តុលាការខេត្តត្បូងឃ្មុំគ្រោងលើកយកសំណុំរឿងសកម្មជននយោបាយ និងសកម្មជនដីធ្លីជាង ១០នាក់ ទៅជំនុំជម្រះនៅសប្ដាហ៍ក្រោយ។ មេធាវី និងមន្ត្រីសិទ្ធិមនុស្សជំរុញឱ្យតុលាការទម្លាក់ចោលបទចោទប្រកាន់លើសកម្មជនទាំងនោះ ហើយដោះលែងអ្នកជាប់ឃុំឱ្យមានសេរីភាពវិញ។
តុលាការខេត្តត្បូងឃ្មុំបានកំណត់យកថ្ងៃទី៧ មេសា ជាថ្ងៃបើកសវនាការជំនុំជម្រះរឿងក្ដីសកម្មជននយោបាយ និងសកម្មជនដីធ្លីចំនួន ១៤នាក់ បន្ទាប់ពីលើកពេលសវនាការកាលពីចុងខែកុម្ភៈកន្លងទៅ។
មេធាវីសមាគមអាដហុក (ADHOC) ដែលជួយការពារក្ដីឱ្យសកម្មជន ២នាក់ ក្នុងចំណោម ១៤នាក់ គឺលោក សំ ទិត្យសីហា ប្រាប់អាស៊ីសេរីថា លោកបានទទួលលិខិតជូនដំណឹងរបស់តុលាការហើយ ហើយលោកនឹងទៅការពារកូនក្ដីតាមកាលកំណត់។ លោករំពឹងថា សវនាការនឹងប្រព្រឹត្តទៅដូចការគ្រោងទុក ព្រោះការពន្យារពេលតទៅទៀត នឹងប៉ះពាល់ដល់សិទ្ធិកូនក្ដីរបស់លោក។ លោកនៅតែអះអាងថា កូនក្តីរបស់លោកមិនបានប្រព្រឹត្តបទល្មើសអ្វីឡើយ ហើយសំណូមពរដល់តុលាការឱ្យដោះលែងពួកគេឱ្យមានសេរីភាពវិញ៖ « ខ្ញុំសង្ឃឹមថា ខាងតុលាការនឹងពិចារណាដោះលែងពួកគាត់ឱ្យមានសេរីភាព ជួបជុំក្រុមគ្រួសារវិញ ព្រោះករណីដែលកូនក្ដីរបស់ខ្ញុំកំពុងតែជាប់ឃុំនោះ គឺគាត់អត់មានបានប្រព្រឹត្តខុសដូចការចោទប្រកាន់នោះទេ។ គាត់គ្រាន់តែជាសកម្មជនដីធ្លីម្នាក់ ហើយគាត់មិនដែលមានសកម្មភាពណាមួយ ដែលចូលទៅក្នុងគណបក្ស ឬក៏ធ្វើឱ្យប៉ះពាល់ដល់សណ្ដាប់ធ្នាប់សាធារណៈ ដោយសារតែការញុះញង់អ្វីហ្នឹងទេ » ។
តុលាការខេត្តត្បូងឃ្មុំបានចោទប្រកាន់មនុស្ស ១៤នាក់ ក្នុងសំណុំរឿងតែមួយ ដោយក្នុងនោះ ៨នាក់ កំពុងជាប់ឃុំក្នុងពន្ធនាគារ។ អាជ្ញាធរបានចាប់ខ្លួនពួកគេ កាលពីចុងឆ្នាំ២០២០ និងដើមឆ្នាំ២០២១ ដោយសាររឿងពាក់អាវដែលមានពាក្យថា អរគុណសន្តិភាពតែត្រូវគោរពមាត្រា២ នៃរដ្ឋធម្មនុញ្ញ និងការប្រមូលផ្តុំគ្នាតវ៉ានៅមុខស្ថានទូតចិននៅរាជធានីភ្នំពេញ ក្នុងអំឡុងខួបកិច្ចព្រមព្រៀងសន្តិភាពទីក្រុងប៉ារីស ២៣ តុលា។ ក្នុងចំណោមអ្នកជាប់ឃុំទាំង ៨នាក់នោះ ៦នាក់ គឺជាសកម្មជនបក្សសង្រោះជាតិ ហើយពីរនាក់ទៀត ជាតំណាងសហគមន៍កសិករ និងសកម្មជនដីធ្លី។ តុលាការបានចោទប្រកាន់ពួកគេផ្សេងៗ គ្នាពីបទផ្ដើមគំនិត សមគំនិត និងញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ (LICADHO) លោក អំ សំអាត មានប្រសាសន៍ថា សំណុំរឿងនេះមានចរិតជាសំណុំរឿងនយោបាយ ព្រោះក្រុមសកម្មជនទាំងនោះរងការចោទប្រកាន់ដោយសារសេរីភាពបញ្ចេញមតិរបស់ពួកគេ។ លោកបន្ថែមថា អាជ្ញាធរហាក់មិនមានភស្តុតាងគ្រប់គ្រាន់ដើម្បីចោទប្រកាន់សកម្មជនទាំង ១៤នាក់ ឱ្យស្របទៅនឹងបទចោទនោះឡើយ៖ « បើយើងមើលទៅលើការចោទប្រកាន់ហ្នឹង ភស្តុតាងភាគច្រើនទៅលើការទំនាក់ទំនង។ ការទំនាក់ទំនង ជួនកាលជាឯកជនភាពរបស់ពួកគេ ហើយយកមកចោទប្រកាន់ជាបទល្មើស អាហ្នឹងខ្ញុំគិតថា វាក៏ជាការរំលោភលើសេរីភាពបញ្ចេញមតិរបស់ពួកគេដែរ » ។
អាស៊ីសេរីមិនអាចទាក់ទងអ្នកនាំពាក្យតុលាការខេត្តត្បូងឃ្មុំ លោក ថេង ជាង ដើម្បីសុំអធិប្បាយរឿងនេះបានទេ នៅថ្ងៃទី១ មេសា ដោយទូរស័ព្ទចូលជាច្រើនដង តែមិនមានអ្នកទទួល។
ចាប់តាំងពីឆ្នាំ២០២០ មក របបលោក ហ៊ុន សែន បានចាប់ខ្លួនសកម្មជននយោបាយ សកម្មជនសង្គម អ្នកការពារបរិស្ថាន យុវជន និងអ្នកបញ្ចេញមតិរិះគន់ ដាក់ពន្ធនាគារប្រមាណ ៨០នាក់ហើយ។ អ្នកទាំងនោះរងការចោទប្រកាន់ពីបទរួមគំនិតក្បត់ បទញុះញង់ ឬបទជេរប្រមាថជាដើម។ ក៏ប៉ុន្តែសហគមន៍ជាតិ និងអន្តរជាតិ រួមទាំងក្រុមអ្នកជំនាញសិទ្ធិមនុស្សអង្គការសហប្រជាជាតិផង បានចាត់ទុកករណីទាំងនេះថា ជារឿងនយោបាយ និងទាមទារឱ្យអាជ្ញាធរដោះលែងពួកគេឱ្យមានសេរីភាពវិញ។ ជាពិសេសពួកគេទទូចដល់របបលោក ហ៊ុន សែន ឱ្យងាកមកគោរពច្បាប់ជាតិ និងអន្តរជាតិវិញ ដោយបញ្ឈប់ទង្វើគាបសង្កត់ និងបង្ក្រាបលើសិទ្ធិសេរីភាពពលរដ្ឋតទៅទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។