ជនជាតិ​ដើម​ភាគតិច​ខេត្ត​មណ្ឌលគិរី​ចោទ​អ្នក​មាន​អំណាច​ម្នាក់​ថា រំលោភ​យក​ដី​សហគមន៍​៥៣ ហិកតារ

0:00 / 0:00

ជនជាតិ​ដើម​ភាគតិច​ព្នង​ជាច្រើន​នាក់​រស់នៅ​ខេត្ត​មណ្ឌលគិរី​ចោទ​អ្នក​មាន​អំណាច​ម្នាក់​ថា ឈូស​ឆាយ​រំលោភ​យក​ដី​ព្រៃ​សហគមន៍​ភូមិ​ពូ​ត្រែង។ ពួកគាត់​ថា ការរំលោភ​យក​ដី​ព្រៃ​ទ្រង់ទ្រាយ​ធំ​នេះ ប៉ះពាល់​ដល់​ព្រៃ​តំណម ជម្រក​សត្វព្រៃ ព្រៃ​ជំនឿ និង បំផ្លាញ​ទីកន្លែង​អាស្រ័យ​ផល​ព្រៃឈើ​របស់​ពលរដ្ឋ​ជាង ២​រយ​គ្រួសារ។

ជនជាតិ​ដើម​ភាគតិច​ព្នង​ជាង ២​រយ​គ្រួសារ រស់នៅ​ភូមិ​ពូ​ត្រែង ឃុំ​ដាក់​ដាំ ស្រុក​អូររាំង កំពុង​ស្វែងរក​ការជួយជ្រោមជ្រែង ពី​អាជ្ញាធរ​មូលដ្ឋាន និង​មន្ត្រី​សង្គម​ស៊ីវិល​ដើម្បី​ឱ្យ​ស្ថាប័ន​ទាំងនេះ ទប់ស្កាត់ និង​ការពារ​ដីព្រៃ​សហគមន៍​ភូមិ​ពូ​ត្រែង ដែល​កំពុង​ទទួលរង​ការ​ឈូស​ឆាយ និង​រំលោភបំពាន​ខុសច្បាប់​ទ្រង់ទ្រាយ​ធំ ពី​សំណាក់​បុគ្គល​មាន​លុយ មានអំណាច។

តំណាង​ជនជាតិ​ដើម​ភាគតិច​លោកស្រី តេះ ស្រីនិច ថ្លែង​ថា អ្នក​មាន​អំណាច​ម្នាក់​ឈ្មោះ ទូច ហឿន បាន​បញ្ជា​ឱ្យ​គ្រឿង​ច្រក​ឈូស​ឆាយ​រំលោភ​ដី​ព្រៃ​សហគមន៍​នេះ នៅ​ចំណុច​តូតាំងព្លាង និង​ភ្នំ​សែពែ។ លោកស្រី​ចាត់ទុក​ការ​ឈូស​ឆាយ​នេះ ជា​ការ​ប្រមាថ​អត្តសញ្ញាណ និង​ប្រពៃណី​វប្បធម៌​របស់​ជនជាតិ​ដើម​ភាគតិច​ព្នង​ធ្ងន់ធ្ងរ​។ លោកស្រី​ថា អ្នកភូមិ​បាន​ប្តឹង​ស្វែងរក​កិច្ច​អន្តរាគមន៍ ពី​អាជ្ញាធរ​ឃុំ​/ និង​សមត្ថកិច្ច តែ​គ្មាន​ដំណោះស្រាយ ៖ «ខ្ញុំ​ហើយ​នឹង​សហគមន៍​ដាច់ខាត​អត់​លក់​អត់​ដូរ​ទេ ព្រោះ​អី សាធារណៈ​របស់​រដ្ឋ​យើង​អាច​ប្រើប្រាស់​រួម​បាន យើង​អាច​ឃ្វាលគោ​ក្របី​បាន ហើយ​ការ​បាត់បង់​ហ្នឹង​ដូចជា ដើមឈើ និង​ចម្ការ​របស់​ពួកគាត់ និង​សម្រស់​ធម្មជាតិ ដែល​ធ្លាប់​ស្អាត វា​អត់​មាន»។

កាល​ពី​ថ្ងៃ​ទី​២៥ មីនា ជនជាតិ​ដើម​ភាគតិច​ព្នង​ជាង ៤០​នាក់ បាន​លើកគ្នា​ឃាត់​អេស្កាវើទ័រ​មួយ​គ្រឿង​ដែល​កំពុង​ឈូស​ឆាយ​ហ៊ុមព័ទ្ធ​ដី​ព្រៃ​សហគមន៍​ភូមិ​ពូ​ត្រែង​ទំហំ ៥៣​ហិកតារ ធ្វើ​ជា​សម្បត្តិ​បុគ្គល​។ អ្នកភូមិ​ថា ព្រៃឈើ​ដែល​ត្រូវ​គេ​ឈូស​កម្ទេច​ចោល​នោះ​ដើម្បី​កាយ​ក្រវាត់​ព្រំ​ដី​នោះ មាន​ទំហំ ទទឹង ១០​ម៉ែត្រ និង​បណ្តោយ​ជាង ៣​រយ​ម៉ែត្រ។

សមាជិក​សហគមន៍​ភូមិ​ពូត្រែង លោក ពីន ព្លេស ប្រាប់​អាស៊ីសេរី​ថា ព្រៃ​សហគមន៍​ដែល​ឈ្មួញ​រំលោភ​យក​នោះ ជា​កន្លែង​ដែល​អ្នកភូមិ​រក​អនុផល​ព្រៃឈើ ឃ្វាលគោ​ក្របី សែនព្រេន និង​ព្រៃ​ជំនឿ​។ ហេតុនេះ លោក​ថា ពួកគេ​សុខចិត្ត​ស្លាប់​ទាមទារ​ដី​ទាំងនោះ​ជា​សម្បត្តិ​សមូហភាព​វិញ៖ «និយាយ​ទៅ​វា​ស្តាយ​ដែរ ខ្លោចចិត្ត​ណាមួយ​កន្លែង​ហ្នឹង ដូច​ថា វា​ដឹង​ស្រាប់​ហើយ​ថា ដី​នៅ​ខាង​មណ្ឌលគិរី​វា​ស្អាត​ខ្លាំង ដល់ពេល​ឈូស​ឆាយ​គឺ​វា​មើលទៅ វា​លែង​ឃើញ​ជា​ធម្មជាតិ​ដូច​មុន​អ៊ីចឹង»។

អាស៊ីសេរី​មិន​ទាន់​អាច​ទាក់ទង​សុំ​ការ​បំភ្លឺ​រឿង​នេះ ពី​លោក ទូច ហឿន ដែល​ត្រូវ​បាន​ប្រជាពលរដ្ឋ​ចោទប្រកាន់​នោះ បាន​នៅ​ឡើយ​ទេ នៅ​ថ្ងៃទី​២៦ មីនា ព្រោះ​ទូរស័ព្ទ​លោក​មិន​អាច​ទាក់ទង​បាន​។ អាស៊ីសេរី​ក៏​មិន​អាច​ទាក់ទង​អាជ្ញាធរ​ខេត្ត​មណ្ឌលគិរី ពី​ថ្នាក់​មូលដ្ឋាន ដល់​ថ្នាក់​ខេត្ត ដើម្បី​សាកសួរ​រឿង​នេះ​បាន​ដែរ នៅ​ថ្ងៃ​ដដែល​នេះ។

ព្រៃ​សហគមន៍​ភូមិ​ត្រែង មាន​ទំហំ ២​ពាន់​ហិកតារ (២០០០) ត្រូវ​បាន​ចុះបញ្ជី​ទទួលស្គាល់​ដោយ​ក្រសួង​កសិកម្ម តាំងពី​ឆ្នាំ​២០០៨​។ ព្រៃ​សហគមន៍​នេះ ជា​ជម្រក​សត្វព្រៃ មាន​ចម្ការ​វិលជុំ កន្លែង​ឃ្វាលគោ​ក្របី និង​ព្រៃ​តំណម​ដែល​ជនជាតិ​ដើម​ភាគតិច​ធ្វើ​ពិធី​សែន​ព្រេន។

ជុំវិញ​រឿង​នេះ មន្ត្រី​ពង្រឹង​សិទ្ធិអំណាច​សហគមន៍​មូលដ្ឋាន​នៃ​សមាគម​អាដហុក (ADHOC) លោក ប៉ែន ប៊ុណ្ណា​រ៍ ចាត់ទុក​ការ​ឈូស​ឆាយ​ព្រៃ​ទ្រង់ទ្រាយ​ធំ​នេះ ជា​បទល្មើស​ឧក្រិដ្ឋ ដែល​ទាមទារ​ឱ្យ​អាជ្ញា​ធរមាន​សមត្ថកិច្ច​ត្រូវ​ស៊ើបអង្កេត​រឿង​នេះ​ឱ្យ​ច្បាស់លាស់​។ លោក​ថា អាជ្ញាធរ​ដែល​បណ្តែតបណ្តោយ​ឱ្យ​ឈ្មួញ​ឈូស​ឆាយ​ព្រៃ​ខុសច្បាប់ ក៏​ត្រូវ​មានទោស​ដែរ៖ «ចុះ​បើសិនជា​ស្រាវជ្រាវ​ទៅ​រក​ឃើញថា មាន​ទទួល​សំណូក​ពី​ឈ្មួញ ពី​អ្នក​មាន​អំណាច ដែល​ទៅ​ឈូស​ព័ទ្ធ​ដី​ព្រៃ វា​ថែម​ទោស​ហ្នឹង ពី ៧ ឆ្នាំទៅ ១៥ ឆ្នាំ​ថែមទៀត​។ ទោស​នៃ​ការ​មិន​ចាត់​ការ​តាមផ្លូវ​ច្បាប់ ទៅលើ​បទឧក្រិដ្ឋ​ហ្នឹង​គឺ គឺ​វា​មិន​មែនមាន​ត្រឹមតែ​ទោស មិន​ប្តឹង​បរិហារ បូក​ជាមួយ ទោស​ពុករលួយ​ទៀត»។

កាល​ពី​ចុង​ឆ្នាំ ២០១៩ ជនជាតិ​ដើម​ភាគតិច​ព្នង​ជាង ១​រយ​គ្រួ​សារបាន​ផ្ដិតមេដៃ​ប្ដឹង​មេភូមិ​ពូ​ត្រែង លោក ប្លង់ សេង និង​មេឃុំ​ដាក់​ដាំ លោក ចាស់ ណា ពាក់ព័ន្ធ​ករណី ឃុបឃិត​លក់​ដី​ព្រៃ​សហគមន៍​ជាង ៥​រយ​ហិកតារ (៥០៣) ឱ្យ​ឈ្មួញ​ខុសច្បាប់​។ តែ​មក​ទល់​ពេល​នេះ​សំណុំ​រឿង​នេះ​ហាក់​ស្ងាត់ជ្រងំ​មិន​ទាន់​ឃើញ អាជ្ញាធរ​ពាក់ព័ន្ធ​ដោះស្រាយ​នៅឡើយ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។