ពលរដ្ឋជាង ២០០នាក់ នៅថ្ងៃទី១៩ ធ្នូ លើកគ្នា តវ៉ាទាមទារឱ្យម្ចាស់គម្រោងលក់ដីឡូត៍មួយកន្លែង ឋិតក្នុងស្រុកឧដុង្គ ខេត្តកំពង់ស្ពឺ អនុវត្តកិច្ចសន្យាទិញ/លក់អចលនទ្រព្យ ដែលពួកគាត់ភាគច្រើន បានបង់លុយរួចហើយ តែមិនទាន់ទទួលបានប្លង់កម្មសិទ្ធិនៅឡើយទេ។
ពលរដ្ឋដែលលើកគ្នាតវ៉ាទាំងនោះ រស់នៅរាជធានីភ្នំពេញ កំពង់ស្ពឺ ខេត្តពោធិ៍សាត់ និងខេត្តមួយចំនួនទៀតបានធ្វើដំណើរដល់ការិយាល័យដីឡូត៍មួយកន្លែង ឈ្មោះ បាត់ដឹងចម្រើនទ្រព្យ ឋិតក្នុងភូមិត្រពាំងប្រិយ៍ ឃុំក្សេមក្សាន្ត ស្រុកឧដុង្គ បំណងទាមទារឱ្យម្ចាស់គម្រោងនេះទទួលខុសត្រូវតាមកិច្ចសន្យាទិញលក់ដី។
ជនជាតិដើមភាគតិចព័ររស់នៅស្រុកក្រវាញ ខេត្តពោធិ៍សាត់ គឺ លោកស្រី សៀន សុខនី ប្រាប់វិទ្យុអាស៊ីសេរីថា គ្រួសារលោកស្រី បានទិញដីឡូត៍ ២ប្លង់ ទំហំសរុប ក្បាល ១០ម៉ែត្រ បណ្ដោយ ២០ម៉ែត្រ មានតម្លៃ ជិត ១ម៉ឺន ៥ពាន់ដុល្លារ (១៤.៧៩៨) កាលពីឆ្នាំ២០២០ ក៏ប៉ុន្តែមកទល់ពេលនេះ ម្ចាស់គម្រោងបែរមិនទាន់ផ្ទេរកម្មសិទ្ធិ និងប្រគល់ដីឱ្យលោកស្រីកាន់កាប់នៅឡើយទេ។
លោកស្រីថា ម្ចាស់គម្រោង លោក ហួ ហួត បានរុញដាក់គ្នាទៅវិញទៅមក មិនទទួលខុសត្រូវរឿងនេះ៖ « អត់សប្បាយចិត្តទេពេលយើងទិញដីហើយ នៅពេលមានបញ្ហាធ្វើឱ្យយើងខាតពេលវេលា រកស៊ីធ្វើការ មកចំណាយពេលដោះស្រាយបញ្ហា។ ដោះម្ដងជាពីរដង មិនដឹងទៅមុខទៅក្រោយ យើងនៅមានអារម្មណ៍មួយ អត់សប្បាយចិត្តហ្មង និយាយទៅ។
ពលរដ្ឋរាប់រយគ្រួសារ ដែលទិញដីឡូត៍គម្រោងមួយនេះ មានតម្លៃចន្លោះ ជិត ១ម៉ឺនដុល្លារ រហូត ដល់ជាង ១ម៉ឺនដុល្លារ (១០.០០០) ក្នុងមួយឡូត៍ ទៅតាមទំហំដី និងទីតាំង ហើយមកទល់ពេលនេះ ពួកគាត់កំពុងភិតភ័យ ព្រោះម្ចាស់គម្រោងមិនទាន់ស្ថាបនា ផ្លូវ បណ្ដាញអគ្គិសនី ទឹក និងប្រព័ន្ធលូរួចរាល់ ដូចការសន្យានៅឡើយទេ។
លោកស្រី សៀន សុខនី បន្ថែមថា គ្រួសារលោកស្រីសន្សំប្រាក់ជាច្រើនឆ្នាំ ទម្រាំសម្រេចចិត្ត ទិញដីឡូត៍មួយកន្លែងនេះ ដោយត្រូវចាយវាយត្បិតត្បៀត និងកាត់បន្ថយចំណាយ ក្នុងគ្រួសារ។ លោកស្រី សៀន សុខនី៖ «យើងប្រឹងសន្សំមក លុយមិនមែនងាយរកទេ ទម្រាំបាន ១០០ ២០០ រហូតដល់ម៉ឺនដុល្លារ មានអារម្មណ៍ថា ខ្លួនឯងខាតបង់។
វិទ្យុអាស៊ីសេរីមិនទាន់អាច ទាក់ទងសុំការអធិប្បាយរឿងនេះ ពីអភិបាលខេត្តកំពង់ស្ពឺ លោក វ៉ី សំណាង បាននៅឡើយទេ នៅថ្ងៃទី១៩ ធ្នូ ដោយទូរស័ព្ទហៅចូល តែគ្មានអ្នកលើក។
រីឯម្ចាស់គម្រោងដីឡូត៍ លោក ហួ ហួត ក៏មិនទាន់អាច សុំការបំភ្លឺបានដែរ នៅថ្ងៃដដែលនេះ។
ក៏ប៉ុន្តែ លោក ហួ ហួត បានថ្លែងប្រាប់ក្រុមពលរដ្ឋ ក្នុងពេលតវ៉ាថា លោកកំពុងព្យាយាមដោះស្រាយរឿងនេះ ហើយលោកសំណូមពរឱ្យពលរដ្ឋអត់ធ្មត់បន្តិច។ លោកថា ដើម្បីដោះស្រាយរឿងនេះ លោកត្រូវលោះប្លង់ពីធនាគារជាមុនសិន រួចនឹងបំបែកក្បាលដីតាមក្រោយ ដោយត្រូវប្រើពេលយូរបន្តិច។
ជុំវិញរឿងនេះ អ្នកសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត យល់ថា ការទាមទាររបស់ពលរដ្ឋ ពាក់ព័ន្ធនឹងករណីមិនអនុវត្តកាតព្វកិច្ច តាមកិច្ចសន្យា ពលរដ្ឋអាចដាក់ពាក្យបណ្ដឹងទៅតុលាការបាន ដើម្បីឱ្យតុលាការជំរុញឱ្យម្ចាស់គម្រោង ទទួលខុសត្រូវ។
លោក វណ្ណ សុផាត៖ «មើលតាមធាតុផ្សំ មិនមែនជាការឆបោក និងរំលោភសេចក្ដីទុកចិត្តទេ អាហ្នឹងជាការមិនអនុវត្តកាតព្វកិច្ច តាមកិច្ចសន្យា តែពលរដ្ឋអាចដាក់ពាក្យបណ្ដឹង ទៅតុលាការ រដ្ឋប្បវេណីបាន ដើម្បីឱ្យតុលាការពិនិត្យមើលនីតិវិធី ការអនុវត្តកាតព្វកិច្ចកិច្ចសន្យា។
មន្ត្រីសង្គមស៊ីវិលរូបនេះ សង្កេតឃើញថា ករណីម្ចាស់គម្រោងលក់ដីឡូត៍ និងផ្ទះល្វែង ដែលអតិថិជន បានបង់ប្រាក់រួចរាល់ហើយ ក៏ប៉ុន្តែមិនទទួលទទួលបានដី និងផ្ទះ កំពុងកើតមានច្រើន នៅរាជធានីភ្នំ និង ខេត្តមួយចំនួនដូចជាខេត្តសៀមរាប។
កន្លងទៅ សមត្ថកិច្ចខេត្តកំពតបានចាប់ខ្លួនឧកញ៉ា ជា សារ៉ន ប្រធានក្រុមហ៊ុនជា សារ៉ន និងបក្ខពួកមួយចំនួនទៀត ករណីឱ្យប្រជាពលរដ្ឋខ្ចីលុយពីធនាគារ ទិញដីរបស់ខ្លួន ដើម្បីទទួលបានការប្រាក់ ឬប្រាក់ចំណេញ ក៏ប៉ុន្តែក្រោយមក ក្រុមហ៊ុនមិនបានប្រគល់ប្រាក់ឱ្យពលរដ្ឋទៀងទាត់នោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។