ជនជាតិដើមភាគតិចព្នងខេត្តមណ្ឌលគិរីជាង ៥០នាក់បានប្រមូលផ្តុំគ្នានៅមន្ទីរដែនដីខេត្តមណ្ឌលគិរី នៅព្រឹកថ្ងៃទី១០ កញ្ញា ដើម្បីពិភាក្សារកដំណោះស្រាយជម្លោះដីធ្លីទំហំ ៣.០០០ហិកតារ ជាមួយក្រុមហ៊ុនមេហ្គា ហ្វើស (Mega First Corporation Berhad) ក៏ប៉ុន្តែតំណាងក្រុមហ៊ុនមិនបានមកជួបអ្នកភូមិតាមការសន្យានោះទេ។
ក្រុមជនជាតិដើមភាគតិចព្នងជាច្រើនគ្រួសាររស់នៅឃុំប៊ូស្រា ស្រុកពេជ្រាដា និងឃុំដាក់ដាំ ស្រុកអូររាំងខឹងសម្បាចំពោះទង្វើរបស់តំណាងក្រុមហ៊ុនសម្បទានសេដ្ឋកិច្ចមេហ្គាហ្វើស ដែលគេចវេះមិនចង់ដោះស្រាយជម្លោះដីធ្លីទំហំ ៣ពាន់ហិកតារដែលកំពុងចម្រូងចម្រាស់។
តំណាងសហគមន៍ជនជាតិដើមភាគតិចរស់នៅឃុំប៊ូស្រា លោក ផើន តែម ឱ្យដឹងនៅថ្ងៃទី១០ កញ្ញាថា ក្រុមហ៊ុនមេហ្គាហ្វើសបន្តឈូសឆាយដីព្រៃសហគមន៍ដែលកំពុងមានជម្លោះមិនទាន់ដោះស្រាយរួចរាល់ អស់ជិត ១រយហិកតារ (១០០) ជាថ្មីទៀត ក្នុងនោះក្រុមហ៊ុនក៏កំពុងដាំដំណាំឧស្សាហកម្មផងដែរ។ លោកថា ពលរដ្ឋតែងតែរារាំងសកម្មភាពឈូសឆាយនោះ ព្រោះទីតាំងដីដែលក្រុមហ៊ុនឈូសឆាយ និងដាំដំណាំជាតំបន់ព្រៃកប់សព ព្រៃត្រណម ព្រៃជំនឿ និងព្រៃមានរុក្ខជាតិកម្រឋិតក្នុងលក្ខខណ្ឌ ដែលរដ្ឋាភិបាលកាត់ឆ្វៀលផលប៉ះពាល់។ លោកចាត់ទុក ទង្វើរបស់ក្រុមហ៊ុនថា ជាការភូតភរពលរដ្ឋដោយគ្មានការទទួលខុសត្រូវ៖ «ក្រុមហ៊ុនហ្នឹងខូចហ្មង ជាក្រុមហ៊ុនកុហកប្រជាជនអ៊ីចឹង។ កុហកថា គាត់ជួយដោះស្រាយតែគាត់អត់ដោះស្រាយទេ រយៈពេលប៉ុន្មានឆ្នាំហើយ ចាប់តាំងពីឆ្នាំ២០១៦។ ជាមួយខាងក្រុមហ៊ុនហ្នឹង គឺក្រុមហ៊ុន មិនផ្អាកទេ ការឈូសឆាយរបស់គាត់ នៅតែបន្តរហូតតំបន់ស្លឹកតៀបសត្វក៏មាន ហើយខ្លះទៀតក៏មានប៉ះពាល់អូរដែរ »។
អាស៊ីសេរីបានព្យាយាមទាក់ទងនាយករដ្ឋបាលក្រុមហ៊ុនមេហ្គាហ្វើស លោក ជា សុវណ្ណា ដើម្បីសុំការបំភ្លឺជុំវិញការចោទប្រកាន់នេះ តែទូរសព្ទហៅចូលច្រើនដងគ្មានអ្នកទទួល នៅថ្ងៃទី ១០ កញ្ញា។
ចំណែកអ្នកនាំពាក្យសាលាខេត្តមណ្ឌលគិរី លោក សុក សេរ៉ា និងអភិបាលខេត្តមណ្ឌលគិរី លោក ស្វាយ សំអ៊ាង ក៏មិនលើកទូរសព្ទដែរ នៅថ្ងៃដដែលនេះ។
ក្រុមហ៊ុនសម្បទានសេដ្ឋកិច្ចមេហ្គា ហ្វើស (Mega First Corporation Berhad) របស់ប្រទេសម៉ាឡេស៊ី ទទួលសិទ្ធិវិនិយោគពីរដ្ឋាភិបាលលើផ្ទៃដីជាង ៩ពាន់ហិកតារ នៅស្រុកអូររាំង តាំងពីឆ្នាំ២០១២។ តំណាងក្រុមហ៊ុនធ្លាប់អះអាងថា ខ្លួនបានកាត់ឆ្វៀលផលប៉ះពាល់ទំហំ ៣ពាន់ហិកតារ ហើយបច្ចុប្បន្នក្រុមហ៊ុននៅសល់តែដីទំហំជាង ៦ពាន់ហិកតារប៉ុណ្ណោះ។
ទោះជាយ៉ាងណាតំណាងសហគមន៍ជនជាតិដើមភាគតិចខេត្តមណ្ឌលគិរី លោក គ្រើង តុលា ឱ្យដឹងថា ព្រៃកប់សពព្រៃត្រណម ព្រៃបម្រុងទុក ព្រៃអារក្ស តំបន់ជម្រាលទឹកអូរ និងព្រៃសម្បូររក្ខជាតិកម្រ មានទំហំ៣ពាន់ហិកតារ ដែលជាកន្លែងដែលជនជាតិដើមភាគតិចអាស្រ័យផល កាន់តែហិនហោចដោយសារតែរដ្ឋាភិបាលមិនដោះស្រាយទំនាស់នេះ។ លោកថា ក្រុមហ៊ុននៅតែ ឈូសឆាយព្រៃទាំងនោះ ផ្ទុយពីកិច្ចសន្យាវិនិយោគ ដោយមានពេលខ្លះ បានទង្គិចជាមួយសហគមន៍ទៀតផង៖ «ក្នុងនាមយើងជាពលរដ្ឋចាត់ទុក គាត់ភូតកុហក គាត់គេចវេះក្នុងការដោះស្រាយបញ្ហាហ្នឹង តែពលរដ្ឋនៅតែមានជំហរមិនឱ្យគាត់ (ក្រុមហ៊ុន ) ដាំបន្តទៀតទេ បើសិនគាត់ដាំយើងនឹងមានវិធានការ ដើម្បីទប់ស្កាត់រង់ចាំការដោះស្រាយទាំងអស់គ្នា »។
ចំណែកមន្ត្រីសម្របសម្រួលសមាគមអាដហុក (Adhoc) ខេត្តមណ្ឌលគិរី លោក អ៊ាង ម៉េងលី ដែលចុះអង្កេតករណីនេះ អះអាងថា អាជ្ញាធរពាក់ព័ន្ធបានពន្យារពេលមិនដោះស្រាយជម្លោះដីធ្លីនេះឱ្យដាច់ស្រឡះនោះទេ ជាច្រើនឆ្នាំមកហើយ ដែលជាហេតុរុញច្រានឱ្យជីវភាពពលរដ្ឋធ្លាក់ចុះ។ លោកយល់ថា ក្រុមហ៊ុនហាក់មានចេតនាមិនចង់ដោះស្រាយផលប៉ះពាល់នានា ឱ្យដាច់ស្រឡះនោះទេ៖ «ស្នើសុំឱ្យអាជ្ញាធរថ្នាក់ជាតិ និងអាជ្ញាធរពាក់ព័ន្ធគួរតែពិនិត្យលើបញ្ហាហ្នឹង ហើយជំរុញក្នុងការដោះស្រាយឱ្យបានឆាប់ចៀសវាងអូសបន្លាយរយៈពេលយូរវាធ្វើឱ្យ បញ្ហាជីវភាពប្រជាពលរដ្ឋកាន់តែក្រ និងកាន់តែលំបាកខ្លាំង »។
កាលពីឆ្នាំ២០១៩ ក្រុមជនជាតិដើមភាគតិច ៥០នាក់ តំណាងឱ្យជនជាតិដើមភាគតិចជាង ៥០០គ្រួសារបានផ្តិតមេដៃសុំកិច្ចអន្តរាគមន៍ទៅអាជ្ញាធរខេត្ត ដើម្បីការពារដីទំហំ ៣ពាន់ហិកតារ ដែលកំពុងរងការរំលោភបំពានពីសំណាក់ក្រុមហ៊ុនសម្បទានសេដ្ឋកិច្ចមេហ្គាហ្វើស។ ក្នុងពាក្យបណ្ដឹងនោះ ពលរដ្ឋបានចោទក្រុមហ៊ុននេះថា ធ្វើឱ្យប៉ះពាល់ព្រៃជំនឿ ផ្នូរកប់សពតំបន់ភូមិចាស់ ប្រភពទឹកអូរធម្មជាតិ បាត់បង់ព្រៃស្រោងជាទីជម្រកសត្វព្រៃ និងអនុផលព្រៃឈើជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។