ពលរដ្ឋ ៥ ភូមិ​នៅ​ខេត្ត​ក្រចេះ​ទាមទារ​រក​អយុត្តិធម៌​ដោយសារ​ក្រុមហ៊ុន​វៀតណាម​រំលោភ​យក​ដី​ហើយ​ប្តឹង​ពួកគាត់​ទៅ​តុលាការ​ថែមទៀត

0:00 / 0:00

តុលាការ​ខេត្ត​ក្រចេះ​បាន​អនុញ្ញាត​ឱ្យ​តំណាង​ពលរដ្ឋ​ដែល​មាន​ជម្លោះ​ដីធ្លី ៦នាក់ វិល​ទៅ​ផ្ទះ​​វិញ​ហើយ ​បន្ទាប់​ពី​ពួកគាត់​បាន​បង្ហាញ​ខ្លួន​ចូល​ឆ្លើយ​បំភ្លឺ​រយៈ​ពេល២ ថ្ងៃ​ជាប់​គ្នា នៅ​ថ្ងៃ​ទី៨ ដល់​ថ្ងៃ​ទី៩ ខែ​តុលា តាម​បណ្តឹង​របស់​តំណាង​ក្រុមហ៊ុន​វៀតណាម។

ពលរដ្ឋ ៥ភូមិ​នៅ​ខេត្ត​ក្រចេះ​បារម្ភ​ថា ប្រសិន​បើ​អាជ្ញាធរ​អូស​បន្លាយ​ពេល​មិន​ដោះស្រាយ​ជម្លោះ​ដីធ្លី​នេះ​ជូន​ពួកគាត់​ អ្នក​ភូមិ​នឹង​គ្មាន​ដី​បង្ក​បង្កើន​ផល​ចិញ្ចឹម​ជីវិត​ទៀត​ឡើយ។

ពលរដ្ឋ​ជាង ២រយ ៥០គ្រួសារ (២៥២) រស់​នៅ​ក្នុង​ភូមិ​ចំនួន ៥​ ក្នុង​ឃុំ​កោះខ្ញែរ ស្រុក​សំបូរ ​​បង្ហាញ​ពី​ភាព​អយុត្តិធម៌ បន្ទាប់​ពី​ក្រុមហ៊ុន​វៀតណាម​ បាន​រំលោភ​យក​ដី​កសិកម្ម​របស់​ពួកគាត់​ទាំង​មូល​ ហើយ​ប្តឹង​តំណាង​ពួកគាត់ ៦នាក់ ទៅ​តុលាការ ដើម្បី​គំរាម​កំហែង​មិន​ឱ្យ​ពួក​តវ៉ា​ថែម​ទៀត​។

អ្នកភូមិ​ឱ្យ​ដឹង​ថា ជម្លោះ​ដីធ្លី​នេះ​កើត​​ឡើង​នៅ​ដើម​ឆ្នាំ​២០២៤ ក្រោយ​ពី​ក្រុមហ៊ុន​កសិកម្ម​យុវជន​ស្វាយរៀង (ខូ​អិល​ធីឌី) របស់​វៀតណាម​ចូល​ទៅ​វិនិយោគ​បន្ត ពីក្រុមហ៊ុន​ចំនួន ២ទៀត របស់​វៀតណាម​ដូចគ្នា ​​ដោយ​បាន​កាយ​ក្រវាត់​កំណត់​ព្រំ​ដី រំលោភ​យក​ដី​កសិកម្ម​របស់​ពលរដ្ឋចំនួន៥ ភូមិ​មាន​ផ្ទៃ​ដី​សរុប​ទំហំ ៥០០​ហិកតារ ឋិត​ក្នុង​ឃុំ​កោះខ្ញែរ ស្រុក​សំបូរ។

តំណាង​ពលរដ្ឋ​ដែល​កំពុង​ជាប់​បណ្តឹង​នៅ​តុលាការ លោកស្រី អែល រ៉ូស្សា ប្រាប់​វិទ្យុ​អាស៊ីសេរី​នៅ​ថ្ងៃ​ទី ០៩ តុលា​ថា គ្រួសារ​លោកស្រី​មាន​ដី ១៣​ហិកតារ អាស្រ័យ​ផល​តាំង​ពី​ឆ្នាំ​២០០៨ មុន​ពេល​ក្រុមហ៊ុន​វិនិយោគ​ក្នុង​តំបន់​នោះ។

លោក​ស្រី​ថា គ្រួសារ​លោកស្រី​មិន​អាច​ចូល​ទៅ​ដាំដុះ​លើ​ដី​របស់​ខ្លួន​បាន​ឡើយ​ ធ្វើ​ឱ្យ​គ្រួសារ​លោកស្រី ព្រម​ទាំង​ពលរដ្ឋ​ចំនួន ៥​ភូមិ​ផ្សេងទៀត កំពុង​​ជួប​ការ​លំបាក ​គ្មាន​ដី​បង្ក​បង្កើន​ផល​ចិញ្ចឹម​ជីវិត។

លោកស្រី អែល រ៉ូស្សា៖«ហើយ​ស្រែ​នោះ​ពួកគាត់​ធ្វើ​​ប្រចាំ​ឆ្នាំ ចិញ្ចឹម​​កូន​ផង​ចៅ​ផង​ គឺ​លំបាក​មិនមែន​តែ​គាត់​ទេ សូម្បី​ខ្ញុំ​ក៏​ត្រូវ​ការ​ដាំដុះ​ដែរ ប៉ុន្តែ​ឥឡូវ​ខ្ញុំ​រង​ទុក្ខ​ខ្លាំង​ណាស់​ ខ្ញុំ​រង​គ្រោះ​មែន​ទែន​រាល់​ថ្ងៃ​នេះ»។

កាលពីដើម​ឆ្នាំ​២០២៤ តំណាង​ពលរដ្ឋ ៤៨នាក់ ក្នុង​ចំណោម​ពលរដ្ឋ​២៥២​គ្រួសារ បាន​ទៅ​ដាក់​ញត្តិ​នៅ​រាជធានី​ភ្នំពេញ​ដោយ​ស្នើ​ឱ្យ​ក្រសួង​ពាក់ព័ន្ធ ​ និង​ខុទ្ទកាល័យ​លោក​នាយក​រដ្ឋ​មន្ត្រី ហ៊ុន ម៉ាណែត អន្តរាគមន៍​កាត់​ឆ្វៀល​ដី​ចំនួន ៥០០ហិកតា​ពី​ក្រុមហ៊ុន​វៀតណាម​ ដើម្បី​ប្រគល់​ជូន​ពួកគាត់​អាស្រ័យ​ផល​វិញ។ ក៏​ប៉ុន្តែ​រហូត​មក​ទល់​ពេល​នេះ គ្មាន​ដំណោះ​ស្រាយ​នៅ​ឡើយ​ទេ។

_ក្រចេះ១.jpg
ទិដ្ឋភាព​ដី​របស់​ពលរដ្ឋ ក្នុង​ឃុំ​កោះខ្ញែរ ស្រុក​សំបូរ ខេត្ត​ក្រចេះ ដែល​ពលរដ្ឋ​អះអាង​ថា ក្រុមហ៊ុន​វៀតណាម​រំលោភ​យក​ទាំងមូល កាល​ពី​ថ្ងៃ​ទី៩ តុលា ២០២៤ ។ រូប​ពលរដ្ឋ​ផ្តល់​ឱ្យ

អ្នកភូមិ​ថា ក្រុមហ៊ុន​បាន​ហ៊ុមព័ទ្ធ​យក ដី​របស់​ពួកគាត់​ទាំងមូល​ ធ្វើ​ឱ្យ​ពលរដ្ឋ​ដែល​មាន​ជីវភាព​ពឹង​ផ្អែក​លើ​ការ​ធ្វើ​ស្រែ​ចម្ការ បាត់បង់​ឆ្នាំង​បាយ ចិញ្ចឹម​ជីវិត ជំពាក់​បំណុល​ធនាគារ និង​ធ្លាក់​ខ្លួន​ក្រីក្រ។

តំណាង​ពលរដ្ឋ​ម្នាក់​ទៀត លោក ភេ ឡៃ និយាយ​ថា ពេល​នេះ​ពលរដ្ឋ​ខ្លាច​រអា មិន​ហ៊ាន​ចូល​ទៅ​បង្ក​បង្កើន​ផល លើ​ដី​ក្នុង​តំបន់​នោះ​ទេ ព្រោះ​ក្រុមហ៊ុន​គំរាមកំហែង និង​ហាម​ឃាត់។

លោក ភេ ឡៃ៖«ចង់​ឱ្យ​ក្រុមហ៊ុន​ដក​ពាក្យ​បណ្ដឹង​ពី​ពលរដ្ឋ​វិញ​ទៅ​មិន​ចង់​មាន​បញ្ហា​ ហើយ​ដី​ក៏​គួរ​ធ្វើ​ប្លង់​ជូន​ពលរដ្ឋ​វិញ​មក​ឱ្យ​ពួកគាត់​មាន​កម្លាំង​ចិត្ត បើ​មិន​អ៊ីចឹង​ពលរដ្ឋ​អត់​មាន​អី​ធ្វើ​ទេ​មាន​តែ​ជំពាក់​ធនាគារ​ និង​រក​អ្វី​ហូប​មិន​បាន​ទេ​រាល់​ថ្ងៃ​នេះ»។

វិទ្យុ​អាស៊ីសេរី​មិន​ទាន់​អាច​ទាក់ទង សុំ​ការ​បំភ្លឺ​រឿង​នេះ​ពី​អភិបាល​ខេត្ត​ក្រចេះ លោក វ៉ា ថន បាន​នៅ​ឡើយ​ទេ នៅ​ថ្ងៃទី៩ តុលា ដោយ​ទូរស័ព្ទ​ហៅ​ចូល​តែ​គ្មាន​អ្នក​លើក។ រីឯ​អ្នក​នាំពាក្យ​សាលា​ដំបូង​ខេត្ត​ក្រចេះ លោក ទីវ វុធធេនក៏​មិន​ទាន់​អាច​ទាក់ទង​បាន​ដែរ នៅ​ថ្ងៃ​ដដែល​នេះ។

ចំណែក​មេឃុំ​កោះខ្ញែរ លោក អ៊ុក សារី មាន​ប្រសាសន៍​ថា ពលរដ្ឋ​ខ្លះ​ចូល​ទៅ​កាន់​កាប់​ដី​ក្នុង​តំបន់​នោះ​តាំង​ពី​ឆ្នាំ​២០០៨ និង​ពលរដ្ឋ​ខ្លះ​ទៀត​ចូល​ទៅ​អាស្រ័យ​ផល ក្នុង​ពេល​ក្រុមហ៊ុន​ផ្អាក​ដំណើរ​ការ​កាល​ពី​ឆ្នាំ២០១៧។

លោក​ថា ដី​ក្នុង​តំបន់​នោះ​មាន​ជីវជាតិ អំណោយ​ផល​សម្រាប់​ការ​ធ្វើ​កសិកម្ម ហើយ​ឋិត​ក្នុង​តំបន់​ខ្ពស់​ផ្តល់​ភាព​ងាយ​ស្រួល​ឱ្យ​ពលរដ្ឋ​ធ្វើស្រែ​ចម្ការ​ មិន​ប្រឈម​នឹង​ទឹក​ជំនន់ ប្រសិន​បើ​រដ្ឋាភិបាល​កាត់​ឆ្វៀល​ប្រគល់​ជូន​ពលរដ្ឋ​ជា​រឿង​ល្អ​ដើម្បី​បញ្ចប់​ជម្លោះ។

លោក អ៊ុក សារី៖ «ខ្ញុំ​ចង់​អញ្ចេះ​សុំ​អាជ្ញាធរ​ខេត្ត​ជួយ​ដោះស្រាយ​ ឥលូវ​អ្នក​បាន​ធ្វើ​ស្រែ​ហ្នឹង​ជួយ​ដោះស្រាយ​ទៅ បង្ក​បង្កើន​ផល​ប្រចាំ​ថ្ងៃ»។

ជុំវិញ​រឿង​នេះ អនុ​ប្រធាន​ផ្នែក​សិទ្ធិ​មនុស្ស ដីធ្លី និង​ធន​ធាន​ធម្មជាតិ​នៃ​សមាគម​ការពារ​សិទ្ធិ​មនុស្ស​អាដហុក (Adhoc) លោក យិន ម៉េងលី ដែល​ចុះ​អង្កេត​រឿង​នេះ​រក​ឃើញ​ថា បញ្ហា​ដីធ្លី​នេះ​កើត​មាន​ឡើង​ដោយសារ​ក្រុមហ៊ុន​ផ្អាក​ដំណើរ​ការ​ហើយ​ទុក​ដី​នៅ​ទំនេរ​ចោល​ជា​ច្រើន​ឆ្នាំ ធ្វើ​ឱ្យ​ពលរដ្ឋ​ចូល​ទៅ​បង្ក​បង្កើន​ផល ព្រម​ទាំង​មាន​ការ​ទិញ​លក់​ដី​តៗ​គ្នា។

លោក​ស្នើ​ឱ្យ​អាជ្ញាធរ​ពិនិត្យ​និង​អង្កេត​ឱ្យ​ច្បាស់​លាស់​ករណី​នេះ​ដោយ​ត្រូវ​កាត់​ឆ្វៀល​ដី​ជូន​ពលរដ្ឋ​អាស្រ័យ​ផល​ជាក់​ស្តែង។

លោក យិន ម៉េងលី៖«ការ​ប្ដឹង​ពលរដ្ឋ​ទៅ​តុលាការ​មិនមែន​ជា​រឿង​ល្អ​ទេ​ ខ្ញុំ​សំណូមពរ​ខេត្ត​ឬ​អភិបាល​កាត់​ឆ្វៀល​ដី​នេះ​ចេញ ព្រោះ​ដី​នេះ​មិនមែន​ជា​ដី​កម្មសិទ្ធិ​ក្រុមហ៊ុន​តែ​ម្នាក់​ ដូច្នេះ​រដ្ឋាភិបាល​មាន​សិទ្ធិ​គ្រប់​គ្រាន់​ក្នុង​ការ​កាត់​ឆ្វៀល​ឱ្យ​ពលរដ្ឋ»។

ក្រុមហ៊ុន កាម៉ាដេនូ វេនឈ័រ (ខេមបូឌា)(Kamdhenu Ventures Cambodia Limited (KVCL) Co., Ltd) និង​ក្រុមហ៊ុន អិន ខេ អេហ្គ្រី (ខេមបូឌា) (NK Agri (cambodia) Co., Ltd) ទទួល​សិទ្ធិ​វិនិយោគ​ដី​សម្បទាន​សេដ្ឋកិច្ច ពី​រដ្ឋាភិបាល​ ជាង ១ ម៉ឺន ៧​ពាន់​ហិកតារ (១៧.០០០)កាល​ពី​ឆ្នាំ២០០៩ ដោយ​វិនិយោគ​ដំណាំ​អំពៅ។

ក្រុមហ៊ុន​ទាំង​នេះ​ផ្អាក​ដំណើរ​ការ និង​ទុក​ដី​សម្បទាន​ទំនេរ​ចោល​កាលពី​ឆ្នាំ​២០១៧ រហូត​ដល់​ឆ្នាំ២០២១​ ក្រុមហ៊ុន​បាន​សហការ​ជាមួយ​ក្រុមហ៊ុន​កសិកម្ម​យុវជន ស្វាយរៀង ផលិត​ស្ករ​អំពៅ ដើម្បី​នាំ​ចេញ​ទៅ​លក់​នៅ​ប្រទេស​វៀតណាម។

វិទ្យុ​អាស៊ីសេរី​មិន​ទាន់​អាច​ទាក់ទង​តំណាង​ក្រុមហ៊ុន កសិកម្ម​យុវជន ស្វាយរៀង ដើម្បី​សុំ​ការ​បំភ្លឺ​រឿង​នេះ​បាន​នៅ​ឡើយ​ទេ នៅ​ថ្ងៃទី៩ តុលា។

ពលរដ្ឋ​អះអាង​ថា ក្រោយ​ពី​ក្រុមហ៊ុន កសិកម្ម​យុវជន ស្វាយរៀង ចូល​ទៅ​វិនិយោគ​តំបន់​នោះ​តាំង​ពី​ឆ្នាំ២០២១ ហើយ​បាន​បង្កើត​រោង​ចក្រ​ផលិត​ស្ករ​អំពៅ​ខ្នាត​ធំ ក្រុមហ៊ុន​នេះ​បាន​ហ៊ុមព័ទ្ធ​រំលោភ​យក​ដី​ស្រែ​ចម្ការ​របស់​ពលរដ្ឋ​ជាបន្តបន្ទាប់ ចំនួន​៥ភូមិ​ ក្នុង​ស្រុក​សំបូរ ហើយ​បាន​ឈូស​ឆាយ​បំផ្លាញ​ផល​ដំណាំ​កសិកម្ម និង​ដុត​ផ្ទះ​សម្បែង​របស់​ពលរដ្ឋ​១​គ្រួសារ ព្រមទាំង​ហ៊ុមព័ទ្ធ​យក​ដី​ព្រៃ​សហគមន៍​មួយ​ផ្នែក​ថែម​ទៀត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។