គណបក្សកម្លាំងជាតិ ស្នើឱ្យរដ្ឋាភិបាល និងក្រុមហ៊ុនអូ.ស៊ី.អាយ.ស៊ី(OCIC) របស់លោក ពុង ឃាវសែទូទាត់ប្រាក់សំណងដល់ប្រជាពលរដ្ឋ រងគ្រោះដីធ្លីនៅតំបន់ព្រលានយន្តហោះថ្មី ក្នុងស្រុកកណ្ដាលស្ទឹង ខេត្តកណ្ដាល ឱ្យបានឆាប់។ ប្រជាពលរដ្ឋលើកឡើងថា ចាប់តាំងពីក្រុមហ៊ុនហាមឃាត់ប្រជាពលរដ្ឋមិនឱ្យអាស្រ័យផលលើដីស្រែ ពួកគាត់ប្រឈមនឹងជីវភាពកាន់តែលំបាក ខណៈពលរដ្ឋភាគច្រើននៅតែព្រួយបារម្ភពីការបាត់បង់ដីធ្លី ដោយមិនអាចទទួលបានសំណងសមរម្យ។
គណបក្សកម្លាំងជាតិចាត់ទុកការពន្យារពេលមិនផ្ដល់ប្រាក់សំណងដីធ្លីឱ្យបានសមរម្យដល់ប្រជាពលរដ្ឋ ដែលមានទំនាស់ជាមួយក្រុមហ៊ុនសាងសង់ព្រលានយន្តហោះ នៅស្រុកកណ្ដាលស្ទឹង ខេត្តកណ្ដាល គឺជាការរំលោភសិទ្ធិមនុស្សធ្ងន់ធ្ងរ។
ទីប្រឹក្សាគណបក្សកម្លាំងជាតិ លោក រ៉ុង ឈុន ប្រាប់វិទ្យុអាស៊ីសេរីថា បើទោះបីជាការសាងសង់ព្រលានយន្តហោះថ្មី នឹងអាចលើកកម្ពស់សេដ្ឋកិច្ចជាតិក្ដី តែរដ្ឋាភិបាលគួរតែផ្ដល់សំណងដល់ប្រជាពលរដ្ឋឱ្យបានសមរម្យ និងឆាប់រហ័ស។ លោកបន្តថា ដើម្បីបង្ហាញពីការយកចិត្តទុកដាក់ដល់ជីវភាពប្រជាពលរដ្ឋ រដ្ឋាភិបាល ឬអាជ្ញាធរមានសមត្ថកិច្ចគួរទូទាត់ប្រាក់សំណងដល់ប្រជាពលរដ្ឋមុននឹងចាប់ផ្ដើមអនុវត្តគម្រោងអភិវឌ្ឍន៍។
លោក រ៉ុង ឈុន៖«សុំឱ្យអាជ្ញាធរពាក់ព័ន្ធ ជាពិសេសនាយករដ្ឋមន្ត្រីត្រូវតែយកចិត្តទុកដាក់បញ្ហាសុខទុក្ខរបស់ប្រជាពលរដ្ឋ ជាពិសេសត្រូវផ្ដល់ដំណោះស្រាយជូនប្រជាពលរដ្ឋឱ្យបានឆាប់ ជៀសវាងទុកអូសបន្លាយពេលវេលា ធ្វើឱ្យពួកគាត់ខាតបង់ ហើយដីធ្លីគាត់មិនបានអាស្រ័យផល។អ៊ីចឹងធ្វើឱ្យប៉ះពាល់ទៅដល់ជីវភាពរបស់គាត់»។
លោក រ៉ុង ឈុន លើកឡើងដូច្នេះនៅពេលគណៈប្រតិភូគណបក្សកម្លាំងជាតិជិត១០នាក់ ចុះទៅទទួលញត្តិរបស់ប្រជាពលរដ្ឋរងគ្រោះដីធ្លីពីការសាងសង់ព្រលានយន្តហោះអន្តរជាតិថ្មី ប្រមាណ១០០នាក់ មកពីឃុំចំនួន៣ រួមមានឃុំអំពៅព្រៃ ឃុំព្រែកស្លែង និងឃុំបឹងខ្យាង ក្នុងស្រុកកណ្ដាលស្ទឹង ខេត្តកណ្ដាល នៅថ្ងៃទី២៣ ខែមិថុនា។
ក្រុមហ៊ុនសាជីវកម្មវិនិយោគក្រៅប្រទេសកម្ពុជា ហៅកាត់ អូ.ស៊ី.អាយ.ស៊ី(OCIC) របស់ លោក ពុង ឃាវសែ ជាអ្នកជំនួញស្និទ្ធនឹងអតីតនាយករដ្ឋមន្ត្រី ហ៊ុន សែន ទទួលបានសិទ្ធិសាងសង់ព្រលានយន្តហោះខ្នាតអន្តរជាតិមួយនេះ។ ទោះជាយ៉ាងណា គម្រោងអភិវឌ្ឍន៍ខ្នាតយក្សនេះ បានបង្កប់នូវទឹកភ្នែករបស់កសិករជាច្រើនគ្រួសារ ដោយសារការកាត់ដី តាមអនុក្រឹត្យថ្ងៃទី៣ ខែមិថុនា ឆ្នាំ២០២០ របស់រដ្ឋាភិបាល ទំហំប្រមាណបីពាន់ហិកតារនោះ (២.៦០០)នោះ ជាន់លើដីស្រែរបស់ពលរដ្ឋ។
វិទ្យុអាស៊ីសេរីនៅពុំទាន់អាចទាក់ទងអភិបាលខេត្តកណ្ដាល លោក គង់ សោភ័ណ្ឌ និងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា ដើម្បីសុំការអត្ថាធិប្បាយជុំវិញបញ្ហានេះបាននៅឡើយទេ នៅថ្ងៃទី ២៣ មិថុនា។
ពលរដ្ឋរងគ្រោះដីធ្លី លោក កែម ព្រឿង ដែលមានអាយុជិត៨០ឆ្នាំ (៧៧) រស់នៅភូមិតាថុក ឃុំព្រែកស្លែង ស្រុកកណ្តាលស្ទឹង ប្រាប់វិទ្យុអាស៊ីសេរីថា មូលហេតុដែលប្រជាពលរដ្ឋដាក់ញត្តិឱ្យគណបក្សកម្លាំងជាតិ ជួយរកដំណោះស្រាយ ព្រោះកន្លងមកប្រជាពលរដ្ឋបានស្វែងរកដំណោះស្រាយពីអាជ្ញាធរ និងក្រសួងពាក់ព័ន្ធផ្សេងៗ តែមិនទទួលបានអន្តរាគមន៍នោះឡើយ។ លោកបន្តថា ប្រជាពលរដ្ឋមិនប្រឆាំងនឹងគម្រោងអភិវឌ្ឍន៍របស់រដ្ឋាភិបាលនោះទេ ហើយការតវ៉ារបស់ប្រជាពលរដ្ឋ គឺដើម្បីទទួលបានប្រាក់សំណងសមរម្យ ដើម្បីដោះស្រាយបំណុល និងទិញដីស្រែបង្កបង្កើនផលឡើងវិញតែប៉ុណ្ណោះ។
លោកកែមព្រឿង៖ «ដូចថាយើងឡើងទៅតវ៉ាអ៊ីចឹងមានអាជ្ញាធរ ដូចថាប៉ូលិសអីណ្ណឹងតាមដានយើង ឃាត់ឃាំងមកនេះអីអ៊ីចឹង អត់ដែលជួយប្រជាជនទេ មានតែជួយខាងក្រុមហ៊ុនឯណោះទេ វាយដំអីអ៊ីចឹង ឈូសឆាយខ្ទេចខ្ទីស្រូវគ្នាអ៊ីចឹង យើងទៅតវ៉ាគេប្រើកម្លាំងបាយមក ដេញវាយដេញចាប់យកដាក់គុកដាក់ច្រវាក់អីអ៊ីចឹងទៅ»។
ប្រជាពលរដ្ឋដែលមិនព្រមទទួលយកប្រាក់សំណងអះអាងថា ពួកគាត់មិនអាចទទួលយកប្រាក់សំណងដែលផ្ដល់តម្លៃដី ១ម៉ែត្រការ៉េ ត្រឹមតែ៨ដុល្លារនោះឡើយ ខណៈតម្លៃដីនៅលើទីផ្សារមុនក្រុមហ៊ុនចូលអភិវឌ្ឍមានតម្លៃប្រមាណ៨០ដុល្លារ ក្នុងមួយម៉ែត្រការ៉េ។ តំណាងប្រជាពលរដ្ឋស្នើឱ្យរដ្ឋាភិបាលគួរតែអន្តរាគមន៍ ផ្ដល់ប្រាក់សំណងដល់ប្រជាពលរដ្ឋយ៉ាងតិចបំផុតត្រឹមតម្លៃ៥០ភាគរយ នៃតម្លៃទីផ្សារ ឬស្មើ នឹង ៤០ដុល្លារអាមេរិកក្នុងមួយម៉ែត្រការ៉េ ទើបក្រុមប្រជាពលរដ្ឋទទួលយកប្រាក់សំណង និងបញ្ឈប់ការតវ៉ា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។