អាជ្ញាធរមូលដ្ឋាននៅស្រុកឆែប ខេត្តព្រះវិហារថា អះអាងថា ដីព្រៃជំនឿដែលកំពុងមានបញ្ហារវាងអ្នកភូមិដងផ្លឹត និងភូមិណារ៉ុង ជាមួយក្រុមហ៊ុន សាន់ តាណា អាហ្គ្រោ ប្រូដាក់ (Santana Agro Products) គឺអាជ្ញាធរថ្នាក់ជាតិជាអ្នកចេញប័ណ្ណកម្មសិទ្ធិឲ្យទៅក្រុមហ៊ុនឯកជនមួយនេះ។ សហគមន៍ថា អាជ្ញាធរកំពុងតែឆ្លើយយករួចខ្លួន គេចវេះមិនទទួលខុសត្រូវចំពោះបញ្ហានេះ។
ក្រោយក្រុមហ៊ុន សាន់ តាណា របស់អភិបាលរងខេត្តព្រះវិហារ លោក អ៊ុក គឹមសាន បានដាក់ទាហានឈ្លោះដណ្ដើមដីស្រែចម្ការ និងដីព្រៃជំនឿរបស់សហគមន៍ អស់ជាច្រើនថ្ងៃរួចមក អាជ្ញាធរមូលដ្ឋាន អះអាងថា អាជ្ញាធរថ្នាក់ជាតិ គឺជាអ្នកចេញប័ណ្ណកម្មសិទ្ធិឲ្យក្រុមហ៊ុនគ្រប់គ្រង ដើម្បីធ្វើការវិនិយោគនៅតំបន់នោះ ចំណែកអាជ្ញាធរមូលដ្ឋានមិនជាប់ពាក់ព័ន្ធបញ្ហានេះឡើយ។
មេឃុំឆែបពីរ លោក ជៀន ជិន បានប្រាប់វិទ្យុអាស៊ីសេរី នៅថ្ងៃទី៨ ខែមីនាថា ករណីចេញប័ណ្ណកម្មសិទ្ធិឲ្យទៅក្រុមហ៊ុន សាន់ តាណា ឈូសឆាយដីស្រែចម្ការ និងដីព្រៃជំនឿសហគមន៍ រហូតដល់មាន ទំនាស់ដីធ្លី និងអំពើហិង្សា ទៅលើអ្នកភូមិបែបនេះ មិនមានជាប់ពាក់ព័ន្ធអាជ្ញាធរមូលដ្ឋានឡើយ។ លោកថា អាជ្ញាធរថ្នាក់ខេត្ត និងថ្នាក់ជាតិ ជាអ្នកចេញប័ណ្ណកម្មសិទ្ធិឲ្យទៅក្រុមហ៊ុនមួយនេះ ហើយអាជ្ញាធរខេត្តមិនបានឲ្យឯកសារទាំងនោះទៅអាជ្ញាធរសាលាឃុំឆែបពីរនោះទេ។ លោកក៏បានចេញមុខការពារក្រុមហ៊ុនដែរថា ដីដែលក្រុមហ៊ុនបានឈូសឆាយនោះ មិនមានផលប៉ះពាល់ដីស្រែចម្ការ ឬដីព្រៃជំនឿរបស់ពលរដ្ឋនៅតំបន់នេះឡើយ គឺក្រុមហ៊ុន ឈូសឆាយដីដែលបានទិញពីពលរដ្ឋ និងដីដែនជម្រកសត្វព្រៃព្រះរកា-ឆែប តែប៉ុណ្ណោះ។
លោក ជៀន ជិន៖«សម្រាប់ខ្ញុំអត់ច្បាស់ទេ រឿងប្លង់នេះខាងក្រសួងគេអ្នកចេញទេ គេគ្រាន់តែបង្ហាញបន្តិច គេរក្សាទុកនៅខេត្ត ឯកសារនេះអ្នកនៅខេត្តទេជាអ្នកចេញប្លង់ ហើយមិនបានរក្សាទុកនៅក្នុងឃុំទេ»។
ពលរដ្ឋថា អាជ្ញាធរខេត្តកំពុងដោះសា និងឆ្លើយដាក់គ្នា
ទោះជាយ៉ាងណា តំណាងសហគមន៍ជនជាតិដើមកួយ ភូមិដងផ្លិត លោក សោម ណៃ ឲ្យដឹងនៅថ្ងៃទី៨ ខែមីនា ថា អាជ្ញាធរកំពុងតែឆ្លើយយករួចរៀងៗខ្លួន ដើម្បីគេចមិនចង់ទទួលខុសត្រូវចំពោះបញ្ហានេះ។ លោកថា សព្វថ្ងៃក្រុមហ៊ុនបានដាក់ទាហានមួយក្រុមមានស្ពាយកាំភ្លើងជាប់ខ្លួន ហើយដើរគំរាមកំហែង និងហាមឃាត់ពលរដ្ឋមិនឲ្យចូលទៅអាស្រ័យផលនៅលើដីស្រែចម្ការរបស់ពួកគាត់នៅក្នុងតំបន់ដែលបានឈូសឆាយរួចហើយនោះទេ។
លោក សោម ណៃ៖«ឆ្លើយបែបនេះគឺដោះសាហើយ ដោះសាគេចខ្លួនមិនចង់ទទួលខុសត្រូវ គាត់អ្នកដើរសួរបងប្អូនបង្ខំឲ្យលក់ដីឲ្យ បើមិនលក់គេយក មិនពាក់ព័ន្ធជាមួយយ៉ាងម៉េចបើមុនដំបូងគាត់អ្នកដើរទិញដីឲ្យក្រុមហ៊ុនបានក្បាលកាក់ ទាហានការពារទាំងមេការគេមិនឲ្យចូលអាស្រ័យផល ឆ្លងកាត់អត់បានទេគេដេញមិនឲ្យថតរូប មិនបានថតផងក៏គេយកទូរស័ព្ទបោកចោលដែរ»។
សហគមន៍ទាមទារឲ្យអាជ្ញាធរបង្ហាញឯកសារជាសាធារណៈ និងយកដីព្រៃនោះមកដាំឈើឡើងវិញ
សហគមន៍នៅភូមិដងផ្លឹត និងភូមិណារ៉ុង ទាមទារឲ្យអាជ្ញាធរបង្ហាញឯកសារជាសាធារណៈ និងទាមទារដីព្រៃដែលក្រុមហ៊ុនឈូសឆាយរួចហើយ យកមកដាំកូនឈើឡើងវិញ ដើម្បីឲ្យពលរដ្ឋបានចូលទៅអាស្រ័យផលបែបប្រពៃណីជនជាតិដើមភាគតិចកួយ និងទុកដីព្រៃទាំងនោះជាសម្បត្តិរួម។ សហគមន៍ព្រមានតវ៉ាទៅអាជ្ញាធរថ្នាក់ជាតិបន្ថែមទៀត ដើម្បីស្វែងរកដំណោះស្រាយ។
វិទ្យុអាស៊ីសេរី មិនអាចទាក់ទង អ្នកនាំពាក្យសាលាខេត្តព្រះវិហារ លោក ណុប វុធ្ធី និងអ្នកនាំពាក្យក្រសួងបរិស្ថាន លោក ខ្វៃ អាទិត្យា ដើម្បីសុំការអត្ថាធិប្បាយ បានទេ នៅថ្ងៃទី៨ ខែមីនា។ ចំណែកប្រធានក្រុមហ៊ុន សាន់ តាណា លោក អ៊ុក គឹមសាន ដែលមានតួនាទីជាអភិបាលរងខេត្តព្រះវិហារផងនោះ ក៏វិទ្យុអាស៊ីសេរី មិនអាចទាក់ទងបានដែរនៅថ្ងៃដដែលនេះ ដោយទូរស័ព្ទចូលតែគ្មានអ្នកលើក។
អត្ថបទដែលទាក់ទង៖
ទាក់ទិននឹងបញ្ហានេះ មន្ត្រីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តព្រះវិហារ លោក ម៉ៃ វុទ្ធី យល់ឃើញថា អាជ្ញាធរពាក់ព័ន្ធគួរចុះត្រួតពិនិត្យជាក់ស្ដែង និងស្ដាប់ការលើកឡើងរបស់ប្រជាពលរដ្ឋ ហើយត្រូវផ្អាកសកម្មភាពឈូសឆាយដីព្រៃ និងដកទាហានចេញពីតំបន់នោះសិន ដើម្បីរកដំណោះស្រាយជូនប្រជាពលរដ្ឋ។ លោកថា អាជ្ញាធរគួរតែបង្ហាញឯកសារ ដែលក្រុមហ៊ុនកាន់កាប់ដី ឬឯកសារពាក់ព័ន្ធផ្សេងៗទៀតជាសាធារណៈឲ្យពលរដ្ឋបានដឹង ដើម្បីឲ្យមានតម្លាភាព និងយុត្តិធម៌។
លោក ម៉ៃ វុទ្ធី៖«ចំពោះបង្ហាញនេះ ពាក់ព័ន្ធអាជ្ញាធរខេត្តព្រះវិហារគួរតែរកដំណោះស្រាយជូនពួកគាត់ ឲ្យមានតម្លាភាព និងយុត្តិធម៌ ជាពិសេសក្នុងការកាត់ឆ្វៀល និងផ្ដល់ដីលក្ខណសមូហភាព ដល់ពួកគាត់គ្រប់គ្រង ដើម្បីទុកជាប្រយោជន៍រួមសម្រាប់ជនជាតិដើមភាគតិច ឬក៏ជនជាតិខ្មែរ ក្នុងការប្រើប្រាស់និងអាស្រ័យផល»។
ក្រុមហ៊ុន សាន់ តាណា របស់អភិបាលរងខេត្តព្រះវិហារ លោក អ៊ុក គឹមសាន បានដាក់គ្រឿងចក្រឈូសឆាយ តំបន់ព្រៃជំនឿ ព្រៃអារក្ស និងតំបន់ព្រៃអាស្រ័យផលកសិកម្មរបស់ជនជាតិដើមភាគតិចកួយចំនួន២ភូមិ ជាង ១ ពាន់ ៥០ ហិកតារ (១.០៥០) ហើយក្រុមហ៊ុនបានប្រើប្រាស់អំពើហិង្សាលើអ្នកភូមិ និងដាក់ទាហានយាមហាមឃាត់មិនឲ្យពលរដ្ឋបានចូលអាស្រ័យផលបែបប្រពៃណីនៅតំបន់នេះឡើយ រហូតមកដល់ពេលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។