អាជ្ញាធរស្រុកតំបែរ ខេត្តត្បូងឃ្មុំ អំពាវនាវឲ្យពលរដ្ឋ រស់នៅក្នុងឃុំត្រពាំងព្រីង បញ្ឈប់សកម្មភាពតវ៉ាលើដីទំនាស់ ដែលកាន់កាប់ដោយក្រុមហ៊ុនចិន តទៅទៀត ដោយសារថា ខាងក្រុមហ៊ុនទទួលបានសិទ្ធិស្របច្បាប់គ្រប់គ្រងដីនោះ។ ចំណែកខាងប្រជាពលរដ្ឋ ថានឹងមិនឈប់ធ្វើការតវ៉ាទេ ដរាបណាមិនទាន់មានដំណោះស្រាយណាមួយ ដែលអាចទទួលយកបាន ។
ការប្រឈមពាក្យសំដីដាក់គ្នា រវាងប្រជាពលរដ្ឋឃុំត្រពាំងព្រីងប្រមាណ ១០០នាក់ និងក្រុមអាជ្ញាធរស្រុកតំបែរស្លៀកពាក់ស៊ីវិលប្រមាណ ២០នាក់ កើតឡើងនៅចំណុចអូរកាត់ផ្លូវ ក្នុងដីមានទំនាស់ជាមួយក្រុមហ៊ុនចម្ការកៅស៊ូរបស់ចិន ហាមិនីវេន អ៊ិនវេសមេន (Hamenivent Investment)។
អាជ្ញាធរស្រុកតំបែរ ស្នើឲ្យប្រជាពលរដ្ឋនៅភូមិស្រែប្រាំង និងភូមិបុសស្នោរ បញ្ឈប់ការតវ៉ា ទាមទារដីធ្លីពីក្រុមហ៊ុនចិន តទៅទៀត ព្រោះក្រុមហ៊ុនទទួលបានសិទ្ធិអភិវឌ្ឍន៍ស្របច្បាប់ពីរដ្ឋាភិបាលរួចហើយ។ អាជ្ញាធរក៏ព្រមានតាមចាប់ខ្លួនតំណាងពលរដ្ឋដែលរត់គេចខ្លួន យកទៅផ្ដន្ទាទោសតាមច្បាប់ ដោយចោទប្រកាន់ពួកគេថា ញុះញង់ឲ្យពលរដ្ឋចេញតវ៉ាទាមទារដីពីក្រុមហ៊ុន ។ នេះគឺជាសារអំពាវនាវ និងព្រមានរបស់អាជ្ញាធរទៅពលរដ្ឋ ដែលចាក់តាមឧបករណ៍បំពង់សំឡេងលើរថយន្ត នៅទីតាំងដីមានទំនាស់៖ «សូមបងប្អូនដែលនៅសេសសល់ មេត្តាដកខ្លួនចេញនិងចូលរួមជាមួយអាជ្ញាធរ និងកម្លាំងមានសមត្ថកិច្ចដើម្បីស្រាវជ្រាវ រកមុខអង្គការ និងជនខិលខូចមួយចំនួនតូច ដែលបានបោកប្រាស់បងប្អូនកន្លងមក ដើម្បីមានវិធានការទៅតាមច្បាប់ និងទៅបញ្ចប់ទំនាស់ក្នុងពេលឆាប់ៗ ខាងមុខនេះ»។
ក្នុងជម្លោះដីធ្លីនេះ សាលាដំបូងខេត្តត្បូងឃ្មុំ ថ្មីៗ នេះ បានផ្ដន្ទាទោសតំណាងពលរដ្ឋ៨នាក់ ឲ្យជាប់ពន្ធនាគារ ៧ឆ្នាំ ពីបទកំហែងយកដោយមានស្ថានទម្ងន់ទោសដោយសារប្រើប្រាស់អាវុធ នៅភូមិស្រែប្រាំង ឃុំត្រពាំងព្រីង កើតឡើងកាលពីថ្ងៃទី១៨ ខែកុម្ភៈ ឆ្នាំ២០១៦។ តំណាងពលរដ្ឋម្នាក់ លោក សែម សាង ត្រូវបន្តជាប់ឃុំក្នុងពន្ធនាគារ ចំណែកពលរដ្ឋ ៧នាក់ទៀត រត់គេចខ្លួនពីការតាមរបស់អាជ្ញាធរ បន្ទាប់ពីតុលាការចេញសាលក្រមកាត់ទោសពួកគាត់ កាលពីថ្ងៃទី៣ ខែមិថុនា។
ពលរដ្ឋម្នាក់ដែលចូលរួមក្នុងតវ៉ា នៅថ្ងៃទី៨ ខែមិថុនា លោកស្រី ម៉ៅ សេងហាក់ ថ្លែងថា ពួកគាត់នឹងបន្តការតវ៉ារហូតដល់មានដំណោះស្រាយជាថ្មីដែលអាចទទួលបាន ពីអាជ្ញាធរខេត្ត និងក្រសួងដែនដី៖ «ក្នុងនាមជាពលរដ្ឋម្នាក់នៅភូមិស្រែប្រាំង អត់ឈប់ទេ នៅតែតវ៉ារកដំណោះស្រាយទៅមុខទៀត ហើយយកអ្វីមកបញ្ជាក់ឲ្យច្បាស់ថាអាហ្នឹងជារបស់ក្រុមហ៊ុនពិតមែន មិនមែនយកតែពាក្យសម្ដី និងកម្លាំងមកគំរាមកំហែងអ៊ីចឹង ពួកខ្ញុំអត់ព្រមទេ»។.
អាស៊ីសេរីព្យាយាមសុំការបកស្រាយរឿងនេះ ពីអភិបាលស្រុកតំបែរ លោក សុខ សារិទ្ធ ប៉ុន្តែលោកប្រាប់ថា ជាប់រវល់ប្រជុំ ចំណែក អភិបាលខេត្តត្បូងឃ្មុំ លោក ជាម ច័ន្ទ សោភ័ណ មិនទទួលទូរស័ព្ទនិយាយអំពីដំណោះស្រាយចំពោះវិវាទដីធ្លីមួយនេះទេ។
អាស៊ីសេរី មិនអាចទាក់ទងតំណាងក្រុមហ៊ុន ហាមិនីវេន អ៊ិនវេសមេន (Hamenivent Investment) ដើម្បីសាកសួររឿងនេះបានទេ នៅថ្ងៃទី៨ មិថុនា។
មន្ត្រីសិទ្ធិមនុស្សនៃអង្គការលីកាដូ ប្រចាំខេត្តត្បូងឃ្មុំ លោក សេង ធុយ មានប្រសាសន៍ថា ទាំងអាជ្ញាធរខេត្ត និងក្រសួងដែនដី គួរកោះហៅតំណាងពលរដ្ឋ និងភាគីក្រុមហ៊ុនចិន ទៅពិភាក្សាគ្នា ដោយសន្តិវិធី និងចេញដំណោះស្រាយរួមមួយ ដែលគ្រប់ភាគីអាចទទួលបាន៖ «ស្នើឲ្យមានការដោះស្រាយឲ្យមានតម្លាភាព និងដោយសន្តិវិធីរវាងពលរដ្ឋ និងខាងតំណាងក្រុមហ៊ុន កុំឲ្យអូសបន្លាយតទៅទៀត។ បើសិនជា មិនធ្វើបែបហ្នឹងទេ តំណាងពួកគាត់មិនបានចូលរួមទេ ជាហេតុធ្វើឲ្យពលរដ្ឋគាត់គិតថា ការសម្រេចហ្នឹង គឺមានភាពមិនប្រក្រតី ដែលធ្វើឲ្យគាត់មានការទាមទារច្រើនអ៊ីចឹង»។
អ្នកភូមិ អះអាងថា ភាគីក្រុមហ៊ុន នៅតែបន្តប្រើគ្រឿងចក្រ ឈូសឆាយបំផ្លាញដីចម្ការ ដំឡូងមី ស្វាយចន្ទីរបស់អ្នកភូមិ ដោយសំអាងថា មន្ទីរសុរិយោដី ស្រុកតំបែរ ខេត្តត្បូងឃ្មុំ បានកាត់ដីព្រៃសហគមន៍ទំហំជាង ៤រយហិកតារ (៤២១.៧០) ឲ្យក្រុមហ៊ុនរួចហើយ។ អាស៊ីសេរី ក៏មិនអាចសុំការឆ្លើយ ពីអ្នកនាំពាក្យក្រសួងរៀបចំដែនដី លោក សេង ឡូត និងលោក ឡោ ដាវុធ រួមទាំងប្រធានមន្ទីររៀបចំដែនដីនគរោបនីយកម្មនិងសំណង់ ខេត្តត្បូងឃ្មុំ លោក ប៉ូច សុធារិទ្ធ បានទេដោយលោកទាំងបីនាក់ មិនទទួលទូរស័ព្ទ។
ពលរដ្ឋ ឲ្យដឹងថា ដីជាង ៤០០ហិកតារ គឺជាចំណែកដីដែលអាជ្ញាធរកាត់ចេញពីដីព្រៃសហគមន៍ត្រពាំងព្រីងជាង ១ពាន់២រយហិកតារ ទៅឲ្យក្រុមហ៊ុន។ ពួកគាត់ថា ខាងក្រុមហ៊ុន នៅតែអះអាងថា ខ្លួនបានផ្ដល់សំណងឲ្យពលរដ្ឋរួចហើយ ប៉ុន្តែគិតមកដល់ពេលនេះ គ្មានពលរដ្ឋណា បានទទួលសំណង ពីវិវាទដីធ្លីនេះនៅឡើយទេ។
កាលពីខែកក្កដា ឆ្នាំ២០១៩ ក្រសួងដែនដី សម្រេចច្រាលចោលសំណើពលរដ្ឋ ដែលស្នើសុំទាមទារដីព្រៃសហគមន៍ យកមកកាន់កាប់វិញ។ ក្រសួងអះអាង ក្នុងសេចក្ដីប្រកាសព័ត៌មានរបស់ខ្លួនថា ប្រជាពលរដ្ឋ និងអាជ្ញាធរមូលដ្ឋាន ព្រមព្រៀងគ្នាលក់ដីឱ្យទៅក្រុមហ៊ុនចម្ការកៅស៊ូរបស់ចិន ហាមិនីវេន អ៊ិនវេសមេន (Hamenivent Investment) តាំងពីឆ្នាំ២០១១ មក ហើយក្រុមហ៊ុនក៏បានចុះបញ្ជីរួចរាល់ដែរ។
ទោះជាយ៉ាងណា ពលរដ្ឋបដិសេធការលើកឡើងនេះ។ ពួកគាត់ នៅតែស្នើឲ្យក្រសួងដែនដី ចុះស៊ើបអង្កេតវិវាទនេះឡើងវិញ ប្រកបដោយឯករាជភាព និងភាពត្រឹមត្រូវ ដោយមិនគួរផ្អែកតាមរបាយការណ៍ថ្នាក់ឃុំ ស្រុក និងខេត្តនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។