ជនជាតិដើមភាគតិចព្នងជិត ២រយនាក់ រស់នៅខេត្តមណ្ឌលគិរី នៅថ្ងៃទី៨ វិច្ឆិកា បានលើកគ្នាតវ៉ាជាថ្មីទៀត នៅទីស្នាក់ការសហគមន៍ ដើម្បីទាមទារឱ្យប្រធានមន្ទីរអភិវឌ្ឍន៍ជនបទខេត្តនេះ អនុវត្តតាមការសន្យាមុនពេលបោះឆ្នោតថា នឹងចុះបញ្ជីដីសមូហភាពជូនសហគមន៍។
ជនជាតិដើមភាគតិចទាំងនោះ រស់នៅភូមិមេមុំ ឃុំរយ៉ ស្រុកកោះញែក បានស្រែកយំ ស្តាយស្រណោះដីព្រៃស្រោង ដែលជាកេរដំណែលវប្បធម៌ និងជាប្រភពសេដ្ឋកិច្ចរបស់ពួកគាត់ កំពុងប្រឈមការបាត់បង់ជាបន្តបន្ទាប់។
ប្រជាសហគមន៍ទាំងនោះ ខឹងសម្បាចំពោះទង្វើរបស់ប្រធានមន្ទីរអភិវឌ្ឍន៍ជនបទ ខេត្តមណ្ឌលគិរី លោក យុន សារោម ថា ភូតភរពួកគាត់ ដែលទន្ទឹងរង់ចាំ អាជ្ញាធរទទួលស្គាល់ជនជាតិដើមភាគតិចព្នង ជាស្វ័យអត្តសញ្ញាណ ដើម្បីបំពេញលក្ខខណ្ឌបង្កើតសហគមន៍។
តំណាងសហគមន៍ លោកស្រី ឡាយ សៀន ប្រាប់វិទ្យុអាស៊ីសេរី នៅថ្ងៃទី៨ វិច្ឆិកា ថា អាជ្ញាធរភូមិ ឃុំ និងស្រុក បានឯកភាពសំណើរបស់សហគមន៍រួចហើយ ក្នុងការបំពេញលក្ខន្តិកសហគមន៍ ក៏ប៉ុន្តែនៅទើរត្រឹមមន្ទីរអភិវឌ្ឍន៍ជនបទជាង ៣ ឆ្នាំមកហើយ គ្មានដំណោះស្រាយនៅឡើយ។
លោកស្រីព្រមានថា អ្នកភូមិនឹងលើកគ្នាតវ៉ានៅសាលាខេត្តមណ្ឌលគិរី ដើម្បីទាមទារឱ្យរដ្ឋាភិបាល និងក្រសួងសាមី ដកដំណែងប្រធានមន្ទីររូបនេះ ប្រសិនអាជ្ញាធរមិនដោះស្រាយបញ្ហានេះ។
លោកស្រី ឡាយ សៀន៖ «អ៊ីចឹងអត់ធ្វើការឱ្យពលរដ្ឋដដែល ទុកគាត់ធ្វើអីប្តូរគាត់ ហើយទុកអ្នកដែលបម្រើពលរដ្ឋមកវិញ។ អត់ដែរឃើញគាត់ជួយពលរដ្ឋផង ការពារតែក្រុមសហគមន៍របស់យើង»។
ចាប់តាំងពីពាក់កណ្តាលឆ្នាំ ២០២៣ មកទល់ពេលនេះ អ្នកភូមិមេមុំ ជិត ២រយនាក់ បានលើកគ្នាតវ៉ាច្រើនសា ដើម្បីការពារសហគមន៍ដីសមូហភាពមេមុំ ដែលទទួលរងការកាប់រាន ការធ្វើប្លង់រឹងមិនប្រក្រតី និងការកាប់ឈើមានតម្លៃជាដើម។
ប្រជាសហគមន៍បានថតវីដេអូ ផ្ញើសារទៅក្រសួងអភិវឌ្ឍន៍ជនបទ ដើម្បីបង្ហាញពីទុក្ខកង្វល់រួមរបស់ពួកគាត់។
លោកស្រី ឡាយ សៀន៖ «យាយគាត់និយាយមិញ គាត់ថា គាត់សក់ស្កូវអស់ហើយ ហេតុអីក៏កុហកគាត់។ គាត់និយាយហើយគាត់យំទៀត ហេតុអីក៏កុហកគាត់។ សូមសម្តេច យកចិត្តទុកដាក់ យើងទាំងអស់គ្នា។ យើងខំតស៊ូដើម្បីកូនចៅជំនាន់ក្រោយ។ យើងទុកចិត្តឱ្យក្រសួង សូមក្រសួងផ្តល់ទំនុកចិត្តឱ្យពួកយើងផង»។
វិទ្យុអាស៊ីសេរី មិនអាចសុំការបំភ្លឺរឿងនេះ ពីប្រធានមន្ទីរអភិវឌ្ឍជនបទខេត្តមណ្ឌលគិរី លោក យន់ សោរោម បាននៅឡើយទេ នៅថ្ងៃទី៨ វិច្ឆិកា ដោយទូរសព្ទហៅចូលច្រើនដង តែគ្មានអ្នកលើក។
ចំណែកអភិបាលខេត្តមណ្ឌលគិរី លោក ថង សាវុន ក៏មិនអាចទាក់ទងបានដែរ នៅថ្ងៃដដែលនេះ។
ក៏ប៉ុន្តែប្រជាសហគមន៍បន្ថែមថា លោក យន់ សារោម តែងតែគេចវេះ ដោយលើកហេតុផលមិនសមទំនង ពេលសហគមន៍សួរនាំ និងដាក់ឯកសារច្បាប់ជូនមន្ត្រីជំនាញ។
បន្ថែមពីនេះទៀត ប្រធានមន្ទីររូបនេះ បានចេញប្លង់កម្មសិទ្ធិ ឬប្លង់រឹង ក្នុងព្រៃសហគមន៍ជាង ១ពាន់ហិកតារ និងដីព្រៃជាច្រើនតំបន់ទៀត ក៏ប៉ុន្តែបែរជាតឹងតែង ជាមួយសហគមន៍មិនឱ្យចុះបញ្ជីដីសមូហភាពទៅវិញ។
ជុំវិញរឿងនេះ មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) លោក ប៊ី វ៉ាន់នី ស្នើឱ្យក្រសួងដែនដី ពិនិត្យពីប្រសិទ្ធភាពការងារ ប្រធានមន្ទីរអភិវឌ្ឍន៍ជនបទរូបនេះឡើងវិញ ដែលខ្វះភាពស្មោះត្រង់ បម្រើពលរដ្ឋ និងដោះស្រាយបញ្ហាប្រឈមជូនពលរដ្ឋ។
លោក ប៊ី វ៉ាន់នី៖ «មន្ត្រីគួរមានការបម្រើពលរដ្ឋឱ្យបានល្អ គោរពសិទ្ធិពលរដ្ឋ ដោះស្រាយពលរដ្ឋឱ្យល្អប្រសើរ មិនត្រូវធ្វើឱ្យរាំងស្ទះដល់ដំណើរការ និងការបម្រើពលរដ្ឋតាមរបបលទ្ធិប្រជាធិបតេយ្យសេរីពហុបក្សនោះទេ។ ត្រូវតែបម្រើពលរដ្ឋដោយស្មោះត្រង់ ជាមួយពលរដ្ឋ និងរដ្ឋាភិបាល»។
កាលពីខែកក្កដា កន្លងទៅ អ្នកភូមិជាង ២០០ នាក់ បានលើកគ្នាតវ៉ាករណីអាជ្ញាធរ បានប្រកាស ផ្តល់ប្លង់កម្មសិទ្ធិ ឬប្លង់រឹង ប៉ះចំព្រៃសហគមន៍ទំហំជាង ១ពាន់ហិកតារ (១.០២២) ក្នុងតំបន់ព្រៃស្រោង និងពាក់កណ្តាលស្រោង ដែលអ្នកភូមិបានដាក់ពាក្យស្នើសុំចុះបញ្ជី។
អ្នកភូមិថា ដីព្រៃស្រោងជាង ១ពាន់ហិកតារ ដែលអាជ្ញាធរចេញប្លង់រឹង ឱ្យក្រុមឈ្មួញ គឺជាកន្លែង ដីកប់សព ព្រៃអារក្ស ដីព្រៃបម្រុងទុក និងដីអាស្រ័យផលរបស់ពួកគាត់ លើផ្ទៃដីសហគមន៍សរុប ជាង ៧ ពាន់ហិកតារ (៧.០០០)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។