អាជ្ញាធរខណ្ឌព្រែកព្នៅ ប្រមាណ១០នាក់ ស្លៀកពាក់ស៊ីវិល នៅថ្ងៃទី១ ខែកក្កដា បានចុះមកថតរូបផ្ទះសម្បែងរបស់ប្រជាពលរដ្ឋនៅតំបន់បឹងតាមោក ស្ថិតនៅក្នុងសង្កាត់សំរោងត្បូង ខណ្ឌព្រែកព្នៅ រាជធានីភ្នំពេញ។
អាជ្ញាធរបានគំរាមរុះរើលំនៅឋានរបស់ពលរដ្ឋ បើពលរដ្ឋនៅតែមិនព្រមទទួលយកគោលនយោបាយដោះដូរដីតាមការចង់បានរបស់អាជ្ញាធរ។
តំណាងពលរដ្ឋបឹងតាមោក លោកស្រី ស៊ា ដាវី ប្រាប់វិទ្យុអាស៊ីសេរីនៅថ្ងៃទី១ ខែកក្កដា ថា ពលរដ្ឋព្រួយបារម្ភថា អាជ្ញាធរអាចរុះរើផ្ទះសម្បែងរបស់ពួកគេជាថ្មី ដោយមិនជូនដំណឹង និងមិនទាន់ទូទាត់សំណងដល់ពលរដ្ឋ។ លោកស្រីស្នើដល់អាជ្ញាធរពាក់ព័ន្ធស្ដាប់នូវតម្រូវការរបស់ពលរដ្ឋ និងផ្ដល់សិទ្ធិឲ្យពលរដ្ឋបានអភិវឌ្ឍនៅនឹងកន្លែង។
លោកស្រី ស៊ា ដាវី៖«គ្មានដីឯណាច្រើននោះទេ មិនបានកន្លះហិកតារផង អីចឹងសម្បទានឲ្យពួកខ្ញុំមកឲ្យពួកខ្ញុំបានរស់នៅហ្នឹងកន្លែងទៅ កុំឲ្យបញ្ជូនកូនចៅមកថតផ្ទះខ្ញុំ ពួកខ្ញុំទាំងអស់គ្នាអីចឹង ដើរថត ដើរនិយាយដូរដីទៅគេ ទៅអស់ហើយកន្លះខែទៀតបើមិនទទួលយកដំណោះស្រាយគេនឹងមកឈូសចោទ គេនឹងបញ្ចប់ហើយ ផ្ដល់សំណងដល់ពលរដ្ឋអីចឹង ឈប់ទៅសម័យអភិវឌ្ឍ កុំគំរាមពលរដ្ឋទៀត សុំអង្វរសុំចិត្តអស់លោក ហើយបញ្ជូនតែមន្ត្រីអត់ក្របខណ្ឌមកធ្វើបាបពលរដ្ឋអីចឹង ឈប់បានឈប់ទៅសុំអង្វរមែន ពួកខ្ញុំរស់នៅយ៉ាងវេទនាមិនគ្រប់គ្រាន់ចិត្តរបស់លោក ឬក៏យ៉ាងម៉េច»។
អាជ្ញាធរខណ្ឌព្រែកព្នៅ កាលពីព្រឹកថ្ងៃទី២៥ ខែមិថុនា បានចុះរុះរើផ្ទះរបស់ពលរដ្ឋនៅតំបន់បឹងតាមោក ខណៈពលរដ្ឋមិនទាន់ទទួលយកគោលនយោបាយដោះដូរដីជាមួយអាជ្ញាធរ។
វិទ្យុអាស៊ីសេរីនៅមិនទាន់អាចទាក់ទងអភិបាលខណ្ឌព្រែកព្នៅ លោក ធឹម សំអាន ដើម្បីសុំការបកស្រាយជុំវិញបញ្ហានេះ បាននៅឡើយទេ នៅថ្ងៃទី១ ខែកក្កដា។
ក្រោយពីអាជ្ញាធរបានគំរាមរុះរើផ្ទះហើយនោះ ពលរដ្ឋបឹងតាមោក ប្រមាណ២០នាក់ នៅរសៀលថ្ងៃទី ១ កក្កដា បានជួបជុំគ្នា កាន់បដា និងរូបថតនាយករដ្ឋមន្ត្រី លោក ហ៊ុន ម៉ាណែត ដើម្បីស្នើសុំដំណោះស្រាយវិវាទដីធ្លី។ បដានោះពលរដ្ឋបានសរសេរថា «អភិវឌ្ឍចុះ តែកុំរុះផ្ទះខ្ញុំ»។
វិវាទដីធ្លីរ៉ាំរ៉ៃ របស់ពលរដ្ឋរស់នៅតំបន់បឹងតាមោកបានអូសបន្លាយពេលជិត៥ឆ្នាំមកហើយ ក្រោយពីអតីតនាយករដ្ឋមន្ត្រី លោក ហ៊ុន សែន ប្រគល់ដីនៅតំបន់នោះ ឱ្យទៅអ្នកមានលុយមានអំណាចជាបន្តបន្ទាប់ សម្រាប់ប្រើប្រាស់ក្នុងគោលដៅផ្សេងៗគ្នា។ ចំណែកពលរដ្ឋ ត្រូវបានអាជ្ញាធរបណ្ដេញពីលំនៅឋានដោយបង្ខំ ហើយពលរដ្ឋចំនួន១៨នាក់ កំពុងជាប់ពាក្យបណ្ដឹងជាច្រើនករណី នៅតុលាការ ដោយសារតែទាមទារដំណោះស្រាយពីរដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។