សាលាឧទ្ធរណ៍ប្រចាំតំបន់តាំងនៅខេត្តព្រះសីហនុ នៅរសៀលថ្ងៃទី២៦ តុលា បើកសវនាការបណ្ដឹងជំទាស់របស់សហគមន៍ដីធ្លីខេត្តកោះកុងចំនួន៩នាក់ ដែលបានប្ដឹងជំទាស់ទៅនឹងសាលក្រមរបស់សាលាដំបូងខេត្តកោះកុង កាលពីខែសីហា កន្លងទៅ ដែលបានសម្រេចឲ្យតំណាងសហគមន៍ម្នាក់ៗជាប់ពន្ធនាគារចំនួន ១ឆ្នាំ និងពិន័យជាប្រាក់សរុបចូលគ្នាចំនួន ៤០លានរៀល ឬប្រមាណ១ម៉ឺនដុល្លារអាមេរិក ពីបទបរិហារកេរ្តិ៍ និងញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គម ដែលប្រព្រឹត្តនៅខេត្តកោះកុង ពាក់ព័ន្ធទៅនឹងសកម្មភាពរបស់ពួកគាត់តវ៉ាទាមទារដីធ្លីរបស់ខ្លួន។
សវនាការនៅថ្ងៃនេះ តំណាងសហគមន៍៩ នាក់ ដែលត្រូវបានសាលាឧទ្ធរណ៍ព្រះសីហនុកោះហៅឲ្យចូលរួមសវនាការ រួមមានលោកស្រី ដេត ហួរ លោកស្រីកើត នៅ លោកសុខ ជ័យ និងតំណាងសហគមន៍៥នាក់ផ្សេងទៀត ដើម្បីសួរដេញដោល។ ចំណែកតំណាងសហគមន៍ម្នាក់ទៀតគឺលោកគង់ ម៉ែន បានទទួលអនិច្ចកម្មទៅហើយ។
រីឯនៅខាងមុខសាលាឧទ្ធរណ៍ព្រះសីហនុ មានសហគមន៍ជាច្រើននាក់ បានមកតាមឃ្លាំមើលសវនាការ ដោយពួកគាត់បានកាន់បដា ទទូចឲ្យរដ្ឋមន្ត្រីក្រសួងមហាផ្ទៃលោក ស សុខា ជំរុញដល់សាលាឧទ្ធរណ៍ព្រះសីហនុទម្លាក់ការចោទប្រកាន់តំណាងសហគមន៍ដីធ្លីទាំងអស់នោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។