ប្រជាពលរដ្ឋរស់នៅស្រុកសំបូរ ខេត្តក្រចេះអះអាងថា មានក្រុមហ៊ុនចំនួន២ បានរំលោភបំពានយកដីធ្លីនិងហាមឃាត់ពួកគេមិនឲ្យធ្វើស្រែចម្ការ ដោយសំអាងថា ដីទាំងនោះជាដីសម្បទានសេដ្ឋកិច្ចដែលក្រុមហ៊ុនទទួលបានពីរដ្ឋាភិបាល។ មន្ត្រីសង្គមស៊ីវិលជំរុញឲ្យអាជ្ញាធរស្វែងរកដំណោះស្រាយដោយសន្តិវិធី។
ប្រជាពលរដ្ឋរស់នៅឃុំកោះខ្ញែរ ស្រុកសំបូរ ខេត្តក្រចេះ អះអាងថា ក្រុមហ៊ុនវៀតណាមឈ្មោះ កាម៉ាដេនូ វេនឈ័រ (ខេមបូឌា) (Kamdhenu Ventures Cambodia Limited (KVCL)) ដែលសហការជាមួយក្រុមហ៊ុន កសិកម្ម យុវជន ស្វាយរៀង បានឈូសឆាយនិងហ៊ុមព័ទ្ធ យកដីស្រែចម្ការរបស់ប្រជាពលរដ្ឋជាង១០០គ្រួសារ និងដីព្រៃសហគមន៍ជាច្រើនហិកតារ ដោយតំណាងក្រុមហ៊ុនអះអាងថា ពួកគេទទួលបានដីសម្បទានសេដ្ឋកិច្ចពីរដ្ឋាភិបាលដើម្បីធ្វើការវិនិយោគដាំដំណាំអំពៅ។
ពលរដ្ឋរស់នៅឃុំកោះខ្ញែរ លោក ហ៊ី សេងហោ ប្រាប់វិទ្យុអាស៊ីសេរី នៅថ្ងៃទី៣ ខែមិថុនា ថា រយៈពេល២ថ្ងៃមកហើយ ដែលក្រុមហ៊ុនវៀតណាមហាមឃាត់ប្រជាពលរដ្ឋមិនឲ្យចូលទៅធ្វើស្រែចម្ការនៅលើដីរបស់ពួកគេ លើសពីនោះ ថែមទាំងចោទប្រជាពលរដ្ឋថា បានចូលទៅទន្ទ្រានយកដីរបស់ក្រុមហ៊ុនទៅវិញ ខណៈដីស្រែចម្ការពលរដ្ឋទាំងនោះមិនស្ថិតនៅក្នុងផែនទីនៃដីសម្បទានសេដ្ឋកិច្ចរបស់ក្រុមហ៊ុនកាម៉ាដេនូ វេនឈ័រ (ខេមបូឌា) និងក្រុមហ៊ុនកសិកម្ម យុវជន ស្វាយរៀង នោះឡើយ។ លោកចាត់ទុកករណីនេះ ជាការរំលោភបំពានយកដីធ្លីរបស់ប្រជាពលរដ្ឋ និងរំលោភសិទ្ធិកាន់កាប់ដីធ្លីរបស់ពលរដ្ឋស្របច្បាប់។
លោក ហ៊ី សេងហោ៖ «និយាយពីកាយក្រវាត់មួយសារហើយលើដីខ្ញុំខាងកើតឥឡូវគេថា ប៉ះពាល់ ហើយក្រវាត់នឹងនៅខាងលិចចម្ការខ្ញុំហើយបង្គោលព្រំនៅខាងលិចចម្ការខ្ញុំប្រហែល១០០ម៉ែត្រ ដល់ឥឡូវគេដើរមកថា ដីពួកខ្ញុំសុទ្ធតែជាប់ក្នុងផែនទីក្រុមហ៊ុននិយាយទៅយួនជាមេការក្រុមហ៊ុនដើរចុះដើរឡើង ពេលឃើញអាត្រាក់ចូល គឺមិនឲ្យចូលអ៊ីចឹងប្រជាពលរដ្ឋនៅម្តុំនឹង ឥឡូវជួបប្រទះការលំបាក ក្នុងការបង្កបង្កើនផល ខ្លះក៏បានធ្វើខ្លះក៏អត់»។
ចំណែកប្រធានសហគមន៍សំពុង លោក យ៉ប ចាន់ធំ ឲ្យដឹងថា ក្រៅពីដីស្រែចម្ការរបស់ប្រជាពលរដ្ឋនៅក្នុងឃុំក្រុមហ៊ុនមួយនេះ ក៏បានជីកប្រឡាយព័ទ្ធយកដីព្រៃសហគមន៍ជាង ១គីឡូម៉ែត្រ ៤ជ្រុងថែមទៀត។ លោកបន្ថែមថា ដីព្រៃសហគមន៍មានទំហំជាង ១ពាន់(១.៣៩៨)ហិកតារ ដែលជាជម្រកសត្វព្រៃគ្រប់ប្រភេទ និងជាកន្លែងពលរដ្ឋប្រកបរបរចិញ្ចឹមជីវិតប្រចាំថ្ងៃ។
លោក យ៉ប ចាន់ធំ៖ «ធ្វើអ៊ីចឹងអយុត្តិធម៌ ហើយប្រជាពលរដ្ឋខ្ញុំគាត់អត់ព្រម គាត់អត់ព្រមឲ្យធ្វើអ៊ីចឹង ដោយសារអត់ឯកភាពពីសហគមន៍ និងអាជ្ញាធរ សូមឲ្យគាត់ដោះស្រាយឲ្យបានហើយលុបប្រទ្បាយកាយឲ្យបានដូចដើមវិញ»។
ប្រជាពលរដ្ឋទទូចទៅរដ្ឋាភិបាលឲ្យជួយរកដំណោះស្រាយ និងត្រូវកាត់ឆ្វៀលដីស្រែចម្ការប្រជាពលរដ្ឋទុកអាស្រ័យផលដើម្បីផ្គត់ផ្គង់ជីវភាពគ្រួសារ ពីព្រោះប្រជាពលរដ្ឋនៅតំបន់នោះ បច្ចុប្បន្នរស់នៅពឹងផ្អែកទៅលើរបរដាំដំណាំកសិកម្ម គ្រាន់បានប្រាក់ដោះស្រាយជីវភាពគ្រួសារ និងសងបំណុលធនាគារ។ ពលរដ្ឋថា ប្រសិនបើរដ្ឋាភិបាលមិនជួយដោះស្រាយនោះទេ ពលរដ្ឋនៅតំបន់នោះនឹងនាំគ្នាចំណាកស្រុកទៅក្រៅប្រទេស ដើម្បីរកប្រាក់ផ្គត់ផ្គង់គ្រួសារ។
ជុំវិញរឿងនេះ វិទ្យុអាស៊ីសេរីមិនអាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា និងអភិបាលខេត្តក្រចេះ លោក វ៉ា ថន បានទេនៅថ្ងៃទី៣ ខែមិថុនា។ ចំណែកតំណាងក្រុមហ៊ុនទាំងពីរក៏វិទ្យុអាស៊ីសេរី មិនអាចទាក់ទងបានដែរ នៅថ្ងៃដដែលនេះ។
ទៅជាយ៉ាងណា សារព័ត៌មានក្នុងស្រុកបានចុះផ្សាយកាលពីឆ្នាំ២០២១ ដោយដកស្រង់សម្ដីអភិបាលខេត្តក្រចេះ លោក វ៉ា ថន ថា ក្រុមហ៊ុនវៀតណាមឈ្មោះ កាម៉ាដេនូ វេនឈ័រ (ខេមបូឌា) បានក្ស័យធនម្ដងរួចមកហើយ កាលពីឆ្នាំ២០១៧ ប៉ុន្តែនៅក្នុងឆ្នាំ២០២១ក្រុមហ៊ុនមួយនេះ បានសហការជាមួយក្រុមហ៊ុន កសិកម្ម យុវជន ស្វាយរៀង ដើម្បីវិនិយោគផលិតស្ករអំពៅ សម្រាប់ផ្គត់ផ្គង់រវាងវៀតណាមនិងកម្ពុជា។
មេឃុំកោះខ្ញែរ លោក អ៊ុក សាវី បញ្ជាក់យ៉ាងខ្លីថា ពលរដ្ឋពិតជាមានវិវាទដីធ្លីជាមួយក្រុមហ៊ុនវៀតណាមប្រាកដមែន។
លោក អ៊ុក សាវី៖ «បាទៗករណីនឹងមានមែន ខ្ញុំកំពុងរវល់ចុះបញ្ជីក្បាលឲ្យប្រជាពលរដ្ឋ»។
ទាក់ទិននឹងបញ្ហានេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិនៃសមាគមការពារសិទ្ធិមនុស្សអាដហុក (Adhoc) លោក យិន ម៉េងលី យល់ឃើញថា អាជ្ញាធរគួរតែយកយន្តការស្បែកខ្លាដែលរដ្ឋាភិបាលធ្លាក់ដាក់ចេញមកអនុវត្តក្នុងការស្វែងរកដំណោះស្រាយបញ្ហាវិវាទដីធ្លី រវាងពលរដ្ឋនិងក្រុមហ៊ុនឯកជន។ លោកបន្ថែមថា រដ្ឋាភិបាលត្រូវតែសិក្សាពីផលប៉ះពាល់ឲ្យបានត្រឹមត្រូវជាមុនសិន មុនអនុញ្ញាតឲ្យក្រុមហ៊ុនធ្វើការវិនិយោគ ដើម្បីកុំឲ្យពលរដ្ឋនៅមូលដ្ឋានរងគ្រោះបន្តទៀត។
លោក យិន ម៉េងលី៖ «រដ្ឋាភិបាលគប្បីតែធ្វើការវាយតម្លៃអំពីផលប៉ះពាល់ឲ្យបានច្បាស់ដើម្បីបញ្ចៀសបញ្ហាទាំងអស់នឹង ហើយការណាធ្វើការសិក្សាមិនបានច្បាស់លាស់ទេ ធ្វើឲ្យមានផលប៉ះពាល់ដល់ប្រជាពលរដ្ឋ»។
ពលរដ្ឋលើកឡើងទៀតថា រហូតមកដល់ពេលនេះ ពលរដ្ឋនៅមិនទាន់ទទួលបានដំណឹងពីការវិនិយោគរបស់ក្រុមហ៊ុនកាម៉ាដេនូ វេនឈ័រ (ខេមបូឌា) និងក្រុមហ៊ុន កសិកម្ម យុវជន ស្វាយរៀង នៅឡើយ ហើយទំហំផ្ទៃដីដែលក្រុមហ៊ុនទទួលបានក៏អាជ្ញាធរមិនបានប្រកាសជាសាធារណៈនោះដែរ។ ពួកគេចង់ឲ្យអាជ្ញាធរពាក់ព័ន្ធពិភាក្សាជាមួយប្រជាពលរដ្ឋជាមុនសិន មុនធ្វើការវិនិយោគឲ្យក្រុមហ៊ុនណាមួយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។