មន្ត្រីគណបក្សសង្គ្រោះជាតិ ខេត្តត្បូងឃ្មុំ ស្នើឲ្យសមត្ថកិច្ចវែកមុខចាប់ឃាតកដៃដល់ដែលសម្លាប់សកម្មជនគណបក្សខ្លួន យកមកផ្ដន្ទាទោសឲ្យបានឆាប់រហ័ស។ សកម្មជនគណបក្សប្រឆាំងម្នាក់នៅស្រុកត្បូងឃ្មុំ ត្រូវបានជនមិនស្គាល់មុខកាប់មួយកាំបិតស្លាប់នៅនឹងកន្លែងកាលពីយប់ថ្ងៃទី២១ កញ្ញា។ រហូតមកទល់ពេលនេះ សមត្ថកិច្ចពុំទាន់កំណត់មុខសញ្ញាឃាតកបាននៅឡើយទេ។
មន្ត្រីគណបក្សសង្គ្រោះជាតិ ខេត្តត្បូងឃ្មុំ ហៅករណីឃាតកម្មលើសកម្មជននេះ ថាជាអំពើសាហាវព្រៃផ្សៃប៉ះពាល់ជាខ្លាំងដល់សតិអារម្មណ៍មន្ត្រីគណបក្សប្រឆាំងក្នុងមូលដ្ឋាន នាំឲ្យមានការភ័យខ្លាច។
ប្រធានគណបក្សសង្គ្រោះជាតិ ខេត្តត្បូងឃ្មុំ លោក សេង ស៊ាងលី មានប្រសាសន៍នៅថ្ងៃទី២២ កញ្ញា ថា អនុប្រធានគណបក្សសង្គ្រោះជាតិ ភូមិខ្ទុំកើត ឃុំជីគរ ស្រុកត្បូងឃ្មុំ គឺលោក ឃិន អ៊ាប អាយុ ៥៥ឆ្នាំ ត្រូវបានឃាតកដៃដល់សម្លាប់ ខណៈដែលលោកធ្វើដំណើរត្រឡប់មកពីផ្ទះបងប្អូននៅភូមិខ្ទុំកើត កាលពីម៉ោង ៨កន្លះយប់ថ្ងៃទី២១ កញ្ញា។ លោកអះអាងថា លោក ឃិន អ៊ាប ត្រូវបានជនមិនស្គាល់មុខកាប់មួយកាំបិតចំក្បាលលើចិញ្ចើមខាងឆ្វេង បណ្ដាលឲ្យស្លាប់នៅនឹងកន្លែង៖ « រឿងនេះខ្ញុំមានព្រួយបារម្ភណាស់ ព្រោះខ្លាចគេធ្វើអំពើបែបនេះមកលើពួកខ្ញុំទៀត ហើយសមត្ថកិច្ចឆ្លើយថាជារឿងគំនុំ។ ហើយបញ្ហានេះមិនគួរឲ្យកើតមានឡើងទេ ព្រោះថ្ងៃបោះឆ្នោតឃុំ - សង្កាត់កាន់តែខិតជិតមកហើយ »។
ឆ្លើយតបនឹងបញ្ហានេះ អធិការរងនគរបាលស្រុកត្បូងឃ្មុំ ទទួលបន្ទុកផ្នែកព្រហ្មទណ្ឌ លោក ឡុង សារឹន មានប្រសាសន៍ថា សមត្ថកិច្ចចុះស៊ើបអង្កេតអស់មួយព្រឹក ហើយសន្និដ្ឋានជំហានដំបូងថា ករណីឃាតកម្មនេះអាចជារឿងគំនុំផ្ទាល់ខ្លួន ប៉ុន្តែលោកថា សមត្ថកិច្ចពុំទាន់កំណត់មុខសញ្ញាច្បាស់លាស់ថាជនដៃដល់ជានរណានៅឡើយ៖ « សាច់ញាតិនៃសពបាននិយាយប្រាប់ខ្ញុំដែរ ថាកន្លងមកជនរងគ្រោះធ្លាប់មានទំនាស់តិចតួចជាមួយអ្នកភូមិជិតខាង។ ហើយក៏យើងកំពុងតែស៊ើបអង្កេតមើលលើការងារនេះ »។
ទោះបីជាយ៉ាងនេះក្ដី មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តត្បូងឃ្មុំ លោក នាង សុវ៉ាត ដែលបានចុះស៊ើបអង្កេតផ្ទាល់ដល់ទីកន្លែង បញ្ជាក់ថា អំពើឃាតកម្មនេះពុំទាន់កំណត់ថាជារឿងគំនុំ ឬជាករណីនយោបាយច្បាស់លាស់នៅឡើយទេ។ លោក នាង សុវ៉ាត ហៅការសន្និដ្ឋានរបស់សមត្ថកិច្ចប៉ូលិសថាជាការឆាប់រហ័សពេក ហើយធ្វើឲ្យសាច់ញាតិនៃសំណុំរឿងនេះមានមន្ទិលទៅលើសមត្ថកិច្ច៖ « ដើម្បីកុំឲ្យមានការចោទប្រកាន់ថាជារឿងនយោបាយ ទាល់តែសមត្ថកិច្ចបង្ហាញមកថា តើឃាតកនោះជាអ្នកណា ? បើសិនជាសមត្ថកិច្ចរកមិនឃើញឃាតកទេ នោះការចោទប្រកាន់នៅតែមានតទៀត »។
លោក នាង សុវ៉ាត កត់សម្គាល់ទៀតថា ករណីឃាតកម្មទៅលើសកម្មជនគណបក្សប្រឆាំងកន្លងទៅ កម្រឃើញសមត្ថកិច្ចចាប់ជនដៃដល់មកផ្ដន្ទាទោសម្ដងណាឡើយ។ លោកព្រួយបារម្ភខ្លាចក្រែងអំពើឃាតកម្មនេះ សមត្ថកិច្ចពុំអាចផ្ដល់យុត្តិធម៌ជូនសាច់ញាតិជនរងគ្រោះដូចពេលមុខទៀត។
បច្ចុប្បន្ន សាកសពជនរងគ្រោះ ត្រូវបានសាច់ញាតិយកទៅធ្វើបុណ្យតាមបែបព្រះពុទ្ធសាសនានៅស្រុកកំណើតនៅខេត្តត្បូងឃ្មុំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។