ជនជាតិ​ដើម​ភាគ​តិច​​​នៅ​ព្រះវិហារ​រង​ការ​គំរាម​ពី​តំណាង​ក្រុមហ៊ុន​ប្ដឹង​ទៅ​តុលាការ បើ​ពុំ​ចែក​ផល​ស្រូវ​ពាក់​កណ្ដាល​ឱ្យ​ទៅ​ក្រុមហ៊ុន

0:00 / 0:00

ស្រប​ពេល​ដែល​ជនជាតិ​ដើម​ភាគ​តិច​កួយ នៅ​ឃុំ​ម្លូព្រៃ​ពីរ ស្រុក​ឆែប ខេត្ត​ព្រះវិហារ​​ជិត​ប្រមូល​ផល​ស្រូវ​ ស្រាប់​តែ​មាន​​តំណាង​ក្រុម​ហ៊ុន​ចិន​ម្នាក់​ឈ្មោះ ឈាង គង់នូវ ហៅ ម៉ៅ បាន​ឃុបឃិត​គ្នា​ ជាមួយ​អភិបាល​រង​ខេត្ត​ព្រះវិហារ លោក ឃឹម បញ្ញា និង​អាជ្ញាធរ​ភូមិ​ឃុំ​គំរាម ពលរដ្ឋ​​ប្ដឹង​ទៅ​តុលាការ និង​បង្ខំ​ឱ្យ​ធ្វើ​កិច្ច​សន្យា ប្រសិន​បើ​ពុំ​ចែក​ស្រូវ​៥០​ភាគ​រយ ឱ្យ​ទៅ​ពួកគេ​ពេល​ពលរដ្ឋ​ប្រមូល​ផល​នៅ​ឆ្នាំ​នេះ។ ការ​ទាមទារ​​នេះ​ធ្វើ​ឡើង​ ដោយ​ចោទ​ពលរដ្ឋ​​​ថា អាស្រ័យ​ផល​លើ​ដី​ ក្រុមហ៊ុន​​ដោយ​ខុស​ច្បាប់។

សហគមន៍​ជនជាតិ​ដើម​ភាគ​តិច​កួយ​​ ប្រមាណ ២០០​គ្រួសារ​ ដែល​មាន​វិវាទ​ដីធ្លី​រ៉ាំរ៉ៃ​ ជាមួយ ​ក្រុមហ៊ុន​ចិន ហេង ហ្វូ (Hengfu Group Sugar Industry)រស់​នៅ​​ភូមិ​ប្រើសក្អក និង​ភូមិ​បុស្ស ឃុំ​ម្លូព្រៃពីរ​ ស្រុក​ឆែប បង្ហាញ​ការ​ឈឺ​ចាប់ និង​​សោកស្ដាយ ដោយ​ពួក​គាត់​ថា ថ្មី​ៗ​នេះ​ ​​តំណាង​ក្រុម​ហ៊ុន​ចិន​ ​ឈ្មោះ ឈាង គង់នូវ បាន​​ឃុបឃិត​ជា​មួយ​អាជ្ញាធរ​ពាក់ព័ន្ធ​គំរាម​ពលរដ្ឋ​ឱ្យ​ឈប់​អាស្រ័យផល​លើ​ដីស្រែ​របស់​​ពួក​គាត់​ទៀត​​ ហើយ​ ផល​ស្រូវ​ ដែល​នឹង​ ប្រមូល​នៅ​ឆ្នាំ​នេះ ត្រូវ​បែង​ចែក​ ៥០​ភាគរយ​​ឱ្យ​ក្រុមហ៊ុន។

តំណាង​សហគមន៍​ជនជាតិ​ដើម​ភាគតិច​កួយ​​រស់​នៅ​ភូមិ​បុស្ស ឃុំ​ម្លូ​ព្រៃពីរ ស្រុក​ឆែប លោក ខាំ សុភ័ក្រ ប្រាប់​វិទ្យុអាស៊ីសេរី នៅ​ថ្ងៃ​ទី១៤ ខែ​តុលា ថា លោក​សោកស្ដាយ​ និង​ឈឺ​ចាប់ ជា​ខ្លាំង​នៅ​ពេល​ដែល​ប្រជា​សហគមន៍​ខំ​ធ្វើស្រែ និង​ជិត​ទទួល​​ផល​បែរ​ជា​ក្រុមហ៊ុន និង​អាជ្ញាធរ​ឱ្យ​ពលរដ្ឋ​ធ្វើ​កិច្ចសន្យា​បញ្ឈប់​ការ​អាស្រ័យផល​ដី​នោះ​ទៀត ហើយ​បែងចែក​ផល​ស្រូវ​ពាក់កណ្ដាល ឱ្យ​ទៅ​ ក្រុមហ៊ុន ។ លោក​ថា ប្រជាពលរដ្ឋ​ភាគ​ច្រើន​មិន​គាំទ្រ និង​ធ្វើ​តាម​ការ​គំរាមកំហែង​នេះ​ឡើយ។

លោក ខាំ សុភ័ក្រ៖«គេ​ថា​បើ​អូន​ឯង អត់​ធ្វើ​កិច្ច​សន្យា​ឱ្យ​គេ កិច្ច​សន្យា​ចែក​ផល​ស្រូវ​ឱ្យ​គ្នា​ហ្នឹង​ណា​ គេ​នឹង​គំរាម​ទៅ​ប្រព័ន្ធ​តុលាការ។ គេ​ថា ចោទ​ប្រកាន់​យើង​ពី​បទ​ចូល​ទៅ​ប្រើ​ប្រាស់​ដី​ក្រុមហ៊ុន ។ បើ​ពួក​ខ្ញុំ​មតិ​ភាគ​ច្រើន​ ប្រជាពលរដ្ឋ​​ មិន​ឱ្យ​ទេ​ ព្រោះ​ពួក​គាត់​​ខំ​ធ្វើ​ចេញ​ពី​ញើស​ពី​ឈាម​ ហើយ​ អស់​កម្លាំង​កាយ ​គេ​មិន​បាន​ធ្វើ​អី​សោះ​មក​យក​ជាៗ»។

នៅ​ថ្ងៃ​ទី​១៣ ខែ​តុលា អភិបាល​រង​ខេត្ត លោក ឃឹម បញ្ហា បាន​ដឹកនាំ​អាជ្ញាធរ​ភូមិ​ឃុំ​ និង​តំណាង​ក្រុមហ៊ុន លោក ឈាង គង់នូវ រួម​និង​ទាហាន ៣នាក់ កាន់​កម្លាំង និង​ប៉ូលិស​ ២នាក់ ចុះ​ជួប ពលរដ្ឋ​មក​ពី​ភូមិ​បុស្ស និង​ភូមិ​ប្រើស​ក្អក ជាង ១០០​នាក់ នៅ​លើ​ដី​ដែល​មាន​ជម្លោះ​ ស្ថិត​នៅ​កសិដ្ឋាន​ក្រុមហ៊ុន​ទី​១០ និង​ទី១១ នៅ​ភូមិ​ប្រើស​ក្អក នៅ​ឃុំ​ម្លូព្រៃពីរ ស្រុក​ឆែប។ ពលរដ្ឋ​ឱ្យ​ដឹង​ថា​ ជំនួប​នេះ​អភិបាល​រង​ខេត្ត លោក ឃឹម បញ្ហា និង​តំណាង​ក្រុមហ៊ុន លោក ឈាង គង់នូវ បាន​គំរាម​ឱ្យ​ពលរដ្ឋ​ធ្វើ​កិច្ចសន្យា​ឈប់​អាស្រ័យ​ផល​លើ​ដី​នោះ​ទៀត ដោយ​ថា ដី​នោះ គឺ​ជា​ដី​របស់​ក្រុមហ៊ុន។ ប្រសិន​បើ​ពលរដ្ឋ​ណា មិន​ព្រម​ធ្វើ​កិច្ចសន្យា​នឹង​ប្រឈម​ចំពោះ​មុខ​ច្បាប់។

ជន​ជាតិ​ភាគ​តិច​កួយ លោក សឿន ថា រស់​នៅ​ភូមិ​ប្រើស​ក្អក​ ឃុំ​ម្លូព្រៃពីរ ដែល​បាន​ចូលរួម​ ក្នុង​ជំនួប​​នោះ​​ដែរ លើក​ឡើង​ថា ពលរដ្ឋ​មួយ​ចំនួន​តូច​បាន​ព្រម​ធ្វើ​កិច្ច​សន្យា ឈប់​អាស្រ័យ​ផល​លើ​ដី​នោះ​ទៀត ហើយ​សន្យា​ ​ផ្ដល់​ផល​ស្រូវ៥០​ភាគ​រយ​ ​ឱ្យ​ទៅ​ខាង​ តំណាង​ក្រុមហ៊ុន ព្រោះ​​ពួក​គាត់​ភ័យ​ខ្លាច ការ​គំរាមកំហែង​របស់​អាជ្ញាធរ។

លោក សឿន ថា៖ «ប្រជាពលរដ្ឋ​ខ្លះ​ព្រម​ចែក​ឱ្យ ព្រោះ​គេ​ថា បើ​មិន​ចែក​គេ ប្រឈម​មុខ​នឹង​តុលាការ​ផ្សេង​ៗ។ ព្រោះ​ពេល​គេ​មក​មាន​ទាំង​កងកម្លាំង​ទាហាន​ និង​ប៉ូលិស​ចុះ​មក​ជួប​ពលរដ្ឋ​ ​ ហើយ​ថា​ ពេល​យើង​ច្រូត​​​ស្រូវ គេ​នឹង​មក​ចាប់ គេ​អត់​ឱ្យ​យើង​ច្រូត​ទេ​ អភិបាល​រង​ខេត្ត​ក៏​គាត់​ថា​អ៊ីចឹង​ដែរ។ អ៊ីចឹង​ប្រជាពលរដ្ឋ​គាត់​បង្ខំ​ចិត្ត​ត្រូវ​តែ​ចែក​ឱ្យ​ខ្លះ»។

ទោះ​ជា​យ៉ាង​ណា​ លោក សឿន ថា និង​​ពលរដ្ឋ​មួយ​ចំនួន​ទៀត មិន​ព្រម​ធ្វើ​កិច្ចសន្យា​តាម​ការ​ចង់​បាន​របស់​តំណាង​ក្រុមហ៊ុន​ជា​ដាច់ខាត ដោយ​លោក​យល់​​​ថា នេះ​ជា​ទង្វើ​កេងប្រវ័ញ្ច​កម្លាំង​ពលកម្ម​ពលរដ្ឋ​ និង​អយុត្តិធម៌។ លោក​ថា ដី​ដែល​ពលរដ្ឋ​​ ​អាស្រ័យ​ផល​​នេះ គឺ​ជា​ដី​ចាស់​ដែល​ពួក​គាត់​អាស្រ័យ​ផល​ ជា​យូរ​មក​ហើយ​ ប៉ុន្តែ​ត្រូវ​បាន​ក្រុមហ៊ុន​​ យក​កាល​ពី​ឆ្នាំ​២០១២ ​ហើយ​ពេល​នេះ​ ក្រុម​​ហ៊ុន​ក៏​បាន​ក្ស័យធន​លែង​ដំណើរ។

លោក សឿន ថា៖«សម្រាប់​ខ្ញុំ​យល់​ថា វា​អយុត្តិធម៌​មែន​ទែន​ព្រោះ​អី?ព្រោះ​ពួក​គាត់​មិន​បាន​ ចំណាយ​ដើម​ទុន​មួយ​កាក​មួយ​សេន​ បែរ​ជា​ចង់​ឱ្យ​​ពួក​យើង ចែក​ផល​ស្រូវ​ ទៅ​ពួក​គាត់ ដែល​ពួក​យើង​ខំ​ថែ​អស់​រាប​ខែ​ជិត​ចូល ១​ឆ្នាំ​ហើយ។ ឧទាហរណ៍ ប្រសិន​បើ​ពួក​គាត់​វិញ យើង​សុំ​ឱ្យ​គាត់​​ចែក ខ្ញុំ​គិត​ថា​ប្រាកដ​ជា​ពួក​គាត់​មិន​ព្រម​ទេ»។

ចាប់​តាំងពី​ឆ្នាំ​២០១៩ ក្រុមហ៊ុន​ស្ករអំពៅ​​ចិន​ ឈ្មោះ​ ហេង ហ្វូ (Hengfu Group Sugar Industry) បាន​ផ្អាក​ដំណើរ​ ការ​ដាំ​ដើម​អំពៅ​ ដោយ​ទុក​ឱ្យ​ដី​ទំនេរ ​ចោល ហើយ​ក្រោយ​មក ជនជាតិ​ភាគតិច​កួយ​ ដែល​នៅ​ទី​នោះ បាន​​ចាប់​ផ្ដើម​អាស្រ័យ​ផល​ឡើង​​វិញ សម្រាប់​ធ្វើ​ស្រូវ​ និង​ដាំ​​ដំឡូង​ជាង ៣​ឆ្នាំ​មក​ហើយ ដោយ​ពុំ​មាន​ការ​​រារាំង​ពី​សំណាក់​ក្រុម​ហ៊ុន​នោះ​ទេ។ ក៏ប៉ុន្តែ​នៅ​ឆ្នាំ​២០២៤​ ស្រាប់​តែ​មាន​ ​បុគ្គល​ឈ្មោះ​ ឈាង គង់នូវ អះអាង​ថា ជា​តំណាង​ក្រុមហ៊ុន​ហើយ​បាន​ឈូស​ឆាយ​ ដំណាំ​ ពលរដ្ឋ រួម​នឹង​គំរាម​មិន​ឱ្យ​ពលរដ្ឋ​អាស្រ័យ​ផល​លើ​ដី​នោះ​ទៀត។

ការណ៍​នេះ​ បាន​បង្ក​ជា​អំពើ​​ហិង្សា​​ រវាង​ពលរដ្ឋ និង​បក្ខពួក លោក ឈាង គង់នូវ ជា​បន្ត​បន្ទាប់។ជាក់ស្ដែង ​កាលពី​ថ្ងៃ​ទី៧ ខែ​កុម្ភៈ តំណាង​អយ្យការ​អម​សាលាដំបូង​ខេត្ត​ព្រះវិហារ លោក ថុល គឹមហ៊ឹង បាន​ចេញ​ដីកា​កោះហៅ តំណាង​សហគមន៍ ៤នាក់ ដើម្បី​សាកសួរ​ពី​បទ​រារាំង​ការ​អនុវត្ត​ការងារ​របស់​ក្រុមហ៊ុន និង​ញុះញង់​ពលរដ្ឋ​ឱ្យ​ចូល​កាន់កាប់​ដី​រដ្ឋ​ខុស​ច្បាប់។ ការ​ប្តឹង​ផ្តល់​នេះ​កើត​ឡើង ដោយ​សារ​ជនជាតិ​ដើម​ភាគតិច​កួយ ជិត​១០០​នាក់ រស់នៅ​ឃុំ​ម្លូព្រៃពីរ ស្រុក​ឆែប បាន​ឃាត់​គ្រឿងចក្រ ក្រុមហ៊ុន​មិន​ឲ្យ​ឈូស​ឆាយ​ដី​ស្រែ​ចម្ការ​របស់​ពួកគាត់ រហូត​ឈាន​ដល់​ប្រើ​អំពើ​ហិង្សា។

​​​​​ទន្ទឹង​នឹង​នេះ​ តំណាង​សហគមន៍ លោក ខាំ សុភ័ក្រ អះអាង​ថា អាជ្ញាធរ​ភូមិ​ឃុំ​ និង​ថ្នាក់​ខេត្ត​ តែងតែ​ចេញ​មុខ​ការពារ​​ក្រុម​ហ៊ុន រីឯ​ពលរដ្ឋ​ត្រូវ​បាន​ ​ចោទ​ជា​ហូរហែ​ថា បាន​ចូល​ទៅ​​កាន់​កាប់​ដី​ និង​អាស្រ័យ​ផល លើ​ដី​ក្រុមហ៊ុន​ខុស​ច្បាប់។ លោក​ស្នើ​ឱ្យ​អាជ្ញាធរ​ពាក់ព័ន្ធ​ដោះស្រាយ​ករណី​នេះ​ឱ្យ​បាន​ត្រឹមត្រូវ និង​យុត្តិធម៌។ លោក​ថា ជា​ច្រើន​ឆ្នាំ​មក​នេះ ជនជាតិ​ដើម​ភាគ​តិច​កួយ​ពួក​គាត់​ ប្រឹង​ត្រដរ​រស់​ទាំង​លំបាក ក្រោយ​ពី​ក្រុមហ៊ុន​រំលោភ​យក​ដី​អស់ ហើយ​ពេល​នេះ​ ក្រុមហ៊ុន​ បាន​ក្ស័យធន ហើយ​គួរតែ​ផ្ដល់​ដី​នោះ​ជូន​ពួក​គាត់​វិញ។

វិទ្យុអាស៊ីសេរី​​​ពុំ​អាច​ទាក់ទង​អភិបាល​ខេត្ត​ព្រះវិហារ លោក គីម រិទ្ធី និង​អភិបាលរង​ខេត្ត លោក ឃឹម បញ្ញា ដើម្បី​ឆ្លើយ​តប​ជុំ​វិញ​រឿង​នេះ​បាន​ទេ​នៅ​ថ្ងៃ​ទី​១៤ ខែ​តុលា ដោយ​ហៅ​ទូរស័ព្ទ​ចូល​តែ​គ្មាន​អ្នក​ទទួល។ រីឯ​អភិបាល​ស្រុក​ឆែប លោក ឡង់ សុបិន និង​មេ​ឃុំ​ម្លូព្រៃពីរ លោក កាន់ សុវណ្ណាគា ក៏​ពុំ​អាច​ទាក់ទង​បាន​ដែរ នៅ​ថ្ងៃ​ដដែល​នេះ។

ដោយ​ឡែក មេភូមិ​ប្រើសក្អក លោក សៀ មើរ ប្រាប់​វិទ្យុអាស៊ី​សេរី​ នៅថ្ងៃទី១៤ ខែ​តុលា ថា​​ ករណី​ដែល​ឱ្យ​ប្រជា​ពលរដ្ឋ​ចំនួន​ពីរ​ភូមិ គឺ​ភូមិ​បុស្ស និង​ភូមិ ​ប្រើស​ក្អក ធ្វើ​កិច្ចសន្យា​បញ្ឈប់​ការ​ស្រ័យ​ផល​លើ​ដី​នោះ និង​ផ្ដល់​ផល​ស្រូវ​មួយ​ចំណែក ឱ្យ​ទៅ​ក្រុមហ៊ុន​នោះ គឺ​ជា​ការ​ពិត​ ព្រោះ​ លោក​ថា ដី​នោះ​រដ្ឋាភិបាល​ បាន​ប្រគល់​ទៅ​ឱ្យ​ក្រុមហ៊ុន​ជា​យូរ​មក​ហើយ​ ប៉ុន្តែ​ពលរដ្ឋ​នាំ​គ្នា​មក​អាស្រ័យ​ផល​ អំឡុង​ពេល​ក្រុមហ៊ុន​ផ្អាក​ដំណើរការ។

លោក​បន្ត​ថា កាល​ពីថ្ងៃ​ទី​១៣ ខែ​តុលា កន្លង​ទៅ​នេះ​ អាជ្ញាធរ​មូលដ្ឋាន រួម​នឹង​អភិបាល​រង​ខេត្ត​ លោក ឃឹម បញ្ញា បាន​សម្របសម្រួល​ឱ្យ​ប្រជាពលរដ្ឋ​នាំ​គ្នា ធ្វើ​កិច្ច​សន្យា​ប្រគល់​ដី​ទាំង​នោះ​ឱ្យ​ទៅ​ក្រុមហ៊ុន​វិញ ប្រសិន​បើ​ពុំ​​ធ្វើ​ទេ​រឿង​នេះ​កាន់​តែ​ធំ ឡើង​ទៅ​ដល់​តុលាការ អាច​នឹង​ធ្វើ​ឱ្យ​ ប៉ះពាល់​ដល់​ជីវភាព​ពលរដ្ឋ។ ទោះ​ជា​បែប​នេះ​ក្ដី លោក​ពុំ​ដឹង​ច្បាស់​នោះ​ទេ​ថា តើ​មក​ដល់​ពេល​នេះ​ មាន​ប្រជាពលរដ្ឋ​ប៉ុន្មាន​នាក់​​ហើយ​នោះ​ទេ​ ដែល​ធ្វើ​កិច្ចសន្យា​ជាមួយ​នឹង​ក្រុមហ៊ុន។

លោក ឃឹម បញ្ញា៖«ទាំង​ឃុំ​ ទាំង​អភិបាល​រង​ខេត្ត ​និង​ខ្ញុំ បាន​ធ្វើ​កិច្ចសន្យា​ឱ្យ​បង​ ប្អូន​ប្រជាពលរដ្ឋ។ បាន​អង្គ​ខ្ញុំ​សុខ​ចិត្ត​សម្របសម្រួល ​ឱ្យ​គាត់​ធ្វើ​កិច្ច​សន្យា​ទៅ​ដើម្បី​បញ្ឈប់​កុំ​ឱ្យ​ទៅ​ព្រួស​ ឬ​​ដាំដុះ ស្រូវ ឬ​ក៏​ដំឡូង​នៅ​លើ​ដី​នោះ​ទៀត​ កុំ​ឱ្យ​ថ្ងៃ​ក្រោយ មាន​បញ្ហា​ពាក់ព័ន្ធ​ទៀត។ អង្គ​ខ្ញុំ​មិន​ដឹង​ធ្វើ​យ៉ាង​ម៉េច​ទេ»។

ទាក់ទិន​រឿង​នេះ​ អនុប្រធាន​ផ្នែក​សិទ្ធិមនុស្ស​ដីធ្លី និង​ធនធាន​ធម្មជាតិ​នៃ​សមាគម​ការពារ​សិទ្ធិមនុស្ស​អាដហុក (Adhoc) លោក យិន ម៉េងលី ប្រាប់​វិទ្យុអាស៊ីសេរី ថា ការណ៍​ដែល​អាជ្ញាធរ​ និង​ក្រុមហ៊ុន​បង្ខំ​ឱ្យ​ប្រជាពលរដ្ឋ​ធ្វើ​កិច្ចសន្យា ​និង​បែង​ចែក​ផល​ស្រូវ មួយ​ចំនួន​ឱ្យ​ទៅ​ក្រុមហ៊ុន​នេះ​ គឺ​ជា​រឿង​​ដែល​ពុំ​ត្រឹម​ត្រូវ និង​រំលោភ​សិទ្ធិ​ជនជាតិ​ដើម​ភាគ​តិច។ លោក​បន្ត​ថា អាជ្ញាធរ​ពាក់ព័ន្ធ​មិន​ត្រូវ​ឃុបឃិត​គ្នា​ជាមួយ​ក្រុមហ៊ុន​ធ្វើ​បាប​ពលរដ្ឋ​នោះ​ទេ ប៉ុន្តែ ​ត្រូវ​រក​ដំណោះស្រាយ​ ប្រកប​ដោយ​យុត្តិធម៌ ធ្វើ​យ៉ាង​ណា​ឱ្យ​ពលរដ្ឋ​មាន​ដី​អាស្រ័យផល​ដើម្បី​ផ្គត់ផ្គង់​គ្រួសារ​បន្ត​ទៀត។

លោក យិន ម៉េងលី៖«តួនាទី​របស់​អាជ្ញាធរ​ដែល​ជា​អ្នក​ការពារ ដែល​ជា​​អ្នក​តំណាង​ ឱ្យ​ប្រជាពលរដ្ឋ​នឹងគប្បី​តែ​សម្របសម្រួល​ធ្វើ​ឱ្យ​ប្រជាពលរដ្ឋ ប្រមូលផល​បាន​សិន ហើយ​យើង​ចាំ​ដោះស្រាយ​ដីធ្លី​តាម​ក្រោយ ធ្វើ​យ៉ាង​​ណា​ជៀសវាង​បញ្ហា​ហិង្សា​ ធ្វើ​យ៉ាង​ណា​ជៀសវាង​ ការ​គំរាម​​ប្រជា​ពលរដ្ឋ។ អី​តិច​ប្ដឹង​ៗ ប្រជាពលរដ្ឋ ទៅ​តុលាការ វា​ពុំ​មែន​ជា​ការ​ល្អ​ទេ ព្រោះ​ប្រជាពលរដ្ឋ និង​អាជ្ញាធរ​រស់​កៀក​គ្នា​ រាល់​ថ្ងៃ។​ អ៊ីចឹង​អាជ្ញាធរ​គប្បី​តែ​ដឹង​សុខ​ទុក្ខ​ផល​លំបាក​ ប្រជាពលរដ្ឋ»។

មន្ត្រី​សង្គម​ស៊ីវិលទទូច​អាជ្ញាធរ​​ជួយ​ដោះស្រាយ​បញ្ហា​​ជនជាតិ​ដើម​ភាគតិច​ឲ្យ​ទទួល​បាន​យុត្តិធម៌ និង​ធ្វើ​ឲ្យ​ស្ថានការណ៍​ស្ងប់ស្ងាត់​ជុំវិញ​វិវាទ​ដីធ្លី​ដ៏​រ៉ាំរ៉ៃ ព្រោះ​ពួកគាត់​បាន​ធ្វើ​ស្រែ​ចម្ការលើ​ដី​នោះ​យូរ​មក​ហើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។