ពលរដ្ឋនៅខេត្តបាត់ដំបង ខកចិត្តនឹងតំណាងរាស្ត្រខេត្ត ដែលមិនខ្វល់ខ្វាយអំពីសំណើសុំជួយអន្តរាគមន៍ដោះស្រាយវិវាទដីធ្លី ជាមួយអ្នកមានអំណាចបិទផ្លូវចេញចូលផ្ទះពលរដ្ឋ ៧០គ្រួសារ។ មន្ត្រីអង្គការសង្គមស៊ីវិលថា ក្នុងនាមជាតំណាងពលរដ្ឋ គួរតែយកចិត្តទុកដាក់ ដោះស្រាយបញ្ហាតាមសំណើរបស់ពលរដ្ឋឲ្យបានឆាប់រហ័ស។
ប្រតិកម្មរបស់តំណាងពលរដ្ឋ៧០គ្រួសារនេះ គឺកើតឡើងបន្ទាប់ពីពួកគេបានដាក់ពាក្យស្នើសុំកិច្ចអន្តរាគមន៍ទៅទីស្នាក់ការរដ្ឋសភាមណ្ឌលខេត្តបាត់ដំបងកាលពីដើមឆ្នាំ២០២៣ ដើម្បីឲ្យតំណាងរាស្ត្រជួយបើកផ្លូវទំហំ ៨ម៉ែត្រ បណ្ដោយ ៤០ម៉ែត្រ ដើម្បីចូលទៅលំនៅឋានពលរដ្ឋ នៅក្នុងភូមិកំប្រង់ ឃុំតាក្រី ស្រុកកំរៀង ខេត្តបាត់ដំបង ក៏ប៉ុន្តែអូសបន្លាយអស់ពេលជាងកន្លះឆ្នាំ នៅតែមិនទាន់មានដំណោះស្រាយ។
តំណាងពលរដ្ឋលោក ជុន ធី ប្រាប់វិទ្យុអាស៊ីសេរី នៅថ្ងៃទី១៦ កក្កដាថា លោកខកចិត្តនឹងតំណាងរាស្ត្រខេត្តបាត់ដំបង ដែលមិនបានស្វែងរកដំណោះស្រាយតាមសំណើសុំរបស់ពួកគាត់។ លោកបន្តថា តាំងតែពីម្ចាស់ដីនៅជាប់ផ្លូវធំ បានទុកផ្លូវឲ្យពលរដ្ឋ ១៥ម៉ែត្រសម្រាប់ចូលទៅដីខាងក្រោយ មុនពេលមិនទាន់លក់ដីឲ្យទៅទីប្រឹក្សាប្រធានក្រុមប្រឹក្សាអភិវឌ្ឍន៍វិស័យកសិកម្ម និងជនបទលោក តួ ធានទឺ។ ប៉ុន្តែក្រោយពីលោកតួ ធានទឺ បានទិញដីជាប់ផ្លូវនោះមក គឺបានបិទផ្លូវមិនឲ្យពួកគាត់ចេញចូលនោះទេ។
លោក ជុន ធី៖«ដីដែលខ្ញុំចែកពលរដ្ឋជាង៧០គ្រួសារ តែធ្វើផ្ទះបានទើបតែធ្វើបាន២៧ខ្នងទេបង។ ហើយតែផ្លូវដែលបានបិទហ្នឹង ខ្ញុំនៅមុននឹងគេបិទហ្នឹង ម្ចាស់មុនគេហ្នឹង គេបានបើកផ្លូវឲ្យប្រើ២ឆ្នាំ រយៈពេល២ឆ្នាំកន្លងផុតមកហើយបង។ អ៊ីចឹងទៅខ្ញុំក៏មានដីនៅហ្នឹង ខ្ញុំក៏ចែកឲ្យពលរដ្ឋរស់នៅទៅព្រោះអង្កាល់ ដែលខ្ញុំទិញដីហ្នឹងក៏ទិញដីរួចបានមួយឆ្នាំក៏កូវីដ ចាប់ផ្ដើមមានកូវីដអ៊ីចឹងទៅប្រជាពលរដ្ឋគាត់ អត់បានចេញទៅរកស៊ីខាងណាបានអ៊ីចឹងទៅ គាត់អត់ដែរ ខ្ញុំក៏អត់ដែរ ប៉ុន្តែខ្ញុំចែករំលែកឲ្យគាត់»។
លោកបន្ថែមថា ការអូសបន្លាយពេលនេះ បានធ្វើឲ្យប៉ះពាល់ដល់សេដ្ឋកិច្ចគ្រួសាររបស់ពលរដ្ឋ ជាពិសេស ពលរដ្ឋត្រូវចំណាយថវិកា ដើម្បីជួលផ្ទះគេស្នាក់នៅជាដើម។
ស្រដៀងគ្នានេះដែរ តំណាងពលរដ្ឋម្នាក់ទៀត គឺលោកស្រី មល់ ស្រីមុំ ប្រាប់អាស៊ីសេរីថា ពួកលោកស្រីធ្លាប់បានស្នើសុំកិច្ចអន្តរាគមន៍ពីអាជ្ញាធរមូលដ្ឋាន រហូតដល់ថ្នាក់ខេត្ត ដើម្បីស្នើឲ្យម្ចាស់ដីជាប់ផ្លូវធំ បើកផ្លូវចូលទៅក្នុង ក៏ប៉ុន្តែមិនមានដំណោះស្រាយនោះទេ។ លោកស្រីស្នើដល់រដ្ឋាភិបាលជួយស្វែងរកដំណោះស្រាយ ដើម្បីសម្រួលដល់ការធ្វើដំណើររបស់ពលរដ្ឋ។
លោកស្រី មល់ ស្រីមុំ៖«គេអត់បាននិយាយលម្អិតថា ទុកផ្លូវឲ្យប្រជាជនហ្នឹងប៉ុន្មាន គេអត់និយាយ គេបានតែលុយហើយ ក៏គេទៅប្រុយទៅ គេអត់មាននិយាយថា ដីនេះទុកឲ្យខាងប្រជាជនដើរអី ដល់ពេលលោក តួ ធានទឺ គាត់អាងតែគាត់ទិញហើយ គឺគាត់បិទផ្លូវហ្នឹងទាំងអស់បណ្ដោយ គាត់មិនឲ្យប្រជាជនណាចេញចូលបានទេ»។
វិទ្យុអាស៊ីសេរី នៅពុំទាន់អាចទាក់ទងអ្នកនាំពាក្យរដ្ឋសភាលោក ឡេង ប៉េងឡុង និងអភិបាលខេត្តបាត់ដំបង លោក សុខ លូ ដើម្បីសុំការអត្ថាធិប្បាយជុំវិញបញ្ហានេះ បានទេនៅថ្ងៃទី១៦ កក្កដា។
ទោះជាយ៉ាងណា អ្នកសម្របសម្រួលផ្នែកឃ្លាំមើលការរំលោភសិទ្ធិមនុស្ស នៃអង្គការលីកាដូ (Licadho) ខេត្តបាត់ដំបង លោក អ៊ិន គង់ជិត មានប្រសាសន៍ថា តំណាងរាស្ត្រ គួរតែធ្វើតួនាទីជាអ្នកតំណាងឲ្យពលរដ្ឋ ដើម្បីស្វែងរកដំណោះស្រាយបញ្ហានានា។ លោកបន្ថែមថា អាជ្ញាធរ គួរតែបង្កើតក្រុមការងារជំនាញ ចុះធ្វើការសិក្សាពីផលប៉ះពាល់ដល់ពលរដ្ឋដើម្បីបញ្ចប់បញ្ហានេះឲ្យបានឆាប់។
លោក អ៊ិន គង់ជិត៖«អ៊ីចឹងដល់ពេលបញ្ហាពួកគាត់អត់ត្រូវបានដោះស្រាយ គាត់អស់សង្ឃឹម គាត់អស់ជំនឿមិនដឹងថា អ៊ីចឹងទៅណាមកណាទេណា ហើយដោះស្រាយបានមិនបាន ក៏មានការឆ្លើយតបចំពោះគាត់ឲ្យបានសមរម្យដែរបាទ គួរតែហៅម្ចាស់ ឬក៏តំណាងនៃម្ចាស់ពាក្យសុំអន្តរាគមន៍ហ្នឹងមកជួប ឬក៏ចុះស្រាវជ្រាវបញ្ហាទាំងអស់ហ្នឹង នៅមូលដ្ឋានគាត់ជាក់ស្ដែងដើម្បីរកឲ្យឃើញឫសគល់នៃបញ្ហា រកផ្នែក ដែលពាក់ព័ន្ធដើម្បីជំរុញឲ្យមានដំណោះស្រាយសម្រាប់ពួកគាត់ឲ្យបានសមរម្យទៅ»។
ដីដែលមានទំនាស់ផ្លូវចូលនេះ ម្ចាស់ដើមគឺលោក សូ តែម បានលក់ឲ្យទៅលោក ជា ប៊ុនធឿន។ លុះដល់ថ្ងៃទី៨ មករា ឆ្នាំ២០១៦ លោក ជា ប៊ុនធឿន បានលក់បន្តឲ្យទៅលោក ជុន ធី ហើយបន្តកាន់កាប់រហូតដល់បច្ចុប្បន្ន។ ក្រោយមកលោក ជុន ធី បានបែងចែកដីជិត ១ហិកតារ នោះនៅភូមិកំប្រង់ ឃុំតាក្រី ស្រុកកំរៀង ឲ្យពលរដ្ឋក្រីក្រគ្មានផ្ទះសម្បែងចំនួន ៦៨សម្រាប់រស់នៅ។ មួយវិញទៀត ផ្លូវចូលទំហំ ៨ម៉ែត្រ បណ្ដោយ៤០ម៉ែត្រ ដែលចូលទៅកាន់ដីរបស់លោក ជុន ធី គឺនៅលើដីរបស់លោក ប៉ែន សុវណ្ណារ៉ា ដែលទុកសម្រាប់ឲ្យពលរដ្ឋចេញចូល ហើយដីនោះបានលក់ទៅឲ្យទីប្រឹក្សាប្រធានក្រុមប្រឹក្សាអភិវឌ្ឍន៍វិស័យកសិកម្ម និងជនបទលោក តួ ធានទឺ។ ចាប់តាំងពីលោក តួ ធានទឺ បានទិញដីនោះមក លោកបានបិទផ្លូវ មិនឲ្យពលរដ្ឋចេញចូលនោះទេ។
កាលពីថ្ងៃទី២ មករា ឆ្នាំ២០២៣ ពលរដ្ឋ ៦៨គ្រួសារ បានដាក់លិខិតស្នើសុំកិច្ចអន្តរាគមន៍ពីតំណាងរាស្ត្រមណ្ឌលបាត់ដំបង ដើម្បីឲ្យជួយដោះស្រាយបញ្ហាអ្នកមានអំណាចបិទផ្លូវចេញចូលផ្ទះសម្បែងរបស់ពួកគាត់។ ក៏ប៉ុន្តែមកទល់ពេលនេះ នៅតែមិនទាន់មានការឆ្លើយតបពីតំណាងរាស្ត្រវិញនោះទេ។
ពលរដ្ឋ និងមន្ត្រីសង្គមស៊ីវិល នៅតែស្នើដល់តំណាងរាស្ត្រ គួរប្រើតួនាទីរបស់ខ្លួនក្នុងការស្វែងរកដំណោះស្រាយជូនពលរដ្ឋ ឲ្យបានឆាប់រហ័ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។