្តិធម៌ដល់ពលរដ្ឋម្ចាស់ដីពិតប្រាកដ ព្រោះមួយរយៈចុងក្រោយនេះ ឈ្មួយរកស៊ីដីធ្លីបានប្រើឥទ្ធិពលរបស់ខ្លួនបំពានពលរដ្ឋ និងចាប់ពលរដ្ឋដាក់ពន្ធនាគារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។