តុលាការកំពូលនៃរបបលោក ហ៊ុន សែន សម្រេចបដិសេធបណ្តឹងសុំនៅក្រៅឃុំលើកទីពីររបស់អតីតបុគ្គលិកអាស៊ីសេរី ក្រោយពេលសវនាការជំនុំជម្រះនៅថ្ងៃទី ២៣ កក្កដា។ មន្ត្រីសិទ្ធិមនុស្សយល់ឃើញថា ការបន្តឃុំខ្លួនអ្នកទាំងពីរទាំងមិនមានទោសកំហុសបែបនេះ គឺជារឿងអយុត្តិធម៌ និងជាការអនុវត្តខុសនឹងគោលការណ៍ច្បាប់។
មេធាវីការពារក្តីឱ្យអតីតបុគ្គលិកអាស៊ីសេរី លោក កែវ វ៉ាន្នី ឱ្យដឹងថា តុលាការកំពូលបានសម្រេចបន្តឃុំខ្លួនកូនក្តីរបស់លោក ដោយយោងទៅលើសំអាងហេតុរបស់តុលាការក្រុងភ្នំពេញ និងសាលាឧទ្ធរណ៍។ លោកបន្តថា ហេតុផលបែបនេះ មិនមានលក្ខណៈគ្រប់គ្រាន់ក្នុងការបន្តឃុំខ្លួនកូនក្តីរបស់លោកឡើយ ព្រោះតុលាការមិនបានរកឃើញភស្តុតាងអ្វីដើម្បីបង្ហាញពីពិរុទ្ធភាពរបស់ពួកគេនោះឡើយ៖ «ប្រសិនបើតុលាការមានភស្តុតាង មានអំណេះអំណាងថា បើដោះលែងទៅ គាត់គេចខ្លួនគាត់ មិនចូលទៅតុលាការ ពេលតុលាការត្រូវការ គាត់បង្កភាពចលាចលដល់សង្គម ឬបំផ្លាញភស្តុតាងជាដើមនោះ ( វាមិនបញ្ហាទេ ) ប៉ុន្តែវាគ្រាន់តែជាការលើកឡើងរបស់តុលាការកំពូលដោយយោងទៅលើកំណត់ហេតុរបស់សាលាដំបូង ឬសាលាឧទ្ធរណ៍តែប៉ុណ្ណឹង វាមិនទាន់គ្រប់គ្រាន់នោះទេ។ រឿងគាត់នេះវាអយុត្តិធម៌ណាស់ដែលតុលាការបានឃុំខ្លួនគាត់អស់រយៈពេល ៨ ខែជាងទៅហើយ ដោយមិនទាន់ឃើញមានតម្រុយ ឬក៏ភស្តុតាងណាមួយដើម្បីដាក់ទោសលើពួកគាត់នោះទេ។ ការឃុំចេះតែឃុំទៅ ធ្វើឱ្យគាត់បាត់បង់សេរីភាព ធ្វើឱ្យគាត់មិនអាចជួបជុំគ្រួសារបាន»។
អតីតបុគ្គលិកអាស៊ីសេរី ២ រូបគឺលោក អ៊ួន ឈិន និងលោក យាង សុធារិន ហៅ យាង សុជាមេត្តា ត្រូវបានតុលាការនៃរបបលោកហ៊ុន សែន ឃុំខ្លួនអស់រយៈពេលជាង ៨ខែទៅហើយ ក្រោមបទចោទ “ផ្តល់ឱ្យរដ្ឋបរទេសនូវព័ត៌មានជាអាទិ៍ ដែលនាំឱ្យអន្តរាយដល់ការការពារជាតិ”។ តុលាការបានពន្យារពេលឃុំខ្លួនអ្នកទាំងពីរ ដោយលើកហេតុផលថា ដើម្បីរក្សាជនត្រូវចោទក្នុងកិច្ចស៊ើបសួរបន្តទៅទៀត។
ទាំងតុលាការជាន់ទាប និងជាន់ខ្ពស់នៃរបបក្រុងភ្នំពេញ សុទ្ធតែបានបដិសេធជាបន្តបន្ទាប់នូវបណ្តឹងសុំនៅក្រៅឃុំលើកទីមួយ និងលើកទីពីរ ព្រមទាំងបណ្តឹងសុំមោឃភាពនីតិវិធីរឿងក្តីនេះ បើទោះបីជាមានការធានាអំពីកិច្ចសហការជាមួយតុលាការ និងការរកឃើញថា រឿងក្តីនេះធ្វើខុសនីតិវិធីតាំងតែពីដើមដំបូងយ៉ាងណាក្តី។
មន្ត្រីស៊ើបអង្កេតជាន់ខ្ពស់សមាគម អាដហុក (ADHOC) លោក សឺង សែនករុណា យល់ឃើញថា សវនាការជំនុំជម្រះបណ្តឹងសុំនៅក្រៅឃុំលើកទីពីររបស់តុលាការកំពូលនេះ ហាក់ដូចជា ការអនុវត្តនីតិវិធីបង្គ្រប់កិច្ច និងធ្វើតាមតែការចង់បានរបស់តុលាការប៉ុណ្ណោះ ខណៈអ្នកទាំងពីរមិនបានប្រព្រឹត្តបទល្មើសអ្វីដូចការចោទប្រកាន់ឡើយ។ លោកយល់ឃើញទៀតថា សំណុំរឿងចារកម្មប្រឆាំងនឹងអតីតបុគ្គលិកអាស៊ីសេរីនេះ ហាក់ដូចជាធ្វើឡើងក្រោមហេតុផលនយោបាយ និងមានការរៀបចំជាប្រព័ន្ធតាំងពីដំណាក់កាលមន្ត្រីនគរបាលយុត្តិធម៌ រហូតដល់តុលាការគ្រប់ជាន់ថ្នាក់ ដោយសាររបបដឹកនាំបច្ចុប្បន្នមិនពេញចិត្តចំពោះស្ថាប័នអាស៊ីសេរីដែលផ្សពផ្សាយព័ត៌មានអំពីភាពអយុត្តិធម៌សង្គមប៉ះពាល់ដល់ប្រជាប្រិយភាពរបស់របបនេះ៖«សាលាដំបូងល្មមដល់ពេលបិទការស៊ើបសួរ ហើយជំរុញរឿងនេះទៅជំម្រះអង្គសេចក្ដីហើយ ព្រោះប្រហែលជាក្នុងនីតិវិធីស៊ើបសួរនេះ តុលាការមិនបានរកឃើញតំរុយណាមួយក្នុងការដាក់បន្ទុកទៅលើអ្នកទាំងពីររូបនេះទេ។ ដូច្នេះទោះបីយើងពន្យារពេលក្នុងនីតិវិធីស៊ើបសួរទៅដល់ដំណាក់កាលណាទៀត ក៏វានាំតែធ្វើឱ្យខាតប្រយោជន៍ទៅដល់អ្នកទាំងពីរ បាត់បង់សេរីភាពរបស់ពួកគាត់។ ប្រសិនជាយើងរកមិនឃើញនោះទេ គួរបិទការស៊ើបសួរ ហើយរុញរឿងនេះទៅជម្រេះក្ដីទៅ។ ប្រសិនបើរកមិនឃើញពីពិរុទ្ធភាពរបស់ពួកគាត់ដែលមិនបានប្រព្រឹត្តដូចការចោទប្រកាន់ គួរតែទម្លាក់បទចោទប្រកាន់នេះចេញទៅ ហើយឱ្យពួកគាត់ទាំងពីរមានសេរីភាពជាពលរដ្ឋទូទៅ ហើយឱ្យពួកគាត់បានធ្វើកិច្ចការងារចឹញ្ចឹមជីវិត ចិញ្ចឹមគ្រួសារផង ពីព្រោះពួកគាត់ទាំងអស់សុទ្ធតែមានបន្ទុកក្នុងគ្រួសារ»។
ក្រៅពីជាប់ចោទរឿងចារកម្មនេះ លោក អ៊ួន ឈិន និងលោក យាង សុធារិន ក៏កំពុងប្រឈមនឹងសំណុំរឿងមួយទៀតដែរ គឺបទផលិតវីដេអូអាសអាភាស ដែលត្រូវបានចោទដោយតំណាងអយ្យការអមតុលាការក្រុងភ្នំពេញ ក៏ប៉ុន្តែសំណុំរឿងទីពីរនេះ កំពុងស្ថិតក្នុងដំណាក់កាលស៊ើបអង្កេតដោយមិនទាន់មានការចោទប្រកាន់ពីចៅក្រមស៊ើបសួរនៅឡើយ។
អង្គការសង្គមស៊ីវិលជាតិ និងអន្តរជាតិបានថ្កោលទោសចំណាត់ការនៃរបបក្រុងភ្នំពេញទៅលើអតីតបុគ្គលិកអាស៊ីសេរីទាំងពីរនាក់ និងបានទាមទារឱ្យមានការដោះលែងពួកគេឱ្យមានសេរីភាពឡើងវិញ។ ក្រុមអង្គការសង្គមស៊ីវិលទាំងនោះ អះអាងថា ចំណាត់ការរបស់របបក្រុងភ្នំពេញនេះ ធ្វើឡើងដោយគ្មានភស្តុតាង និងមូលដ្ឋានច្បាប់ត្រឹមត្រូវ ហើយថា ការមិនដោះលែងអ្នកទាំងពីរ ព្រមទាំងការបន្ថែមបទចោទថ្មីទៀតនោះ បង្ហាញឱ្យឃើញកាន់តែច្បាស់ថា របបក្រុងភ្នំពេញកំពុងរំលោភបំពានច្បាប់ជាតិ និងអន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។