អ្នកស្រុកកណ្ដាលស្ទឹង ខេត្តកណ្ដាល ដែលរងផលប៉ះពាល់ពីការអភិវឌ្ឍព្រលានយន្តហោះថ្មីអះអាងថា កម្មករក្រុមហ៊ុន អូ.ស៊ី.អាយ.ស៊ី (OCIC) ប្រើគ្រឿងចក្រកាយផ្ដាច់ផ្លូវពេលយប់ នៅទីតាំងដីចម្រូងចម្រាស ដោយគ្មានជូនដំណឹងពលរដ្ឋជាមុន។ អ្នកភូមិ មិនជំទាស់នឹងការសាងសង់របស់ក្រុមហ៊ុនទេ តែស្នើសុំអាជ្ញាធរពន្លឿនការដោះស្រាយវិវាទដីធ្លីនេះឲ្យបានឆាប់នូវសំណងមួយដែលអាចទទួលបាន។
ជម្លោះដីធ្លីរវាងពលរដ្ឋចំនួន៣ឃុំ ក្នុងខេត្តកណ្ដាល និង១ឃុំក្នុងខេត្តតាកែវ ជាមួយក្រុមហ៊ុន OCIC របស់ឧកញ៉ា ពុង ឃាវសែ អាជ្ញាធរនៅមិនទាន់ដោះស្រាយបញ្ចប់នៅឡើយ ខណៈខាងក្រុមហ៊ុនបន្តឈូសឆាយដីស្រែនិងផ្លូវ ធ្វើឲ្យអ្នកភូមិតវ៉ាជាញឹកញាប់ នៅទីតាំងដីមានទំនាស់។
តំណាងប្រជាពលរដ្ឋលោក ទួន វណ្ណៈ ប្រាប់វិទ្យុអាស៊ីសេរីនៅថ្ងៃទី១ ខែកញ្ញាថា ខាងក្រុមហ៊ុនបានលួចកាយផ្ដាច់ផ្លូវលំមួយខ្សែដើម្បីកំណត់យកទីតាំងនោះធ្វើជាផ្លូវយន្តហោះ កាលពីយប់ថ្ងៃទី៣១ ខែសីហា។
លោកបន្តថា ការផ្ដាច់ផ្លូវនេះ គឺបង្កបញ្ហាលំបាកជាច្រើនដល់ប្រជាពលរដ្ឋ ក្នុងការធ្វើការដំណើរទៅមក ពិបាកដឹកស្រូវទៅលក់ និងមិនអាចទៅមើលដីស្រែបានដូចសព្វដង។ លោកបញ្ជាក់ថា ពលរដ្ឋទាំងអស់ដែលបន្តការតវ៉ានេះ គឺមិនជំទាស់នឹងគម្រោងអភិវឌ្ឍន៍របស់ក្រុមហ៊ុននិងរដ្ឋាភិបាលឡើយ តែស្នើសុំឲ្យអាជ្ញាធរនិងក្រុមហ៊ុនដោះស្រាយបញ្ចប់បញ្ហាដីធ្លីនេះជូនពលរដ្ឋជាមុនសិន ដោយផ្ដល់សំណងដែលអាចទទួលយកបាន៖ «មិនចំពោះតែខ្ញុំមួយទេ សូម្បីតែប្រជាពលរដ្ឋ ក៏មិនឯកភាពនឹងការកាយហ្នឹងដែរ ព្រោះផ្លូវប្រជាពលរដ្ឋធ្វើចរាចរហើយមិនទាន់ដោះស្រាយដីធ្លីរបស់គាត់។ អ៊ីចឹង ! បានន័យថា ខុសច្បាប់ហើយ។ សំណូមពរសម្ដេចពុក សម្ដេចម៉ែ មេត្តាអាណិតកូនចៅផង។ ជួយដោះស្រាយដីធ្លីឲ្យកូនចៅឲ្យបានសមរម្យមក។ កូនចៅមិនដែលប្រឆាំងនឹងការអភិវឌ្ឍនោះទេ ប៉ុន្តែទន្ទឹមនឹងការអភិវឌ្ឍ សូមសម្ដេចពុក សម្ដេចម៉ែ មេត្តាជួយកូនចៅធ្វើយ៉ាងណាជួបទុក្ខលំបាកឲ្យសមស្របការអភិវឌ្ឍជាតិ ដើម្បីប្រជាពលរដ្ឋទៅ»។
វិទ្យុអាស៊ីសេរីមិនអាចសុំការឆ្លើយតបរឿងនេះ ពីតំណាងក្រុមហ៊ុន OCIC នៅព្រលានយន្តហោះថ្មីលោក ជូ កុកសាយ បានទេ ដោយលោកប្រាប់ថាជាប់រវល់។
ជុំវិញរឿងនេះ អភិបាលខេត្តកណ្ដាលលោក គង់ សោភ័ណ្ឌ ឲ្យដឹងថា ការកាយកំណាត់ផ្លូវនោះ គឺដើម្បីរំដោះទឹកចេញ ដោយសារតែមានទឹកជន់លិចខ្លាំងនៅការដ្ឋានសាងសង់របស់ក្រុមហ៊ុន។ លោកបានចាត់ក្រុមការងារទៅពិនិត្យមើលរឿងនេះហើយ។
ចំណែកដំណោះស្រាយជូនប្រជាពលរដ្ឋវិញ អភិបាលរូបនេះបញ្ជាក់ថា គោលនយោបាយដោះស្រាយគឺនៅដដែល មិនមានការផ្លាស់ប្ដូរទេ ចំពោះពលរដ្ឋណាដែលស្ម័គ្រចិត្តទទួលយកសំណង៖ «ជម្រើសមានតែប៉ុណ្ណឹង។ អ៊ីចឹងទេ ! មានតែទទួលយក ដើម្បីចូលរួមចំណែកលើកស្ទួយការអភិវឌ្ឍទាំងអស់គ្នា តែបើសិនបងប្អូនប្រជាពលរដ្ឋ គាត់ទទួលយក គឺមានពេលវេលាឲ្យគាត់គិតគូរ។ មានបងប្អូនខ្លះ គាត់ទទួលយក ដូរដីបានទៅ ក៏ស្ងៀមទៅ។ អ៊ីចឹង ! ដូចយើងបន្តិចម្ដងៗ វានៅលើតម្រូវការរបស់គាត់។ ហើយគាត់មើលឃើញថា អាហ្នឹង ការសម្រេចចិត្តគាត់ចូលរួមហើយ។ បើអត់ចូលរួម មានតែរង់ចាំ»។
ទាក់ទងនឹងរឿងនេះ អ្នកសម្របសម្រួលគម្រោងធុរកិច្ច និងសិទ្ធិមនុស្សនៃមជ្ឈមណ្ឌលសិទ្ធិមនុស្សកម្ពុជាលោក វណ្ណ សូផាត មានប្រសាសន៍ថា ការប្រកាន់យកគោលនយោបាយដោះស្រាយដីធ្លី ជូនប្រជាពលរដ្ឋ តែមួយជម្រើសបែបនេះ គឺមិនអាចបញ្ចប់បញ្ហាដីធ្លីបានទេ ព្រោះតម្លៃដីធ្លីបច្ចុប្បន្ន ខុសពីតម្លៃដីដែលអាជ្ញាធរឲ្យពលរដ្ឋជាង១០ដង។
លោកជឿជាក់ថា ប្រសិនបើអាជ្ញាធរអាចផ្ដល់សំណងជូនពលរដ្ឋឲ្យល្អប្រសើរជាងនេះ ដោយសន្តិវិធី តម្លាភាព និងស្របតាមច្បាប់ នោះបញ្ហានេះនឹងត្រូវបញ្ចប់៖ «តាំងរដ្ឋធម្មនុញ្ញ ច្បាប់ភូមិបាល ច្បាប់អាសាមីករ ច្បាប់ពាក់ព័ន្ធទៀត គឺត្រូវមានដំណោះស្រាយសមរម្យ ដោយយុត្តិធម៌។ សួរថា តើដំណោះស្រាយហ្នឹង វាមានយុត្តិធម៌ឬអត់ ក្នុងខណៈពេលដែលគាត់ទទួលបានតែ ៨ ដុល្លារ ក្នុងមួយម៉ែត្រការ៉េ ហើយតំបន់នៅជុំវិញហ្នឹង វាឡើង៥០ ៦០ ៨០ ខ្លះដល់១០០ដុល្លារ។ សួរថា វាយុត្តិធម៌ វាសមរម្យ គាត់អាចទទួលយកបានឬអត់។ យើងគិតទាំងអស់គ្នាមើល៍ ! បើសិនមិនមានដំណោះស្រាយ អ៊ីចឹងទេ ! ទៅថ្ងៃមុខ វានៅតែប្រឈមក្នុងការដែលប៉ះទង្គិចគ្នា ជាអំពើហិង្សា រវាងប្រជាពលរដ្ឋនិងអាជ្ញាធរហ្នឹងហើយ»។
ជម្លោះដីធ្លីរវាងក្រុមហ៊ុន អូ.ស៊ី.អាយ.ស៊ី (OCIC) របស់ឧកញ៉ា ពុង ឃាវសែ ជាមួយនឹងប្រជាពលរដ្ឋសរុបជាង ៣រយគ្រួសារ (៣៣០) នៅស្រុកកណ្ដាលស្ទឹង ខេត្តកណ្ដាល អូសបន្លាយជាង៣ឆ្នាំមកហើយ ដោយពលរដ្ឋមិនព្រមទទួលយកសំណងដែលអាជ្ញាធរផ្ដល់ឲ្យចន្លោះពី ៣ ដុល្លារទៅ ៨ ដុល្លារ ក្នុងដី១ម៉ែត្រការ៉េ។
ក្រុមហ៊ុនសាជីវកម្មវិនិយោគក្រៅប្រទេសកម្ពុជា ហៅកាត់អូ.ស៊ី.អាយ.ស៊ី (OCIC) របស់ លោក ពុង ឃាវសែ ដែលជាអ្នកជំនួញស្និទ្ធនឹងលោកនាយករដ្ឋមន្ត្រី ហ៊ុន សែន ទទួលបានសិទ្ធិសាងសង់ព្រលានយន្តហោះខ្នាតអន្តរជាតិមួយនៅទីនោះ។ តាមគម្រោង ក្រុមហ៊ុននឹងសាងសង់រួចរាល់នៅ ឆ្នាំ២០២៣។ ព្រលានយន្តហោះថ្មីនេះ វិនិយោគក្នុងទឹកប្រាក់ប្រមាណជាងមួយពាន់លានដុល្លារ (១.៥០០លាន) លើផ្ទៃដី ជិតបីពាន់ហិកតារ (២.៦០០)។
ប្រជាពលរដ្ឋដែលរងផលប៉ះពាល់ពីគម្រោងនេះ ស្នើសុំលោកនាយករដ្ឋមន្ត្រី ហ៊ុន សែន ដោះស្រាយបញ្ចប់ជម្លោះដីធ្លីនេះ។ ពលរដ្ឋបញ្ជាក់ថា ពួកគាត់នឹងបន្តការតវ៉ារហូតដល់មានដំណោះស្រាយសមរម្យដែលអាចទទួលយកបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។