មន្រ្តីបក្សប្រឆាំងមិនបានប្រគល់លិខិតដោយផ្ទាល់ដៃដល់មន្រ្តីទូតខ្មែរនៅរដ្ឋធានីវ៉ាស៊ីនតោនទេ ដោយសារស្ថានទូតបិទទ្វារចំពេលពួកគាត់នាំគ្នាដាក់លិខិតសុំសុពលភាពលិខិតឆ្លងដែនវិញ កាលពីថ្ងៃទី១០ ខែវិច្ឆិកា ម្សិលម៉ិញនេះ។
មន្រ្តីបក្សប្រឆាំងទាំងនោះខកចិត្ត និងសង្ស័យថានេះជាការចង់គេចវេសរបស់មន្រ្តីទូតខ្មែរ។
ពួកគាត់ចាត់ទុកទង្វើបែបនេះថាជាការរើសអើង ធ្វើការបម្រើបក្សកាន់អំណាច ជាជាងបម្រើប្រយោជន៍ពលរដ្ឋខ្មែរទូទៅ។
មន្រ្តីគណបក្សប្រឆាំងចំនួន៤នាក់ ដែលនាំគ្នាទៅដាក់លិខិតនៅស្ថានទូតខ្មែរប្រចាំនៅរដ្ឋធានីវ៉ាស៊ីនតោន (Washington DC) បានសម្រេចដាក់លិខិតរបស់ពួកគេទៅក្នុងប្រអប់សំបុត្រនៅនឹងរបងស្ថានទូត បន្ទាប់ពីបានចុចកណ្ដឹងជាច្រើនសារ តែពុំមានមនុស្សចេញពីអាគារស្ថានទូត។
ក្នុងលិខិតនោះបានស្នើសុំទៅក្រសួងមហាផ្ទៃ តាមរយៈស្ថានទូតខ្មែរអោយផ្ដល់សុពលភាព លិខិតឆ្លងដែនដល់មន្រ្តីគណបក្សសង្រ្គោះជាតិចំនួន១១រូបដែលត្រូវក្រសួងការបរទេសបញ្ឈប់សុពលភាពកាលពីខែវិច្ឆិកា ឆ្នាំ២០១៩។
លោក អេង ឆៃអ៊ាង អនុប្រធានគណបក្សសង្រ្គោះជាតិសង្ស័យថាមន្រ្តីស្ថានទូតគេចវេសមិនទទួលលិខិត ទើបយកលេសបិទទ្វារស្ថានទូតនៅពេលដែលក្រុមរបស់លោកទៅដាក់លិខិត៖«បណ្ដាទូតនៃប្រទេសប្រជាធិបតេយ្យ កាលណាគេទៅធ្វើដំណាងរបស់ប្រទេសគេនៅតាមប្រទេសណាមួយគឺគេមិនដែលមានភាពរើសអើង ចាត់ទុកជាតិសាសន៍គេបែងចែកអីទេ គេតែងតែស្វាគមន៍ទាំងសង្ខាងទោះបី ឯកអគ្គរដ្ឋទូតមានបេះដូងខាងបក្សណាក៏ដោយ។ ប៉ុន្តែដោយឡែកទូតខ្មែរនេះគឺយ៉ាប់មែនទែននៅគ្រប់កន្លែងមិនមែនសម្រាប់តែសហរដ្ឋអាមេរិកទេគឺនៅគ្រប់ទីកន្លែងទាំងអស់ គឺតំណាងអោយបក្សសុទ្ធសាធ។»
អាស៊ីសេរីនៅមិនទាន់អាចសុំការឆ្លើយតបរឿងនេះពីមន្រ្តីនៅស្ថានទូតខ្មែរប្រចាំនៅរដ្ឋធានី រដ្ឋធានីវ៉ាស៊ីងតោនបានទេដោយពុំមានអ្នកលើកទូរស័ព្ទ។
ចំណែកអ្នកនាំពាក្យក្រសួងការបរទេស លោក កុយ គួង ប្រាប់អាស៊ីសេរីតាមតេលេក្រាម (Telegram) ដោយអោយទៅបញ្ជាក់ជាមួយក្រសួងមហាផ្ទៃវិញ។
អាស៊ីសេរីក៏មិនទាន់អាចសុំការឆ្លើយតបពីអ្នកនាំពាក្យក្រសួងមហាផ្ទៃ លោក ខៀវ សុភ័គ ដែរដោយលោកមិនលើកទូរស័ព្ទ។
មន្រ្តីបក្សប្រឆាំងចំនួន៣នាក់នោះទៀត ដែលទៅដាក់លិខិតនោះមានអនុប្រធានគណបក្សប្រឆាំង អ្នកស្រី មូរ សុខហួរ តំណាងរាស្រ្ត លោក ឡុង រី និង លោក នុត រំដួល។
អ្នកស្រី មូរ សុខហួរ លើកឡើងថា ការស្នើសុំសុពលភាពលិខិតឆ្លងដែននៅពេលនេះគឺជាការទាមទារសិទ្ធិសេរីភាពជាពលរដ្ឋ ដែលធានាដោយច្បាប់កម្ពុជា។ អ្នកស្រីបន្តថាពលរដ្ឋមានសិទ្ធិស្មើភាពគ្នា ចំពោះមុខច្បាប់ ពោលគឺត្រូវតែបានទៅតតាំងក្ដី នៅក្នុងតុលាការ តាមការកោះ ហៅ៖«បើសិនជារដ្ឋាភិបាលលោក ហ៊ុន សែន ទុកថាយើងមានសិទ្ធិស្មើគ្នាជាពលរដ្ឋខ្មែរ អត់មានត្រូវការមានការរើសអើងទេ ហើយអត់មានត្រូវការខ្លាចពលរដ្ឋខ្លួនឯងទេ។ នេះបង្ហាញអោយឃើញថាខ្លាចពលរដ្ឋខ្លួនឯង ឬយ៉ាងម៉េច? ឬមួយមានការរើសអើងខាងផ្លូវនយោបាយ?»
តុលាការក្រុងភ្នំពេញនឹងបើកសវនាការរឿងក្ដីមេដឹកនាំគណបក្សសង្រ្គោះជាតិចំនួន៩នាក់នៅថ្ងៃទី១១ វិច្ឆិកា ក្នុងសំណុំរឿងឧបឃាត ហើយនៅថ្ងៃទី២៦ វិច្ឆិកា នឹងបើកសវនាការមួយសំណុំរឿងទៀតទាក់ទងនឹងបទចោទរួមគំនិតក្បត់ និងញុះញង់អោយ ប្រព្រឹត្ត បទឧក្រិដ្ឋជាអាទិ៍។ សំណុំរឿងទាំង២នេះពាក់ព័ន្ធនឹងថ្នាក់ដឹកនាំគណបក្សសង្រ្គោះជាតិ និងសកម្មជនចំនួន៥៩នាក់។ តុលាការបង្គាប់ឲ្យអ្នកទាំងអស់ ត្រូវបង្ហាញមុខជាកំហិត ប៉ុន្តែមិនបានបង្គាប់ឲ្យរដ្ឋាភិបាលបញ្ឈប់ការរាំងខ្ទប់ដំណើរវិលចូលស្រុករបស់ពួកគេឡើយ។
លោក អេង ឆៃអ៊ាង ថាទង្វើបែបនេះបង្ហាញថាតុលាការគ្រាន់តែសម្ដែងអោយល្អមើលប៉ុណ្ណោះ៖«បើចង់អោយពួកយើងខ្ញុំទៅចូលរួមសវនាការក្ដីហ្នឹងបាន សូមអោយតុលាការជួយធ្វើអន្តរាគមន៍ដើម្បីអោយពួកយើងខ្ញុំហ្នឹងអាចចូលទៅប្រទេសកម្ពុជាវិញបាន កុំរារាំង ត្រូវផ្ដល់សុពលភាពលិខិតឆ្លងដែនពួកយើងខ្ញុំ ក្រុមហ៊ុនយន្តហោះទាំងអស់អាចដឹកពួកយើងខ្ញុំទៅអោយបាន ហ្នឹងបានសវនាការហ្នឹងវាអាចមានរូបភាពជាច្បាប់ខ្លះ។ ប៉ុន្តែបើសិនជាបិទពួកខ្ញុំមិនអោយចូលហ្នឹងជាសវនាការនយោបាយសុទ្ធសាធ។ ដូច្នេះវាអត់មានស្អីដែលយើងត្រូវយកមកគិត មកពិចារណាទេវាជារឿងបាយឡុកបាយឡ។»
កាលពីថ្ងៃទី៦ ខែវិច្ឆិកា ឆ្នាំ២០១៩ ក្រសួងការបរទេសកម្ពុជាបានលុបចោលសុពលភាពលិខិតឆ្លងដែនមន្រ្តីគណបក្សសង្រ្គោះជាតិចំនួន១២នាក់ បច្ចុប្បន្នមាន១១នាក់កំពុងនិរទេសខ្លួននៅក្រៅប្រទេស និងម្នាក់កំពុងស្ថិតក្នុងប្រទេស។ នៅក្នុងខែវិច្ឆិកាដដែលនោះក្រសួងដដែលក៏បានលុបចោលសុពលភាពលិខិតឆ្លងដែនសកម្មជនចំនួន២៧នាក់ផ្សេងទៀត។
ក្រុមមន្រ្តីបក្សប្រឆាំងអះអាងថានឹងមិនបញ្ចប់ត្រឹមការដាក់លិខិតនៅស្ថានទូតខ្មែរនេះទេ ពួកគេនឹងបន្តទាមទារតាមផ្លូវច្បាប់តទៅទៀតរហូតដល់បានទទួលសុពលភាពលិខិតឆ្លងដែនពួកគេមកវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។