ព្រះរាជអាជ្ញាសាលាដំបូងរាជធានីភ្នំពេញ នៅយប់ថ្ងៃអង្គារ ទី១៥ ខែកក្កដា បានចោទប្រកាន់តំណាងរាស្ត្រជាប់ឆ្នោតគណបក្សសង្គ្រោះជាតិ ៤រូប ពីបទញុះញង់ឲ្យប្រព្រឹត្តបទឧក្រិដ្ឋតាមមាត្រា ៤៩៤ និង ៤៩៥។ សមត្ថកិច្ចនឹងបញ្ជូនតំណាងរាស្ត្រទាំង ៤រូប ទៅតុលាការដំបូងរាជធានីភ្នំពេញ នៅថ្ងៃពុធ ទី១៦ កក្កដា នេះ ដើម្បីសម្រេចថា តើត្រូវឃុំខ្លួនជាបន្ត ឬត្រូវដោះលែង?
មន្ត្រីជាន់ខ្ពស់អង្គការសិទ្ធិមនុស្សលីកាដូ លោក អំ សំអាត សម្ដែងក្ដីបារម្ភថា រដ្ឋាភិបាលនឹងអាចប្រើប្រាស់ការចាប់ឃុំខ្លួន និងចោទប្រកាន់តំណាងរាស្ត្រគណបក្សសង្គ្រោះជាតិ ដើម្បីគាបសង្កត់បង្ខំឲ្យគណបក្សប្រឆាំងដោះស្រាយវិបត្តិនយោបាយ និងគណបក្សប្រជាជនកម្ពុជា។
លោកបន្តទៀតថា កាលពីយប់ថ្ងៃអង្គារ ទី១៥ កក្កដា ព្រះរាជអាជ្ញាបានធ្វើការចោទប្រកាន់តំណាងរាស្ត្រជាប់ឆ្នោតអ្នកស្រី មូរ សុខហួរ លោក ហូរ វ៉ាន់ លោក កែវ ភិរម្យ និងលោក ម៉ែន សុថាវរិន្ទ្រ ពីបទចោទញុះញង់ឲ្យប្រព្រឹត្តបទឧក្រិដ្ឋ។ ប្រសិនបើតុលាការរកឃើញថា មានកំហុសនោះ អ្នកទាំងពីរអាចជាប់ពន្ធនាគារពី ៦ខែ រហូតដល់ ២ឆ្នាំ។ សមត្ថកិច្ចបានបដិសេធមិនឲ្យមន្ត្រីសិទ្ធិមនុស្ស និងតំណាងរាស្ត្រចូលជួបអ្នកទាំងបួននាក់នោះឡើយ ដោយអះអាងថា សមត្ថកិច្ចកំពុងស៊ើបសួរ។
លោក អំ សំអាត៖ «ប្រសិនមានឃើញក្រុមណាចង់បង្កឲ្យមានអំពើហិង្សាដូចជាមានឧបករណ៍ហិង្សាត្រូវដកហូត ឬក៏ឃាត់ ប៉ុន្តែព្រឹកមិញមានដំបងរបស់ក្រុមសន្តិសុខ ប៉ុន្តែគ្មានការដកហូត ក្រោយពីប្រជុំជួរសន្តិសុខមានដំបងឲ្យបង្កើតឲ្យមានហិង្សា នេះជាប្រព័ន្ធបង្កើតអំពើហិង្សាដើម្បីចាប់ខ្លួនតំណាងរាស្ត្រ»។
សមត្ថកិច្ចរាជធានីភ្នំពេញ បានឃាត់ខ្លួនតំណាងរាស្ត្រទាំងបួននាក់ បន្ទាប់ពីហេតុការណ៍ប៉ះទង្គិចដោយហិង្សាមួយនៅក្បែរទីលានប្រជាធិបតេយ្យ កាលពីព្រឹកថ្ងៃអង្គារ ទី១៥ កក្កដា នៅពេលសកម្មជនគណបក្សសង្គ្រោះជាតិ នាំគ្នាទៅតវ៉ាអោយបើកទីលានប្រជាធិបតេយ្យឡើងវិញ។
តំណាងរាស្ត្រជាប់ឆ្នោតគណបក្សសង្គ្រោះជាតិ លោក ឡុង រី ដែលបានចូលរួមការតវ៉ាឲ្យបើទីលានប្រជាធិបតេយ្យនោះ មានប្រសាសន៍ថា ប្រភពមួយចំនួនឲ្យដឹងថា សមត្ថកិច្ចកំពុងស្វែងរកចាប់ខ្លួនលោក និងតំណាងរាស្ត្រជាប់ឆ្នោតម្នាក់ទៀត គឺលោក រៀល ខេមរិន្ទ ប៉ុន្តែរហូតដល់ម៉ោងប្រមាណ ៩យប់ កាលពីថ្ងៃអង្គារ សមត្ថកិច្ចនៅមិនទាន់បានចាប់ខ្លួនអ្នកទាំងបួននៅឡើយទេ។
លោកបន្តថា តំណាងរាស្ត្រគណបក្សសង្គ្រោះជាតិ នឹងមិនភៀសខ្លួនពីការតាមចាប់នេះឡើយ។ លោកស្នើឲ្យសមត្ថកិច្ចដោះលែងតំណាងរាស្ត្រទាំងបួននាក់ជាបន្ទាន់ ប្រសិនមិនដូច្នោះទេ ប្រជាពលរដ្ឋនឹងធ្វើបាតុកម្មជាទ្រង់ទ្រាយធំ។
មន្ត្រីនាំពាក្យសាលារាជធានីភ្នំពេញ លោក ឡុង ឌីម៉ង់ កាលពីយប់ថ្ងៃអង្គារ មានប្រសាសន៍ថា សាលារាជធានីបានស្នើឲ្យសមត្ថកិច្ចបានចាប់ជនសង្ស័យក្នុងពេលប៉ះទង្គិចគ្នាដោយហិង្សានៅទីលានប្រជាធិបតេយ្យ។ លោកបន្តថា យ៉ាងហោចណាស់ក៏មានក្រុមសន្តិសុខចំនួន ៣៩នាក់ រងរបួស ក្នុងនោះ ៣នាក់ ស្ថិតនៅសភាពធ្ងន់ធ្ងរ ត្រូវការសង្គ្រោះជាបន្ទាន់។ ប៉ុន្តែអង្គការលីកាដូ អះអាងថា ក្រុមសន្តិសុខប្រមាណ ១៧នាក់រងរបួស ចំណែកបាតុករ ១៤នាក់ ក៏រងរបួសដែរ៖ «មិនមែនជាបាតុករ ជាក្រុមអនាធិបតេយ្យពេញទី ដែលគាត់ប្រើប្រាស់ដំបង ចង់ធ្វើឃាតដោយចេតនា»។
លោក អំ សំអាត ឲ្យដឹងថា ទៀតថា តំណាងរាស្ត្រទាំងបួននាក់នឹងត្រូវបញ្ជូនទៅកាន់សាលារាជធានីភ្នំពេញ នៅព្រឹកថ្ងៃពុធ ទី១៦ កក្កដា នេះ ដើម្បីសម្រេចថា តើត្រូវឃុំខ្លួនជាបន្ត ឬត្រូវដោះលែង។ លោក កឹម សុខា ស្តីទីប្រធានគណបក្សសង្គ្រោះជាតិ បដិសេធមិនធ្វើអត្ថាធិប្បាយពីព្រឹត្តិការណ៍ហិង្សានៅទីលានប្រជាធិបតេយ្យទេ ដោយរង់ចាំទទួលបានព័ត៌មានគ្រប់គ្រាន់ជាមុនសិន ប៉ុន្តែគណបក្សសង្គ្រោះជាតិ គ្រោងនឹងធ្វើសន្និសីទសារព័ត៌មាននៅថ្ងៃពុធ នេះ ដើម្បីបញ្ជាក់ជំហរគណបក្សស្ដីពីព្រឹត្តិការណ៍នៅទីលានប្រជាធិបតេយ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។