ប្រជាពលរដ្ឋនៅស្រុកកណ្ដាលស្ទឹង ខេត្តកណ្ដាល ប្រមាណ៣០០នាក់ ជួបជុំគ្នាលើកបដា អមដោយរូបថតលោកនាយករដ្ឋមន្ត្រី ហ៊ុន និងភរិយា ទាមទារឲ្យអាជ្ញាធរពន្លឿនដោះស្រាយវិវាទដីធ្លីជាមួយក្រុមហ៊ុនអូស៊ីអាយស៊ី (OCIC) រឿងយកដីស្រែពួកគាត់ទៅសាងសង់ព្រលានយន្តហោះថ្មី។ អ្នកឃ្លាំមើលសិទ្ធិមនុស្ស និងសិទ្ធិដីធ្លី ស្នើឲ្យអាជ្ញាធរចេញមុខដោះស្រាយបញ្ចប់ទំនាស់នេះ ប្រកបដោយតម្លាភាព និងអាចទទួលបានគ្រប់ភាគី។
ជម្លោះដីធ្លីរវាងពលរដ្ឋចំនួន៣ឃុំ ក្នុងខេត្តកណ្ដាល និង១ឃុំក្នុងខេត្តតាកែវ ជាមួយក្រុមហ៊ុនOCIC របស់ឧកញ៉ា នៅមិនទាន់លេចចេញដំណោះស្រាយណាមួយច្បាស់លាស់នៅឡើយ ជាហេតុធ្វើឲ្យពលរដ្ឋបាត់បង់ដីស្រែ ចេញតវ៉ាជាញឹកញាប់ នៅលើទីតាំងដីមានទំនាស់។
តំណាងប្រជាពលរដ្ឋ លោក ទួន វណ្ណៈ ឲ្យដឹងថា ពលរដ្ឋជាង៣រយនាក់ ដែលចូលរួមលើកបដាដើរហែក្បួនឆ្ពោះសំដៅទៅទីស្នាក់ក្រុមហ៊ុនOCIC នៅថ្ងៃទី១៣ មិថុនា គឺមានមកពីឃុំបឹងខ្យាង ឃុំអំពៅព្រៃ ឃុំព្រែកស្លែង ក្នុងស្រុកកណ្ដាលស្ទឹង ខេត្តកណ្ដាល និងឃុំពត់សរ នៃស្រុកបាទី ខេត្តតាកែវ។
លោកបន្តថា ការដើរក្បួនរបស់ក្រុមប្រជាពលរដ្ឋ ត្រូវបានហាមឃាត់ពីសំណាក់សមត្ថកិច្ចកិច្ចរាប់រយនាក់ បិទផ្លូវមិនឲ្យធ្វើដំណើរ ដោយប្រាប់ឲ្យតំណាងពលរដ្ឋទាំងអស់ ទៅស្វែងរកដំណោះស្រាយនៅសាលាខេត្តកណ្ដាល នៅសប្ដាហ៍ក្រោយ។ លោកបញ្ជាក់ថា តំណាងពលរដ្ឋនឹងទៅតាមកោះហៅរបស់អាជ្ញាធរ ប៉ុន្តែបើអាជ្ញាធរនៅតែឲ្យថ្លៃដីម៉ែត្រការ៉េ ៨ដុល្លារ ដដែលនោះ គឺពួកគាត់នឹងនៅតែបន្តការតវ៉ា លុះត្រាទទួលបានតម្លៃដីតាមទីផ្សារបច្ចុប្បន្ន។
តំណាងពលរដ្ឋនៅភូមិកំពង់តាឡុង រូបនេះ ស្នើអាជ្ញាធរគួរដោះស្រាយវិវាទនេះជូនពលរដ្ឋទាំងអស់ ដោយមិនអាចដោះស្រាយឲ្យតែពលរដ្ឋ១៥គ្រួសារដែលបាត់បង់ដីលំនៅឋាន ហើយមិនផ្ដល់ដំណោះស្រាយឲ្យពលរដ្ឋរាប់រយគ្រួសារផ្សេងទៀត ដែលបាត់ដីស្រែនោះទេ៖ « តម្លៃដែលពួកគេឲ្យពួកខ្ញុំរាល់ថ្ងៃហ្នឹង គឺគេឲ្យតែ៨ដុល្លារ ហើយនឹងដូរដីនៅក្នុងឃុំបឹងខ្យាងហ្នឹងដដែល។ ហើយការដូរដីហ្នឹង គឺគ្មានប្លង់តបមកឲ្យប្រជាពលរដ្ឋវិញទេ។ ដូរហើយបាត់ ដូរហើយបាត់ អ៊ីចឹងទៅ ហើយលក់លុយក៏អត់ រយៈពេលជិត១ឆ្នាំអ៊ីចឹងដែរ។ មួយសារ ខ្ញុំនឹងទៅ ដើម្បីឲ្យដឹងរឿងពិតថា គាត់ត្រូវដោះស្រាយរបៀបណា មកវិញ ខ្ញុំនឹងមានផែនការមួយ ខ្ញុំនឹងធ្វើការបិទផ្លូវកន្លែងណាមួយ ដើម្បីឲ្យគាត់មានដំណោះស្រាយបន្ទាន់»។
អាស៊ីសេរី មិនអាចសុំការឆ្លើយតបរឿងពី អភិបាលស្រុកកណ្ដាលស្ទឹង លោក អ៊ូច សៅវឿន និងអភិបាលខេត្តកណ្ដាល លោក គង់ សោភ័ណ្ឌ បាននៅឡើយទេ នៅថ្ងៃទី១៣ មិថុនា ដោយហៅទូរស័ព្ទចូល តែពុំមានអ្នកទទួល។
ទោះបីជាយ៉ាងណា លោក គង់ សោភ័ណ្ឌ ធ្លាប់ប្រាប់អាស៊ីសេរី កាលពីពេលកន្លងទៅថា នៅសល់ពលរដ្ឋតិចតួចបំផុត ដែលមិនព្រមទទួលយកសំណង តាមតម្លៃដី ដែលបានដាក់ចេញ មុនពេលមានគម្រោងអភិវឌ្ឍន៍។ តែយ៉ាងណា លោកបញ្ជាក់ថា អាជ្ញាធរនឹងខិតខំដោះស្រាយ ជាមួយពលរដ្ឋបន្តទៀត។ អភិបាលខេត្តរូបនេះ អំពាវនាវសុំឱ្យពលរដ្ឋអត់ធ្មត់ និងចូលរួមរកដំណោះស្រាយជាមួយអាជ្ញាធរពាក់ព័ន្ធទាំងអស់។
ទាក់ទងរឿងនេះ អ្នកសម្របសម្រួលគម្រោងធុរកិច្ច និងសិទ្ធិមនុស្សនៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សូផាត សង្កេតឃើញថា រាល់ការអភិវឌ្ឍរបស់ក្រុមហ៊ុនOCIC មិនថានៅតំបន់ជ្រោយចង្វារ ឬខេត្តកណ្ដាល តែងតែមានប្រជាពលរដ្ឋចេញមុខតវ៉ាទាមទារសំណងជានិច្ច ព្រោះថាសំណងដែលក្រុមហ៊ុនផ្ដល់ឲ្យពលរដ្ឋនោះ គឺចំនួនតិចតួច ដែលពួកគាត់មិនអាចទទួលយកបាន។
លោកយល់ថា អាជ្ញាធរគ្រប់លំដាប់ថ្នាក់និងខាងក្រុមហ៊ុន គួរផ្ដល់ដំណោះស្រាយវិវាទនេះ ប្រកបដោយតម្លាភាព និងភាពស្មោះត្រង់ជាមួយពលរដ្ឋ បើមិនដូច្នោះទេ ការតវ៉ានៅតែបន្តកើតមាន ហើយមុខមាត់ក្រុមហ៊ុនក៏មិនល្អ ក្នុងជំនួញថ្នាក់ជាតិ និងអន្តរជាតិដែរ៖ «ខ្ញុំយល់ថា ក្រុមហ៊ុននិងប្រជាពលរដ្ឋ ចរចាគ្នា ហើយធ្វើសម្បទានគ្នាទៅវិញទៅមក ដោយមានសមធម៌ក្នុងការដោះស្រាយ ដោយតម្លាភាព។ យើងធ្វើសម្បទានគ្នាទៅវិញទៅមកទៅ ដែលយើងអាចទទួលបានទាំងអស់គ្នាអ៊ីចឹង។ កុំទាញយកតែការចង់បានរៀងៗខ្លួន មិនងាយចប់ទេ។ វាប្រទាំងប្រទើសគ្នា យូរតទៅទៀត។ ហើយគម្រោងហ្នឹង ក៏គាត់មិនអាចធ្វើបានតាមដែលខ្លួនមានទំនាស់អ៊ីចឹង»។
គម្រោងអភិវឌ្ឍន៍ព្រលានយន្តហោះថ្មី លើផ្ទៃដី ជិតបីពាន់ហិកតារ (២.៦០០)នេះ មានភាពចម្រូងចម្រាស់តាំងពីដើមមក ដោយសារ អាជ្ញាធរបានកំណត់តម្លៃដី ក្នុងមួយម៉ែត្រការ៉េចន្លោះ ពី៣ដុល្លារ ដល់៨ដុល្លារ ប៉ុន្តែពលរដ្ឋទាមទារតម្លៃដីតាមទីផ្សារបច្ចុប្បន្ន។ គម្រោងនេះ លាតសន្ធឹងលើឃុំ៤ គឺឃុំបឹងខ្យាង ឃុំអំពៅព្រៃ ឃុំព្រែកស្លែង ក្នុងស្រុកកណ្ដាលស្ទឹង ខេត្តកណ្ដាល និងឃុំពត់សរ នៃស្រុកបាទី ខេត្តតាកែវ។
ក្រុមហ៊ុនសាជីវកម្មវិនិយោគក្រៅប្រទេសកម្ពុជា ហៅកាត់ អូ.ស៊ី.អាយ.ស៊ី (OCIC) របស់ លោក ពុង ឃាវសែ ដែលជាអ្នកជំនួញស្និទ្ធនឹងលោកនាយករដ្ឋមន្ត្រី ហ៊ុន សែន ទទួលបានសិទ្ធិសាងសង់ព្រលានយន្តហោះខ្នាតអន្តរជាតិមួយនេះ។ តាមគម្រោង ក្រុមហ៊ុននឹងសាងសង់រួចរាល់នៅ ឆ្នាំ២០២៣។ ព្រលានយន្តហោះថ្មីនេះ វិនិយោគក្នុងទឹកប្រាក់ប្រមាណជាងមួយពាន់លានដុល្លារ (១.៥០០លាន)។
ព្រលានថ្មីនេះ ជាប្រភេទព្រលានសម្រាប់ចុះចតយន្តហោះធំៗ ដែលអាចហោះហើរឆ្លងទ្វីប ដូចជា ប្រភេទយន្តហោះធុនយក្ស អ៊ែរ.បើស (Airbus A380-800) និង ប៊ូអ៊ីង (Boeing 747-800) ជាដើម។ ប៉ុន្តែ គម្រោងអភិវឌ្ឍន៍ខ្នាតយក្សនេះ បានបង្កប់នូវទឹកភ្នែករបស់កសិករជាច្រើនគ្រួសារ ដោយសារ ការកាត់ដី តាមអនុក្រឹត្យថ្ងៃទី៣ ខែមិថុនា ឆ្នាំ២០២០ របស់រដ្ឋាភិបាល ក្នុងទំហំប្រហែលជិតបីពាន់ហិកតារនោះ (២.៦០០)នោះ ជាន់លើដីស្រែ របស់ពលរដ្ឋ យ៉ាងហោចណាស់ បួនរយគ្រួសារ (៤០០)។
អាស៊ីសេរីមិនអាចសុំការឆ្លើយតបរឿងសំណងជូនពលរដ្ឋដែលរងផលប៉ះពាល់គម្រោងនេះ ពីប្រធានក្រុមហ៊ុនសាជីវកម្មវិនិយោគក្រៅប្រទេសកម្ពុជា (OCIC) លោក ពុង ឃាវសែ បានទេ ដោយហៅទូរស័ព្ទចូលតែលោកមិនទទួល។
ក្រុមតំណាងពលរដ្ឋទាំង ៤ឃុំ ប្រកាន់ជំហរថា បើក្រុមហ៊ុនឯកជន និងអាជ្ញាធរ មិនព្រមផ្ដល់សំណងសមរម្យទេ ពួកគាត់មិនព្រមប្រគល់ដីស្រែ និងដីលំនៅឋាន ឲ្យអភិវឌ្ឍន៍ជាដាច់ខាត។ ពួកគាត់បញ្ជាក់ថា នឹងនាំបន្តការតវ៉ា និងនៅការពារដីរបស់ខ្លួន រហូតដល់ទីបញ្ចប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។