ម្ចាស់កាសែត ឌឹ ខេមបូឌា ដេលី (The Cambodia Daily) នៅតែប្រកាន់ជំហររឹងត្អឹងរបស់ខ្លួន តបទៅនឹងការចោទប្រកាន់របស់លោក ហ៊ុន សែន និងមន្ត្រីអគ្គនាយកដ្ឋានពន្ធដារ ជុំវិញរឿងជំពាក់ពន្ធរដ្ឋ និងការព្រមានបិទកាសែតនេះ។ ពួកគេនៅតែអះអាងថា នេះគឺជាលេសនយោបាយរបស់រដ្ឋាភិបាលដែលចង់បិទសារព័ត៌មានសេរីដ៏កម្រនៅកម្ពុជា តែប៉ុណ្ណោះ និងស្នើឲ្យប្រមុខរដ្ឋាភិបាលចាត់ការស៊ើបអង្កេតមន្ត្រីរបស់ខ្លួន ដែលកំពុងប្រព្រឹត្តល្មើសច្បាប់ និងនីតិវិធីពន្ធដារ។
ម្ដងណេះថ្នាក់ដឹកនាំរបស់កាសែត ឌឹ ខេមបូឌា ដេលី ដែលជាសារព័ត៌មានសេរីរបស់អាមេរិក ក្នុងចំណោមសារព័ត៌មានសេរី ដ៏តិចតូចនៅកម្ពុជា បានបន្តតតាំងជាមួយប្រមុខរដ្ឋាភិបាលកម្ពុជា និងមន្ត្រីអគ្គនាយកដ្ឋានពន្ធដារ ពាក់ព័ន្ធនឹងការចោទប្រកាន់ ថាខកខានមិនបានបង់ពន្ធជូនរដ្ឋ ១០ឆ្នាំមកហើយ។
ម្ចាស់កាសែត ឌឹ ខេមបូឌា ដេលី អ្នកស្រី ដេប្រ៉ា គ្រីស័រ-ស្ទាល (Deborah Krisher-Steele) បានប្រាប់អាស៊ីសេរី តាមសារអេឡិចត្រូនិក (E-mail) កាលពីថ្ងៃទី២២ ខែសីហា ថា អ្នកស្រីគោរពច្បាប់ពន្ធដារកម្ពុជា យ៉ាងខ្ជាប់ខ្ជួនបំផុត។ អ្នកស្រីបន្តថា បើអគ្គនាយកដ្ឋានពន្ធដារយល់ថា កាសែត ឌឹ ខេមបូឌា ដេលី ជំពាក់ពន្ធរដ្ឋមែននោះ មន្ត្រីអគ្គនាយកដ្ឋានពន្ធដារត្រូវតែប្រាប់ខាងអ្នកស្រី ថាតើកាសែតអ្នកស្រីជំពាក់ថ្លៃអ្វីខ្លះ? ឬក៏ត្រូវស្នើសុំឲ្យអ្នកស្រីបង្ហាញព័ត៌មានបំភ្លឺ។ តាមអ្វីដែលអគ្គនាយកដ្ឋានពន្ធដារធ្វើ គឺគេជប់ឲ្យចេញទឹកប្រាក់ ៦,១លានដុល្លារ ចោទថា កាសែត ឌឹ ខេមបូឌា ដេលី ជំពាក់រដ្ឋ រួចហើយទុកពេលឲ្យតែ ៣០ថ្ងៃប៉ុណ្ណោះ ឲ្យខាងអ្នកស្រីបង់។ អ្នកស្រី ដេប្រ៉ា បញ្ជាក់ថា ភ្លាមនោះខាងអ្នកស្រីបានឆ្លើយតបទៅវិញ ដោយបដិសេធចំនួនទឹកប្រាក់នេះ។
អ្នកស្រីបន្តថា លោក ប៊ើណាត គ្រីស័រ (Bernard Krisher) ក៏បានសរសេរបំភ្លឺថែមទៀតថា បើគណនាពន្ធរដ្ឋគប្បីគិតបញ្ចូលទឹកប្រាក់ដែលលោកបានបរិច្ចាគជួយដល់ការអភិវឌ្ឍកម្ពុជា ចំនួន ៣៩លានដុល្លារនោះផង។ អ្នកស្រីរម្លឹកថា បើតាមច្បាប់ ប្រាក់បរិច្ចាគដូច្នេះ គេមិនត្រូវយកពន្ធនោះទេ)។ អ្នកស្រីបញ្ជាក់បន្ថែមថា ខាងអគ្គនាយកដ្ឋានពន្ធដារបានរំលោភសិទ្ធិអ្នកស្រី ដែលជាអ្នកបង់ពន្ធ ព្រោះពេលខាងអ្នកស្រីបដិសេធដូច្នេះ ខាងអគ្គនាយកដ្ឋានពន្ធដារ ត្រូវធ្វើសវនកម្ម និងត្រួតពិនិត្យឡើងវិញ ដោយមិនត្រូវប្រញាប់ប្រញាល់បង្ខំឲ្យខាងគាត់បង់ពន្ធ ៦,១លានដុល្លារ ក្នុងរយៈពេល ៣០ថ្ងៃ ឲ្យខាងតែបានដូច្នេះនោះទេ។ មិនតែប៉ុណ្ណោះ អ្នកស្រីមិនយល់ ថាតើហេតុអ្វីបានជាទាំងខាងនាយកដ្ឋានពន្ធដារ និងនាយករដ្ឋមន្ត្រី ហ៊ុន សែន ខ្លួនឯង សុទ្ធតែប្រើធម៌គំរាម ថានឹងបិទកាសែតនេះចោល និងបង្កកគណនីធនាគាររបស់ខាងអ្នកស្រី បើមិនបានបង់ពន្ធតាមកាលកំណត់។
អ្នកស្រី ដេប្រ៉ា អំពាវនាវឲ្យអគ្គនាយកដ្ឋានពន្ធដារខ្លួនឯង ចេះគោរពច្បាប់ពន្ធដារផង ហើយស្នើឲ្យលោកនាយករដ្ឋមន្ត្រី ហ៊ុន សែន ត្រូវពិនិត្យតាមដានមន្ត្រីនៃអគ្គនាយកពន្ធដារ ដោយធ្វើយ៉ាងណាឲ្យពួកគេចេះគោរពច្បាប់ពន្ធដារ និងត្រូវចាប់ពួកគេឲ្យទទួលខុសត្រូវចំពោះការណ៍ដែលពួកគេកំពុងរំលោភច្បាប់ពន្ធដារ។
ការណ៍ដែលកំពុងរំលោភច្បាប់ នីតិវិធីពន្ធដារនេះ អ្នកស្រីចង់សំដៅទៅលើលោក គង់ វិបុល នៃអគ្គនាយកដ្ឋានពន្ធដារដែលអ្នកស្រីថា បានបំពានមាត្រា ៩៤ នៃច្បាប់ពន្ធដាររហូតដល់ទៅពីរលើក ព្រោះធ្វើឲ្យបែកធ្លាយការសម្ងាត់នៃព័ត៌មានពាក់ព័ន្ធនឹងអ្នកបង់ពន្ធ។ ការល្មើសច្បាប់បែបនេះ អាចទទួលទោសជាប់ពន្ធនាគារ និងពិន័យជាប្រាក់ថែមទៀតផង។ អ្នកស្រីលើកឡើងបន្ថែមថា ការលេចធ្លាយឯកសារសម្ងាត់ទៅសារព័ត៌មានបែបនេះធ្វើឲ្យពលរដ្ឋមានមន្ទិល។ អ្នកស្រី ដេប្រ៉ា ថា បើលោក ហ៊ុន សែន ចង់ឲ្យពលរដ្ឋមានជំនឿលើប្រព័ន្ធពន្ធដារនៅកម្ពុជា លោក ហ៊ុន សែន ត្រូវចាប់ផ្ដើមពីមន្ត្រីពន្ធដាររបស់គាត់ជាមុនសិន គឺគាត់ត្រូវធ្វើយ៉ាងណាឲ្យមន្ត្រីទាំងនោះគោរពច្បាប់ឲ្យបានត្រឹមត្រូវសិន។
អ្នកស្រីបញ្ជាក់ថា នេះជាឱកាសមួយសម្រាប់ឲ្យលោក ហ៊ុន សែន ក្នុងការបង្ហាញថា តើគាត់មានភាពជាអ្នកដឹកនាំដែលមានសមត្ថភាពដឹកនាំស្ថាប័នរដ្ឋ និងបង្ហាញឲ្យឃើញថា ពិតជាគ្មានលេសនយោបាយណាមួយនោះទេ នៅពីក្រោយការចង់បិទកាសែត ឌឹ ខេមបូឌា ដេលី របស់អ្នកស្រីដែរ ឬយ៉ាងណា។ អ្នកស្រីបញ្ជាក់ថា បើអគ្គនាយកដ្ឋានពន្ធដារអនុវត្តនីតិវិធីត្រួតពិនិត្យត្រឹមត្រូវ និងរកឃើញថា កាសែតអ្នកស្រីជំពាក់ពន្ធរដ្ឋមែន នោះអ្នកស្រីនឹងបង់ពន្ធជូនរដ្ឋ។ ប៉ុន្តែត្រូវធ្វើសវនកម្ម និងត្រួតពិនិត្យឡើងវិញឲ្យបានត្រឹមត្រូវជាមុនសិន។
ការឆ្លើយតបរបស់អ្នកស្រី ដេប្រ៉ា បែបនេះ គឺធ្វើឡើងបន្ទាប់លោក ហ៊ុន សែន កាលពីព្រឹកថ្ងៃទី២២ ខែសីហា ដែរ ព្រមានបិទកាសែត ឌឹ ខេមបូឌា ដេលី បើសិនជាស្ថាប័នព័ត៌មានមួយនេះប្រកាន់ជំហរមិនបង់ពន្ធតាមការទាមទាររបស់អគ្គនាយកដ្ឋានពន្ធដារទេ។ លោក ហ៊ុន សែន បានហៅស្ថាប័នមួយនេះថាជាមេចោរ ព្រោះគេចមិនបង់ពន្ធ៖ «១០ឆ្នាំគេគិតតែរឿងច្បាប់ពន្ធទេ តែនេះតាំងពីកើតចេញជារូបរាងមក មិនដែលបង់ពន្ធឲ្យរដ្ឋទេ។ សូមទោស! ឥឡូវកំពុងតែបង្វែរទៅជាផ្លូវនយោបាយហើយ ខ្លួនឯងជាមេចោរ ហើយមកបង្រៀនគេ។ បើចង់នៅតទៅទៀត ត្រូវបង់ពន្ធឲ្យរដ្ឋ បើមិនបង់ពន្ធឲ្យរដ្ឋទេ វេចបង្វេចចាកចេញទៅ»។
ទាក់ទងបញ្ហានេះ នាយកវិទ្យាស្ថានកម្ពុជា សម្រាប់ការសិក្សាផ្នែកសារព័ត៌មាន លោក មឿន ឈានណារិទ្ធិ ទម្លាក់កំហុសទៅលើទាំងខាងកាសែត ឌឹ ខេមបូឌា ដេលី និងអគ្គនាយកដ្ឋានពន្ធដារ។ លោកថា ក្នុងនាមជាស្ថាប័នសារព័ត៌មានដែលមានវិជ្ជាជីវៈ ឌឹ ខេមបូឌា ដេលី គួរតែសិក្សា និងអនុវត្តតាមកាតព្វកិច្ចបង់ពន្ធដូចដែលមានចែងក្នុងច្បាប់ ចំណែកឯខាងអគ្គនាយកដ្ឋានពន្ធដារវិញ គួរតែរំលឹក ឌឹ ខេមបូឌា ដេលី អំពីរឿងការបង់ពន្ធនេះតាំងតែពីដើមដំបូង មិនមែនទុកអូសបន្លាយដល់ពេលបច្ចុប្បន្ននេះទេ។
ចំណែក លោក ដាហ្គ្លាស់ ស្ទាល (Douglas Steele) ដែលជាអ្នកចាត់ការទូទៅរបស់កាសែត ឌឹ ខេមបូឌា ដេលី និងជាស្វាមីរបស់អ្នកស្រី ដេប្រ៉ា គ្រីស័រ-ស្ទាល ក៏ប្រាប់អាស៊ីសេរី តាមសារអេឡិចត្រូនិក ថាបើលោកនាយករដ្ឋមន្ត្រីយកលេសនយោបាយ ដើម្បីបិទកាសែត ឌឹ ខេមបូឌា ដេលី ដែលជាសារព័ត៌មានសេរីនៅមុនបោះឆ្នោតបែបនេះ គឺជាការគួរឲ្យខកចិត្តខ្លាំងមែនទែន ដែលអ្នកនយោបាយធ្វើដូច្នេះកើត។ លោកស្នើឲ្យលោក ហ៊ុន សែន កុំដើរជាន់ដានប្រវត្តិសាស្ត្រ ដូចអ្វីដែលកើតឡើងកាលពី ៥២ឆ្នាំកន្លងទៅ ដែលពេលនោះមេដឹកនាំកម្ពុជា ចង់យកលេសផ្ដាច់ទំនាក់ទំនងការទូតជាមួយសហរដ្ឋអាមេរិក ដោយសារអត្ថបទសារព័ត៌មានរបស់អ្នកកាសែតអាមេរិកាំង ម្នាក់។
លោកស្នើឲ្យរដ្ឋាភិបាលកម្ពុជា ថ្លឹងថ្លែងសមិទ្ធផល និងការបរិច្ចាគជួយសង្គមដែលកាសែត ឌឹ ខេមបូឌា ដេលី បានធ្វើកន្លងមក ដោយជួយកសាងសាលារៀន ៥៦១ខ្នង នៅកម្ពុជា និងសង់មន្ទីរពេទ្យនានា ព្រមទាំងជួយបណ្ដុះបណ្ដាលវិស័យសារព័ត៌មានសេរីផង។ ពេលបោះឆ្នោតជាតិកាន់តែខិតជិតមកដល់ លោកនាយករដ្ឋមន្ត្រី ហ៊ុន សែន កាន់តែបង្ហាញឲ្យឃើញនូវអរិយភាពខ្លាំងជាមួយអង្គការ និងស្ថាប័នបរទេស ជាពិសេស អង្គការអាមេរិក ដូចជាទូរទស្សន៍ CNN អង្គការមេត្រីអន្តរជាតិ (AIM) វិទ្យាស្ថានជាតិប្រជាធិបតេយ្យ (NDI) និងកាសែត ឌឹ ខេមបូឌា ដេលី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។