ជនជាតិដើមភាគតិចព្នងជាង២រយគ្រួសារ រស់នៅស្រុកកោះញែក ខេត្តមណ្ឌលគិរី កំពុងកើតទុក្ខមិនខុសចិត្ត ករណីអ្នកមានឥទ្ធិពល បានយកពលរដ្ឋជាខែល ឃុបឃិតគ្នាជាមួយអាជ្ញាធរជំនាញធ្វើប្លង់រឹងដោយស្ងាត់ៗ ប៉ះចំដីព្រៃសហគមន៍ទំហំ ១២ហិកតារ ដែលអ្នកភូមិអាស្រ័យផលចិញ្ចឹមជីវិត។ ប៉ុន្តែអាជ្ញាធរស្រុកបដិសេធចំពោះការលើកឡើងបែបនេះរបស់ក្រុមពលរដ្ឋ។
ជនជាតិដើមភាគតិចព្នងជាង២រយគ្រួសារ រស់នៅភូមិអញ្ជ័រ ឃុំសុខសាន្ត ស្រុកកោះញែក ប្រកាសជំហរថា ពួកគេនឹងប្តូរជីវិតការពារដីព្រៃសហគមន៍ភូមិអញ្ជ័រឱ្យគង់វង្ស ដើម្បីរក្សាបាននូវទីកន្លែងអាស្រ័យផលបែបប្រពៃណីវប្បធម៌ជនជាតិដើមភាគតិច។ ពលរដ្ឋអះអាងថា មានឧកញ៉ាម្នាក់ ដែលពួកគេមិនស្គាល់ឈ្មោះ បានយកពលរដ្ឋមូលដ្ឋានជាខែល ធ្វើប្លង់រឹង ឬប្លង់កម្មសិទ្ធិដីធ្លី រំលោភដីព្រៃសហគមន៍ទំហំ ១២ហិកតារ។
តំណាងសហគមន៍ការពារព្រៃឈើភូមិអញ្ជ័រ លោក រោជ ចក់ ឱ្យដឹងនៅថ្ងៃទី២ ធ្នូថា ព្រៃសហគមន៍នេះ ជាអាយុជីវិតអ្នកភូមិ ដែលពួកគេអាស្រ័យផលតាំងពីដើមមក និងបានដាក់ពាក្យស្នើសុំចុះបញ្ជី ប្រើប្រាស់សមូហភាពនៅឆ្នាំ ២០២០នេះ ក៏ប៉ុន្តែលោកថា ព្រៃអភិរក្សមួយនេះ កំពុងប្រឈមការរំលោភបំពាន ដោយអ្នកមានអំណាច។ លោកថា អ្នកភូមិនឹងមិននៅស្ងៀមឡើយ ដរាបណាអាជ្ញាធរមិនស៊ើបអង្កេត ពីភាពមិនប្រក្រតី ពាក់ព័ន្ធការចេញប្លង់កម្មសិទ្ធិ ឬប្លង់រឹង មិនត្រឹមត្រូវ ក្នុងដីព្រៃសហគមន៍៖ «មេឃុំគាត់ថា ៨ប្លង់ ប៉ុន្តែតាមមើលទៅ ១២ហិកតារដីហ្នឹង។ ពលរដ្ឋទាមទារឱ្យដោះស្រាយប្រគល់ដីហ្នឹង ឱ្យពលរដ្ឋវិញ ពលរដ្ឋហ្នឹងគឺអាស្រ័យផល លើដីហ្នឹងតែម្ដង»។
កាលពីថ្ងៃទី២៨ វិច្ឆិកា ជនជាតិដើមភាគតិចប្រមាណ ១រយនាក់ (១០០) បានលើកគ្នាទៅឃាត់គ្រឿងចក្រពីរគ្រឿងដែល កំពុងឈូសឆាយដីព្រៃសហគមន៍អស់ ២ហិកតារ ក្នុងចំណោមដី១២ ហិកតារ។ អ្នកភូមិឱ្យដឹងថា ក្នុងពេលហាមឃាត់នោះ ភាគីម្ខាងទៀតបានអះអាងថា ពួកគេមានប្លង់កម្មសិទ្ធិ ៨ប្លង់ ដោយប្លង់ខ្លះចុះហត្ថលេខាដោយអាជ្ញាធរស្រុក និងមន្ត្រីជំនាញ និងមានប្លង់ខ្លះទៀត ចុះហត្ថលេខាដោយប្រធានមន្ទីរសុរិយោដីខេត្តលោក ឈឹម កាន។
ការលើកឡើងនេះ ក្រោយពីឧកញ៉ាម្នាក់ ដែលពួកគេមិនស្គាល់ឈ្មោះ បានយកពលរដ្ឋមូលដ្ឋានជាខែល ធ្វើប្លង់រឹង ឬប្លង់កម្មសិទ្ធិដីធ្លី រំលោភដីព្រៃសហគមន៍ទំហំ ១២ហិកតារ។
ឆ្លើយតបរឿងនេះ មេឃុំសុខសាន្ដលោក ឆាន ជិន ប្រាប់អាស៊ីសេរីថា ភាគីដែលឈូសឆាយដីនោះ មានឈ្មោះ ចក់ និង ធួន ជាពលរដ្ឋនៅមូលដ្ឋាន ដោយពួកគេបានចូលទៅកាន់កាប់លើដីមានជម្លោះនោះ ជាច្រើនឆ្នាំមកហើយ។ លោកថា ដីនៅតំបន់នោះ ពុំមែនជាដីព្រៃនោះទេ តែគឺជាដីកម្មសិទ្ធិរបស់ពលរដ្ឋ ដែលទៅអាស្រ័យផល៖ «ដីហ្នឹងមិនមែនជាដីអភិរក្សទេ ជាដីរបស់គាត់ធ្វើយូរឆ្នាំហើយ តាំងពីជំនាន់ខ្មែរក្រហមជម្លៀសមកគាត់នៅ គាត់ធ្វើនៅអូររំជ័រហ្នឹង គាត់ធ្វើនៅឆ្នាំ ២០០១ ដល់២០០៥ បានល្បីចោរអាករ គាត់ឡើងទៅភូមិអស់ទៅ រហូតដល់ហ្នឹងទៅលែងបានទៅធ្វើវិញអ៊ីចឹង»។
អាស៊ីសេរីនៅមិនទាន់អាចទាក់ទងសុំការបំភ្លឺរឿងនេះពី បុរសឈ្មោះ ចក់ និងឈ្មោះ ធួន បាននៅឡើយទេនៅថ្ងៃទី២ ខែធ្នូ។
រីឯអភិបាលស្រុកកោះញែក លោក ឌឹម នី មានប្រសាសន៍ថា លោកបានបញ្ជូនមន្ត្រីជំនាញចុះទៅស៊ើបអង្កេតរួចហើយ ដោយរកឃើញថា ដីដែលឈូសឆាយ និងមានប្លង់រឹងនោះ មិនឋិតក្នុងបរិវេណដីព្រៃសហគមន៍ ដែលជនជាតិដើមភាគតិចអាស្រ័យផលនោះទេ។ លោកបញ្ជាក់ថា អ្នកកាន់កាប់ដីនៅតំបន់នោះ ជាពលរដ្ឋក្នុងភូមិ ពុំជាប់ពាក់ព័ន្ធនឹងឧកញ៉ាណាម្នាក់ទេ។ លោកបដិសេធមិនបញ្ជាក់លម្អិតថា តើដីដែលមានជម្លោះនោះ មានអ្នកគ្រប់គ្រងប៉ុន្មានម្ចាស់នោះទេ?៖ «ឱ្យស្រាវជ្រាវឯកសារដែលកាន់ប្លង់កម្មសិទ្ធិហ្នឹង ប្លង់ហ្នឹងយើងស្រាវជ្រាវ អ្នកនៅភូមិហ្នឹងទាំងអស់ដែលកាន់កាប់ ហើយដល់អ៊ីចឹងទៅ យើងទៅសិក្សាមើល ដីរបស់គាត់ពិតប្រាកដ ពុំមែនជាដីព្រៃទេ»។
ទាក់ទងបញ្ហានេះ មន្ត្រីសម្របសម្រួលសមាគមអាដហុក (Adhoc) ខេត្តមណ្ឌលគិរី លោក អ៊ាង ម៉េងលី ផ្ដល់មតិថា ពលរដ្ឋមានសិទ្ធិទាមទារដីព្រៃរបស់រដ្ឋ ដែលពួកគាត់អាស្រ័យផលបែបប្រពៃណី ហើយអាជ្ញាធររដ្ឋត្រូវតែដោះស្រាយរឿងនេះឱ្យបានត្រឹមត្រូវ និងយុត្តិធម៌។ លោកថា ការធ្វើប្លង់រឹងប៉ះចំដីសហគមន៍ អាជ្ញាធរគួរតែស៊ើបអង្កេតករណីនេះឱ្យច្បាស់លាស់៖ «ប្រសិនបើករណីធ្វើប្លង់នេះ ប៉ះចំដីព្រៃ និងព្រៃសហគមន៍គួរតែធ្វើការដកហូត ឬក៏ចាត់វិធានការណាមួយ ដើម្បីឱ្យមជ្ឈដ្ឋានទូទៅ យល់ឃើញថា ការធ្វើប្លង់ ឬដំណើរការធ្វើប័ណ្ណកម្មសិទ្ធិហ្នឹងវាស្របទៅហ្នឹង អ្វីដែលគោលនយោបាយរបស់រដ្ឋ ដែលបានចែង»។
មន្ត្រីសង្គមស៊ីវិលរូបនេះបន្ថែមថា អាជ្ញាធរត្រូវតែអនុវត្តច្បាប់ចំពោះមន្ត្រីខិលខូចណា ដែលឃុបឃិតធ្វើប្លង់រឹង មិនប្រក្រតី ប៉ះចំដីសហគមន៍បំពានច្បាប់។ លោកសង្កេតឃើញថា ការធ្វើប្លង់រឹង ឬប្លង់កម្មសិទ្ធិជាន់ចំដីព្រៃសហគមន៍ ព្រៃស្រោង និងព្រៃអភិរក្សរបស់រដ្ឋ នៅតែកើតមានច្រើនក្នុងខេត្តមណ្ឌលគិរី ដែលអាជ្ញាធរពាក់ព័ន្ធ និងតុលាការ នៅមិនទាន់ដោះស្រាយឱ្យសមស្រប ដើម្បីការពារទ្រព្យរបស់រដ្ឋឱ្យមានប្រសិទ្ធភាពនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។