អាជ្ញាធរមូលដ្ឋានខេត្តមណ្ឌលគិរីបានប្ដឹងបកពលរដ្ឋជនជាតិភាគតិចវិញ ករណីពលរដ្ឋប្ដឹងមេភូមិពូត្រែង និងមេឃុំដាក់ដាំពាក់ព័ន្ធករណី ឃុបឃិតលក់ដីព្រៃសហគមន៍ជាង ៥រយហិកតារ។ ថ្មីៗ នេះ នគរបាលនៃស្នងការខេត្តមណ្ឌលគិរី បានចេញលិខិតកោះហៅតំណាងសហគមន៍ ៤រូប មកបំភ្លឺ បន្ទាប់ពីទទួលពាក្យបណ្ដឹងពីមេភូមិ។
ក្រុមជនជាតិដើមភាគតិច ៤នាក់ តំណាងឲ្យសហគមន៍ជនជាតិដើមភាគតិចជាង ១រយគ្រួសារ (១០៦) រស់នៅភូមិពូត្រែង ឃុំដាក់ដាំ ស្រុកអូររាំងអះអាងថា ពួកគេនឹងចូលខ្លួនបំភ្លឺនៅស្នងការនគរបាលខេត្ត នៅថ្ងៃទី៦ មិថុនា។ ពួកគេប្ដេជ្ញាថា នឹងបន្តទាមទារដីដែលមេភូមិពូត្រែង លោក ប្លង់ សេង និងមេឃុំដាក់ដាំ លោក ចាស់ ណា ឃុបឃិតលក់ដែលមានទំហំ ៥រយ (៥០៣) ហិកតារមកវិញ បំណងរក្សាដីនោះ ប្រើប្រាស់សមូហភាពរបស់សហគមន៍។
ជនជាតិដើមភាគតិចម្នាក់ដែលស្នងការនគរបាលខេត្តនេះកោះហៅ លោក ទឺយ ច្រេន ចាត់ទុកលិខិតកោះហៅនេះជាសារគំរាមចង់ឲ្យសហគមន៍ឈប់ប្ដឹងទាមទារដី ដែលអាជ្ញាធរឃុបឃិតលក់។ លោកថា ពួកគេមិនភ័យខ្លាចការកោះហៅនេះទេ ព្រោះក្រុមសហគមន៍មិនបានប្រព្រឹត្តកំហុស។លោករំឭកថា កន្លងទៅពលរដ្ឋជាង ១រយគ្រួសារបានផ្ដិតមេដៃប្ដឹងមេភូមិ និងមេឃុំពាក់ព័ន្ធករណី ឃុបឃិតលក់ដីព្រៃសហគមន៍ជាង ៥រយហិកតារ (៥០៣) ឲ្យឈ្មួញទៅអាជ្ញាធរខេត្ត និងខណ្ឌរដ្ឋបាលព្រៃឈើ មកទល់ពេលនេះ មិនទាន់មានការស៊ើបអង្កេតនៅឡើយទេ៖ «គ្មានភ័យព្រួយទេព្រោះអត់មានកំហុសអីផង បញ្ហាដាក់ពាក្យបណ្ដឹងមុន ទាមទារប្រយោជន៍សមូហភាពរួម ដល់ឥឡូវពួកគាត់ប្ដឹងបក ពួកខ្ញុំអត់មានកំហុសអី? ពួកខ្ញុំប្ដឹងពួកគាត់មិន អត់ទាន់ឃើញចំណាត់ការដោះស្រាយ ពីថ្នាក់ខេត្ត មន្ទីរដែនដី និងខាងរដ្ឋបាលព្រៃឈើអត់ទានទេ»។
តំណាងជនជាតិដើមភាគតិចព្នង (ពូនង)ម្នាក់ទៀត លោក រាច ម៉ែ ដែលត្រូវបាននគរបាលកោះហៅដែរនោះ ឲ្យដឹងនៅថ្ងៃទី៥ មិថុនាថា ទំហំដីព្រៃជាង ៥រយហិកតារ ដែលអាជ្ញាធរមូលដ្ឋានឃុបឃិតចេញលិខិតលក់ឲ្យឈ្មួញ ជាតំបន់ដែលអ្នកភូមិរកអនុផលព្រៃឈើ ឃ្វាលគោក្របី និងព្រៃជំនឿ ហេតុនេះពួកគេសុខចិត្តស្លាប់ទាមទារដីទាំងនោះជាសម្បត្តិសមូហភាពវិញ៖ «គេប្ដឹងអ៊ីចឹង ពួកខ្ញុំថា អត់ភ័យអត់ខ្លាចទេ ធម្មតាកុំឲ្យតែយើងធ្វើខុស។ ដីហ្នឹងជាដីរបស់រដ្ឋ ដីសហគមន៍យើងប្រុងថាឲ្យពលរដ្ឋគាំទ្រឲ្យច្រើន ទុកដីព្រៃឲ្យល្អ»។
កាលពីថ្ងៃទី៣ មិថុនា ប្រធានការិយាល័យព្រហ្មទណ្ឌកម្រិតស្រាល នៃស្នងការនគរបាលខេត្តមណ្ឌលគិរី លោក ស៊ុម សោភ័ណ្ឌ បានកោះហៅតំណាងក្រុមជនជាតិដើមភាគតិច ៤នាក់មកបំភ្លឺ នៅថ្ងៃទី៦ មិថុនា ក្រោយពីទទួលពាក្យបណ្ដឹងពីមេភូមិពូត្រែង លោក ប្លង់ សេង។ លិខិតកោះហៅនោះ មិនបានសរសេរពីកម្មវត្ថុ បទល្មើសអ្វីនោះទេ?
អាស៊ីសេរីបានទាក់ទង ប្រធានការិយាល័យព្រហ្មទណ្ឌកម្រិតស្រាល នៃស្នងការខេត្តមណ្ឌលគិរី លោក ស៊ុម សោភ័ណ្ឌ ដើម្បីសុំការបំភ្លឺករណីនេះ តែលោកមិនលើកទូរស័ព្ទ នៅថ្ងៃទី៥ មិថុនា។
ចំណែកដើមបណ្ដឹង ដែលមានតួនាទីជាមេភូមិពូត្រែង លោក ប្លង់ សេង មិនលើកទូរស័ព្ទ។ តែទោះយ៉ាងណា មេឃុំដាក់ដាំ លោក ចាស់ ណា ប្រាប់អាស៊ីសេរីថា អាជ្ញាធរមូលដ្ឋានបានកោះហៅភាគីពាក់ព័ន្ធ មកសម្របសម្រួលគ្នាដោះស្រាយបញ្ហានេះ ជាច្រើនសារមកហើយ ក៏ប៉ុន្តែតំណាងសហគមន៍បានបដិសេធ។ លោកបដិសេធមិនបញ្ជាក់លម្អិតពីខ្លឹមសារនៃការសម្របសម្រួលនោះបែបណានោះទេ។ លើសពីនេះ លោកបញ្ជាក់ថា អាជ្ញាធរឃុំមិនបានដាក់ពាក្យប្ដឹង តំណាងពលរដ្ឋ ៤រូបនោះទៅស្នងការខេត្តទេ៖ «សម្របសម្រួលនេះកុំឲ្យមានបញ្ហា ដល់ពេលអ៊ីចឹង ពួកគាត់ខ្ញុំហៅដល់ពីរលើកហើយ សម្របសម្រួលដល់ទៅគាត់ដាក់ពាក្យប្ដឹងវិញ។ ខ្ញុំអត់យល់?»។
មន្ត្រីសម្របសម្រួលសមាគម អាដហុក ខេត្តមណ្ឌលគិរី លោក អ៊ាង ម៉េងលី យល់ថា មេភូមិប្ដឹង តំណាងសហគមន៍ គឺជារូបភាពគំរាមកំហែងក្នុងន័យឲ្យពួកគេឈប់តវ៉ាទាមទារដីទាំងនោះមកវិញ។ លោកថា វិធានការរបស់សមត្ថកិច្ចនៃស្នងការនគរបាលខេត្តបែបនេះ ជាសញ្ញាបង្ហាញពីភាពអយុត្តិធម៌របស់សហគមន៍ ដែលខំទាមទារដីធ្លី និងការពារធនធានធម្មជាតិទុកជាសម្បត្តិរួម៖ «ការកោះហៅនេះ រូបភាពនៃការគំរាមកំហែង ដើម្បីឲ្យសហគមន៍ដែលគាត់ ខិតខំតវ៉ាហ្នឹងបាក់ស្បាតផងដែរ។ ខ្ញុំសង្កេតឃើញថា រឿងនេះផ្ដើមចេញដីធ្លី មានន័យថា ពលរដ្ឋតតាំងគ្នា ដើម្បីឲ្យអាជ្ញាធរពាក់ព័ន្ធ គាត់បានដាក់លិខិតទៅហើយ តែចំណាត់ការហាក់ដូចយឺតយ៉ាវក្នុងការដោះស្រាយ»។
សហគមន៍ភូមិពូត្រែងបន្ថែមថា អ្នកភូមិរកឃើញឯកសារមួយចំនួន ដែលមានហត្ថលេខាមេភូមិពូត្រែង លោក ប្លង់ សេង និងមេឃុំដាក់ដាំ លោក ចាស់ ណា ដែលបញ្ជាក់ពីទំហំផ្ទៃដីចំនួន ៥០៣ ហិកតារ ទៅឲ្យឈ្មោះ ចឆ ស្វង់ និងឈ្មោះ ឆ្វល ច្រិះ។ ក្រោយពីអាជ្ញាធរមូលដ្ឋានលក់ដីព្រៃសហគមន៍ មានគ្រឿងចក្រមួយគ្រឿងកាយក្រវ៉ាត់ព្រំដី។ លើសពីនេះ រូបភាពនៃការរំលោភដីព្រៃទាំងនេះ អាជ្ញាធរមូលដ្ឋាន បានយក ៦៨នាក់ ជាខែល ដោយអះអាងថា ដីព្រៃដែលពួកគេរំលោភយក ជាប្រភេទដីចម្ការរបស់អ្នកស្រុក ត្រួតស៊ីគ្នាលើដី ព្រៃសហគមន៍ច្បារតាប់ កេះកាប់ចុងលុង(ឈ្មោះជនជាតិព្នង) មានទំហំ ២ពាន់ហិកតារ (២.០០០) ដែលបានស្នើសុំចុះបញ្ជីសមូហភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។